The Text      

Tr 1 1 The double sorwe of Troilus to tellen,
Tr 1 2 That was the kyng Priamus sone of Troye,
Tr 1 3 In lovynge, how his aventures fellen
Tr 1 4 Fro wo to wele, and after out of joie,
Tr 1 5 My purpos is, er that I parte fro ye.
Tr 1 6 Thesiphone, thow help me for t' endite
Tr 1 7 Thise woful vers, that wepen as I write.
Tr 1 8 To the clepe I, thow goddesse of torment,
Tr 1 9 Thow cruwel Furie, sorwynge evere in peyne,
Tr 1 10 Help me, that am the sorwful instrument,
Tr 1 11 That helpeth loveres, as I kan, to pleyne;
Tr 1 12 For wel sit it, the sothe for to seyne,
Tr 1 13 A woful wight to han a drery feere,
Tr 1 14 And to a sorwful tale, a sory chere.
Tr 1 15 For I, that God of Loves servantz serve,
Tr 1 16 Ne dar to Love, for myn unliklynesse,
Tr 1 17 Preyen for speed, al sholde I therfore sterve,
Tr 1 18 So fer am I from his help in derknesse.
Tr 1 19 But natheles, if this may don gladnesse
Tr 1 20 Unto any lovere, and his cause availle,
Tr 1 21 Have he my thonk, and myn be this travaille!
Tr 1 22 But ye loveres, that bathen in gladnesse,
Tr 1 23 If any drope of pyte in yow be,
Tr 1 24 Remembreth yow on passed hevynesse
Tr 1 25 That ye han felt, and on the adversite
Tr 1 26 Of othere folk, and thynketh how that ye
Tr 1 27 Han felt that Love dorste yow displese,
Tr 1 28 Or ye han wonne hym with to gret an ese.
Tr 1 29 And preieth for hem that ben in the cas
Tr 1 30 Of Troilus, as ye may after here,
Tr 1 31 That Love hem brynge in hevene to solas;
Tr 1 32 And ek for me preieth to God so dere
Tr 1 33 That I have myght to shewe, in som manere,
Tr 1 34 Swich peyne and wo as Loves folk endure,
Tr 1 35 In Troilus unsely aventure.
Tr 1 36 And biddeth ek for hem that ben despeired
Tr 1 37 In love, that nevere nyl recovered be,
Tr 1 38 And ek for hem that falsly ben apeired
Tr 1 39 Thorugh wikked tonges, be it he or she;
Tr 1 40 Thus biddeth God, for his benignite,
Tr 1 41 So graunte hem soone owt of this world to pace,
Tr 1 42 That ben despeired out of Loves grace.
Tr 1 43 And biddeth ek for hem that ben at ese,
Tr 1 44 That God hem graunte ay good perseveraunce,
Tr 1 45 And sende hem myght hire ladies so to plese
Tr 1 46 That it to Love be worship and plesaunce.
Tr 1 47 For so hope I my sowle best avaunce,
Tr 1 48 To prey for hem that Loves servauntz be,
Tr 1 49 And write hire wo, and lyve in charite,
Tr 1 50 And for to have of hem compassioun,
Tr 1 51 As though I were hire owne brother dere.
Tr 1 52 Now herkneth with a good entencioun,
Tr 1 53 For now wil I gon streght to my matere,
Tr 1 54 In which ye may the double sorwes here
Tr 1 55 Of Troilus in lovynge of Criseyde,
Tr 1 56 And how that she forsook hym er she deyde.
Tr 1 57 Yt is wel wist how that the Grekes stronge
Tr 1 58 In armes with a thousand shippes wente
Tr 1 59 To Troiewardes, and the cite longe
Tr 1 60 Assegeden, neigh ten yer er they stente,
Tr 1 61 And in diverse wise and oon entente,
Tr 1 62 The ravysshyng to wreken of Eleyne,
Tr 1 63 By Paris don, they wroughten al hir peyne.
Tr 1 64 Now fel it so that in the town ther was
Tr 1 65 Dwellynge a lord of gret auctorite,
Tr 1 66 A gret devyn, that clepid was Calkas,
Tr 1 67 That in science so expert was that he
Tr 1 68 Knew wel that Troie sholde destroied be,
Tr 1 69 By answere of his god, that highte thus:
Tr 1 70 Daun Phebus or Appollo Delphicus.
Tr 1 71 So whan this Calkas knew by calkulynge,
Tr 1 72 And ek by answer of this Appollo,
Tr 1 73 That Grekes sholden swich a peple brynge,
Tr 1 74 Thorugh which that Troie moste ben fordo,
Tr 1 75 He caste anon out of the town to go;
Tr 1 76 For wel wiste he by sort that Troye sholde
Tr 1 77 Destroyed ben, ye, wolde whoso nolde.
Tr 1 78 For which for to departen softely
Tr 1 79 Took purpos ful this forknowynge wise,
Tr 1 80 And to the Grekes oost ful pryvely
Tr 1 81 He stal anon; and they, in curteys wise,
Tr 1 82 Hym diden bothe worship and servyce,
Tr 1 83 In trust that he hath konnynge hem to rede
Tr 1 84 In every peril which that is to drede.
Tr 1 85 Gret rumour gan, whan it was first aspied
Tr 1 86 Thorugh al the town, and generaly was spoken,
Tr 1 87 That Calkas traitour fled was and allied
Tr 1 88 With hem of Grece, and casten to be wroken
Tr 1 89 On hym that falsly hadde his feith so broken,
Tr 1 90 And seyden he and al his kyn at-ones
Tr 1 91 Ben worthi for to brennen, fel and bones.
Tr 1 92 Now hadde Calkas left in this meschaunce,
Tr 1 93 Al unwist of this false and wikked dede,
Tr 1 94 His doughter, which that was in gret penaunce,
Tr 1 95 For of hire lif she was ful sore in drede,
Tr 1 96 As she that nyste what was best to rede;
Tr 1 97 For bothe a widewe was she and allone
Tr 1 98 Of any frend to whom she dorste hir mone.
Tr 1 99 Criseyde was this lady name al right.
Tr 1 100 As to my doom, in al Troies cite
Tr 1 101 Nas non so fair, forpassynge every wight,
Tr 1 102 So aungelik was hir natif beaute,
Tr 1 103 That lik a thing inmortal semed she,
Tr 1 104 As doth an hevenyssh perfit creature,
Tr 1 105 That down were sent in scornynge of nature.
Tr 1 106 This lady, which that alday herd at ere
Tr 1 107 Hire fadres shame, his falsnesse and tresoun,
Tr 1 108 Wel neigh out of hir wit for sorwe and fere,
Tr 1 109 In widewes habit large of samyt broun,
Tr 1 110 On knees she fil biforn Ector adown
Tr 1 111 With pitous vois, and tendrely wepynge,
Tr 1 112 His mercy bad, hirselven excusynge.
Tr 1 113 Now was this Ector pitous of nature,
Tr 1 114 And saugh that she was sorwfully bigon,
Tr 1 115 And that she was so fair a creature;
Tr 1 116 Of his goodnesse he gladede hire anon,
Tr 1 117 And seyde, " Lat youre fadres treson gon
Tr 1 118 Forth with meschaunce, and ye youreself in joie
Tr 1 119 Dwelleth with us, whil yow good list, in Troie.
Tr 1 120 " And al th' onour that men may don yow have,
Tr 1 121 As ferforth as youre fader dwelled here,
Tr 1 122 Ye shul have, and youre body shal men save,
Tr 1 123 As fer as I may ought enquere or here. "
Tr 1 124 And she hym thonked with ful humble chere,
Tr 1 125 And ofter wolde, and it hadde ben his wille,
Tr 1 126 And took hire leve, and hom, and held hir stille.
Tr 1 127 And in hire hous she abood with swich meyne
Tr 1 128 As til hire honour nede was to holde;
Tr 1 129 And whil she was dwellynge in that cite,
Tr 1 130 Kepte hir estat, and both of yonge and olde
Tr 1 131 Ful wel biloved, and wel men of hir tolde.
Tr 1 132 But wheither that she children hadde or noon,
Tr 1 133 I rede it naught, therfore I late it goon.
Tr 1 134 The thynges fellen, as they don of werre,
Tr 1 135 Bitwixen hem of Troie and Grekes ofte;
Tr 1 136 For som day boughten they of Troie it derre,
Tr 1 137 And eft the Grekes founden nothing softe
Tr 1 138 The folk of Troie; and thus Fortune on lofte
Tr 1 139 And under eft gan hem to whielen bothe
Tr 1 140 Aftir hir course, ay whil that thei were wrothe.
Tr 1 141 But how this town com to destruccion
Tr 1 142 Ne falleth naught to purpos me to telle,
Tr 1 143 For it were a long digression
Tr 1 144 Fro my matere, and yow to long to dwelle.
Tr 1 145 But the Troian gestes, as they felle,
Tr 1 146 In Omer, or in Dares, or in Dite,
Tr 1 147 Whoso that kan may rede hem as they write.
Tr 1 148 But though that Grekes hem of Troie shetten,
Tr 1 149 And hir cite biseged al aboute,
Tr 1 150 Hire olde usage nolde they nat letten,
Tr 1 151 As for to honoure hir goddes ful devoute;
Tr 1 152 But aldirmost in honour, out of doute,
Tr 1 153 Thei hadde a relik, heet Palladion,
Tr 1 154 That was hire trist aboven everichon.
Tr 1 155 And so bifel, whan comen was the tyme
Tr 1 156 Of Aperil, whan clothed is the mede
Tr 1 157 With newe grene, of lusty Veer the pryme,
Tr 1 158 And swote smellen floures white and rede,
Tr 1 159 In sondry wises shewed, as I rede,
Tr 1 160 The folk of Troie hire observaunces olde,
Tr 1 161 Palladiones feste for to holde.
Tr 1 162 And to the temple, in al hir beste wise,
Tr 1 163 In general ther wente many a wight,
Tr 1 164 To herknen of Palladions servyce;
Tr 1 165 And namely, so many a lusty knyght,
Tr 1 166 So many a lady fressh and mayden bright,
Tr 1 167 Ful wel arayed, both meeste, mene, and leste,
Tr 1 168 Ye, bothe for the seson and the feste.
Tr 1 169 Among thise othere folk was Criseyda,
Tr 1 170 In widewes habit blak; but natheles,
Tr 1 171 Right as oure firste lettre is now an A,
Tr 1 172 In beaute first so stood she, makeles.
Tr 1 173 Hire goodly lokyng gladed al the prees.
Tr 1 174 Nas nevere yet seyn thyng to ben preysed derre,
Tr 1 175 Nor under cloude blak so bright a sterre
Tr 1 176 As was Criseyde, as folk seyde everichone
Tr 1 177 That hir behelden in hir blake wede.
Tr 1 178 And yet she stood ful lowe and stille allone,
Tr 1 179 Byhynden other folk, in litel brede,
Tr 1 180 And neigh the dore, ay undre shames drede,
Tr 1 181 Simple of atir and debonaire of chere,
Tr 1 182 With ful assured lokyng and manere.
Tr 1 183 This Troilus, as he was wont to gide
Tr 1 184 His yonge knyghtes, lad hem up and down
Tr 1 185 In thilke large temple on every side,
Tr 1 186 Byholding ay the ladies of the town,
Tr 1 187 Now here, now there; for no devocioun
Tr 1 188 Hadde he to non, to reven hym his reste,
Tr 1 189 But gan to preise and lakken whom hym leste.
Tr 1 190 And in his walk ful faste he gan to wayten
Tr 1 191 If knyght or squyer of his compaignie
Tr 1 192 Gan for to syke, or lete his eighen baiten
Tr 1 193 On any womman that he koude espye.
Tr 1 194 He wolde smyle and holden it folye,
Tr 1 195 And seye hym thus, " God woot, she slepeth softe
Tr 1 196 For love of the, whan thow turnest ful ofte!
Tr 1 197 " I have herd told, pardieux, of youre lyvynge,
Tr 1 198 Ye loveres, and youre lewed observaunces,
Tr 1 199 And which a labour folk han in wynnynge
Tr 1 200 Of love, and in the kepyng which doutaunces;
Tr 1 201 And whan youre prey is lost, woo and penaunces.
Tr 1 202 O veray fooles, nyce and blynde be ye!
Tr 1 203 Ther nys nat oon kan war by other be. "
Tr 1 204 And with that word he gan caste up the browe,
Tr 1 205 Ascaunces, " Loo! is this naught wisely spoken? "
Tr 1 206 At which the God of Love gan loken rowe
Tr 1 207 Right for despit, and shop for to ben wroken.
Tr 1 208 He kidde anon his bowe nas naught broken;
Tr 1 209 For sodeynly he hitte hym atte fulle --
Tr 1 210 And yet as proud a pekok kan he pulle.
Tr 1 211 O blynde world, O blynde entencioun!
Tr 1 212 How often falleth al the effect contraire
Tr 1 213 Of surquidrie and foul presumpcioun;
Tr 1 214 For kaught is proud, and kaught is debonaire.
Tr 1 215 This Troilus is clomben on the staire,
Tr 1 216 And litel weneth that he moot descenden;
Tr 1 217 But alday faileth thing that fooles wenden.
Tr 1 218 As proude Bayard gynneth for to skippe
Tr 1 219 Out of the weye, so pryketh hym his corn,
Tr 1 220 Til he a lasshe have of the longe whippe --
Tr 1 221 Than thynketh he, " Though I praunce al byforn
Tr 1 222 First in the trays, ful fat and newe shorn,
Tr 1 223 Yet am I but an hors, and horses lawe
Tr 1 224 I moot endure, and with my feres drawe " --
Tr 1 225 So ferde it by this fierse and proude knyght:
Tr 1 226 Though he a worthy kynges sone were,
Tr 1 227 And wende nothing hadde had swich myght
Tr 1 228 Ayeyns his wille that shuld his herte stere,
Tr 1 229 Yet with a look his herte wex a-fere,
Tr 1 230 That he that now was moost in pride above,
Tr 1 231 Wax sodeynly moost subgit unto love.
Tr 1 232 Forthy ensample taketh of this man,
Tr 1 233 Ye wise, proude, and worthi folkes alle,
Tr 1 234 To scornen Love, which that so soone kan
Tr 1 235 The fredom of youre hertes to hym thralle;
Tr 1 236 For evere it was, and evere it shal byfalle,
Tr 1 237 That Love is he that alle thing may bynde,
Tr 1 238 For may no man fordon the lawe of kynde.
Tr 1 239 That this be soth, hath preved and doth yit.
Tr 1 240 For this trowe I ye knowen alle or some,
Tr 1 241 Men reden nat that folk han gretter wit
Tr 1 242 Than they that han be most with love ynome;
Tr 1 243 And strengest folk ben therwith overcome,
Tr 1 244 The worthiest and grettest of degree:
Tr 1 245 This was, and is, and yet men shall it see.
Tr 1 246 And trewelich it sit wel to be so,
Tr 1 247 For alderwisest han therwith ben plesed;
Tr 1 248 And they that han ben aldermost in wo,
Tr 1 249 With love han ben comforted moost and esed;
Tr 1 250 And ofte it hath the cruel herte apesed,
Tr 1 251 And worthi folk maad worthier of name,
Tr 1 252 And causeth moost to dreden vice and shame.
Tr 1 253 Now sith it may nat goodly ben withstonde,
Tr 1 254 And is a thing so vertuous in kynde,
Tr 1 255 Refuseth nat to Love for to ben bonde,
Tr 1 256 Syn, as hymselven liste, he may yow bynde;
Tr 1 257 The yerde is bet that bowen wole and wynde
Tr 1 258 Than that that brest, and therfore I yow rede
Tr 1 259 To folowen hym that so wel kan yow lede.
Tr 1 260 But for to tellen forth in special
Tr 1 261 Of this kynges sone of which I tolde,
Tr 1 262 And leten other thing collateral,
Tr 1 263 Of hym thenke I my tale forth to holde,
Tr 1 264 Both of his joie and of his cares colde;
Tr 1 265 And al his werk, as touching this matere,
Tr 1 266 For I it gan, I wol therto refere.
Tr 1 267 Withinne the temple he wente hym forth pleyinge,
Tr 1 268 This Troilus, of every wight aboute,
Tr 1 269 On this lady, and now on that, lokynge,
Tr 1 270 Wher so she were of town or of withoute;
Tr 1 271 And upon cas bifel that thorugh a route
Tr 1 272 His eye percede, and so depe it wente,
Tr 1 273 Til on Criseyde it smot, and ther it stente.
Tr 1 274 And sodeynly he wax therwith astoned,
Tr 1 275 And gan hir bet biholde in thrifty wise.
Tr 1 276 " O mercy, God, " thoughte he, " wher hastow woned,
Tr 1 277 That art so feyr and goodly to devise? "
Tr 1 278 Therwith his herte gan to sprede and rise,
Tr 1 279 And softe sighed, lest men myghte hym here,
Tr 1 280 And caught ayeyn his firste pleyinge chere.
Tr 1 281 She nas nat with the leste of hire stature,
Tr 1 282 But alle hire lymes so wel answerynge
Tr 1 283 Weren to wommanhod, that creature
Tr 1 284 Was nevere lasse mannyssh in semynge;
Tr 1 285 And ek the pure wise of hire mevynge
Tr 1 286 Shewed wel that men myght in hire gesse
Tr 1 287 Honour, estat, and wommanly noblesse.
Tr 1 288 To Troilus right wonder wel with alle
Tr 1 289 Gan for to like hire mevynge and hire chere,
Tr 1 290 Which somdel deignous was, for she let falle
Tr 1 291 Hire look a lite aside in swich manere,
Tr 1 292 Ascaunces, " What, may I nat stonden here? "
Tr 1 293 And after that hir lokynge gan she lighte,
Tr 1 294 That nevere thoughte hym seen so good a syghte.
Tr 1 295 And of hire look in him ther gan to quyken
Tr 1 296 So gret desir and such affeccioun,
Tr 1 297 That in his herte botme gan to stiken
Tr 1 298 Of hir his fixe and depe impressioun.
Tr 1 299 And though he erst hadde poured up and down,
Tr 1 300 He was tho glad his hornes in to shrinke:
Tr 1 301 Unnethes wiste he how to loke or wynke.
Tr 1 302 Lo, he that leet hymselven so konnynge,
Tr 1 303 And scorned hem that Loves peynes dryen,
Tr 1 304 Was ful unwar that Love hadde his dwellynge
Tr 1 305 Withinne the subtile stremes of hire yen;
Tr 1 306 That sodeynly hym thoughte he felte dyen,
Tr 1 307 Right with hire look, the spirit in his herte:
Tr 1 308 Blissed be Love, that kan thus folk converte!
Tr 1 309 She, this in blak, likynge to Troilus
Tr 1 310 Over alle thing, he stood for to biholde;
Tr 1 311 Ne his desir, ne wherfore he stood thus,
Tr 1 312 He neither chere made, ne word tolde;
Tr 1 313 But from afer, his manere for to holde,
Tr 1 314 On other thing his look som tyme he caste,
Tr 1 315 And eft on hire, whil that servyse laste.
Tr 1 316 And after this, nat fullich al awhaped,
Tr 1 317 Out of the temple al esilich he wente,
Tr 1 318 Repentynge hym that he hadde evere ijaped
Tr 1 319 Of Loves folk, lest fully the descente
Tr 1 320 Of scorn fille on hymself; but what he mente,
Tr 1 321 Lest it were wist on any manere syde,
Tr 1 322 His woo he gan dissimilen and hide.
Tr 1 323 Whan he was fro the temple thus departed,
Tr 1 324 He streght anon unto his paleys torneth.
Tr 1 325 Right with hire look thorugh-shoten and thorugh-darted,
Tr 1 326 Al feyneth he in lust that he sojorneth,
Tr 1 327 And al his chere and speche also he borneth,
Tr 1 328 And ay of Loves servantz every while,
Tr 1 329 Hymself to wrye, at hem he gan to smyle,
Tr 1 330 And seyde, " Lord, so ye lyve al in lest,
Tr 1 331 Ye loveres! For the konnyngeste of yow,
Tr 1 332 That serveth most ententiflich and best,
Tr 1 333 Hym tit as often harm therof as prow.
Tr 1 334 Youre hire is quyt ayeyn, ye, God woot how!
Tr 1 335 Nought wel for wel, but scorn for good servyse.
Tr 1 336 In feith, youre ordre is ruled in good wise!
Tr 1 337 " In nouncerteyn ben alle youre observaunces,
Tr 1 338 But it a sely fewe pointes be;
Tr 1 339 Ne no thing asketh so gret attendaunces
Tr 1 340 As doth youre lay, and that knowe alle ye;
Tr 1 341 But that is nat the worste, as mote I the!
Tr 1 342 But, tolde I yow the worste point, I leve,
Tr 1 343 Al seyde I soth, ye wolden at me greve.
Tr 1 344 " But take this: that ye loveres ofte eschuwe,
Tr 1 345 Or elles doon, of good entencioun,
Tr 1 346 Ful ofte thi lady wol it mysconstruwe,
Tr 1 347 And deme it harm in hire oppynyoun;
Tr 1 348 And yet if she, for other enchesoun,
Tr 1 349 Be wroth, than shaltow have a groyn anon.
Tr 1 350 Lord, wel is hym that may ben of yow oon! "
Tr 1 351 But for al this, whan that he say his tyme,
Tr 1 352 He held his pees -- non other boote hym gayned --
Tr 1 353 For love bigan his fetheres so to lyme
Tr 1 354 That wel unnethe until his folk he fayned
Tr 1 355 That other besy nedes hym destrayned;
Tr 1 356 For wo was hym, that what to doon he nyste,
Tr 1 357 But bad his folk to gon wher that hem liste.
Tr 1 358 And whan that he in chambre was allone,
Tr 1 359 He doun upon his beddes feet hym sette,
Tr 1 360 And first he gan to sike, and eft to grone,
Tr 1 361 And thought ay on hire so, withouten lette,
Tr 1 362 That, as he sat and wook, his spirit mette
Tr 1 363 That he hire saugh a-temple, and al the wise
Tr 1 364 Right of hire look, and gan it newe avise.
Tr 1 365 Thus gan he make a mirour of his mynde
Tr 1 366 In which he saugh al holly hire figure,
Tr 1 367 And that he wel koude in his herte fynde.
Tr 1 368 It was to hym a right good aventure
Tr 1 369 To love swich oon, and if he dede his cure
Tr 1 370 To serven hir, yet myghte he falle in grace,
Tr 1 371 Or ellis for oon of hire servantz pace.
Tr 1 372 Imagenynge that travaille nor grame
Tr 1 373 Ne myghte for so goodly oon be lorn
Tr 1 374 As she, ne hym for his desir no shame,
Tr 1 375 Al were it wist, but in pris and up-born
Tr 1 376 Of alle lovers wel more than biforn,
Tr 1 377 Thus argumented he in his gynnynge,
Tr 1 378 Ful unavysed of his woo comynge.
Tr 1 379 Thus took he purpos loves craft to suwe,
Tr 1 380 And thoughte he wolde werken pryvely,
Tr 1 381 First to hiden his desir in muwe
Tr 1 382 From every wight yborn, al outrely,
Tr 1 383 But he myghte ought recovered be therby,
Tr 1 384 Remembryng hym that love to wide yblowe
Tr 1 385 Yelt bittre fruyt, though swete seed be sowe.
Tr 1 386 And over al this, yet muchel more he thoughte
Tr 1 387 What for to speke, and what to holden inne;
Tr 1 388 And what to arten hire to love he soughte,
Tr 1 389 And on a song anon-right to bygynne,
Tr 1 390 And gan loude on his sorwe for to wynne;
Tr 1 391 For with good hope he gan fully assente
Tr 1 392 Criseyde for to love, and nought repente.
Tr 1 393 And of his song naught only the sentence,
Tr 1 394 As writ myn auctour called Lollius,
Tr 1 395 But pleinly, save oure tonges difference,
Tr 1 396 I dar wel seyn, in al, that Troilus
Tr 1 397 Seyde in his song, loo, every word right thus
Tr 1 398 As I shal seyn; and whoso list it here,
Tr 1 399 Loo, next this vers he may it fynden here.
Tr 1 400 " If no love is, O God, what fele I so?
Tr 1 401 And if love is, what thing and which is he?
Tr 1 402 If love be good, from whennes cometh my woo?
Tr 1 403 If it be wikke, a wonder thynketh me,
Tr 1 404 When every torment and adversite
Tr 1 405 That cometh of hym may to me savory thinke,
Tr 1 406 For ay thurst I, the more that ich it drynke.
Tr 1 407 " And if that at myn owen lust I brenne,
Tr 1 408 From whennes cometh my waillynge and my pleynte?
Tr 1 409 If harm agree me, wherto pleyne I thenne?
Tr 1 410 I noot, ne whi unwery that I feynte.
Tr 1 411 O quike deth, O swete harm so queynte,
Tr 1 412 How may of the in me swich quantite,
Tr 1 413 But if that I consente that it be?
Tr 1 414 " And if that I consente, I wrongfully
Tr 1 415 Compleyne, iwis. Thus possed to and fro,
Tr 1 416 Al sterelees withinne a boot am I
Tr 1 417 Amydde the see, bitwixen wyndes two,
Tr 1 418 That in contrarie stonden evere mo.
Tr 1 419 Allas, what is this wondre maladie?
Tr 1 420 For hote of cold, for cold of hote, I dye. "
Tr 1 421 And to the God of Love thus seyde he
Tr 1 422 With pitous vois, " O lord, now youres is
Tr 1 423 My spirit, which that oughte youres be.
Tr 1 424 Yow thanke I, lord, that han me brought to this.
Tr 1 425 But wheither goddesse or womman, iwis,
Tr 1 426 She be, I not, which that ye do me serve;
Tr 1 427 But as hire man I wol ay lyve and sterve.
Tr 1 428 " Ye stonden in hir eighen myghtily,
Tr 1 429 As in a place unto youre vertu digne;
Tr 1 430 Wherfore, lord, if my service or I
Tr 1 431 May liken yow, so beth to me benigne;
Tr 1 432 For myn estat roial I here resigne
Tr 1 433 Into hire hond, and with ful humble chere
Tr 1 434 Bicome hir man, as to my lady dere. "
Tr 1 435 In hym ne deyned spare blood roial
Tr 1 436 The fyr of love -- wherfro God me blesse --
Tr 1 437 Ne him forbar in no degree, for al
Tr 1 438 His vertu or his excellent prowesse,
Tr 1 439 But held hym as his thral lowe in destresse,
Tr 1 440 And brende hym so in soundry wise ay newe,
Tr 1 441 That sexti tyme a day he loste his hewe.
Tr 1 442 So muche, day by day, his owene thought,
Tr 1 443 For lust to hire, gan quiken and encresse,
Tr 1 444 That every other charge he sette at nought.
Tr 1 445 Forthi ful ofte, his hote fir to cesse,
Tr 1 446 To sen hire goodly lok he gan to presse;
Tr 1 447 For therby to ben esed wel he wende,
Tr 1 448 And ay the ner he was, the more he brende.
Tr 1 449 For ay the ner the fir, the hotter is --
Tr 1 450 This, trowe I, knoweth al this compaignye;
Tr 1 451 But were he fer or ner, I dar sey this:
Tr 1 452 By nyght or day, for wisdom or folye,
Tr 1 453 His herte, which that is his brestez ye,
Tr 1 454 Was ay on hire, that fairer was to sene
Tr 1 455 Than evere were Eleyne or Polixene.
Tr 1 456 Ek of the day ther passed nought an houre
Tr 1 457 That to hymself a thousand tyme he seyde,
Tr 1 458 " Good goodly, to whom serve I and laboure
Tr 1 459 As I best kan, now wolde God, Criseyde,
Tr 1 460 Ye wolden on me rewe, er that I deyde!
Tr 1 461 My dere herte, allas, myn hele and hewe
Tr 1 462 And lif is lost, but ye wol on me rewe! "
Tr 1 463 Alle other dredes weren from him fledde,
Tr 1 464 Both of th' assege and his savacioun;
Tr 1 465 N' yn him desir noon other fownes bredde,
Tr 1 466 But argumentes to his conclusioun:
Tr 1 467 That she of him wolde han compassioun,
Tr 1 468 And he to ben hire man while he may dure.
Tr 1 469 Lo, here his lif, and from the deth his cure!
Tr 1 470 The sharpe shoures felle of armes preve
Tr 1 471 That Ector or his othere brethren diden
Tr 1 472 Ne made hym only therfore ones meve;
Tr 1 473 And yet was he, where so men wente or riden,
Tr 1 474 Founde oon the beste, and longest tyme abiden
Tr 1 475 Ther peril was, and dide ek swich travaille
Tr 1 476 In armes, that to thenke it was merveille.
Tr 1 477 But for non hate he to the Grekes hadde,
Tr 1 478 Ne also for the rescous of the town,
Tr 1 479 Ne made hym thus in armes for to madde,
Tr 1 480 But only, lo, for this conclusioun:
Tr 1 481 To liken hire the bet for his renoun.
Tr 1 482 Fro day to day in armes so he spedde
Tr 1 483 That the Grekes as the deth him dredde.
Tr 1 484 And fro this forth tho refte hym love his slep,
Tr 1 485 And made his mete his foo, and ek his sorwe
Tr 1 486 Gan multiplie, that, whoso tok kep,
Tr 1 487 It shewed in his hewe both eve and morwe.
Tr 1 488 Therfor a title he gan him for to borwe
Tr 1 489 Of other siknesse, lest men of hym wende
Tr 1 490 That the hote fir of love hym brende,
Tr 1 491 And seyde he hadde a fevere and ferde amys.
Tr 1 492 But how it was, certeyn, kan I nat seye,
Tr 1 493 If that his lady understood nat this,
Tr 1 494 Or feynede hire she nyste, oon of the tweye;
Tr 1 495 But wel I rede that, by no manere weye,
Tr 1 496 Ne semed it that she of hym roughte,
Tr 1 497 Or of his peyne, or whatsoevere he thoughte.
Tr 1 498 But thanne felte this Troilus swich wo
Tr 1 499 That he was wel neigh wood; for ay his drede
Tr 1 500 Was this, that she som wight hadde loved so,
Tr 1 501 That nevere of hym she wolde han taken hede,
Tr 1 502 For which hym thoughte he felte his herte blede;
Tr 1 503 Ne of his wo ne dorste he nat bygynne
Tr 1 504 To tellen hir, for al this world to wynne.
Tr 1 505 But whan he hadde a space from his care,
Tr 1 506 Thus to hymself ful ofte he gan to pleyne;
Tr 1 507 He seyde, " O fool, now artow in the snare,
Tr 1 508 That whilom japedest at loves peyne.
Tr 1 509 Now artow hent, now gnaw thin owen cheyne!
Tr 1 510 Thow were ay wont ech lovere reprehende
Tr 1 511 Of thing fro which thou kanst the nat defende.
Tr 1 512 " What wol now every lovere seyn of the,
Tr 1 513 If this be wist, but evere in thin absence
Tr 1 514 Laughen in scorn, and seyn, `Loo, ther goth he
Tr 1 515 That is the man of so gret sapience,
Tr 1 516 That held us loveres leest in reverence.
Tr 1 517 Now, thanked God, he may gon in the daunce
Tr 1 518 Of hem that Love list febly for to avaunce.'
Tr 1 519 " But, O thow woful Troilus, God wolde,
Tr 1 520 Sith thow most loven thorugh thi destine,
Tr 1 521 That thow beset were on swich oon that sholde
Tr 1 522 Know al thi wo, al lakked hir pitee!
Tr 1 523 But also cold in love towardes the
Tr 1 524 Thi lady is as frost in wynter moone,
Tr 1 525 And thow fordon as snow in fire is soone.
Tr 1 526 " God wold I were aryved in the port
Tr 1 527 Of deth, to which my sorwe wol me lede!
Tr 1 528 A, Lord, to me it were a gret comfort;
Tr 1 529 Than were I quyt of languisshyng in drede;
Tr 1 530 For, be myn hidde sorwe iblowe on brede,
Tr 1 531 I shal byjaped ben a thousand tyme
Tr 1 532 More than that fol of whos folie men ryme.
Tr 1 533 " But now help, God, and ye, swete, for whom
Tr 1 534 I pleyne, ikaught, ye, nevere wight so faste!
Tr 1 535 O mercy, dere herte, and help me from
Tr 1 536 The deth, for I, whil that my lyf may laste,
Tr 1 537 More than myself wol love yow to my laste;
Tr 1 538 And with som frendly lok gladeth me, swete,
Tr 1 539 Though nevere more thing ye me byheete. "
Tr 1 540 Thise wordes, and ful many an other to,
Tr 1 541 He spak, and called evere in his compleynte
Tr 1 542 Hire name, for to tellen hire his wo,
Tr 1 543 Til neigh that he in salte teres dreynte.
Tr 1 544 Al was for nought: she herde nat his pleynte;
Tr 1 545 And whan that he bythought on that folie,
Tr 1 546 A thousand fold his wo gan multiplie.
Tr 1 547 Bywayling in his chambre thus allone,
Tr 1 548 A frend of his that called was Pandare
Tr 1 549 Com oones in unwar, and herde hym groone,
Tr 1 550 And say his frend in swich destresse and care:
Tr 1 551 " Allas, " quod he, " who causeth al this fare?
Tr 1 552 O mercy, God! What unhap may this meene?
Tr 1 553 Han now thus soone Grekes maad yow leene?
Tr 1 554 " Or hastow som remors of conscience,
Tr 1 555 And art now falle in som devocioun,
Tr 1 556 And wailest for thi synne and thin offence,
Tr 1 557 And hast for ferde caught attricioun?
Tr 1 558 God save hem that biseged han oure town,
Tr 1 559 That so kan leye oure jolite on presse,
Tr 1 560 And bringe oure lusty folk to holynesse! "
Tr 1 561 Thise wordes seyde he for the nones alle,
Tr 1 562 That with swich thing he myght hym angry maken,
Tr 1 563 And with angre don his wo to falle,
Tr 1 564 As for the tyme, and his corage awaken.
Tr 1 565 But wel he wist, as fer as tonges spaken,
Tr 1 566 Ther nas a man of gretter hardinesse
Tr 1 567 Thanne he, ne more desired worthinesse.
Tr 1 568 " What cas, " quod Troilus, " or what aventure
Tr 1 569 Hath gided the to sen me langwisshinge,
Tr 1 570 That am refus of every creature?
Tr 1 571 But for the love of God, at my preyinge,
Tr 1 572 Go hennes awey; for certes my deyinge
Tr 1 573 Wol the disese, and I mot nedes deye;
Tr 1 574 Therfore go wey, ther is na more to seye.
Tr 1 575 " But if thow wene I be thus sik for drede,
Tr 1 576 It is naught so, and therfore scorne nought.
Tr 1 577 Ther is another thing I take of hede
Tr 1 578 Wel more than aught the Grekes han yet wrought,
Tr 1 579 Which cause is of my deth, for sorowe and thought;
Tr 1 580 But though that I now telle it the ne leste,
Tr 1 581 Be thow naught wroth; I hide it for the beste. "
Tr 1 582 This Pandare, that neigh malt for wo and routhe,
Tr 1 583 Ful ofte seyde, " Allas, what may this be?
Tr 1 584 Now frend, " quod he, " if evere love or trouthe
Tr 1 585 Hath ben, or is, bitwixen the and me,
Tr 1 586 Ne do thow nevere swich a crueltee
Tr 1 587 To hiden fro thi frend so gret a care!
Tr 1 588 Wostow naught wel that it am I, Pandare?
Tr 1 589 " I wol parten with the al thi peyne,
Tr 1 590 If it be so I do the no comfort,
Tr 1 591 As it is frendes right, soth for to seyne,
Tr 1 592 To entreparten wo as glad desport.
Tr 1 593 I have, and shal, for trewe or fals report,
Tr 1 594 In wrong and right iloved the al my lyve:
Tr 1 595 Hid nat thi wo fro me, but telle it blyve. "
Tr 1 596 Than gan this sorwful Troylus to syke,
Tr 1 597 And seide hym thus: " God leve it be my beste
Tr 1 598 To telle it the; for sith it may the like,
Tr 1 599 Yet wol I telle it, though myn herte breste.
Tr 1 600 And wel woot I thow mayst do me no reste;
Tr 1 601 But lest thow deme I truste nat to the,
Tr 1 602 Now herke, frend, for thus it stant with me.
Tr 1 603 " Love, ayeins the which whoso defendeth
Tr 1 604 Hymselven most, hym alderlest avaylleth,
Tr 1 605 With disespeyr so sorwfulli me offendeth,
Tr 1 606 That streight unto the deth myn herte sailleth.
Tr 1 607 Therto desir so brennyngly me assailleth,
Tr 1 608 That to ben slayn it were a gretter joie
Tr 1 609 To me than kyng of Grece ben and Troye.
Tr 1 610 " Suffiseth this, my fulle frend Pandare,
Tr 1 611 That I have seyd, for now wostow my wo;
Tr 1 612 And for the love of God, my colde care,
Tr 1 613 So hide it wel -- I tolde it nevere to mo,
Tr 1 614 For harmes myghten folwen mo than two
Tr 1 615 If it were wist -- but be thow in gladnesse,
Tr 1 616 And lat me sterve, unknowe, of my destresse. "
Tr 1 617 " How hastow thus unkyndely and longe
Tr 1 618 Hid this fro me, thow fol? " quod Pandarus.
Tr 1 619 " Paraunter thow myghte after swich oon longe,
Tr 1 620 That myn avys anoon may helpen us. "
Tr 1 621 " This were a wonder thing, " quod Troilus;
Tr 1 622 " Thow koudest nevere in love thiselven wisse.
Tr 1 623 How devel maistow brynge me to blisse? "
Tr 1 624 " Ye, Troilus, now herke, " quod Pandare;
Tr 1 625 " Though I be nyce, it happeth often so,
Tr 1 626 That oon that excesse doth ful yvele fare
Tr 1 627 By good counseil kan kepe his frend therfro.
Tr 1 628 I have myself ek seyn a blynd man goo
Tr 1 629 Ther as he fel that couth. loken wide;
Tr 1 630 A fool may ek a wis-man ofte gide.
Tr 1 631 " A wheston is no kervyng instrument,
Tr 1 632 But yet it maketh sharppe kervyng tolis;
Tr 1 633 And there thow woost that I have aught myswent,
Tr 1 634 Eschuw thow that, for swich thing to the scole is.
Tr 1 635 Thus often wise men ben war by foolys.
Tr 1 636 If thow do so, thi wit is wel bewared;
Tr 1 637 By his contrarie is every thyng declared.
Tr 1 638 " For how myghte evere swetnesse han ben knowe
Tr 1 639 To him that nevere tasted bitternesse?
Tr 1 640 Ne no man may ben inly glad, I trowe,
Tr 1 641 That nevere was in sorwe or som destresse.
Tr 1 642 Eke whit by blak, by shame ek worthinesse,
Tr 1 643 Ech set by other, more for other semeth,
Tr 1 644 As men may se, and so the wyse it demeth.
Tr 1 645 " Sith thus of two contraries is o lore,
Tr 1 646 I, that have in love so ofte assayed
Tr 1 647 Grevances, oughte konne, and wel the more,
Tr 1 648 Counseillen the of that thow art amayed.
Tr 1 649 Ek the ne aughte nat ben yvel appayed,
Tr 1 650 Though I desyre with the for to bere
Tr 1 651 Thyn hevy charge; it shal the lasse dere.
Tr 1 652 " I woot wel that it fareth thus be me
Tr 1 653 As to thi brother, Paris, an herdesse
Tr 1 654 Which that icleped was Oenone
Tr 1 655 Wrot in a compleynte of hir hevynesse.
Tr 1 656 Yee say the lettre that she wrot, I gesse? "
Tr 1 657 " Nay, nevere yet, ywys, " quod Troilus.
Tr 1 658 " Now, " quod Pandare, " herkne, it was thus:
Tr 1 659 " `Phebus, that first fond art of medicyne,'
Tr 1 660 Quod she, `and couth. in every wightes care
Tr 1 661 Remedye and reed, by herbes he knew fyne,
Tr 1 662 Yet to hymself his konnyng was ful bare,
Tr 1 663 For love hadde hym so bounden in a snare,
Tr 1 664 Al for the doughter of the kyng Amete,
Tr 1 665 That al his craft ne koude his sorwes bete.'
Tr 1 666 " Right so fare I, unhappyly for me.
Tr 1 667 I love oon best, and that me smerteth sore;
Tr 1 668 And yet, peraunter, kan I reden the
Tr 1 669 And nat myself; repreve me na more.
Tr 1 670 I have no cause, I woot wel, for to sore
Tr 1 671 As doth an hauk that listeth for to pleye;
Tr 1 672 But to thin help yet somwhat kan I seye.
Tr 1 673 " And of o thing right siker maistow be,
Tr 1 674 That certein, for to dyen in the peyne,
Tr 1 675 That I shal nevere mo discoveren the;
Tr 1 676 Ne, by my trouthe, I kepe nat restreyne
Tr 1 677 The fro thi love, theigh that it were Eleyne
Tr 1 678 That is thi brother wif, if ich it wiste:
Tr 1 679 Be what she be, and love hire as the liste!
Tr 1 680 " Therfore, as frend, fullich in me assure,
Tr 1 681 And tel me plat what is th' enchesoun
Tr 1 682 And final cause of wo that ye endure;
Tr 1 683 For douteth nothyng, myn entencioun
Tr 1 684 Nis nat to yow of reprehencioun,
Tr 1 685 To speke as now, for no wight may byreve
Tr 1 686 A man to love, tyl that hym list to leve.
Tr 1 687 " And witteth wel that bothe two ben vices:
Tr 1 688 Mistrusten alle, or elles alle leve.
Tr 1 689 But wel I woot, the mene of it no vice is,
Tr 1 690 For to trusten som wight is a preve
Tr 1 691 Of trouth; and forthi wolde I fayn remeve
Tr 1 692 Thi wrong conseyte, and do the som wyght triste
Tr 1 693 Thi wo to telle; and tel me, if the liste.
Tr 1 694 " The wise seith, `Wo hym that is allone,
Tr 1 695 For, and he falle, he hath non helpe to ryse';
Tr 1 696 And sith thow hast a felawe, tel thi mone;
Tr 1 697 For this nys naught, certein, the nexte wyse
Tr 1 698 To wynnen love -- as techen us the wyse --
Tr 1 699 To walwe and wepe as Nyobe the queene,
Tr 1 700 Whos teres yet in marble ben yseene.
Tr 1 701 " Lat be thy wepyng and thi drerynesse,
Tr 1 702 And lat us lissen wo with oother speche;
Tr 1 703 So may thy woful tyme seme lesse.
Tr 1 704 Delyte nat in wo thi wo to seche,
Tr 1 705 As don thise foles that hire sorwes eche
Tr 1 706 With sorwe, whan thei han mysaventure,
Tr 1 707 And listen naught to seche hem other cure.
Tr 1 708 " Men seyn, `to wrecche is consolacioun
Tr 1 709 To have another felawe in hys peyne.'
Tr 1 710 That owghte wel ben oure opynyoun,
Tr 1 711 For bothe thow and I of love we pleyne.
Tr 1 712 So ful of sorwe am I, soth for to seyne,
Tr 1 713 That certeinly namore harde grace
Tr 1 714 May sitte on me, for-why ther is no space.
Tr 1 715 " If God wol, thow art nat agast of me,
Tr 1 716 Lest I wolde of thi lady the bygyle!
Tr 1 717 Thow woost thyself whom that I love, parde,
Tr 1 718 As I best kan, gon sithen longe while.
Tr 1 719 And sith thow woost I do it for no wyle,
Tr 1 720 And sith I am he that thow trustest moost,
Tr 1 721 Tel me somwhat, syn al my wo thow woost. "
Tr 1 722 Yet Troilus for al this no word seyde,
Tr 1 723 But longe he ley as stylle as he ded were;
Tr 1 724 And after this with sikynge he abreyde,
Tr 1 725 And to Pandarus vois he lente his ere,
Tr 1 726 And up his eighen caste he, that in feere
Tr 1 727 Was Pandarus, lest that in frenesie
Tr 1 728 He sholde falle, or elles soone dye;
Tr 1 729 And cryde " Awake! " ful wonderlich and sharpe;
Tr 1 730 " What! Slombrestow as in a litargie?
Tr 1 731 Or artow lik an asse to the harpe,
Tr 1 732 That hereth sown whan men the strynges plye,
Tr 1 733 But in his mynde of that no melodie
Tr 1 734 May sinken hym to gladen, for that he
Tr 1 735 So dul ys of his bestialite? "
Tr 1 736 And with that, Pandare of his wordes stente;
Tr 1 737 And Troilus yet hym nothyng answerde,
Tr 1 738 For-why to tellen nas nat his entente
Tr 1 739 To nevere no man, for whom that he so ferde;
Tr 1 740 For it is seyd, " Men maketh ofte a yerde
Tr 1 741 With which the maker is hymself ybeten
Tr 1 742 In sondry manere, " as thise wyse treten,
Tr 1 743 And namelich in his counseil tellynge
Tr 1 744 That toucheth love that oughte ben secree;
Tr 1 745 For of himself it wol ynough out sprynge,
Tr 1 746 But if that it the bet governed be.
Tr 1 747 Ek som tyme it is a craft to seme fle
Tr 1 748 Fro thyng whych in effect men hunte faste;
Tr 1 749 Al this gan Troilus in his herte caste.
Tr 1 750 But natheles, whan he hadde herd hym crye
Tr 1 751 " Awake! " he gan to syken wonder soore,
Tr 1 752 And seyde, " Frend, though that I stylle lye,
Tr 1 753 I am nat deef. Now pees, and crye namore,
Tr 1 754 For I have herd thi wordes and thi lore;
Tr 1 755 But suffre me my meschief to bywaille,
Tr 1 756 For thy proverbes may me naught availle.
Tr 1 757 " Nor other cure kanstow non for me;
Tr 1 758 Ek I nyl nat ben cured; I wol deye.
Tr 1 759 What knowe I of the queene Nyobe?
Tr 1 760 Lat be thyne olde ensaumples, I the preye. "
Tr 1 761 " No, " quod Pandarus, " therfore I seye,
Tr 1 762 Swych is delit of foles to bywepe
Tr 1 763 Hire wo, but seken bote they ne kepe.
Tr 1 764 " Now knowe I that ther reson in the failleth.
Tr 1 765 But tel me, if I wiste what she were
Tr 1 766 For whom that the al this mysaunter ailleth,
Tr 1 767 Dorstestow that I tolde in hire ere
Tr 1 768 Thi wo, sith thow darst naught thiself for feere,
Tr 1 769 And hire bysoughte on the to han som routhe? "
Tr 1 770 " Why, nay, " quod he, " by God and by my trouthe! "
Tr 1 771 " What, nat as bisyly, " quod Pandarus,
Tr 1 772 " As though myn owene lyf lay on this nede? "
Tr 1 773 " No, certes, brother, " quod this Troilus,
Tr 1 774 " And whi? For that thow scholdest nevere spede. "
Tr 1 775 " Wostow that wel? " -- " Ye, that is out of drede, "
Tr 1 776 Quod Troilus; " for al that evere ye konne,
Tr 1 777 She nyl to noon swich wrecche as I ben wonne. "
Tr 1 778 Quod Pandarus, " Allas! What may this be,
Tr 1 779 That thow dispeired art thus causeles?
Tr 1 780 What! lyveth nat thi lady, bendiste?
Tr 1 781 How wostow so that thow art graceles?
Tr 1 782 Swich yvel is nat alwey booteles.
Tr 1 783 Why, put nat impossible thus thi cure,
Tr 1 784 Syn thyng to come is oft in aventure.
Tr 1 785 " I graunte wel that thow endurest wo
Tr 1 786 As sharp as doth he Ticius in helle,
Tr 1 787 Whos stomak foughles tiren evere moo
Tr 1 788 That hightyn volturis, as bokes telle;
Tr 1 789 But I may nat endure that thow dwelle
Tr 1 790 In so unskilful an oppynyoun
Tr 1 791 That of thi wo is no curacioun.
Tr 1 792 " But oones nyltow, for thy coward herte,
Tr 1 793 And for thyn ire and folissh wilfulnesse,
Tr 1 794 For wantrust, tellen of thy sorwes smerte,
Tr 1 795 Ne to thyn owen help don bysynesse
Tr 1 796 As muche as speke a resoun moore or lesse,
Tr 1 797 But list as he that lest of nothyng recche.
Tr 1 798 What womman koude loven swich a wrecche?
Tr 1 799 " What may she demen oother of thy deeth,
Tr 1 800 If thow thus deye, and she not why it is,
Tr 1 801 But that for feere is yolden up thy breth,
Tr 1 802 For Grekes han biseged us, iwys?
Tr 1 803 Lord, which a thonk than shaltow han of this!
Tr 1 804 Thus wol she seyn, and al the town attones,
Tr 1 805 `The wrecche is ded, the devel have his bones!'
Tr 1 806 " Thow mayst allone here wepe and crye and knele --
Tr 1 807 But love a womman that she woot it nought,
Tr 1 808 And she wol quyte it that thow shalt nat fele;
Tr 1 809 Unknowe, unkist, and lost that is unsought.
Tr 1 810 What, many a man hath love ful deere ybought
Tr 1 811 Twenty wynter that his lady wiste,
Tr 1 812 That nevere yet his lady mouth he kiste.
Tr 1 813 " What sholde he therfore fallen in dispayr,
Tr 1 814 Or be recreant for his owne tene,
Tr 1 815 Or slen hymself, al be his lady fair?
Tr 1 816 Nay, nay, but evere in oon be fressh and grene
Tr 1 817 To serve and love his deere hertes queene,
Tr 1 818 And thynk it is a guerdon hire to serve,
Tr 1 819 A thousand fold moore than he kan deserve. "
Tr 1 820 Of that word took hede Troilus,
Tr 1 821 And thoughte anon what folie he was inne,
Tr 1 822 And how that soth hym seyde Pandarus,
Tr 1 823 That for to slen hymself myght he nat wynne,
Tr 1 824 But bothe don unmanhod and a synne,
Tr 1 825 And of his deth his lady naught to wite;
Tr 1 826 For of his wo, God woot, she knew ful lite.
Tr 1 827 And with that thought he gan ful sore syke,
Tr 1 828 And seyde, " Allas! What is me best to do? "
Tr 1 829 To whom Pandare answered, " If the like,
Tr 1 830 The beste is that thow telle me al thi wo;
Tr 1 831 And have my trouthe, but thow it fynde so
Tr 1 832 I be thi boote, er that it be ful longe,
Tr 1 833 To pieces do me drawe and sithen honge! "
Tr 1 834 " Ye, so thow seyst, " quod Troilus tho, " allas!
Tr 1 835 But, God woot, it is naught the rather so.
Tr 1 836 Ful hard were it to helpen in this cas,
Tr 1 837 For wel fynde I that Fortune is my fo;
Tr 1 838 Ne al the men that riden konne or go
Tr 1 839 May of hire cruel whiel the harm withstonde;
Tr 1 840 For as hire list she pleyeth with free and bonde. "
Tr 1 841 Quod Pandarus, " Than blamestow Fortune
Tr 1 842 For thow art wroth; ye, now at erst I see.
Tr 1 843 Woost thow nat wel that Fortune is comune
Tr 1 844 To everi manere wight in som degree?
Tr 1 845 And yet thow hast this comfort, lo, parde,
Tr 1 846 That, as hire joies moten overgon,
Tr 1 847 So mote hire sorwes passen everechon.
Tr 1 848 " For if hire whiel stynte any thyng to torne,
Tr 1 849 Than cessed she Fortune anon to be.
Tr 1 850 Now, sith hire whiel by no way may sojourne,
Tr 1 851 What woostow if hire mutabilite
Tr 1 852 Right as thyselven list wol don by the,
Tr 1 853 Or that she be naught fer fro thyn helpynge?
Tr 1 854 Paraunter thow hast cause for to synge.
Tr 1 855 " And therfore wostow what I the biseche?
Tr 1 856 Lat be thy wo and tornyng to the grounde;
Tr 1 857 For whoso list have helyng of his leche,
Tr 1 858 To hym byhoveth first unwre his wownde.
Tr 1 859 To Cerberus yn helle ay be I bounde,
Tr 1 860 Were it for my suster, al thy sorwe,
Tr 1 861 By my wil she sholde al be thyn to-morwe.
Tr 1 862 " Look up, I seye, and telle me what she is
Tr 1 863 Anon, that I may gon about thy nede.
Tr 1 864 Knowe ich hire aught? For my love, telle me this.
Tr 1 865 Thanne wolde I hopen rather for to spede. "
Tr 1 866 Tho gan the veyne of Troilus to blede,
Tr 1 867 For he was hit, and wax al reed for shame.
Tr 1 868 " A ha! " quod Pandare; " Here bygynneth game. "
Tr 1 869 And with that word he gan hym for to shake,
Tr 1 870 And seyde, " Thef, thow shalt hyre name telle. "
Tr 1 871 But tho gan sely Troilus for to quake
Tr 1 872 As though men sholde han led hym into helle,
Tr 1 873 And seyde, " Allas, of al my wo the welle,
Tr 1 874 Thanne is my swete fo called Criseyde! "
Tr 1 875 And wel neigh with the word for feere he deide.
Tr 1 876 And whan that Pandare herde hire name nevene,
Tr 1 877 Lord, he was glad, and seyde, " Frend so deere,
Tr 1 878 Now far aright, for Joves name in hevene.
Tr 1 879 Love hath byset the wel; be of good cheere!
Tr 1 880 For of good name and wisdom and manere
Tr 1 881 She hath ynough, and ek of gentilesse.
Tr 1 882 If she be fayr, thow woost thyself, I gesse,
Tr 1 883 " Ne nevere saugh a more bountevous
Tr 1 884 Of hire estat, n' a gladder, ne of speche
Tr 1 885 A frendlyer, n' a more gracious
Tr 1 886 For to do wel, ne lasse hadde nede to seche
Tr 1 887 What for to don; and al this bet to eche,
Tr 1 888 In honour, to as fer as she may strecche,
Tr 1 889 A kynges herte semeth by hyrs a wrecche.
Tr 1 890 " And forthi loke of good comfort thow be;
Tr 1 891 For certeinly, the ferste poynt is this
Tr 1 892 Of noble corage and wel ordeyne,
Tr 1 893 A man to have pees with hymself, ywis.
Tr 1 894 So oghtist thow, for noht but good it is
Tr 1 895 To love wel, and in a worthy place;
Tr 1 896 The oghte not to clepe it hap, but grace.
Tr 1 897 " And also thynk, and therwith glade the,
Tr 1 898 That sith thy lady vertuous is al,
Tr 1 899 So foloweth it that there is some pitee
Tr 1 900 Amonges alle thise other in general;
Tr 1 901 And forthi se that thow, in special,
Tr 1 902 Requere naught that is ayeyns hyre name;
Tr 1 903 For vertu streccheth naught hymself to shame.
Tr 1 904 " But wel is me that evere that I was born,
Tr 1 905 That thow biset art in so good a place;
Tr 1 906 For by my trouthe, in love I dorste have sworn
Tr 1 907 The sholde nevere han tid thus fayr a grace.
Tr 1 908 And wostow why? For thow were wont to chace
Tr 1 909 At Love in scorn, and for despit him calle
Tr 1 910 `Seynt Idiot, lord of thise foles alle.'
Tr 1 911 " How often hastow maad thi nyce japes,
Tr 1 912 And seyd that Loves servantz everichone
Tr 1 913 Of nycete ben verray Goddes apes;
Tr 1 914 And some wolde mucche hire mete allone,
Tr 1 915 Liggyng abedde, and make hem for to grone;
Tr 1 916 And som, thow seydest, hadde a blaunche fevere,
Tr 1 917 And preydest God he sholde nevere kevere.
Tr 1 918 " And som of hem took on hym, for the cold,
Tr 1 919 More than ynough, so seydestow ful ofte.
Tr 1 920 And som han feyned ofte tyme, and told
Tr 1 921 How that they waken, whan thei slepen softe;
Tr 1 922 And thus they wolde han brought hemself alofte,
Tr 1 923 And natheles were under at the laste.
Tr 1 924 Thus seydestow, and japedest ful faste.
Tr 1 925 " Yet seydestow that for the moore part
Tr 1 926 Thise loveres wolden speke in general,
Tr 1 927 And thoughten that it was a siker art,
Tr 1 928 For faylyng, for t' assaien overal.
Tr 1 929 Now may I jape of the, if that I shal;
Tr 1 930 But natheles, though that I sholde deye,
Tr 1 931 That thow art non of tho, I dorste saye.
Tr 1 932 " Now bet thi brest, and sey to God of Love,
Tr 1 933 `Thy grace, lord, for now I me repente,
Tr 1 934 If I mysspak, for now myself I love.'
Tr 1 935 Thus sey with al thyn herte in good entente. "
Tr 1 936 Quod Troilus, " A, lord! I me consente,
Tr 1 937 And preye to the my japes thow foryive,
Tr 1 938 And I shal nevere more whyle I live. "
Tr 1 939 " Thow seist wel, " quod Pandare, " and now I hope
Tr 1 940 That thow the goddes wrathe hast al apesed;
Tr 1 941 And sithen thow hast wopen many a drope,
Tr 1 942 And seyd swych thyng wherwith thi god is plesed,
Tr 1 943 Now wolde nevere god but thow were esed!
Tr 1 944 And thynk wel, she of whom rist al thi wo
Tr 1 945 Hereafter may thy comfort be also.
Tr 1 946 " For thilke grownd that bereth the wedes wikke
Tr 1 947 Bereth ek thise holsom herbes, as ful ofte
Tr 1 948 Next the foule netle, rough and thikke,
Tr 1 949 The rose waxeth swoote and smothe and softe;
Tr 1 950 And next the valeye is the hil o-lofte;
Tr 1 951 And next the derke nyght the glade morwe;
Tr 1 952 And also joie is next the fyn of sorwe.
Tr 1 953 " Now loke that atempre be thi bridel,
Tr 1 954 And for the beste ay suffre to the tyde,
Tr 1 955 Or elles al oure labour is on ydel:
Tr 1 956 He hasteth wel that wisely kan abyde.
Tr 1 957 Be diligent and trewe, and ay wel hide;
Tr 1 958 Be lusty, fre; persevere in thy servyse,
Tr 1 959 And al is wel, if thow werke in this wyse.
Tr 1 960 " But he that departed is in everi place
Tr 1 961 Is nowher hol, as writen clerkes wyse.
Tr 1 962 What wonder is, though swich oon have no grace?
Tr 1 963 Ek wostow how it fareth of som servise,
Tr 1 964 As plaunte a tree or herbe, in sondry wyse,
Tr 1 965 And on the morwe pulle it up as blyve!
Tr 1 966 No wonder is, though it may nevere thryve.
Tr 1 967 " And sith that God of Love hath the bistowed
Tr 1 968 In place digne unto thi worthinesse,
Tr 1 969 Stond faste, for to good port hastow rowed;
Tr 1 970 And of thiself, for any hevynesse,
Tr 1 971 Hope alwey wel; for, but if drerinesse
Tr 1 972 Or over-haste oure bothe labour shende,
Tr 1 973 I hope of this to maken a good ende.
Tr 1 974 " And wostow why I am the lasse afered
Tr 1 975 Of this matere with my nece trete?
Tr 1 976 For this have I herd seyd of wyse lered,
Tr 1 977 Was nevere man or womman yet bigete
Tr 1 978 That was unapt to suffren loves hete,
Tr 1 979 Celestial, or elles love of kynde;
Tr 1 980 Forthy som grace I hope in hire to fynde.
Tr 1 981 " And for to speke of hire in specyal,
Tr 1 982 Hire beaute to bithynken and hire youthe,
Tr 1 983 It sit hire naught to ben celestial
Tr 1 984 As yet, though that hire liste bothe and kowthe;
Tr 1 985 But trewely, it sate hire wel right nowthe
Tr 1 986 A worthi knyght to loven and cherice,
Tr 1 987 And but she do, I holde it for a vice.
Tr 1 988 " Wherfore I am, and wol ben, ay redy
Tr 1 989 To peyne me to do yow this servyse;
Tr 1 990 For bothe yow to plese thus hope I
Tr 1 991 Herafterward; for ye ben bothe wyse,
Tr 1 992 And konne it counseil kepe in swych a wyse
Tr 1 993 That no man shal the wiser of it be;
Tr 1 994 And so we may ben gladed alle thre.
Tr 1 995 " And, by my trouthe, I have right now of the
Tr 1 996 A good conceyte in my wit, as I gesse,
Tr 1 997 And what it is, I wol now that thow se.
Tr 1 998 I thenke, sith that Love, of his goodnesse,
Tr 1 999 Hath the converted out of wikkednesse,
Tr 1 1000 That thow shalt ben the beste post, I leve,
Tr 1 1001 Of al his lay, and moost his foos to greve.
Tr 1 1002 " Ensample why, se now thise wise clerkes,
Tr 1 1003 That erren aldermost ayeyn a lawe,
Tr 1 1004 And ben converted from hire wikked werkes
Tr 1 1005 Thorugh grace of God that list hem to hym drawe,
Tr 1 1006 Thanne arn thise folk that han moost God in awe,
Tr 1 1007 And strengest feythed ben, I undirstonde,
Tr 1 1008 And konne an errowr alderbest withstonde. "
Tr 1 1009 Whan Troilus hadde herd Pandare assented
Tr 1 1010 To ben his help in lovyng of Cryseyde,
Tr 1 1011 Weex of his wo, as who seith, untormented,
Tr 1 1012 But hotter weex his love, and thus he seyde,
Tr 1 1013 With sobre chere, although his herte pleyde:
Tr 1 1014 " Now blisful Venus helpe, er that I sterve,
Tr 1 1015 Of the, Pandare, I mowe som thank deserve.
Tr 1 1016 " But, deere frend, how shal my wo be lesse
Tr 1 1017 Til this be doon? And good, ek telle me this:
Tr 1 1018 How wiltow seyn of me and my destresse,
Tr 1 1019 Lest she be wroth -- this drede I moost, ywys --
Tr 1 1020 Or nyl nat here or trowen how it is.
Tr 1 1021 Al this drede I, and ek for the manere
Tr 1 1022 Of the, hire em, she nyl no swich thyng here. "
Tr 1 1023 Quod Pandarus, " Thow hast a ful gret care
Tr 1 1024 Lest that the cherl may falle out of the moone!
Tr 1 1025 Whi, Lord! I hate of the thi nyce fare!
Tr 1 1026 Whi, entremete of that thow hast to doone!
Tr 1 1027 For Goddes love, I bidde the a boone:
Tr 1 1028 So lat m' alone, and it shal be thi beste. "
Tr 1 1029 " Whi, frend, " quod he, " now do right as the leste.
Tr 1 1030 " But herke, Pandare, o word, for I nolde
Tr 1 1031 That thow in me wendest so gret folie,
Tr 1 1032 That to my lady I desiren sholde
Tr 1 1033 That toucheth harm or any vilenye;
Tr 1 1034 For dredeles me were levere dye
Tr 1 1035 Than she of me aught elles understode
Tr 1 1036 But that that myghte sownen into goode. "
Tr 1 1037 Tho lough this Pandare, and anon answerde,
Tr 1 1038 " And I thi borugh? Fy! No wight doth but so.
Tr 1 1039 I roughte naught though that she stood and herde
Tr 1 1040 How that thow seist! but farewel, I wol go.
Tr 1 1041 Adieu! Be glad! God spede us bothe two!
Tr 1 1042 Yef me this labour and this bisynesse,
Tr 1 1043 And of my spede be thyn al that swetnesse. "
Tr 1 1044 Tho Troilus gan doun on knees to falle,
Tr 1 1045 And Pandare in his armes hente faste,
Tr 1 1046 And seyde, " Now, fy on the Grekes alle!
Tr 1 1047 Yet, parde, God shal helpe us atte laste.
Tr 1 1048 And dredelees, if that my lyf may laste,
Tr 1 1049 And God toforn, lo, som of hem shal smerte;
Tr 1 1050 And yet m' athenketh that this avant m' asterte!
Tr 1 1051 " Now, Pandare, I kan na more seye,
Tr 1 1052 But, thow wis, thow woost, thow maist, thow art al!
Tr 1 1053 My lif, my deth, hol in thyn hond I leye.
Tr 1 1054 Help now! " Quod he, " Yis, by mi trowthe, I shal. "
Tr 1 1055 " God yelde the, frend, and this in special, "
Tr 1 1056 Quod Troilus, " that thow me recomande
Tr 1 1057 To hire that to the deth me may comande. "
Tr 1 1058 This Pandarus, tho desirous to serve
Tr 1 1059 His fulle frend, than seyde in this manere:
Tr 1 1060 " Farwell, and thenk I wol thi thank deserve!
Tr 1 1061 Have here my trowthe, and that thow shalt wel here. "
Tr 1 1062 And went his wey, thenkyng on this matere,
Tr 1 1063 And how he best myghte hire biseche of grace,
Tr 1 1064 And fynde a tyme therto, and a place.
Tr 1 1065 For everi wight that hath an hous to founde
Tr 1 1066 Ne renneth naught the werk for to bygynne
Tr 1 1067 With rakel hond, but he wol bide a stounde,
Tr 1 1068 And sende his hertes line out fro withinne
Tr 1 1069 Aldirfirst his purpos for to wynne.
Tr 1 1070 Al this Pandare in his herte thoughte,
Tr 1 1071 And caste his werk ful wisely or he wroughte.
Tr 1 1072 But Troilus lay tho no lenger down,
Tr 1 1073 But up anon upon his stede bay,
Tr 1 1074 And in the feld he pleyde tho leoun;
Tr 1 1075 Wo was that Grek that with hym mette a-day!
Tr 1 1076 And in the town his manere tho forth ay
Tr 1 1077 So goodly was, and gat hym so in grace,
Tr 1 1078 That ecch hym loved that loked on his face.
Tr 1 1079 For he bicom the frendlieste wight,
Tr 1 1080 The gentilest, and ek the mooste fre,
Tr 1 1081 The thriftiest, and oon the beste knyght
Tr 1 1082 That in his tyme was or myghte be;
Tr 1 1083 Dede were his japes and his cruelte,
Tr 1 1084 His heighe port and his manere estraunge,
Tr 1 1085 And ecch of tho gan for a vertu chaunge.
Tr 1 1086 Now lat us stynte of Troilus a stounde,
Tr 1 1087 That fareth lik a man that hurt is soore,
Tr 1 1088 And is somdeel of akyngge of his wownde
Tr 1 1089 Ylissed wel, but heeled no deel moore,
Tr 1 1090 And, as an esy pacyent, the loore
Tr 1 1091 Abit of hym that gooth aboute his cure;
Tr 1 1092 And thus he dryeth forth his aventure.
Tr 2 1 Owt of thise blake wawes for to saylle,
Tr 2 2 O wynd, o wynd, the weder gynneth clere;
Tr 2 3 For in this see the boot hath swych travaylle,
Tr 2 4 Of my connyng, that unneth I it steere.
Tr 2 5 This see clepe I the tempestous matere
Tr 2 6 Of disespeir that Troilus was inne;
Tr 2 7 But now of hope the kalendes bygynne.
Tr 2 8 O lady myn, that called art Cleo,
Tr 2 9 Thow be my speed fro this forth, and my Muse,
Tr 2 10 To ryme wel this book til I have do;
Tr 2 11 Me nedeth here noon other art to use.
Tr 2 12 Forwhi to every lovere I me excuse,
Tr 2 13 That of no sentement I this endite,
Tr 2 14 But out of Latyn in my tonge it write.
Tr 2 15 Wherfore I nyl have neither thank ne blame
Tr 2 16 Of al this werk, but prey yow mekely,
Tr 2 17 Disblameth me if any word be lame,
Tr 2 18 For as myn auctour seyde, so sey I.
Tr 2 19 Ek though I speeke of love unfelyngly,
Tr 2 20 No wondre is, for it nothyng of newe is.
Tr 2 21 A blynd man kan nat juggen wel in hewis.
Tr 2 22 Ye knowe ek that in forme of speche is chaunge
Tr 2 23 Withinne a thousand yeer, and wordes tho
Tr 2 24 That hadden pris, now wonder nyce and straunge
Tr 2 25 Us thinketh hem, and yet thei spake hem so,
Tr 2 26 And spedde as wel in love as men now do;
Tr 2 27 Ek for to wynnen love in sondry ages,
Tr 2 28 In sondry londes, sondry ben usages.
Tr 2 29 And forthi if it happe in any wyse,
Tr 2 30 That here be any lovere in this place
Tr 2 31 That herkneth, as the storie wol devise,
Tr 2 32 How Troilus com to his lady grace,
Tr 2 33 And thenketh, " So nold I nat love purchace, "
Tr 2 34 Or wondreth on his speche or his doynge,
Tr 2 35 I noot; but it is me no wonderynge.
Tr 2 36 For every wight which that to Rome went
Tr 2 37 Halt nat o path, or alwey o manere;
Tr 2 38 Ek in som lond were al the game shent,
Tr 2 39 If that they ferde in love as men don here,
Tr 2 40 As thus, in opyn doyng or in chere,
Tr 2 41 In visityng in forme, or seyde hire sawes;
Tr 2 42 Forthi men seyn, " Ecch contree hath his lawes. "
Tr 2 43 Ek scarsly ben ther in this place thre
Tr 2 44 That have in love seid lik, and don, in al;
Tr 2 45 For to thi purpos this may liken the,
Tr 2 46 And the right nought; yet al is seid or schal;
Tr 2 47 Ek som men grave in tree, some in ston wal,
Tr 2 48 As it bitit. But syn I have bigonne,
Tr 2 49 Myn auctour shal I folwen, if I konne.
Tr 2 50 In May, that moder is of monthes glade,
Tr 2 51 That fresshe floures, blew and white and rede,
Tr 2 52 Ben quike agayn, that wynter dede made,
Tr 2 53 And ful of bawme is fletyng every mede,
Tr 2 54 Whan Phebus doth his bryghte bemes sprede
Tr 2 55 Right in the white Bole, it so bitidde,
Tr 2 56 As I shal synge, on Mayes day the thrydde,
Tr 2 57 That Pandarus, for al his wise speche,
Tr 2 58 Felt ek his part of loves shotes keene,
Tr 2 59 That, koude he nevere so wel of lovyng preche,
Tr 2 60 It made his hewe a-day ful ofte greene.
Tr 2 61 So shop it that hym fil that day a teene
Tr 2 62 In love, for which in wo to bedde he wente,
Tr 2 63 And made, er it was day, ful many a wente.
Tr 2 64 The swalowe Proigne, with a sorowful lay,
Tr 2 65 Whan morwen com, gan make hire waymentynge
Tr 2 66 Whi she forshapen was; and evere lay
Tr 2 67 Pandare abedde, half in a slomberynge,
Tr 2 68 Til she so neigh hym made hire cheterynge
Tr 2 69 How Tereus gan forth hire suster take,
Tr 2 70 That with the noyse of hire he gan awake,
Tr 2 71 And gan to calle, and dresse hym up to ryse,
Tr 2 72 Remembryng hym his erand was to doone
Tr 2 73 From Troilus, and ek his grete emprise;
Tr 2 74 And caste and knew in good plit was the moone
Tr 2 75 To doon viage, and took his way ful soone
Tr 2 76 Unto his neces palays ther biside.
Tr 2 77 Now Janus, god of entree, thow hym gyde!
Tr 2 78 Whan he was come unto his neces place,
Tr 2 79 " Wher is my lady? " to hire folk quod he;
Tr 2 80 And they hym tolde, and he forth in gan pace,
Tr 2 81 And fond two othere ladys sete and she,
Tr 2 82 Withinne a paved parlour, and they thre
Tr 2 83 Herden a mayden reden hem the geste
Tr 2 84 Of the siege of Thebes, while hem leste.
Tr 2 85 Quod Pandarus, " Madame, God yow see,
Tr 2 86 With youre book and all the compaignie! "
Tr 2 87 " Ey, uncle myn, welcome iwys, " quod she;
Tr 2 88 And up she roos, and by the hond in hye
Tr 2 89 She took hym faste, and seyde, " This nyght thrie,
Tr 2 90 To goode mot it turne, of yow I mette. "
Tr 2 91 And with that word she doun on bench hym sette.
Tr 2 92 " Ye, nece, yee shal faren wel the bet,
Tr 2 93 If God wol, al this yeer, " quod Pandarus;
Tr 2 94 " But I am sory that I have yow let
Tr 2 95 To herken of youre book ye preysen thus.
Tr 2 96 For Goddes love, what seith it? telle it us!
Tr 2 97 Is it of love? O, som good ye me leere! "
Tr 2 98 " Uncle, " quod she, " youre maistresse is nat here. "
Tr 2 99 With that thei gonnen laughe, and tho she seyde,
Tr 2 100 " This romaunce is of Thebes that we rede;
Tr 2 101 And we han herd how that kyng Layus deyde
Tr 2 102 Thorugh Edippus his sone, and al that dede;
Tr 2 103 And here we stynten at thise lettres rede --
Tr 2 104 How the bisshop, as the book kan telle,
Tr 2 105 Amphiorax, fil thorugh the ground to helle. "
Tr 2 106 Quod Pandarus, " Al this knowe I myselve,
Tr 2 107 And al th' assege of Thebes and the care;
Tr 2 108 For herof ben ther maked bookes twelve.
Tr 2 109 But lat be this, and telle me how ye fare.
Tr 2 110 Do wey youre barbe, and shew youre face bare;
Tr 2 111 Do wey youre book, rys up, and lat us daunce,
Tr 2 112 And lat us don to May som observaunce. "
Tr 2 113 " I! God forbede! " quod she. " Be ye mad?
Tr 2 114 Is that a widewes lif, so God yow save?
Tr 2 115 By God, ye maken me ryght soore adrad!
Tr 2 116 Ye ben so wylde, it semeth as ye rave.
Tr 2 117 It satte me wel bet ay in a cave
Tr 2 118 To bidde and rede on holy seyntes lyves;
Tr 2 119 Lat maydens gon to daunce, and yonge wyves. "
Tr 2 120 " As evere thrive I, " quod this Pandarus,
Tr 2 121 " Yet koude I telle a thyng to doon yow pleye. "
Tr 2 122 " Now, uncle deere, " quod she, " telle it us
Tr 2 123 For Goddes love; is than th' assege aweye?
Tr 2 124 I am of Grekes so fered that I deye. "
Tr 2 125 " Nay, nay, " quod he, " as evere mote I thryve,
Tr 2 126 It is a thing wel bet than swyche fyve. "
Tr 2 127 " Ye, holy God, " quod she, " what thyng is that?
Tr 2 128 What! Bet than swyche fyve? I! Nay, ywys!
Tr 2 129 For al this world ne kan I reden what
Tr 2 130 It sholde ben; some jape I trowe is this;
Tr 2 131 And but youreselven telle us what it is,
Tr 2 132 My wit is for t' arede it al to leene.
Tr 2 133 As help me God, I not nat what ye meene. "
Tr 2 134 " And I youre borugh, ne nevere shal, for me,
Tr 2 135 This thyng be told to yow, as mote I thryve! "
Tr 2 136 " And whi so, uncle myn? Whi so? " quod she.
Tr 2 137 " By God, " quod he, " that wol I telle as blyve!
Tr 2 138 For proudder womman is ther noon on lyve,
Tr 2 139 And ye it wiste, in al the town of Troye.
Tr 2 140 I jape nought, as evere have I joye! "
Tr 2 141 Tho gan she wondren moore than biforn
Tr 2 142 A thousand fold, and down hire eyghen caste;
Tr 2 143 For nevere, sith the tyme that she was born,
Tr 2 144 To knowe thyng desired she so faste;
Tr 2 145 And with a syk she seyde hym atte laste,
Tr 2 146 " Now, uncle myn, I nyl yow nought displese,
Tr 2 147 Nor axen more that may do yow disese. "
Tr 2 148 So after this, with many wordes glade,
Tr 2 149 And frendly tales, and with merie chiere,
Tr 2 150 Of this and that they pleide, and gonnen wade
Tr 2 151 In many an unkouth, glad, and dep matere,
Tr 2 152 As frendes doon whan thei ben mette yfere,
Tr 2 153 Tyl she gan axen hym how Ector ferde,
Tr 2 154 That was the townes wal and Grekes yerde.
Tr 2 155 " Ful wel, I thonk it God, " quod Pandarus,
Tr 2 156 " Save in his arm he hath a litel wownde;
Tr 2 157 And ek his fresshe brother Troilus,
Tr 2 158 The wise, worthi Ector the secounde,
Tr 2 159 In whom that alle vertu list habounde,
Tr 2 160 As alle trouthe and alle gentilesse,
Tr 2 161 Wisdom, honour, fredom, and worthinesse. "
Tr 2 162 " In good feith, em, " quod she, " that liketh me
Tr 2 163 Thei faren wel; God save hem bothe two!
Tr 2 164 For trewelich I holde it gret deynte
Tr 2 165 A kynges sone in armes wel to do,
Tr 2 166 And ben of goode condiciouns therto;
Tr 2 167 For gret power and moral vertu here
Tr 2 168 Is selde yseyn in o persone yfeere. "
Tr 2 169 " In good faith, that is soth, " quod Pandarus.
Tr 2 170 " But, by my trouthe, the kyng hath sones tweye --
Tr 2 171 That is to mene, Ector and Troilus --
Tr 2 172 That certeynly, though that I sholde deye,
Tr 2 173 Thei ben as voide of vices, dar I seye,
Tr 2 174 As any men that lyven under the sonne:
Tr 2 175 Hire myght is wyde yknowe, and what they konne.
Tr 2 176 " Of Ector nedeth it namore for to telle:
Tr 2 177 In al this world ther nys a bettre knyght
Tr 2 178 Than he, that is of worthynesse welle;
Tr 2 179 And he wel moore vertu hath than myght;
Tr 2 180 This knoweth many a wis and worthi wight.
Tr 2 181 The same pris of Troilus I seye;
Tr 2 182 God help me so, I knowe nat swiche tweye. "
Tr 2 183 " By God, " quod she, " of Ector that is sooth.
Tr 2 184 Of Troilus the same thyng trowe I;
Tr 2 185 For, dredeles, men tellen that he doth
Tr 2 186 In armes day by day so worthily,
Tr 2 187 And bereth hym here at hom so gentily
Tr 2 188 To everi wight, that alle pris hath he
Tr 2 189 Of hem that me were levest preysed be. "
Tr 2 190 " Ye sey right sooth, ywys, " quod Pandarus;
Tr 2 191 " For yesterday, whoso had with hym ben,
Tr 2 192 He myghte han wondred upon Troilus;
Tr 2 193 For nevere yet so thikke a swarm of been
Tr 2 194 Ne fleigh, as Grekes for hym gonne fleen,
Tr 2 195 And thorugh the feld, in everi wightes eere,
Tr 2 196 Ther nas no cry but `Troilus is there!'
Tr 2 197 " Now here, now ther, he hunted hem so faste,
Tr 2 198 Ther nas but Grekes blood -- and Troilus.
Tr 2 199 Now hem he hurte, and hem al down he caste;
Tr 2 200 Ay wher he wente, it was arayed thus:
Tr 2 201 He was hire deth, and sheld and lif for us,
Tr 2 202 That, as that day, ther dorste non withstonde
Tr 2 203 Whil that he held his blody swerd in honde.
Tr 2 204 " Therto he is the frendlieste man
Tr 2 205 Of gret estat that evere I saugh my lyve;
Tr 2 206 And wher hym lest, best felawshipe kan
Tr 2 207 To swich as hym thynketh able for to thryve. "
Tr 2 208 And with that word tho Pandarus, as blyve,
Tr 2 209 He took his leve, and seyde, " I wol gon henne. "
Tr 2 210 " Nay, blame have I, myn uncle, " quod she thenne.
Tr 2 211 " What aileth yow to be thus wery soone,
Tr 2 212 And namelich of wommen? Wol ye so?
Tr 2 213 Nay, sitteth down; by God, I have to doone
Tr 2 214 With yow, to speke of wisdom er ye go. "
Tr 2 215 And everi wight that was aboute hem tho,
Tr 2 216 That herde that, gan fer awey to stonde,
Tr 2 217 Whil they two hadde al that hem liste in honde.
Tr 2 218 Whan that hire tale al brought was to an ende,
Tr 2 219 Of hire estat and of hire governaunce,
Tr 2 220 Quod Pandarus, " Now tyme is that I wende.
Tr 2 221 But yet, I say, ariseth, lat us daunce,
Tr 2 222 And cast youre widewes habit to mischaunce!
Tr 2 223 What list yow thus youreself to disfigure,
Tr 2 224 Sith yow is tid thus fair an aventure? "
Tr 2 225 " A, wel bithought! For love of God, " quod she,
Tr 2 226 " Shal I nat witen what ye meene of this? "
Tr 2 227 " No, this thing axeth leyser, " tho quod he,
Tr 2 228 " And eke me wolde muche greve, iwis,
Tr 2 229 If I it tolde and ye it toke amys.
Tr 2 230 Yet were it bet my tonge for to stille
Tr 2 231 Than seye a soth that were ayeyns youre wille.
Tr 2 232 " For, nece, by the goddesse Mynerve,
Tr 2 233 And Jupiter, that maketh the thondre rynge,
Tr 2 234 And by the blisful Venus that I serve,
Tr 2 235 Ye ben the womman in this world lyvynge --
Tr 2 236 Withouten paramours, to my wyttynge --
Tr 2 237 That I best love, and lothest am to greve;
Tr 2 238 And that ye weten wel youreself, I leve. "
Tr 2 239 " Iwis, myn uncle, " quod she, " grant mercy!
Tr 2 240 Youre frendshipe have I founden evere yit.
Tr 2 241 I am to no man holden, trewely,
Tr 2 242 So muche as yow, and have so litel quyt;
Tr 2 243 And with the grace of God, emforth my wit,
Tr 2 244 As in my gylt I shal yow nevere offende;
Tr 2 245 And if I have er this, I wol amende.
Tr 2 246 " But for the love of God I yow biseche,
Tr 2 247 As ye ben he that I love moost and triste,
Tr 2 248 Lat be to me youre fremde manere speche,
Tr 2 249 And sey to me, youre nece, what yow liste. "
Tr 2 250 And with that word hire uncle anoon hire kiste,
Tr 2 251 And seyde, " Gladly, leve nece dere!
Tr 2 252 Tak it for good, that I shal sey yow here. "
Tr 2 253 With that she gan hire eighen down to caste,
Tr 2 254 And Pandarus to coghe gan a lite,
Tr 2 255 And seyde, " Nece, alwey -- lo! -- to the laste,
Tr 2 256 How so it be that som men hem delite
Tr 2 257 With subtyl art hire tales for to endite,
Tr 2 258 Yet for al that, in hire entencioun
Tr 2 259 Hire tale is al for som conclusioun.
Tr 2 260 " And sithe th' ende is every tales strengthe,
Tr 2 261 And this matere is so bihovely,
Tr 2 262 What sholde I peynte or drawen it on lengthe
Tr 2 263 To yow, that ben my frend so feythfully? "
Tr 2 264 And with that word he gan right inwardly
Tr 2 265 Byholden hire and loken on hire face,
Tr 2 266 And seyde, " On swich a mirour goode grace! "
Tr 2 267 Than thought he thus: " If I my tale endite
Tr 2 268 Aught harde, or make a proces any whyle,
Tr 2 269 She shal no savour have therin but lite,
Tr 2 270 And trowe I wolde hire in my wil bigyle;
Tr 2 271 For tendre wittes wenen al be wyle
Tr 2 272 Theras thei kan nought pleynly understonde;
Tr 2 273 Forthi hire wit to serven wol I fonde " --
Tr 2 274 And loked on hire in a bysi wyse,
Tr 2 275 And she was war that he byheld hire so,
Tr 2 276 And seyde, " Lord! so faste ye m' avise!
Tr 2 277 Sey ye me nevere er now? What sey ye, no? "
Tr 2 278 " Yis, yys, " quod he, " and bet wol er I go!
Tr 2 279 But be my trouthe, I thoughte now if ye
Tr 2 280 Be fortunat, for now men shal it se.
Tr 2 281 " For to every wight som goodly aventure
Tr 2 282 Som tyme is shape, if he it kan receyven;
Tr 2 283 But if he wol take of it no cure,
Tr 2 284 Whan that it commeth, but wilfully it weyven,
Tr 2 285 Lo, neyther cas ne fortune hym deceyven,
Tr 2 286 But ryght his verray slouthe and wrecchednesse;
Tr 2 287 And swich a wight is for to blame, I gesse.
Tr 2 288 " Good aventure, O beele nece, have ye
Tr 2 289 Ful lightly founden, and ye konne it take;
Tr 2 290 And for the love of God, and ek of me,
Tr 2 291 Cache it anon, lest aventure slake!
Tr 2 292 What sholde I lenger proces of it make?
Tr 2 293 Yif me youre hond, for in this world is noon --
Tr 2 294 If that yow list -- a wight so wel bygon.
Tr 2 295 " And sith I speke of good entencioun,
Tr 2 296 As I to yow have told wel herebyforn,
Tr 2 297 And love as wel youre honour and renoun
Tr 2 298 As creature in al this world yborn,
Tr 2 299 By alle the othes that I have yow sworn,
Tr 2 300 And ye be wrooth therfore, or wene I lye,
Tr 2 301 Ne shal I nevere sen yow eft with ye.
Tr 2 302 " Beth naught agast, ne quaketh naught! Wherto?
Tr 2 303 Ne chaungeth naught for fere so youre hewe!
Tr 2 304 For hardely the werst of this is do;
Tr 2 305 And though my tale as now be to yow newe,
Tr 2 306 Yet trist alwey ye shal me fynde trewe;
Tr 2 307 And were it thyng that me thoughte unsittynge,
Tr 2 308 To yow wolde I no swiche tales brynge. "
Tr 2 309 " Now, good em, for Goddes love, I preye, "
Tr 2 310 Quod she, " come of, and telle me what it is.
Tr 2 311 For both I am agast what ye wol seye,
Tr 2 312 And ek me longeth it to wite, ywis;
Tr 2 313 For whethir it be wel or be amys,
Tr 2 314 Say on, lat me nat in this feere dwelle. "
Tr 2 315 " So wol I doon; now herkeneth! I shall telle:
Tr 2 316 " Now, nece myn, the kynges deere sone,
Tr 2 317 The goode, wise, worthi, fresshe, and free,
Tr 2 318 Which alwey for to don wel is his wone,
Tr 2 319 The noble Troilus, so loveth the,
Tr 2 320 That, but ye helpe, it wol his bane be.
Tr 2 321 Lo, here is al! What sholde I moore seye?
Tr 2 322 Doth what yow lest to make hym lyve or deye.
Tr 2 323 " But if ye late hym deyen, I wol sterve --
Tr 2 324 Have here my trouthe, nece, I nyl nat lyen --
Tr 2 325 Al sholde I with this knyf my throte kerve. "
Tr 2 326 With that the teris breste out of his yen,
Tr 2 327 And seide, " If that ye don us bothe dyen
Tr 2 328 Thus gilteles, than have ye fisshed fayre!
Tr 2 329 What mende ye, though that we booth appaire?
Tr 2 330 " Allas, he which that is my lord so deere,
Tr 2 331 That trewe man, that noble gentil knyght,
Tr 2 332 That naught desireth but youre frendly cheere,
Tr 2 333 I se hym dyen, ther he goth upryght,
Tr 2 334 And hasteth hym with al his fulle myght
Tr 2 335 For to ben slayn, if his fortune assente.
Tr 2 336 Allas, that God yow swich a beaute sente!
Tr 2 337 " If it be so that ye so cruel be
Tr 2 338 That of his deth yow liste nought to recche,
Tr 2 339 That is so trewe and worthi, as ye se,
Tr 2 340 Namoore than of a japer or a wrecche --
Tr 2 341 If ye be swich, youre beaute may nat strecche
Tr 2 342 To make amendes of so cruel a dede;
Tr 2 343 Avysement is good byfore the nede.
Tr 2 344 " Wo worth the faire gemme vertulees!
Tr 2 345 Wo worth that herbe also that dooth no boote!
Tr 2 346 Wo worth that beaute that is routheles!
Tr 2 347 Wo worth that wight that tret ech undir foote!
Tr 2 348 And ye, that ben of beaute crop and roote,
Tr 2 349 If therwithal in yow ther be no routhe,
Tr 2 350 Than is it harm ye lyven, by my trouthe!
Tr 2 351 " And also think wel that this is no gaude;
Tr 2 352 For me were levere thow and I and he
Tr 2 353 Were hanged, than I sholde ben his baude,
Tr 2 354 As heigh as men myghte on us alle ysee!
Tr 2 355 I am thyn em; the shame were to me,
Tr 2 356 As wel as the, if that I sholde assente
Tr 2 357 Thorugh myn abet that he thyn honour shente.
Tr 2 358 " Now understond, for I yow nought requere
Tr 2 359 To bynde yow to hym thorugh no byheste,
Tr 2 360 But only that ye make hym bettre chiere
Tr 2 361 Than ye han doon er this, and moore feste,
Tr 2 362 So that his lif be saved atte leeste;
Tr 2 363 This al and som, and pleynly, oure entente.
Tr 2 364 God help me so, I nevere other mente!
Tr 2 365 " Lo, this requeste is naught but skylle, ywys,
Tr 2 366 Ne doute of resoun, pardee, is ther noon.
Tr 2 367 I sette the worste, that ye dreden this:
Tr 2 368 Men wolde wondren sen hym come or goon.
Tr 2 369 Ther-ayeins answere I thus anoon,
Tr 2 370 That every wight, but he be fool of kynde,
Tr 2 371 Wol deme it love of frendshipe in his mynde.
Tr 2 372 " What, who wol demen, though he se a man
Tr 2 373 To temple go, that he th' ymages eteth.
Tr 2 374 Thenk ek how wel and wisely that he kan
Tr 2 375 Governe hymself, that he no thyng foryeteth,
Tr 2 376 That where he cometh he pris and thank hym geteth.
Tr 2 377 And ek therto, he shal come here so selde,
Tr 2 378 What fors were it though al the town byhelde?
Tr 2 379 " Swych love of frendes regneth al this town;
Tr 2 380 And wre yow in that mantel evere moo,
Tr 2 381 And God so wys be my savacioun,
Tr 2 382 As I have seyd, youre beste is to do soo.
Tr 2 383 But alwey, goode nece, to stynte his woo,
Tr 2 384 So lat youre daunger sucred ben a lite,
Tr 2 385 That of his deth ye be naught for to wite. "
Tr 2 386 Criseyde, which that herde hym in this wise,
Tr 2 387 Thoughte, " I shal felen what he meneth, ywis. "
Tr 2 388 " Now em, " quod she, " what wolde ye devise?
Tr 2 389 What is youre reed I sholde don of this? "
Tr 2 390 " That is wel seyd, " quod he. " Certein, best is
Tr 2 391 That ye hym love ayeyn for his lovynge,
Tr 2 392 As love for love is skilful guerdonynge.
Tr 2 393 " Thenk ek how elde wasteth every houre
Tr 2 394 In ech of yow a partie of beautee;
Tr 2 395 And therfore er that age the devoure,
Tr 2 396 Go love; for old, ther wol no wight of the.
Tr 2 397 Lat this proverbe a loore unto yow be:
Tr 2 398 To late ywar, quod Beaute, whan it paste;
Tr 2 399 And Elde daunteth Daunger at the laste.
Tr 2 400 " The kynges fool is wont to crien loude,
Tr 2 401 Whan that hym thinketh a womman berth hire hye,
Tr 2 402 `So longe mote ye lyve, and alle proude,
Tr 2 403 Til crowes feet be growe under youre ye,
Tr 2 404 And sende yow than a myrour in to prye,
Tr 2 405 In which that ye may se youre face a morwe!'
Tr 2 406 I bidde wisshe yow namore sorwe. "
Tr 2 407 With this he stynte, and caste adown the heed,
Tr 2 408 And she began to breste a-wepe anoon,
Tr 2 409 And seyde, " Allas, for wo! Why nere I deed?
Tr 2 410 For of this world the feyth is al agoon.
Tr 2 411 Allas, what sholden straunge to me doon,
Tr 2 412 Whan he that for my beste frend I wende
Tr 2 413 Ret me to love, and sholde it me defende?
Tr 2 414 " Allas! I wolde han trusted, douteles,
Tr 2 415 That if that I, thorugh my dysaventure,
Tr 2 416 Hadde loved outher hym or Achilles,
Tr 2 417 Ector, or any mannes creature,
Tr 2 418 Ye nolde han had no mercy ne mesure
Tr 2 419 On me, but alwey had me in repreve.
Tr 2 420 This false world -- allas! -- who may it leve?
Tr 2 421 " What, is this al the joye and al the feste?
Tr 2 422 Is this youre reed? Is this my blisful cas?
Tr 2 423 Is this the verray mede of youre byheeste?
Tr 2 424 Is al this paynted proces seyd -- allas! --
Tr 2 425 Right for this fyn? O lady myn, Pallas!
Tr 2 426 Thow in this dredful cas for me purveye,
Tr 2 427 For so astoned am I that I deye. "
Tr 2 428 Wyth that she gan ful sorwfully to syke.
Tr 2 429 " A, may it be no bet? " quod Pandarus;
Tr 2 430 " By God, I shal namore come here this wyke,
Tr 2 431 And God toforn, that am mystrusted thus!
Tr 2 432 I se wel that ye sette lite of us,
Tr 2 433 Or of oure deth! Allas, I woful wrecche!
Tr 2 434 Might he yet lyve, of me is nought to recche.
Tr 2 435 " O cruel god, O dispitouse Marte,
Tr 2 436 O Furies thre of helle, on yow I crye!
Tr 2 437 So lat me nevere out of this hous departe,
Tr 2 438 If I mente harm or vilenye!
Tr 2 439 But sith I se my lord mot nedes dye,
Tr 2 440 And I with hym, here I me shryve, and seye
Tr 2 441 That wikkedly ye don us bothe deye.
Tr 2 442 " But sith it liketh yow that I be ded,
Tr 2 443 By Neptunus, that god is of the see,
Tr 2 444 Fro this forth shal I nevere eten bred
Tr 2 445 Til I myn owen herte blood may see;
Tr 2 446 For certeyn I wol deye as soone as he. "
Tr 2 447 And up he sterte, and on his wey he raughte,
Tr 2 448 Tyl she agayn hym by the lappe kaughte.
Tr 2 449 Criseyde, which that wel neigh starf for feere,
Tr 2 450 So as she was the ferfulleste wight
Tr 2 451 That myghte be, and herde ek with hire ere
Tr 2 452 And saugh the sorwful ernest of the knyght,
Tr 2 453 And in his preier ek saugh noon unryght,
Tr 2 454 And for the harm that myghte ek fallen moore,
Tr 2 455 She gan to rewe and dredde hire wonder soore,
Tr 2 456 And thoughte thus: " Unhappes fallen thikke
Tr 2 457 Alday for love, and in swych manere cas
Tr 2 458 As men ben cruel in hemself and wikke;
Tr 2 459 And if this man sle here hymself -- allas! --
Tr 2 460 In my presence, it wol be no solas.
Tr 2 461 What men wolde of hit deme I kan nat seye;
Tr 2 462 It nedeth me ful sleighly for to pleie. "
Tr 2 463 And with a sorowful sik she sayde thrie,
Tr 2 464 " A, Lord! What me is tid a sory chaunce!
Tr 2 465 For myn estat lith in a jupartie,
Tr 2 466 And ek myn emes lif is in balaunce;
Tr 2 467 But natheles, with Goddes governaunce,
Tr 2 468 I shal so doon, myn honour shal I kepe,
Tr 2 469 And ek his lif " -- and stynte for to wepe.
Tr 2 470 " Of harmes two, the lesse is for to chese;
Tr 2 471 Yet have I levere maken hym good chere
Tr 2 472 In honour, than myn emes lyf to lese.
Tr 2 473 Ye seyn, ye nothyng elles me requere? "
Tr 2 474 " No, wis, " quod he, " myn owen nece dere. "
Tr 2 475 " Now wel, " quod she, " and I wol doon my peyne;
Tr 2 476 I shal myn herte ayeins my lust constreyne.
Tr 2 477 " But that I nyl nat holden hym in honde,
Tr 2 478 Ne love a man ne kan I naught ne may
Tr 2 479 Ayeins my wyl, but elles wol I fonde,
Tr 2 480 Myn honour sauf, plese hym fro day to day.
Tr 2 481 Therto nolde I nat ones han seyd nay,
Tr 2 482 But that I drede, as in my fantasye;
Tr 2 483 But cesse cause, ay cesseth maladie.
Tr 2 484 " And here I make a protestacioun
Tr 2 485 That in this proces if ye depper go,
Tr 2 486 That certeynly, for no salvacioun
Tr 2 487 Of yow, though that ye sterven bothe two,
Tr 2 488 Though al the world on o day be my fo,
Tr 2 489 Ne shal I nevere of hym han other routhe. "
Tr 2 490 " I graunte wel, " quod Pandare, " by my trowthe.
Tr 2 491 " But may I truste wel to yow, " quod he,
Tr 2 492 " That of this thyng that ye han hight me here,
Tr 2 493 Ye wole it holden trewely unto me? "
Tr 2 494 " Ye, doutelees, " quod she, " myn uncle deere. "
Tr 2 495 " Ne that I shal han cause in this matere, "
Tr 2 496 Quod he, " to pleyne, or ofter yow to preche? "
Tr 2 497 " Why, no, parde; what nedeth moore speche? "
Tr 2 498 Tho fellen they in other tales glade,
Tr 2 499 Tyl at the laste, " O good em, " quod she tho,
Tr 2 500 " For his love, that us bothe made,
Tr 2 501 Tel me how first ye wisten of his wo.
Tr 2 502 Woot noon of it but ye? " He seyde, " No. "
Tr 2 503 " Kan he wel speke of love? " quod she; " I preye
Tr 2 504 Tel me, for I the bet me shal purveye. "
Tr 2 505 Tho Pandarus a litel gan to smyle,
Tr 2 506 And seyde, " By my trouthe, I shal yow telle.
Tr 2 507 This other day, naught gon ful longe while,
Tr 2 508 In-with the paleis gardyn, by a welle,
Tr 2 509 Gan he and I wel half a day to dwelle,
Tr 2 510 Right for to speken of an ordinaunce,
Tr 2 511 How we the Grekes myghten disavaunce.
Tr 2 512 " Soon after that bigonne we to lepe,
Tr 2 513 And casten with oure dartes to and fro,
Tr 2 514 Tyl at the laste he seyde he wolde slepe,
Tr 2 515 And on the gres adoun he leyde hym tho;
Tr 2 516 And I afer gan romen to and fro,
Tr 2 517 Til that I herde, as that I welk alone,
Tr 2 518 How he bigan ful wofully to grone.
Tr 2 519 " Tho gan I stalke hym softely byhynde,
Tr 2 520 And sikirly, the soothe for to seyne,
Tr 2 521 As I kan clepe ayein now to my mynde,
Tr 2 522 Right thus to Love he gan hym for to pleyne:
Tr 2 523 He seyde, `Lord, have routhe upon my peyne,
Tr 2 524 Al have I ben rebell in myn entente;
Tr 2 525 Now, mea culpa, lord, I me repente!
Tr 2 526 " `O god, that at thi disposicioun
Tr 2 527 Ledest the fyn by juste purveiaunce
Tr 2 528 Of every wight, my lowe confessioun
Tr 2 529 Accepte in gree, and sende me swich penaunce
Tr 2 530 As liketh the, but from disesperaunce,
Tr 2 531 That may my goost departe awey fro the,
Tr 2 532 Thow be my sheld, for thi benignite.
Tr 2 533 " `For certes, lord, so soore hath she me wounded,
Tr 2 534 That stood in blak, with lokyng of hire eyen,
Tr 2 535 That to myn hertes botme it is ysounded,
Tr 2 536 Thorugh which I woot that I moot nedes deyen.
Tr 2 537 This is the werste, I dar me nat bywreyen;
Tr 2 538 And wel the hotter ben the gledes rede,
Tr 2 539 That men hem wrien with asshen pale and dede.'
Tr 2 540 " Wyth that he smot his hed adown anon,
Tr 2 541 And gan to motre, I noot what, trewely.
Tr 2 542 And I with that gan stille awey to goon,
Tr 2 543 And leet therof as nothing wist had I,
Tr 2 544 And com ayein anon, and stood hym by,
Tr 2 545 And seyde, `Awake, ye slepen al to longe!
Tr 2 546 It semeth nat that love doth yow longe,
Tr 2 547 " `That slepen so that no man may yow wake.
Tr 2 548 Who sey evere or this so dul a man?'
Tr 2 549 `Ye, frend,' quod he, `do ye youre hedes ake
Tr 2 550 For love, and lat me lyven as I kan.'
Tr 2 551 But though that he for wo was pale and wan,
Tr 2 552 Yet made he tho as fresshe a countenaunce
Tr 2 553 As though he sholde have led the newe daunce.
Tr 2 554 " This passed forth til now, this other day,
Tr 2 555 It fel that I com romyng al allone
Tr 2 556 Into his chaumbre, and fond how that he lay
Tr 2 557 Upon his bed; but man so soore grone
Tr 2 558 Ne herde I nevere, and what that was his mone
Tr 2 559 Ne wist I nought; for, as I was comynge,
Tr 2 560 Al sodeynly he lefte his complaynynge.
Tr 2 561 " Of which I took somwat suspecioun,
Tr 2 562 And ner I com, and fond he wepte soore;
Tr 2 563 And God so wys be my savacioun,
Tr 2 564 As nevere of thyng hadde I no routhe moore;
Tr 2 565 For neither with engyn, ne with no loore,
Tr 2 566 Unnethes myghte I fro the deth hym kepe,
Tr 2 567 That yet fele I myn herte for hym wepe.
Tr 2 568 " And God woot, nevere sith that I was born
Tr 2 569 Was I so besy no man for to preche,
Tr 2 570 Ne nevere was to wight so depe isworn,
Tr 2 571 Or he me told who myghte ben his leche.
Tr 2 572 But now to yow rehercen al his speche,
Tr 2 573 Or alle his woful wordes for to sowne,
Tr 2 574 Ne bid me naught, but ye wol se me swowne.
Tr 2 575 " But for to save his lif, and elles nought,
Tr 2 576 And to noon harm of yow, thus am I dryven;
Tr 2 577 And for the love of God, that us hath wrought,
Tr 2 578 Swich cheer hym dooth that he and I may lyven!
Tr 2 579 Now have I plat to yow myn herte shryven,
Tr 2 580 And sith ye woot that myn entent is cleene,
Tr 2 581 Take heede therof, for I non yvel meene.
Tr 2 582 " And right good thrift, I prey to God, have ye,
Tr 2 583 That han swich oon ykaught withouten net!
Tr 2 584 And be ye wis as ye be fair to see,
Tr 2 585 Wel in the ryng than is the ruby set.
Tr 2 586 Ther were nevere two so wel ymet,
Tr 2 587 Whan ye ben his al hool as he is youre;
Tr 2 588 Ther myghty God graunte us see that houre! "
Tr 2 589 " Nay, therof spak I nought, ha, ha! " quod she;
Tr 2 590 " As helpe me God, ye shenden every deel! "
Tr 2 591 " O, mercy, dere nece, " anon quod he,
Tr 2 592 " What so I spak, I mente naught but wel,
Tr 2 593 By Mars, the god that helmed is of steel!
Tr 2 594 Now beth naught wroth, my blood, my nece dere. "
Tr 2 595 " Now wel, " quod she, " foryeven be it here! "
Tr 2 596 With this he took his leve, and hom he wente;
Tr 2 597 And, Lord, he was glad and wel bygon!
Tr 2 598 Criseyde aros, no lenger she ne stente,
Tr 2 599 But streght into hire closet wente anon,
Tr 2 600 And set hire doun as stylle as any ston,
Tr 2 601 And every word gan up and down to wynde
Tr 2 602 That he had seyd, as it com hire to mynde,
Tr 2 603 And wex somdel astoned in hire thought
Tr 2 604 Right for the newe cas; but whan that she
Tr 2 605 Was ful avysed, tho fond she right nought
Tr 2 606 Of peril why she ought afered be.
Tr 2 607 For man may love, of possibilite,
Tr 2 608 A womman so, his herte may tobreste,
Tr 2 609 And she naught love ayein, but if hire leste.
Tr 2 610 But as she sat allone and thoughte thus,
Tr 2 611 Ascry aros at scarmuch al withoute,
Tr 2 612 And men criden in the strete, " Se, Troilus
Tr 2 613 Hath right now put to flighte the Grekes route! "
Tr 2 614 With that gan al hire meyne for to shoute,
Tr 2 615 " A, go we se! Cast up the yates wyde!
Tr 2 616 For thorwgh this strete he moot to paleys ride;
Tr 2 617 " For other wey is to the yate noon
Tr 2 618 Of Dardanus, there opyn is the cheyne. "
Tr 2 619 With that com he and al his folk anoon
Tr 2 620 An esy pas rydyng, in routes tweyne,
Tr 2 621 Right as his happy day was, sooth to seyne,
Tr 2 622 For which, men seyn, may nought destourbed be
Tr 2 623 That shal bityden of necessitee.
Tr 2 624 This Troilus sat on his baye steede
Tr 2 625 Al armed, save his hed, ful richely;
Tr 2 626 And wownded was his hors, and gan to blede,
Tr 2 627 On which he rood a pas ful softely.
Tr 2 628 But swich a knyghtly sighte trewely
Tr 2 629 As was on hym, was nought, withouten faille,
Tr 2 630 To loke on Mars, that god is of bataille.
Tr 2 631 So lik a man of armes and a knyght
Tr 2 632 He was to seen, fulfilled of heigh prowesse,
Tr 2 633 For bothe he hadde a body and a myght
Tr 2 634 To don that thing, as wel as hardynesse;
Tr 2 635 And ek to seen hym in his gere hym dresse,
Tr 2 636 So fressh, so yong, so weldy semed he,
Tr 2 637 It was an heven upon hym for to see.
Tr 2 638 His helm tohewen was in twenty places,
Tr 2 639 That by a tyssew heng his bak byhynde;
Tr 2 640 His sheeld todasshed was with swerdes and maces,
Tr 2 641 In which men myghte many an arwe fynde
Tr 2 642 That thirled hadde horn and nerf and rynde;
Tr 2 643 And ay the peple cryde, " Here cometh oure joye,
Tr 2 644 And, next his brother, holder up of Troye! "
Tr 2 645 For which he wex a litel reed for shame
Tr 2 646 When he the peple upon hym herde cryen,
Tr 2 647 That to byholde it was a noble game
Tr 2 648 How sobrelich he caste down his yen.
Tr 2 649 Criseyda gan al his chere aspien,
Tr 2 650 And leet it so softe in hire herte synke,
Tr 2 651 That to hireself she seyde, " Who yaf me drynke? "
Tr 2 652 For of hire owen thought she wex al reed,
Tr 2 653 Remembryng hire right thus, " Lo, this is he
Tr 2 654 Which that myn uncle swerith he moot be deed,
Tr 2 655 But I on hym have mercy and pitee. "
Tr 2 656 And with that thought, for pure ashamed, she
Tr 2 657 Gan in hire hed to pulle, and that as faste,
Tr 2 658 Whil he and alle the peple forby paste,
Tr 2 659 And gan to caste and rollen up and down
Tr 2 660 Withinne hire thought his excellent prowesse,
Tr 2 661 And his estat, and also his renown,
Tr 2 662 His wit, his shap, and ek his gentilesse;
Tr 2 663 But moost hire favour was, for his distresse
Tr 2 664 Was al for hire, and thoughte it was a routhe
Tr 2 665 To sleen swich oon, if that he mente trouthe.
Tr 2 666 Now myghte som envious jangle thus:
Tr 2 667 " This was a sodeyn love; how myght it be
Tr 2 668 That she so lightly loved Troilus
Tr 2 669 Right for the firste syghte, ye, parde? "
Tr 2 670 Now whoso seith so, mote he nevere ythe!
Tr 2 671 For every thing a gynnyng hath it nede
Tr 2 672 Er al be wrought, withowten any drede.
Tr 2 673 For I sey nought that she so sodeynly
Tr 2 674 Yaf hym hire love, but that she gan enclyne
Tr 2 675 To like hym first, and I have told yow whi;
Tr 2 676 And after that, his manhod and his pyne
Tr 2 677 Made love withinne hire for to myne,
Tr 2 678 For which by proces and by good servyse
Tr 2 679 He gat hire love, and in no sodeyn wyse.
Tr 2 680 And also blisful Venus, wel arrayed,
Tr 2 681 Sat in hire seventhe hous of hevene tho,
Tr 2 682 Disposed wel, and with aspectes payed,
Tr 2 683 To helpe sely Troilus of his woo.
Tr 2 684 And soth to seyne, she nas not al a foo
Tr 2 685 To Troilus in his nativitee;
Tr 2 686 God woot that wel the sonner spedde he.
Tr 2 687 Now lat us stynte of Troilus a throwe,
Tr 2 688 That rideth forth, and lat us torne faste
Tr 2 689 Unto Criseyde, that heng hire hed ful lowe
Tr 2 690 Ther as she sat allone, and gan to caste
Tr 2 691 Where on she wolde apoynte hire atte laste,
Tr 2 692 If it so were hire em ne wolde cesse
Tr 2 693 For Troilus upon hire for to presse.
Tr 2 694 And, Lord! So she gan in hire thought argue
Tr 2 695 In this matere of which I have yow told,
Tr 2 696 And what to doone best were, and what eschue,
Tr 2 697 That plited she ful ofte in many fold.
Tr 2 698 Now was hire herte warm, now was it cold;
Tr 2 699 And what she thoughte somwhat shal I write,
Tr 2 700 As to myn auctour listeth for t' endite.
Tr 2 701 She thoughte wel that Troilus persone
Tr 2 702 She knew by syghte, and ek his gentilesse,
Tr 2 703 And thus she seyde, " Al were it nat to doone
Tr 2 704 To graunte hym love, yet for his worthynesse
Tr 2 705 It were honour with pley and with gladnesse
Tr 2 706 In honestee with swich a lord to deele,
Tr 2 707 For myn estat, and also for his heele.
Tr 2 708 " Ek wel woot I my kynges sone is he,
Tr 2 709 And sith he hath to se me swich delit,
Tr 2 710 If I wolde outreliche his sighte flee,
Tr 2 711 Peraunter he myghte have me in dispit,
Tr 2 712 Thorugh whicch I myghte stonde in worse plit.
Tr 2 713 Now were I wis, me hate to purchace,
Tr 2 714 Withouten need, ther I may stonde in grace?
Tr 2 715 " In every thyng, I woot, ther lith mesure;
Tr 2 716 For though a man forbede dronkenesse,
Tr 2 717 He naught forbet that every creature
Tr 2 718 Be drynkeles for alwey, as I gesse.
Tr 2 719 Ek sith I woot for me is his destresse,
Tr 2 720 I ne aughte nat for that thing hym despise,
Tr 2 721 Sith it is so he meneth in good wyse.
Tr 2 722 " And ek I knowe of longe tyme agon
Tr 2 723 His thewes goode, and that he is nat nyce;
Tr 2 724 N' avantour, seith men, certein, he is noon;
Tr 2 725 To wis is he to doon so gret a vice;
Tr 2 726 Ne als I nyl hym nevere so cherice
Tr 2 727 That he may make avaunt, by juste cause,
Tr 2 728 He shal me nevere bynde in swich a clause.
Tr 2 729 " Now sette a caas: the hardest is, ywys,
Tr 2 730 Men myghten demen that he loveth me.
Tr 2 731 What dishonour were it unto me, this?
Tr 2 732 May ich hym lette of that? Why, nay, parde!
Tr 2 733 I knowe also, and alday heere and se,
Tr 2 734 Men loven wommen al biside hire leve,
Tr 2 735 And whan hem leste namore, lat hem byleve!
Tr 2 736 " I thenke ek how he able is for to have
Tr 2 737 Of al this noble town the thriftieste
Tr 2 738 To ben his love, so she hire honour save.
Tr 2 739 For out and out he is the worthieste,
Tr 2 740 Save only Ector, which that is the beste;
Tr 2 741 And yet his lif al lith now in my cure.
Tr 2 742 But swich is love, and ek myn aventure.
Tr 2 743 " Ne me to love, a wonder is it nought;
Tr 2 744 For wel woot I myself, so God me spede --
Tr 2 745 Al wolde I that noon wiste of this thought --
Tr 2 746 I am oon the faireste, out of drede,
Tr 2 747 And goodlieste, who that taketh hede,
Tr 2 748 And so men seyn, in al the town of Troie.
Tr 2 749 What wonder is though he of me have joye?
Tr 2 750 " I am myn owene womman, wel at ese --
Tr 2 751 I thank it God -- as after myn estat,
Tr 2 752 Right yong, and stonde unteyd in lusty leese,
Tr 2 753 Withouten jalousie or swich debat:
Tr 2 754 Shal noon housbonde seyn to me `Chek mat!'
Tr 2 755 For either they ben ful of jalousie,
Tr 2 756 Or maisterfull, or loven novelrie.
Tr 2 757 " What shal I doon? To what fyn lyve I thus?
Tr 2 758 Shal I nat love, in cas if that me leste?
Tr 2 759 What, pardieux! I am naught religious.
Tr 2 760 And though that I myn herte sette at reste
Tr 2 761 Upon this knyght, that is the worthieste,
Tr 2 762 And kepe alwey myn honour and my name,
Tr 2 763 By alle right, it may do me no shame. "
Tr 2 764 But right as when the sonne shyneth brighte
Tr 2 765 In March, that chaungeth ofte tyme his face,
Tr 2 766 And that a cloude is put with wynd to flighte,
Tr 2 767 Which oversprat the sonne as for a space,
Tr 2 768 A cloudy thought gan thorugh hire soule pace,
Tr 2 769 That overspradde hire brighte thoughtes alle,
Tr 2 770 So that for feere almost she gan to falle.
Tr 2 771 That thought was this: " Allas! Syn I am free,
Tr 2 772 Sholde I now love, and put in jupartie
Tr 2 773 My sikernesse, and thrallen libertee?
Tr 2 774 Allas, how dorst I thenken that folie?
Tr 2 775 May I naught wel in other folk aspie
Tr 2 776 Hire dredfull joye, hire constreinte, and hire peyne?
Tr 2 777 Ther loveth noon, that she nath why to pleyne.
Tr 2 778 " For love is yet the mooste stormy lyf,
Tr 2 779 Right of hymself, that evere was bigonne;
Tr 2 780 For evere som mystrust or nice strif
Tr 2 781 Ther is in love, som cloude is over that sonne.
Tr 2 782 Therto we wrecched wommen nothing konne,
Tr 2 783 Whan us is wo, but wepe and sitte and thinke;
Tr 2 784 Oure wrecche is this, oure owen wo to drynke.
Tr 2 785 " Also thise wikked tonges ben so prest
Tr 2 786 To speke us harm; ek men ben so untrewe,
Tr 2 787 That right anon as cessed is hire lest,
Tr 2 788 So cesseth love, and forth to love a newe.
Tr 2 789 But harm ydoon is doon, whoso it rewe:
Tr 2 790 For though thise men for love hem first torende,
Tr 2 791 Ful sharp bygynnyng breketh ofte at ende.
Tr 2 792 " How ofte tyme hath it yknowen be
Tr 2 793 The tresoun that to wommen hath ben do!
Tr 2 794 To what fyn is swich love I kan nat see,
Tr 2 795 Or wher bycometh it, whan that it is ago.
Tr 2 796 Ther is no wight that woot, I trowe so,
Tr 2 797 Where it bycometh. Lo, no wight on it sporneth.
Tr 2 798 That erst was nothing, into nought it torneth.
Tr 2 799 " How bisy, if I love, ek most I be
Tr 2 800 To plesen hem that jangle of love, and dremen,
Tr 2 801 And coye hem, that they seye noon harm of me!
Tr 2 802 For though ther be no cause, yet hem semen
Tr 2 803 Al be for harm that folk hire frendes quemen;
Tr 2 804 And who may stoppen every wikked tonge,
Tr 2 805 Or sown of belles whil that thei ben ronge? "
Tr 2 806 And after that, hire thought gan for to clere,
Tr 2 807 And seide, " He which that nothing undertaketh,
Tr 2 808 Nothyng n' acheveth, be hym looth or deere. "
Tr 2 809 And with an other thought hire herte quaketh.
Tr 2 810 Than slepeth hope, and after drede awaketh.
Tr 2 811 Now hoot, now cold; but thus, bitwixen tweye,
Tr 2 812 She rist hire up, and went hire for to pleye.
Tr 2 813 Adown the steyre anonright tho she wente
Tr 2 814 Into the gardyn with hire neces thre,
Tr 2 815 And up and down ther made many a wente --
Tr 2 816 Flexippe, she, Tharbe, and Antigone --
Tr 2 817 To pleyen that it joye was to see;
Tr 2 818 And other of hire wommen, a gret route,
Tr 2 819 Hire folowede in the gardyn al aboute.
Tr 2 820 This yerd was large, and rayled alle th' aleyes,
Tr 2 821 And shadewed wel with blosmy bowes grene,
Tr 2 822 And benched newe, and sonded alle the weyes,
Tr 2 823 In which she walketh arm in arm bitwene,
Tr 2 824 Til at the laste Antigone the shene
Tr 2 825 Gan on a Troian song to singen cleere,
Tr 2 826 That it an heven was hire vois to here.
Tr 2 827 She seyde, " O Love, to whom I have and shal
Tr 2 828 Ben humble subgit, trewe in myn entente,
Tr 2 829 As I best kan, to yow, lord, yeve ich al
Tr 2 830 For everemo myn hertes lust to rente;
Tr 2 831 For nevere yet thi grace no wight sente
Tr 2 832 So blisful cause as me, my lif to lede
Tr 2 833 In alle joie and seurte out of drede.
Tr 2 834 " Ye, blisful god, han me so wel byset
Tr 2 835 In love, iwys, that al that bereth lif
Tr 2 836 Ymagynen ne kouth. how to be bet;
Tr 2 837 For, lord, withouten jalousie or strif,
Tr 2 838 I love oon which is moost ententif
Tr 2 839 To serven wel, unweri or unfeyned,
Tr 2 840 That evere was, and leest with harm desteyned.
Tr 2 841 " As he that is the welle of worthynesse,
Tr 2 842 Of trouthe grownd, mirour of goodlihed,
Tr 2 843 Of wit Apollo, stoon of sikernesse,
Tr 2 844 Of vertu roote, of lust fynder and hed,
Tr 2 845 Thorugh which is alle sorwe fro me ded --
Tr 2 846 Iwis, I love hym best, so doth he me;
Tr 2 847 Now good thrift have he, wherso that he be!
Tr 2 848 " Whom shulde I thanken but yow, god of Love,
Tr 2 849 Of al this blisse, in which to bathe I gynne?
Tr 2 850 And thanked be ye, lord, for that I love!
Tr 2 851 This is the righte lif that I am inne,
Tr 2 852 To flemen alle manere vice and synne:
Tr 2 853 This dooth me so to vertu for t' entende,
Tr 2 854 That day by day I in my wille amende.
Tr 2 855 " And whoso seith that for to love is vice,
Tr 2 856 Or thraldom, though he feele in it destresse,
Tr 2 857 He outher is envyous, or right nyce,
Tr 2 858 Or is unmyghty, for his shrewednesse,
Tr 2 859 To loven; for swich manere folk, I gesse,
Tr 2 860 Defamen Love, as nothing of hym knowe.
Tr 2 861 Thei speken, but thei benten nevere his bowe!
Tr 2 862 " What is the sonne wers, of kynde right,
Tr 2 863 Though that a man, for fieblesse of his yen,
Tr 2 864 May nought endure on it to see for bright?
Tr 2 865 Or love the wers, though wrecches on it crien?
Tr 2 866 No wele is worth, that may no sorwe dryen.
Tr 2 867 And forthi, who that hath an hed of verre,
Tr 2 868 Fro cast of stones war hym in the werre!
Tr 2 869 " But I with al myn herte and al my myght,
Tr 2 870 As I have seyd, wol love unto my laste
Tr 2 871 My deere herte and al myn owen knyght,
Tr 2 872 In which myn herte growen is so faste,
Tr 2 873 And his in me, that it shal evere laste.
Tr 2 874 Al dredde I first to love hym to bigynne,
Tr 2 875 Now woot I wel, ther is no peril inne. "
Tr 2 876 And of hir song right with that word she stente,
Tr 2 877 And therwithal, " Now nece, " quod Cryseyde,
Tr 2 878 " Who made this song now with so good entente? "
Tr 2 879 Antygone answerde anoon and seyde,
Tr 2 880 " Madame, ywys, the goodlieste mayde
Tr 2 881 Of gret estat in al the town of Troye,
Tr 2 882 And let hire lif in moste honour and joye. "
Tr 2 883 " Forsothe, so it semeth by hire song, "
Tr 2 884 Quod tho Criseyde, and gan therwith to sike,
Tr 2 885 And seyde, " Lord, is ther swych blisse among
Tr 2 886 Thise loveres, as they konne faire endite? "
Tr 2 887 " Ye, wis, " quod fresshe Antigone the white,
Tr 2 888 " For alle the folk that han or ben on lyve
Tr 2 889 Ne konne wel the blisse of love discryve.
Tr 2 890 " But wene ye that every wrecche woot
Tr 2 891 The parfit blisse of love? Why, nay, iwys!
Tr 2 892 They wenen all be love, if oon be hoot.
Tr 2 893 Do wey, do wey, they woot no thyng of this!
Tr 2 894 Men moste axe at seyntes if it is
Tr 2 895 Aught fair in hevene (Why? For they kan telle),
Tr 2 896 And axen fendes is it foul in helle. "
Tr 2 897 Criseyde unto that purpos naught answerde,
Tr 2 898 But seyde, " Ywys, it wol be nyght as faste. "
Tr 2 899 But every word which that she of hire herde,
Tr 2 900 She gan to prenten in hire herte faste,
Tr 2 901 And ay gan love hire lasse for t' agaste
Tr 2 902 Than it dide erst, and synken in hire herte,
Tr 2 903 That she wex somwhat able to converte.
Tr 2 904 The dayes honour, and the hevenes ye,
Tr 2 905 The nyghtes foo -- al this clepe I the sonne --
Tr 2 906 Gan westren faste, and downward for to wrye,
Tr 2 907 As he that hadde his dayes cours yronne,
Tr 2 908 And white thynges wexen dymme and donne
Tr 2 909 For lak of lyght, and sterres for t' apere,
Tr 2 910 That she and alle hire folk in went yfeere.
Tr 2 911 So whan it liked hire to go to reste,
Tr 2 912 And voided weren thei that voiden oughte,
Tr 2 913 She seyde that to slepen wel hire leste.
Tr 2 914 Hire wommen soone til hire bed hire broughte.
Tr 2 915 Whan al was hust, than lay she stille and thoughte
Tr 2 916 Of al this thing; the manere and the wise
Tr 2 917 Reherce it nedeth nought, for ye ben wise.
Tr 2 918 A nyghtyngale, upon a cedre grene,
Tr 2 919 Under the chambre wal ther as she ley,
Tr 2 920 Ful loude song ayein the moone shene,
Tr 2 921 Peraunter in his briddes wise a lay
Tr 2 922 Of love, that made hire herte fressh and gay.
Tr 2 923 That herkned she so longe in good entente,
Tr 2 924 Til at the laste the dede slep hire hente.
Tr 2 925 And as she slep, anonright tho hire mette
Tr 2 926 How that an egle, fethered whit as bon,
Tr 2 927 Under hire brest his longe clawes sette,
Tr 2 928 And out hire herte he rente, and that anon,
Tr 2 929 And dide his herte into hire brest to gon --
Tr 2 930 Of which she nought agroos, ne nothyng smerte --
Tr 2 931 And forth he fleigh, with herte left for herte.
Tr 2 932 Now lat hire slepe, and we oure tales holde
Tr 2 933 Of Troilus, that is to paleis riden
Tr 2 934 Fro the scarmuch of the which I tolde,
Tr 2 935 And in his chaumbre sit and hath abiden
Tr 2 936 Til two or thre of his messages yeden
Tr 2 937 For Pandarus, and soughten hym ful faste,
Tr 2 938 Til they him founde and broughte him at the laste.
Tr 2 939 This Pandarus com lepyng in atones,
Tr 2 940 And seyde thus: " Who hath ben wel ibete
Tr 2 941 To-day with swerdes and with slynge-stones,
Tr 2 942 But Troilus, that hath caught hym an hete? "
Tr 2 943 And gan to jape, and seyde, " Lord, so ye swete!
Tr 2 944 But ris and lat us soupe and go to reste. "
Tr 2 945 And he answerde hym, " Do we as the leste. "
Tr 2 946 With al the haste goodly that they myghte
Tr 2 947 They spedde hem fro the soper unto bedde;
Tr 2 948 And every wight out at the dore hym dyghte,
Tr 2 949 And where hym liste upon his wey him spedde.
Tr 2 950 But Troilus, that thoughte his herte bledde
Tr 2 951 For wo, til that he herde som tydynge,
Tr 2 952 He seyde, " Frend, shal I now wepe or synge? "
Tr 2 953 Quod Pandarus, " Ly stylle and lat me slepe,
Tr 2 954 And don thyn hood; thy nedes spedde be!
Tr 2 955 And ches if thow wolt synge or daunce or lepe!
Tr 2 956 At shorte wordes, thow shal trowen me:
Tr 2 957 Sire, my nece wol do wel by the,
Tr 2 958 And love the best, by God and by my trouthe,
Tr 2 959 But lak of pursuyt make it in thi slouthe.
Tr 2 960 " For thus ferforth I have thi werk bigonne
Tr 2 961 Fro day to day, til this day by the morwe
Tr 2 962 Hire love of frendshipe have I to the wonne,
Tr 2 963 And therto hath she leyd hire feyth to borwe.
Tr 2 964 Algate a foot is hameled of thi sorwe! "
Tr 2 965 What sholde I lenger sermoun of it holde?
Tr 2 966 As ye han herd byfore, al he hym tolde.
Tr 2 967 But right as floures, thorugh the cold of nyght
Tr 2 968 Iclosed, stoupen on hire stalke lowe,
Tr 2 969 Redressen hem ayein the sonne bright,
Tr 2 970 And spreden on hire kynde cours by rowe,
Tr 2 971 Right so gan tho his eighen up to throwe
Tr 2 972 This Troilus, and seyde, " O Venus deere,
Tr 2 973 Thi myght, thi grace, yheried be it here! "
Tr 2 974 And to Pandare he held up bothe his hondes,
Tr 2 975 And seyde, " Lord, al thyn be that I have!
Tr 2 976 For I am hool, al brosten ben my bondes.
Tr 2 977 A thousand Troyes whoso that me yave,
Tr 2 978 Ech after other, God so wys me save,
Tr 2 979 Ne myghte me so gladen; lo, myn herte,
Tr 2 980 It spredeth so for joie it wol tosterte!
Tr 2 981 " But, Lord, how shal I doon? How shal I lyven?
Tr 2 982 Whan shal I next my deere herte see?
Tr 2 983 How shal this longe tyme awey be dryven
Tr 2 984 Til that thow be ayein at hire fro me?
Tr 2 985 Thow maist answer, `Abid, abid,' but he
Tr 2 986 That hangeth by the nekke, soth to seyne
Tr 2 987 In gret disese abideth for the peyne. "
Tr 2 988 " Al esily, now, for the love of Marte, "
Tr 2 989 Quod Pandarus, " for every thing hath tyme.
Tr 2 990 So longe abid til that the nyght departe,
Tr 2 991 For also siker as thow list here by me,
Tr 2 992 And God toforn, I wol be ther at pryme;
Tr 2 993 And forthi, werk somwhat as I shal seye,
Tr 2 994 Or on som other wight this charge leye.
Tr 2 995 " For, pardee, God woot I have evere yit
Tr 2 996 Ben redy the to serve, and to this nyght
Tr 2 997 Have I naught feyned, but emforth my wit
Tr 2 998 Don al thi lust, and shal with al my myght.
Tr 2 999 Do now as I shal seyn, and far aright;
Tr 2 1000 And if thow nylt, wite al thiself thi care!
Tr 2 1001 On me is nought along thyn yvel fare.
Tr 2 1002 " I woot wel that thow wiser art than I
Tr 2 1003 A thousand fold, but if I were as thow,
Tr 2 1004 God help me so, as I wolde outrely
Tr 2 1005 Of myn owen hond write hire right now
Tr 2 1006 A lettre, in which I wolde hire tellen how
Tr 2 1007 I ferde amys, and hire biseche of routhe.
Tr 2 1008 Now help thiself, and leve it nought for slouthe!
Tr 2 1009 " And I myself wol therwith to hire gon;
Tr 2 1010 And whan thow woost that I am with hire there,
Tr 2 1011 Worth thow upon a courser right anon --
Tr 2 1012 Ye, hardily, right in thi beste gere --
Tr 2 1013 And ryd forth by the place, as nought ne were,
Tr 2 1014 And thow shalt fynde us, if I may, sittynge
Tr 2 1015 At som wyndow, into the strete lokynge.
Tr 2 1016 " And if the list, than maystow us salue;
Tr 2 1017 And upon me make thow thi countenaunce;
Tr 2 1018 But by thi lif, be war and faste eschue
Tr 2 1019 To tarien ought -- God shilde us fro meschaunce!
Tr 2 1020 Rid forth thi wey, and hold thi governaunce;
Tr 2 1021 And we shal speek of the somwhat, I trowe,
Tr 2 1022 Whan thow art gon, to don thyn eris glowe!
Tr 2 1023 " Towchyng thi lettre, thou art wys ynough.
Tr 2 1024 I woot thow nylt it dygneliche endite,
Tr 2 1025 As make it with thise argumentes tough;
Tr 2 1026 Ne scryvenyssh or craftyly thow it write;
Tr 2 1027 Biblotte it with thi teris ek a lite;
Tr 2 1028 And if thow write a goodly word al softe,
Tr 2 1029 Though it be good, reherce it nought to ofte.
Tr 2 1030 " For though the beste harpour upon lyve
Tr 2 1031 Wolde on the beste sowned joly harpe
Tr 2 1032 That evere was, with alle his fyngres fyve
Tr 2 1033 Touche ay o stryng, or ay o werbul harpe,
Tr 2 1034 Were his nayles poynted nevere so sharpe,
Tr 2 1035 It sholde maken every wight to dulle,
Tr 2 1036 To here his glee, and of his strokes fulle.
Tr 2 1037 " Ne jompre ek no discordant thyng yfeere,
Tr 2 1038 As thus, to usen termes of phisik
Tr 2 1039 In loves termes; hold of thi matere
Tr 2 1040 The forme alwey, and do that it be lik;
Tr 2 1041 For if a peyntour wolde peynte a pyk
Tr 2 1042 With asses feet, and hedde it as an ape,
Tr 2 1043 It cordeth naught, so were it but a jape. "
Tr 2 1044 This counseil liked wel to Troilus,
Tr 2 1045 But, as a dredful lovere, he seyde this:
Tr 2 1046 " Allas, my deere brother Pandarus,
Tr 2 1047 I am ashamed for to write, ywys,
Tr 2 1048 Lest of myn innocence I seyde amys,
Tr 2 1049 Or that she nolde it for despit receyve;
Tr 2 1050 Than were I ded: ther myght it nothyng weyve. "
Tr 2 1051 To that Pandare answered, " If the lest,
Tr 2 1052 Do that I seye, and lat me therwith gon;
Tr 2 1053 For by that Lord that formede est and west,
Tr 2 1054 I hope of it to brynge answere anon
Tr 2 1055 Of hire hond; and if that thow nylt noon,
Tr 2 1056 Lat be, and sory mote he ben his lyve
Tr 2 1057 Ayeins thi lust that helpeth the to thryve. "
Tr 2 1058 Quod Troilus, " Depardieux, ich assente!
Tr 2 1059 Sith that the list, I wil arise and write;
Tr 2 1060 And blisful God prey ich with good entente,
Tr 2 1061 The viage, and the lettre I shal endite,
Tr 2 1062 So spede it; and thow, Minerva, the white,
Tr 2 1063 Yif thow me wit my lettre to devyse. "
Tr 2 1064 And sette hym down, and wrot right in this wyse:
Tr 2 1065 First he gan hire his righte lady calle,
Tr 2 1066 His hertes lif, his lust, his sorwes leche,
Tr 2 1067 His blisse, and ek thise other termes alle
Tr 2 1068 That in swich cas thise loveres alle seche;
Tr 2 1069 And in ful humble wise, as in his speche,
Tr 2 1070 He gan hym recomaunde unto hire grace;
Tr 2 1071 To telle al how, it axeth muchel space.
Tr 2 1072 And after this ful lowely he hire preyde
Tr 2 1073 To be nought wroth, thogh he, of his folie,
Tr 2 1074 So hardy was to hire to write, and seyde
Tr 2 1075 That love it made, or elles most he die,
Tr 2 1076 And pitousli gan mercy for to crye;
Tr 2 1077 And after that he seyde -- and leigh ful loude --
Tr 2 1078 Hymself was litel worth, and lasse he koude;
Tr 2 1079 And that she sholde han his konnyng excused,
Tr 2 1080 That litel was, and ek he dredde hire soo;
Tr 2 1081 And his unworthynesse he ay acused;
Tr 2 1082 And after that than gan he telle his woo --
Tr 2 1083 But that was endeles, withouten hoo --
Tr 2 1084 And seyde he wolde in trouthe alwey hym holde;
Tr 2 1085 And radde it over, and gan the lettre folde.
Tr 2 1086 And with his salte teris gan he bathe
Tr 2 1087 The ruby in his signet, and it sette
Tr 2 1088 Upon the wex deliverliche and rathe.
Tr 2 1089 Therwith a thousand tymes er he lette
Tr 2 1090 He kiste tho the lettre that he shette,
Tr 2 1091 And seyde, " Lettre, a blisful destine
Tr 2 1092 The shapyn is. my lady shal the see! "
Tr 2 1093 This Pandare tok the lettre, and that bytyme
Tr 2 1094 A-morwe, and to his neces paleis sterte,
Tr 2 1095 And faste he swor that it was passed prime,
Tr 2 1096 And gan to jape, and seyde, " Ywys, myn herte,
Tr 2 1097 So fressh it is, although it sore smerte,
Tr 2 1098 I may naught slepe nevere a Mayes morwe;
Tr 2 1099 I have a joly wo, a lusty sorwe. "
Tr 2 1100 Criseyde, whan that she hire uncle herde,
Tr 2 1101 With dredful herte, and desirous to here
Tr 2 1102 The cause of his comynge, thus answerde:
Tr 2 1103 " Now, by youre fey, myn uncle, " quod she, " dere,
Tr 2 1104 What manere wyndes gydeth yow now here?
Tr 2 1105 Tel us youre joly wo and youre penaunce.
Tr 2 1106 How ferforth be ye put in loves daunce? "
Tr 2 1107 " By God, " quod he, " I hoppe alwey byhynde! "
Tr 2 1108 And she to laughe, it thoughte hire herte brest.
Tr 2 1109 Quod Pandarus, " Loke alwey that ye fynde
Tr 2 1110 Game in myn hood; but herkneth, if yow lest!
Tr 2 1111 Ther is right now come into town a gest,
Tr 2 1112 A Greek espie, and telleth newe thinges,
Tr 2 1113 For which I come to telle yow tydynges.
Tr 2 1114 " Into the gardyn go we, and ye shal here,
Tr 2 1115 Al pryvely, of this a long sermoun. "
Tr 2 1116 With that they wenten arm in arm yfeere
Tr 2 1117 Into the gardyn from the chaumbre down;
Tr 2 1118 And whan that he so fer was that the sown
Tr 2 1119 Of that he spak no man heren myghte,
Tr 2 1120 He seyde hire thus, and out the lettre plighte:
Tr 2 1121 " Lo, he that is al holy youres free
Tr 2 1122 Hym recomaundeth lowely to youre grace,
Tr 2 1123 And sente yow this lettre here by me.
Tr 2 1124 Avyseth yow on it, whan ye han space,
Tr 2 1125 And of som goodly answere yow purchace,
Tr 2 1126 Or, helpe me God, so pleynly for to seyne,
Tr 2 1127 He may nat longe lyven for his peyne. "
Tr 2 1128 Ful dredfully tho gan she stonden stylle,
Tr 2 1129 And took it naught, but al hire humble chere
Tr 2 1130 Gan for to chaunge, and seyde, " Scrit ne bille,
Tr 2 1131 For love of God, that toucheth swich matere,
Tr 2 1132 Ne bryng me noon; and also, uncle deere,
Tr 2 1133 To myn estat have more reward, I preye,
Tr 2 1134 Than to his lust! What sholde I more seye?
Tr 2 1135 " And loketh now if this be resonable,
Tr 2 1136 And letteth nought, for favour ne for slouthe,
Tr 2 1137 To seyn a sooth; now were it covenable
Tr 2 1138 To myn estat, by God and by youre trouthe,
Tr 2 1139 To taken it, or to han of hym routhe,
Tr 2 1140 In harmyng of myself, or in repreve?
Tr 2 1141 Ber it ayein, for hym that ye on leve! "
Tr 2 1142 This Pandarus gan on hire for to stare,
Tr 2 1143 And seyde, " Now is this the grettest wondre
Tr 2 1144 That evere I seigh! Lat be this nyce fare!
Tr 2 1145 To dethe mot I smyten be with thondre,
Tr 2 1146 If for the citee which that stondeth yondre,
Tr 2 1147 Wolde I a lettre unto yow brynge or take
Tr 2 1148 To harm of yow! What list yow thus it make?
Tr 2 1149 " But thus ye faren, wel neigh alle and some,
Tr 2 1150 That he that most desireth yow to serve,
Tr 2 1151 Of hym ye recche leest wher he bycome,
Tr 2 1152 And whethir that he lyve or elles sterve.
Tr 2 1153 But for al that that ever I may deserve,
Tr 2 1154 Refuse it naught, " quod he, and hente hire faste,
Tr 2 1155 And in hire bosom the lettre down he thraste,
Tr 2 1156 And seyde hire, " Now cast it awey anon,
Tr 2 1157 That folk may seen and gauren on us tweye. "
Tr 2 1158 Quod she, " I kan abyde til they be gon " ;
Tr 2 1159 And gan to smyle, and seyde hym, " Em, I preye,
Tr 2 1160 Swich answere as yow list, youreself purveye,
Tr 2 1161 For trewely I nyl no lettre write. "
Tr 2 1162 " No? than wol I, " quod he, " so ye endite. "
Tr 2 1163 Therwith she lough, and seyde, " Go we dyne. "
Tr 2 1164 And he gan at hymself to jape faste,
Tr 2 1165 And seyde, " Nece, I have so gret a pyne
Tr 2 1166 For love, that everich other day I faste -- "
Tr 2 1167 And gan his beste japes forth to caste,
Tr 2 1168 And made hire so to laughe at his folye,
Tr 2 1169 That she for laughter wende for to dye.
Tr 2 1170 And whan that she was comen into halle,
Tr 2 1171 " Now, em, " quod she, " we wol go dyne anon. "
Tr 2 1172 And gan some of hire wommen to hire calle,
Tr 2 1173 And streght into hire chambre gan she gon;
Tr 2 1174 But of hire besynesses this was on --
Tr 2 1175 Amonges othere thynges, out of drede --
Tr 2 1176 Ful pryvely this lettre for to rede;
Tr 2 1177 Avysed word by word in every lyne,
Tr 2 1178 And fond no lak, she thoughte he koude good,
Tr 2 1179 And up it putte, and wente hire in to dyne.
Tr 2 1180 But Pandarus, that in a studye stood,
Tr 2 1181 Er he was war, she took hym by the hood,
Tr 2 1182 And seyde, " Ye were caught er that ye wiste. "
Tr 2 1183 " I vouche sauf, " quod he. " Do what you liste. "
Tr 2 1184 Tho wesshen they, and sette hem down, and ete;
Tr 2 1185 And after noon ful sleighly Pandarus
Tr 2 1186 Gan drawe hym to the wyndowe next the strete,
Tr 2 1187 And seyde, " Nece, who hath araied thus
Tr 2 1188 The yonder hous, that stant aforyeyn us? "
Tr 2 1189 " Which hous? " quod she, and gan for to byholde,
Tr 2 1190 And knew it wel, and whos it was hym tolde;
Tr 2 1191 And fillen forth in speche of thynges smale,
Tr 2 1192 And seten in the windowe bothe tweye.
Tr 2 1193 Whan Pandarus saugh tyme unto his tale,
Tr 2 1194 And saugh wel that hire folk were alle aweye,
Tr 2 1195 " Now, nece myn, tel on, " quod he; " I seye,
Tr 2 1196 How liketh yow the lettre that ye woot?
Tr 2 1197 Kan he theron? For, by my trouthe, I noot. "
Tr 2 1198 Therwith al rosy hewed tho wex she,
Tr 2 1199 And gan to homme, and seyde, " So I trowe. "
Tr 2 1200 " Aquite hym wel, for Goddes love, " quod he;
Tr 2 1201 " Myself to medes wol the lettre sowe. "
Tr 2 1202 And held his hondes up, and sat on knowe;
Tr 2 1203 " Now, goode nece, be it nevere so lite,
Tr 2 1204 Yif me the labour it to sowe and plite. "
Tr 2 1205 " Ye, for I kan so writen, " quod she tho;
Tr 2 1206 " And ek I noot what I sholde to hym seye. "
Tr 2 1207 " Nay, nece, " quod Pandare, " sey nat so.
Tr 2 1208 Yet at the leeste thonketh hym, I preye,
Tr 2 1209 Of his good wille, and doth hym nat to deye.
Tr 2 1210 Now, for the love of me, my nece deere,
Tr 2 1211 Refuseth nat at this tid my prayere! "
Tr 2 1212 " Depardieux, " quod she, " God leve al be wel!
Tr 2 1213 God help me so, this is the firste lettre
Tr 2 1214 That evere I wroot, ye, al or any del. "
Tr 2 1215 And into a closet, for t' avise hire bettre,
Tr 2 1216 She wente allone, and gan hire herte unfettre
Tr 2 1217 Out of desdaynes prisoun but a lite,
Tr 2 1218 And sette hire down, and gan a lettre write,
Tr 2 1219 Of which to telle in short is myn entente
Tr 2 1220 Th' effect, as fer as I kan understonde.
Tr 2 1221 She thanked hym of al that he wel mente
Tr 2 1222 Towardes hire, but holden hym in honde
Tr 2 1223 She nolde nought, ne make hireselven bonde
Tr 2 1224 In love; but as his suster, hym to plese,
Tr 2 1225 She wolde fayn to doon his herte an ese.
Tr 2 1226 She shette it, and to Pandare in gan goon,
Tr 2 1227 Ther as he sat and loked into the strete,
Tr 2 1228 And down she sette hire by hym on a stoon
Tr 2 1229 Of jaspre, upon a quysshyn gold-ybete,
Tr 2 1230 And seyde, " As wisly help me God the grete,
Tr 2 1231 I nevere dide thing with more peyne
Tr 2 1232 Than writen this, to which ye me constreyne, "
Tr 2 1233 And took it hym. He thonked hire and seyde,
Tr 2 1234 " God woot, of thyng ful often looth bygonne
Tr 2 1235 Comth ende good; and nece myn, Criseyde,
Tr 2 1236 That ye to hym of hard now ben ywonne
Tr 2 1237 Oughte he be glad, by God and yonder sonne;
Tr 2 1238 For-whi men seith, `Impressiounes lighte
Tr 2 1239 Ful lightly ben ay redy to the flighte.'
Tr 2 1240 " But ye han played tirant neigh to longe,
Tr 2 1241 And hard was it youre herte for to grave.
Tr 2 1242 Now stynte, that ye no lenger on it honge,
Tr 2 1243 Al wolde ye the forme of daunger save,
Tr 2 1244 But hasteth you to doon hym joye have;
Tr 2 1245 For trusteth wel, to long ydoon hardnesse
Tr 2 1246 Causeth despit ful often for destresse. "
Tr 2 1247 And right as they declamed this matere,
Tr 2 1248 Lo, Troilus, right at the stretes ende,
Tr 2 1249 Com rydyng with his tenthe som yfere,
Tr 2 1250 Al softely, and thiderward gan bende
Tr 2 1251 Ther as they sete, as was his way to wende
Tr 2 1252 To paleis-ward; and Pandare hym aspide,
Tr 2 1253 And seyde, " Nece, ysee who comth here ride!
Tr 2 1254 " O fle naught in (he seeth us, I suppose),
Tr 2 1255 Lest he may thynken that ye hym eschuwe. "
Tr 2 1256 " Nay, nay, " quod she, and wex as red as rose.
Tr 2 1257 With that he gan hire humbly to saluwe
Tr 2 1258 With dredful chere, and oft his hewes muwe;
Tr 2 1259 And up his look debonairly he caste,
Tr 2 1260 And bekked on Pandare, and forth he paste.
Tr 2 1261 God woot if he sat on his hors aright,
Tr 2 1262 Or goodly was biseyn, that ilke day!
Tr 2 1263 God woot wher he was lik a manly knyght!
Tr 2 1264 What sholde I drecche, or telle of his aray?
Tr 2 1265 Criseyde, which that alle thise thynges say,
Tr 2 1266 To telle in short, hire liked al in-fere,
Tr 2 1267 His persoun, his aray, his look, his chere,
Tr 2 1268 His goodly manere, and his gentilesse,
Tr 2 1269 So wel that nevere, sith that she was born,
Tr 2 1270 Ne hadde she swych routh of his destresse;
Tr 2 1271 And how so she hath hard ben here-byforn,
Tr 2 1272 To God hope I, she hath now kaught a thorn,
Tr 2 1273 She shal nat pulle it out this nexte wyke.
Tr 2 1274 God sende mo swich thornes on to pike!
Tr 2 1275 Pandare, which that stood hire faste by,
Tr 2 1276 Felte iren hoot, and he bygan to smyte,
Tr 2 1277 And seyde, " Nece, I pray yow hertely,
Tr 2 1278 Tel me that I shal axen yow a lite:
Tr 2 1279 A womman that were of his deth to wite,
Tr 2 1280 Withouten his gilt, but for hire lakked routhe,
Tr 2 1281 Were it wel doon? " Quod she, " Nay, by my trouthe! "
Tr 2 1282 " God help me so, " quod he, " ye sey me soth.
Tr 2 1283 Ye felen wel youreself that I nought lye.
Tr 2 1284 Lo, yond he rit! " Quod she, " Ye, so he doth! "
Tr 2 1285 " Wel, " quod Pandare, " as I have told yow thrie,
Tr 2 1286 Lat be youre nyce shame and youre folie,
Tr 2 1287 And spek with hym in esyng of his herte;
Tr 2 1288 Lat nycete nat do yow bothe smerte. "
Tr 2 1289 But theron was to heven and to doone.
Tr 2 1290 Considered al thing it may nat be;
Tr 2 1291 And whi? For speche; and it were ek to soone
Tr 2 1292 To graunten hym so gret a libertee.
Tr 2 1293 For pleynly hire entente, as seyde she,
Tr 2 1294 Was for to love hym unwist, if she myghte,
Tr 2 1295 And guerdoun hym with nothing but with sighte.
Tr 2 1296 But Pandarus thought, " It shal nought be so,
Tr 2 1297 Yif that I may; this nyce opynyoun
Tr 2 1298 Shal nought be holden fully yeres two. "
Tr 2 1299 What sholde I make of this a long sermoun?
Tr 2 1300 He moste assente on that conclusioun,
Tr 2 1301 As for the tyme; and whan that it was eve,
Tr 2 1302 And al was wel, he roos and tok his leve.
Tr 2 1303 And on his wey ful faste homward he spedde,
Tr 2 1304 And right for joye he felte his herte daunce;
Tr 2 1305 And Troilus he fond allone abedde,
Tr 2 1306 That lay, as do thise lovers, in a traunce
Tr 2 1307 Bitwixen hope and derk disesperaunce.
Tr 2 1308 But Pandarus, right at his in-comynge,
Tr 2 1309 He song, as who seyth, " Somwhat I brynge, "
Tr 2 1310 And seyde, " Who is in his bed so soone
Tr 2 1311 Iburied thus? " " It am I, frend, " quod he.
Tr 2 1312 " Who, Troilus? Nay, help me so the moone, "
Tr 2 1313 Quod Pandarus, " thow shalt arise and see
Tr 2 1314 A charme that was sent right now to the,
Tr 2 1315 The which kan helen the of thyn accesse,
Tr 2 1316 If thow do forthwith al thi bisynesse. "
Tr 2 1317 " Ye, thorugh the myght of God, " quod Troilus,
Tr 2 1318 And Pandarus gan hym the lettre take,
Tr 2 1319 And seyde, " Parde, God hath holpen us!
Tr 2 1320 Have here a light, and loke on al this blake. "
Tr 2 1321 But ofte gan the herte glade and quake
Tr 2 1322 Of Troilus, whil that he gan it rede,
Tr 2 1323 So as the wordes yave hym hope or drede.
Tr 2 1324 But finaly, he took al for the beste
Tr 2 1325 That she hym wroot, for somwhat he byheld
Tr 2 1326 On which hym thoughte he myghte his herte reste,
Tr 2 1327 Al covered she tho wordes under sheld.
Tr 2 1328 Thus to the more worthi part he held,
Tr 2 1329 That what for hope and Pandarus byheste,
Tr 2 1330 His grete wo foryede he at the leste.
Tr 2 1331 But as we may alday oureselven see,
Tr 2 1332 Thorugh more wode or col, the more fir,
Tr 2 1333 Right so encreese hope, of what it be,
Tr 2 1334 Therwith ful ofte encresseth ek desir;
Tr 2 1335 Or as an ook comth of a litil spir,
Tr 2 1336 So thorugh this lettre which that she hym sente
Tr 2 1337 Encrescen gan desir, of which he brente.
Tr 2 1338 Wherfore I seye alwey, that day and nyght
Tr 2 1339 This Troilus gan to desiren moore
Tr 2 1340 Thanne he did erst, thorugh hope, and did his myght
Tr 2 1341 To preessen on, as by Pandarus loore,
Tr 2 1342 And writen to hire of his sorwes soore.
Tr 2 1343 Fro day to day he leet it nought refreyde,
Tr 2 1344 That by Pandare he wroot somwhat or seyde;
Tr 2 1345 And dide also his other observaunces
Tr 2 1346 That til a lovere longeth in this cas;
Tr 2 1347 And after that thise dees torned on chaunces,
Tr 2 1348 So was he outher glad or seyde " Allas! "
Tr 2 1349 And held after his gistes ay his pas;
Tr 2 1350 And after swiche answeres as he hadde,
Tr 2 1351 So were his dayes sory outher gladde.
Tr 2 1352 But to Pandare alwey was his recours,
Tr 2 1353 And pitously gan ay tyl hym to pleyne,
Tr 2 1354 And hym bisoughte of reed and som socours.
Tr 2 1355 And Pandarus, that sey his woode peyne,
Tr 2 1356 Wex wel neigh ded for routhe, sooth to seyne,
Tr 2 1357 And bisily with al his herte caste
Tr 2 1358 Som of his wo to slen, and that as faste;
Tr 2 1359 And seyde, " Lord, and frend, and brother dere,
Tr 2 1360 God woot that thi disese doth me wo.
Tr 2 1361 But wiltow stynten al this woful cheere,
Tr 2 1362 And, by my trouthe, er it be dayes two,
Tr 2 1363 And God toforn, yet shal I shape it so,
Tr 2 1364 That thow shalt come into a certeyn place,
Tr 2 1365 There as thow mayst thiself hire preye of grace.
Tr 2 1366 " And certeynly -- I noot if thow it woost,
Tr 2 1367 But tho that ben expert in love it seye --
Tr 2 1368 It is oon of the thynges forthereth most,
Tr 2 1369 A man to han a layser for to preye,
Tr 2 1370 And siker place his wo for to bywreye;
Tr 2 1371 For in good herte it mot som routhe impresse,
Tr 2 1372 To here and see the giltlees in distresse.
Tr 2 1373 " Peraunter thynkestow: though it be so,
Tr 2 1374 That Kynde wolde don hire to bygynne
Tr 2 1375 To have a manere routhe upon my woo,
Tr 2 1376 Seyth Daunger, `Nay, thow shalt me nevere wynne!'
Tr 2 1377 So reulith hire hir hertes gost withinne,
Tr 2 1378 That though she bende, yeet she stant on roote;
Tr 2 1379 What in effect is this unto my boote?
Tr 2 1380 " Thenk here-ayeins: whan that the stordy ook,
Tr 2 1381 On which men hakketh ofte, for the nones,
Tr 2 1382 Receyved hath the happy fallyng strook,
Tr 2 1383 The greete sweigh doth it come al at ones,
Tr 2 1384 As don thise rokkes or thise milnestones;
Tr 2 1385 For swifter cours comth thyng that is of wighte,
Tr 2 1386 Whan it descendeth, than don thynges lighte.
Tr 2 1387 " And reed that boweth down for every blast,
Tr 2 1388 Ful lightly, cesse wynd, it wol aryse;
Tr 2 1389 But so nyl nought an ook, whan it is cast;
Tr 2 1390 It nedeth me nought the longe to forbise.
Tr 2 1391 Men shal rejoissen of a gret empryse
Tr 2 1392 Acheved wel, and stant withouten doute,
Tr 2 1393 Al han men ben the lenger theraboute.
Tr 2 1394 " But, Troilus, yet telle me, if the lest,
Tr 2 1395 A thing now which that I shal axen the:
Tr 2 1396 Which is thi brother that thow lovest best,
Tr 2 1397 As in thi verray hertes privetee? "
Tr 2 1398 " Iwis, my brother Deiphebus, " quod he.
Tr 2 1399 " Now, " quod Pandare, " er houres twyes twelve,
Tr 2 1400 He shal the ese, unwist of it hymselve.
Tr 2 1401 " Now lat m' alone, and werken as I may, "
Tr 2 1402 Quod he; and to Deiphebus wente he tho,
Tr 2 1403 Which hadde his lord and grete frend ben ay;
Tr 2 1404 Save Troilus, no man he loved so.
Tr 2 1405 To telle in short, withouten wordes mo,
Tr 2 1406 Quod Pandarus, " I pray yow that ye be
Tr 2 1407 Frend to a cause which that toucheth me. "
Tr 2 1408 " Yis, parde, " quod Deiphebus, " wel thow woost,
Tr 2 1409 In al that evere I may, and God tofore,
Tr 2 1410 Al nere it but for man I love moost,
Tr 2 1411 My brother Troilus; but sey wherfore
Tr 2 1412 It is. for sith that day that I was bore,
Tr 2 1413 I nas, ne nevere mo to ben I thynke,
Tr 2 1414 Ayeins a thing that myghte the forthynke. "
Tr 2 1415 Pandare gan hym thanke, and to hym seyde,
Tr 2 1416 " Lo, sire, I have a lady in this town,
Tr 2 1417 That is my nece, and called is Criseyde,
Tr 2 1418 Which some men wolden don oppressioun,
Tr 2 1419 And wrongfully han hire possessioun;
Tr 2 1420 Wherfore I of youre lordship yow biseche
Tr 2 1421 To ben oure frend, withouten more speche. "
Tr 2 1422 Deiphebus hym answerde, " O, is nat this,
Tr 2 1423 That thow spekest of to me thus straungely,
Tr 2 1424 Criseda, my frend? " He seyde, " Yis. "
Tr 2 1425 " Than nedeth, " quod Deiphebus, " hardyly,
Tr 2 1426 Namore to speke, for trusteth wel that I
Tr 2 1427 Wol be hire champioun with spore and yerde;
Tr 2 1428 I roughte nought though alle hire foos it herde.
Tr 2 1429 " But tel me how -- thow woost of this matere --
Tr 2 1430 It myghte best avaylen. " " Now lat se, "
Tr 2 1431 Quod Pandarus; " if ye, my lord so dere,
Tr 2 1432 Wolden as now do this honour to me,
Tr 2 1433 To preyen hire to-morwe, lo, that she
Tr 2 1434 Come unto yow, hire pleyntes to devise,
Tr 2 1435 Hire adversaries wolde of it agrise.
Tr 2 1436 " And yif I more dorste preye as now,
Tr 2 1437 And chargen yow to han so gret travaille,
Tr 2 1438 To han some of youre bretheren here with yow,
Tr 2 1439 That myghten to hire cause bet availle,
Tr 2 1440 Than wot I wel she myghte nevere faille
Tr 2 1441 For to ben holpen, what at youre instaunce,
Tr 2 1442 What with hire other frendes governaunce. "
Tr 2 1443 Deiphebus, which that comen was of kynde
Tr 2 1444 To alle honour and bounte to consente,
Tr 2 1445 Answerd, " It shal be don; and I kan fynde
Tr 2 1446 Yet grettere help to this in myn entente.
Tr 2 1447 What wiltow seyn if I for Eleyne sente
Tr 2 1448 To speke of this? I trowe it be the beste,
Tr 2 1449 For she may leden Paris as hire leste.
Tr 2 1450 " Of Ector, which that is my lord, my brother,
Tr 2 1451 It nedeth naught to preye hym frend to be;
Tr 2 1452 For I have herd hym, o tyme and ek oother,
Tr 2 1453 Speke of Cryseyde swich honour that he
Tr 2 1454 May seyn no bet, swich hap to hym hath she.
Tr 2 1455 It nedeth naught his helpes for to crave;
Tr 2 1456 He shal be swich, right as we wol hym have.
Tr 2 1457 " Spek thow thiself also to Troilus
Tr 2 1458 On my byhalve, and prey hym with us dyne. "
Tr 2 1459 " Syre, al this shal be don, " quod Pandarus,
Tr 2 1460 And took his leve, and nevere gan to fyne,
Tr 2 1461 But to his neces hous, as streyght as lyne,
Tr 2 1462 He com; and fond hire fro the mete arise,
Tr 2 1463 And sette hym down, and spak right in this wise:
Tr 2 1464 He seide, " O verray God, so have I ronne!
Tr 2 1465 Lo, nece myn, se ye nought how I swete?
Tr 2 1466 I not wheither ye the more thank me konne.
Tr 2 1467 Be ye naught war how false Poliphete
Tr 2 1468 Is now aboute eftsones for to plete,
Tr 2 1469 And brynge on yow advocacies newe? "
Tr 2 1470 " I, no! " quod she, and chaunged al hire hewe.
Tr 2 1471 " What is he more aboute, me to drecche
Tr 2 1472 And don me wrong? What shal I doon, allas?
Tr 2 1473 Yet of hymself nothing ne wolde I recche,
Tr 2 1474 Nere it for Antenor and Eneas,
Tr 2 1475 That ben his frendes in swich manere cas.
Tr 2 1476 But, for the love of God, myn uncle deere,
Tr 2 1477 No fors of that; lat hym han al yfeere,
Tr 2 1478 " Withouten that I have ynough for us. "
Tr 2 1479 " Nay, " quod Pandare, " it shal nothing be so.
Tr 2 1480 For I have ben right now at Deiphebus,
Tr 2 1481 At Ector, and myn oother lordes moo,
Tr 2 1482 And shortly maked ech of hem his foo,
Tr 2 1483 That, by my thrift, he shal it nevere wynne,
Tr 2 1484 For aught he kan, whan that so he bygynne. "
Tr 2 1485 And as thei casten what was best to doone,
Tr 2 1486 Deiphebus, of his owen curteisie,
Tr 2 1487 Com hire to preye, in his propre persone,
Tr 2 1488 To holde hym on the morwe compaignie
Tr 2 1489 At dyner, which she nolde nought denye,
Tr 2 1490 But goodly gan to his preier obeye.
Tr 2 1491 He thonked hire, and went upon his weye.
Tr 2 1492 Whan this was don, this Pandare up anon,
Tr 2 1493 To telle in short, and forth gan for to wende
Tr 2 1494 To Troilus, as stille as any ston;
Tr 2 1495 And al this thyng he tolde hym, word and ende,
Tr 2 1496 And how that he Deiphebus gan to blende,
Tr 2 1497 And seyde hym, " Now is tyme, if that thow konne,
Tr 2 1498 To bere the wel tomorwe, and al is wonne.
Tr 2 1499 " Now spek, now prey, now pitously compleyne;
Tr 2 1500 Lat nought for nyce shame, or drede, or slouthe!
Tr 2 1501 Somtyme a man mot telle his owen peyne.
Tr 2 1502 Bileve it, and she shal han on the routhe:
Tr 2 1503 Thow shalt be saved by thi feyth, in trouthe.
Tr 2 1504 But wel woot I thow art now in drede,
Tr 2 1505 And what it is, I leye, I kan arede.
Tr 2 1506 " Thow thynkest now, `How sholde I don al this?
Tr 2 1507 For by my cheres mosten folk aspie
Tr 2 1508 That for hire love is that I fare amys;
Tr 2 1509 Yet hadde I levere unwist for sorwe dye.'
Tr 2 1510 Now thynk nat so, for thow dost gret folie;
Tr 2 1511 For I right now have founden o manere
Tr 2 1512 Of sleyghte, for to coveren al thi cheere.
Tr 2 1513 " Thow shalt gon over nyght, and that bylyve,
Tr 2 1514 Unto Deiphebus hous as the to pleye,
Tr 2 1515 Thi maladie awey the bet to dryve --
Tr 2 1516 For-whi thow semest sik, soth for to seye.
Tr 2 1517 Sone after that, down in thi bed the leye,
Tr 2 1518 And sey thow mayst no lenger up endure,
Tr 2 1519 And ly right there, and byd thyn aventure.
Tr 2 1520 " Sey that thi fevre is wont the for to take
Tr 2 1521 The same tyme, and lasten til a-morwe;
Tr 2 1522 And lat se now how wel thow kanst it make,
Tr 2 1523 For, parde, sik is he that is in sorwe.
Tr 2 1524 Go now, farwel! And Venus here to borwe,
Tr 2 1525 I hope, and thow this purpos holde ferme,
Tr 2 1526 Thi grace she shal fully ther conferme. "
Tr 2 1527 Quod Troilus, " Iwis, thow nedeles
Tr 2 1528 Conseilest me that siklich I me feyne,
Tr 2 1529 For I am sik in ernest, douteles,
Tr 2 1530 So that wel neigh I sterve for the peyne. "
Tr 2 1531 Quod Pandarus, " Thow shalt the bettre pleyne,
Tr 2 1532 And hast the lasse need to countrefete,
Tr 2 1533 For hym men demen hoot that men seen swete.
Tr 2 1534 " Lo, hold the at thi triste cloos, and I
Tr 2 1535 Shal wel the deer unto thi bowe dryve. "
Tr 2 1536 Therwith he took his leve al softely,
Tr 2 1537 And Troilus to paleis wente blyve.
Tr 2 1538 So glad ne was he nevere in al his lyve,
Tr 2 1539 And to Pandarus reed gan al assente,
Tr 2 1540 And to Deiphebus hous at nyght he wente.
Tr 2 1541 What nedeth yow to tellen al the cheere
Tr 2 1542 That Deiphebus unto his brother made,
Tr 2 1543 Or his accesse, or his sikliche manere,
Tr 2 1544 How men gan hym with clothes for to lade
Tr 2 1545 Whan he was leyd, and how men wolde hym glade?
Tr 2 1546 But al for nought; he held forth ay the wyse
Tr 2 1547 That ye han herd Pandare er this devyse.
Tr 2 1548 But certayn is, er Troilus hym leyde,
Tr 2 1549 Deiphebus had hym preied over-nyght
Tr 2 1550 To ben a frend and helpyng to Criseyde.
Tr 2 1551 God woot that he it graunted anon-right,
Tr 2 1552 To ben hire fulle frend with al his myght.
Tr 2 1553 But swich a nede was to preye hym thenne,
Tr 2 1554 As for to bidde a wood man for to renne!
Tr 2 1555 The morwen com, and neighen gan the tyme
Tr 2 1556 Of meeltid, that the faire queene Eleyne
Tr 2 1557 Shoop hire to ben, an houre after the prime,
Tr 2 1558 With Deiphebus, to whom she nolde feyne;
Tr 2 1559 But as his suster, homly, soth to seyne,
Tr 2 1560 She com to dyner in hire pleyne entente.
Tr 2 1561 But God and Pandare wist al what this mente.
Tr 2 1562 Com ek Criseyde, al innocent of this,
Tr 2 1563 Antigone, hire suster Tarbe also.
Tr 2 1564 But fle we now prolixitee best is,
Tr 2 1565 For love of God, and lat us faste go
Tr 2 1566 Right to th' effect, withouten tales mo,
Tr 2 1567 Whi al this folk assembled in this place;
Tr 2 1568 And lat us of hire saluynges pace.
Tr 2 1569 Gret honour did hem Deiphebus, certeyn,
Tr 2 1570 And fedde hem wel with al that myghte like;
Tr 2 1571 But evere mo " Allas! " was his refreyn,
Tr 2 1572 " My goode brother Troilus, the syke,
Tr 2 1573 Lith yet " -- and therwithal he gan to sike;
Tr 2 1574 And after that, he peyned hym to glade
Tr 2 1575 Hem as he myghte, and cheere good he made.
Tr 2 1576 Compleyned ek Eleyne of his siknesse
Tr 2 1577 So feythfully that pite was to here,
Tr 2 1578 And every wight gan waxen for accesse
Tr 2 1579 A leche anon, and seyde, " In this manere
Tr 2 1580 Men curen folk. " -- " This charme I wol yow leere. "
Tr 2 1581 But ther sat oon, al list hire nought to teche,
Tr 2 1582 That thoughte, " Best koud I yet ben his leche. "
Tr 2 1583 After compleynte, hym gonnen they to preyse,
Tr 2 1584 As folk don yet whan som wight hath bygonne
Tr 2 1585 To preise a man, and up with pris hym reise
Tr 2 1586 A thousand fold yet heigher than the sonne:
Tr 2 1587 " He is, he kan, that fewe lordes konne. "
Tr 2 1588 And Pandarus, of that they wolde afferme,
Tr 2 1589 He naught forgat hire preisynge to conferme.
Tr 2 1590 Herde al this thyng Criseyde wel inough,
Tr 2 1591 And every word gan for to notifie;
Tr 2 1592 For which with sobre cheere hire herte lough.
Tr 2 1593 For who is that ne wolde hire glorifie,
Tr 2 1594 To mowen swich a knyght don lyve or dye?
Tr 2 1595 But al passe I, lest ye to longe dwelle;
Tr 2 1596 For for o fyn is al that evere I telle.
Tr 2 1597 The tyme com fro dyner for to ryse,
Tr 2 1598 And as hem aughte, arisen everichon.
Tr 2 1599 And gonne a while of this and that devise.
Tr 2 1600 But Pandarus brak al that speche anon,
Tr 2 1601 And seide to Deiphebus, " Wol ye gon,
Tr 2 1602 If it youre wille be, as I yow preyde,
Tr 2 1603 To speke here of the nedes of Criseyde? "
Tr 2 1604 Eleyne, which that by the hond hire held,
Tr 2 1605 Took first the tale, and seyde, " Go we blyve " ;
Tr 2 1606 And goodly on Criseyde she biheld,
Tr 2 1607 And seyde, " Joves lat hym nevere thryve
Tr 2 1608 That doth yow harm, and brynge hym soone of lyve,
Tr 2 1609 And yeve me sorwe, but he shal it rewe,
Tr 2 1610 If that I may, and alle folk be trewe! "
Tr 2 1611 " Tel thow thi neces cas, " quod Deiphebus
Tr 2 1612 To Pandarus, " for thow kanst best it telle. "
Tr 2 1613 " My lordes and my ladys, it stant thus:
Tr 2 1614 What sholde I lenger, " quod he, " do yow dwelle? "
Tr 2 1615 He rong hem out a proces lik a belle
Tr 2 1616 Upon hire foo that highte Poliphete,
Tr 2 1617 So heynous that men myghten on it spete.
Tr 2 1618 Answerde of this ech werse of hem than other,
Tr 2 1619 And Poliphete they gonnen thus to warien:
Tr 2 1620 " Anhonged be swich oon, were he my brother!
Tr 2 1621 And so he shal, for it ne may nought varien! "
Tr 2 1622 What shold I lenger in this tale tarien?
Tr 2 1623 Pleynliche, alle at ones, they hire highten
Tr 2 1624 To ben hire help in al that evere they myghten.
Tr 2 1625 Spak than Eleyne, and seyde, " Pandarus,
Tr 2 1626 Woot ought my lord, my brother, this matere --
Tr 2 1627 I meene Ector -- or woot it Troilus? "
Tr 2 1628 He seyde, " Ye, but wole ye now me here?
Tr 2 1629 Me thynketh this, sith that Troilus is here,
Tr 2 1630 It were good, if that ye wolde assente,
Tr 2 1631 She tolde hireself hym al this er she wente.
Tr 2 1632 " For he wol have the more hir grief at herte,
Tr 2 1633 By cause, lo, that she a lady is.
Tr 2 1634 And, by youre leve, I wol but in right sterte
Tr 2 1635 And do yow wyte, and that anon, iwys,
Tr 2 1636 If that he slepe, or wol ought here of this. "
Tr 2 1637 And in he lepte, and seyde hym in his ere,
Tr 2 1638 " God have thi soule, ibrought have I thi beere! "
Tr 2 1639 To smylen of this gan tho Troilus,
Tr 2 1640 And Pandarus, withouten rekenynge,
Tr 2 1641 Out wente anon to Eleyne and Deiphebus,
Tr 2 1642 And seyde hem, " So ther be no taryinge,
Tr 2 1643 Ne moore prees, he wol wel that ye brynge
Tr 2 1644 Criseda, my lady, that is here;
Tr 2 1645 And as he may enduren, he wol here.
Tr 2 1646 " But wel ye woot, the chaumbre is but lite,
Tr 2 1647 And fewe folk may lightly make it warm;
Tr 2 1648 Now loketh ye (for I wol have no wite
Tr 2 1649 To brynge in prees that myghte don hym harm,
Tr 2 1650 Or hym disesen, for my bettre arm)
Tr 2 1651 Wher it be bet she bide til eft-sonys;
Tr 2 1652 Now loketh ye that knowen what to doon is.
Tr 2 1653 " I sey for me, best is, as I kan knowe,
Tr 2 1654 That no wight in ne wente but ye tweye,
Tr 2 1655 But it were I, for I kan in a throwe
Tr 2 1656 Reherce hire cas unlik that she kan seye;
Tr 2 1657 And after this she may hym ones preye
Tr 2 1658 To ben good lord, in short, and take hire leve.
Tr 2 1659 This may nought muchel of his ese hym reve.
Tr 2 1660 " And ek, for she is straunge, he wol forbere
Tr 2 1661 His ese, which that hym thar nought for yow;
Tr 2 1662 Ek oother thing that toucheth nought to here
Tr 2 1663 He wol yow telle -- I woot it wel right now --
Tr 2 1664 That secret is, and for the townes prow. "
Tr 2 1665 And they, that nothyng knewe of his entente,
Tr 2 1666 Withouten more, to Troilus in they wente.
Tr 2 1667 Eleyne, in al hire goodly softe wyse,
Tr 2 1668 Gan hym salue, and wommanly to pleye,
Tr 2 1669 And seyde, " Iwys, ye moste alweies arise!
Tr 2 1670 Now faire brother, beth al hool, I preye! "
Tr 2 1671 And gan hire arm right over his shulder leye,
Tr 2 1672 And hym with al hire wit to reconforte;
Tr 2 1673 As she best koude, she gan hym to disporte.
Tr 2 1674 So after this quod she, " We yow biseke,
Tr 2 1675 My deere brother Deiphebus and I,
Tr 2 1676 For love of God -- and so doth Pandare eke --
Tr 2 1677 To ben good lord and frend, right hertely,
Tr 2 1678 Unto Criseyde, which that certeynly
Tr 2 1679 Receyveth wrong, as woot weel here Pandare,
Tr 2 1680 That kan hire cas wel bet than I declare. "
Tr 2 1681 This Pandarus gan newe his tong affile,
Tr 2 1682 And al hire cas reherce, and that anon.
Tr 2 1683 Whan it was seyd, soone after in a while,
Tr 2 1684 Quod Troilus, " As sone as I may gon,
Tr 2 1685 I wol right fayn with al my myght ben oon --
Tr 2 1686 Have God my trouthe -- hire cause to sustene. "
Tr 2 1687 " Good thrift have ye! " quod Eleyne the queene.
Tr 2 1688 Quod Pandarus, " And it youre wille be
Tr 2 1689 That she may take hire leve, er that she go? "
Tr 2 1690 " O, elles God forbede it, " tho quod he,
Tr 2 1691 " If that she vouche sauf for to do so. "
Tr 2 1692 And with that word quod Troilus, " Ye two,
Tr 2 1693 Deiphebus and my suster lief and deere,
Tr 2 1694 To yow have I to speke of o matere,
Tr 2 1695 " To ben avysed by youre reed the bettre -- "
Tr 2 1696 And fond, as hap was, at his beddes hed
Tr 2 1697 The copie of a tretys and a lettre
Tr 2 1698 That Ector hadde hym sent to axen red
Tr 2 1699 If swych a man was worthi to ben ded,
Tr 2 1700 Woot I nought who; but in a grisly wise
Tr 2 1701 He preyede hem anon on it avyse.
Tr 2 1702 Deiphebus gan this lettre for t' onfolde
Tr 2 1703 In ernest greet; so did Eleyne the queene;
Tr 2 1704 And romyng outward, faste it gonne byholde,
Tr 2 1705 Downward a steire, into an herber greene.
Tr 2 1706 This ilke thing they redden hem bitwene,
Tr 2 1707 And largely, the mountance of an houre,
Tr 2 1708 Thei gonne on it to reden and to poure.
Tr 2 1709 Now lat hem rede, and torne we anon
Tr 2 1710 To Pandarus, that gan ful faste prye
Tr 2 1711 That al was wel, and out he gan to gon
Tr 2 1712 Into the grete chaumbre, and that in hye,
Tr 2 1713 And seyde, " God save al this compaynye!
Tr 2 1714 Com, nece myn; my lady queene Eleyne
Tr 2 1715 Abideth yow, and ek my lordes tweyne.
Tr 2 1716 " Rys, take with yow youre nece Antigone,
Tr 2 1717 Or whom yow list; or no fors; hardyly
Tr 2 1718 The lesse prees, the bet; com forth with me,
Tr 2 1719 And loke that ye thonken humblely
Tr 2 1720 Hem alle thre, and whan ye may goodly
Tr 2 1721 Youre tyme se, taketh of hem youre leeve,
Tr 2 1722 Lest we to longe his restes hym byreeve. "
Tr 2 1723 Al innocent of Pandarus entente,
Tr 2 1724 Quod tho Criseyde, " Go we, uncle deere " ;
Tr 2 1725 And arm in arm inward with hym she wente,
Tr 2 1726 Avysed wel hire wordes and hire cheere;
Tr 2 1727 And Pandarus, in ernestful manere,
Tr 2 1728 Seyde, " Alle folk, for Goddes love, I preye,
Tr 2 1729 Stynteth right here, and softely yow pleye.
Tr 2 1730 " Avyseth yow what folk ben hire withinne,
Tr 2 1731 And in what plit oon is, God hym amende! "
Tr 2 1732 And inward thus, " Ful softely bygynne,
Tr 2 1733 Nece, I conjure and heighly yow defende,
Tr 2 1734 On his half which that soule us alle sende,
Tr 2 1735 And in the vertu of corones tweyne,
Tr 2 1736 Sle naught this man, that hath for yow this peyne!
Tr 2 1737 " Fy on the devel! Thynk which oon he is,
Tr 2 1738 And in what plit he lith. com of anon!
Tr 2 1739 Thynk al swich taried tyde, but lost it nys.
Tr 2 1740 That wol ye bothe seyn, whan ye ben oon.
Tr 2 1741 Secoundely, ther yet devyneth noon
Tr 2 1742 Upon yow two; come of now, if ye konne!
Tr 2 1743 While folk is blent, lo, al the tyme is wonne.
Tr 2 1744 " In titeryng, and pursuyte, and delayes,
Tr 2 1745 The folk devyne at waggyng of a stree;
Tr 2 1746 And though ye wolde han after mirye dayes,
Tr 2 1747 Than dar ye naught. And whi? For she, and she
Tr 2 1748 Spak swych a word; thus loked he, and he!
Tr 2 1749 Las, tyme ilost! I dar nought with yow dele.
Tr 2 1750 Com of, therfore, and bryngeth hym to hele! "
Tr 2 1751 But now to yow, ye loveres that ben here,
Tr 2 1752 Was Troilus nought in a kankedort,
Tr 2 1753 That lay, and myghte whisprynge of hem here,
Tr 2 1754 And thoughte, " O Lord, right now renneth my sort
Tr 2 1755 Fully to deye, or han anon comfort! "
Tr 2 1756 And was the firste tyme he shulde hire preye
Tr 2 1757 Of love; O myghty God, what shal he seye?
Tr 3 1 O blisful light of which the bemes clere
Tr 3 2 Adorneth al the thridde heven faire!
Tr 3 3 O sonnes lief, O Joves doughter deere,
Tr 3 4 Plesance of love, O goodly debonaire,
Tr 3 5 In gentil hertes ay redy to repaire!
Tr 3 6 O veray cause of heele and of gladnesse,
Tr 3 7 Iheryed be thy myght and thi goodnesse!
Tr 3 8 In hevene and helle, in erthe and salte see
Tr 3 9 Is felt thi myght, if that I wel descerne,
Tr 3 10 As man, brid, best, fissh, herbe, and grene tree
Tr 3 11 Thee fele in tymes with vapour eterne.
Tr 3 12 God loveth, and to love wol nought werne,
Tr 3 13 And in this world no lyves creature
Tr 3 14 Withouten love is worth, or may endure.
Tr 3 15 Ye Joves first to thilke effectes glade,
Tr 3 16 Thorugh which that thynges lyven alle and be,
Tr 3 17 Comeveden, and amorous him made
Tr 3 18 On mortal thyng, and as yow list, ay ye
Tr 3 19 Yeve hym in love ese or adversitee,
Tr 3 20 And in a thousand formes down hym sente
Tr 3 21 For love in erthe, and whom yow liste he hente.
Tr 3 22 Ye fierse Mars apaisen of his ire,
Tr 3 23 And as yow list, ye maken hertes digne;
Tr 3 24 Algates hem that ye wol sette a-fyre,
Tr 3 25 They dreden shame, and vices they resygne;
Tr 3 26 Ye do hem corteys be, fresshe and benigne;
Tr 3 27 And heighe or lowe, after a wight entendeth,
Tr 3 28 The joies that he hath, youre myght it sendeth.
Tr 3 29 Ye holden regne and hous in unitee;
Tr 3 30 Ye sothfast cause of frendship ben also;
Tr 3 31 Ye knowe al thilke covered qualitee
Tr 3 32 Of thynges, which that folk on wondren so,
Tr 3 33 Whan they kan nought construe how it may jo
Tr 3 34 She loveth hym, or whi he loveth here,
Tr 3 35 As whi this fissh, and naught that, comth to were.
Tr 3 36 Ye folk a lawe han set in universe,
Tr 3 37 And this knowe I by hem that lovers be,
Tr 3 38 That whoso stryveth with yow hath the werse.
Tr 3 39 Now, lady bryght, for thi benignite,
Tr 3 40 At reverence of hem that serven the,
Tr 3 41 Whos clerc I am, so techeth me devyse
Tr 3 42 Som joye of that is felt in thi servyse.
Tr 3 43 Ye in my naked herte sentement
Tr 3 44 Inhielde, and do me shewe of thy swetnesse.
Tr 3 45 Caliope, thi vois be now present,
Tr 3 46 For now is nede: sestow nought my destresse,
Tr 3 47 How I mot telle anonright the gladnesse
Tr 3 48 Of Troilus, to Venus heryinge?
Tr 3 49 To which gladnesse, who nede hath, God hym brynge!
Tr 3 50 Lay al this mene while Troilus,
Tr 3 51 Recordyng his lesson in this manere:
Tr 3 52 " Mafay, " thoughte he, " thus wol I sey, and thus;
Tr 3 53 Thus wol I pleyne unto my lady dere;
Tr 3 54 That word is good, and this shal be my cheere;
Tr 3 55 This nyl I nought foryeten in no wise. "
Tr 3 56 God leve hym werken as he kan devyse!
Tr 3 57 And, Lord, so that his herte gan to quappe,
Tr 3 58 Heryng hire come, and shorte for to sike!
Tr 3 59 And Pandarus, that ledde hire by the lappe,
Tr 3 60 Com ner, and gan in at the curtyn pike,
Tr 3 61 And seyde, " God do boot on alle syke!
Tr 3 62 Se who is here yow comen to visite:
Tr 3 63 Lo, here is she that is youre deth to wite. "
Tr 3 64 Therwith it semed as he wepte almost.
Tr 3 65 " Ha, a, " quod Troilus so reufully,
Tr 3 66 " Wher me be wo, O myghty God, thow woost!
Tr 3 67 Who is al ther? I se nought trewely. "
Tr 3 68 " Sire, " quod Criseyde, " it is Pandare and I. "
Tr 3 69 " Ye, swete herte? Allas, I may nought rise,
Tr 3 70 To knele and do yow honour in som wyse. "
Tr 3 71 And dressed hym upward, and she right tho
Tr 3 72 Gan bothe hire hondes softe upon hym leye.
Tr 3 73 " O, for the love of God, do ye nought so
Tr 3 74 To me, " quod she, " I! What is this to seye?
Tr 3 75 Sire, comen am I to yow for causes tweye:
Tr 3 76 First, yow to thonke, and of youre lordshipe eke
Tr 3 77 Continuance I wolde yow biseke. "
Tr 3 78 This Troilus, that herde his lady preye
Tr 3 79 Of lordshipe hym, wax neither quyk ne ded,
Tr 3 80 Ne myghte o word for shame to it seye,
Tr 3 81 Although men sholde smyten of his hed.
Tr 3 82 But Lord, so he wex sodeynliche red,
Tr 3 83 And sire, his lessoun, that he wende konne
Tr 3 84 To preyen hire, is thorugh his wit ironne.
Tr 3 85 Criseyde al this aspied wel ynough,
Tr 3 86 For she was wis, and loved hym nevere the lasse,
Tr 3 87 Al nere he malapert, or made it tough,
Tr 3 88 Or was to bold, to synge a fool a masse.
Tr 3 89 But whan his shame gan somwhat to passe,
Tr 3 90 His resons, as I may my rymes holde,
Tr 3 91 I yow wol telle, as techen bokes olde.
Tr 3 92 In chaunged vois, right for his verray drede,
Tr 3 93 Which vois ek quook, and therto his manere
Tr 3 94 Goodly abaist, and now his hewes rede,
Tr 3 95 Now pale, unto Criseyde, his lady dere,
Tr 3 96 With look down cast and humble iyolden chere,
Tr 3 97 Lo, the alderfirste word that hym asterte
Tr 3 98 Was, twyes, " Mercy, mercy, swete herte! "
Tr 3 99 And stynte a while, and whan he myghte out brynge,
Tr 3 100 The nexte word was, " God woot, for I have,
Tr 3 101 As ferforthly as I have had konnynge,
Tr 3 102 Ben youres al, God so my soule save,
Tr 3 103 And shal til that I, woful wight, be grave!
Tr 3 104 And though I dar, ne kan, unto yow pleyne,
Tr 3 105 Iwis, I suffre nought the lasse peyne.
Tr 3 106 " Thus muche as now, O wommanliche wif,
Tr 3 107 I may out brynge, and if this yow displese,
Tr 3 108 That shal I wreke upon myn owen lif
Tr 3 109 Right soone, I trowe, and do youre herte an ese,
Tr 3 110 If with my deth youre wreththe may apese.
Tr 3 111 But syn that ye han herd me somwhat seye,
Tr 3 112 Now recche I nevere how soone that I deye. "
Tr 3 113 Therwith his manly sorwe to biholde
Tr 3 114 It myghte han mad an herte of stoon to rewe;
Tr 3 115 And Pandare wep as he to water wolde,
Tr 3 116 And poked evere his nece new and newe,
Tr 3 117 And seyde, " Wo bygon ben hertes trewe!
Tr 3 118 For love of God, make of this thing an ende,
Tr 3 119 Or sle us both at ones er ye wende. "
Tr 3 120 " I, what? " quod she, " by God and by my trouthe,
Tr 3 121 I not nat what ye wilne that I seye. "
Tr 3 122 " I, what? " quod he, " That ye han on hym routhe,
Tr 3 123 For Goddes love, and doth hym nought to deye! "
Tr 3 124 " Now than thus, " quod she, " I wolde hym preye
Tr 3 125 To telle me the fyn of his entente.
Tr 3 126 Yet wist I nevere wel what that he mente. "
Tr 3 127 " What that I mene, O swete herte deere? "
Tr 3 128 Quod Troilus, " O goodly, fresshe free,
Tr 3 129 That with the stremes of youre eyen cleere
Tr 3 130 Ye wolde somtyme frendly on me see,
Tr 3 131 And thanne agreen that I may ben he,
Tr 3 132 Withouten braunche of vice on any wise,
Tr 3 133 In trouthe alwey to don yow my servise,
Tr 3 134 " As to my lady right and chief resort,
Tr 3 135 With al my wit and al my diligence;
Tr 3 136 And I to han, right as yow list, comfort,
Tr 3 137 Under yowre yerde, egal to myn offence,
Tr 3 138 As deth, if that I breke youre defence;
Tr 3 139 And that ye deigne me so muchel honoure
Tr 3 140 Me to comanden aught in any houre;
Tr 3 141 " And I to ben youre -- verray, humble, trewe,
Tr 3 142 Secret, and in my paynes pacient,
Tr 3 143 And evere mo desiren fresshly newe
Tr 3 144 To serve, and ben ylike diligent,
Tr 3 145 And with good herte al holly youre talent
Tr 3 146 Receyven wel, how sore that me smerte;
Tr 3 147 Lo, this mene I, myn owen swete herte. "
Tr 3 148 Quod Pandarus, " Lo, here an hard requeste,
Tr 3 149 And resonable, a lady for to werne!
Tr 3 150 Now, nece myn, by natal Joves feste,
Tr 3 151 Were I a god, ye sholden sterve as yerne,
Tr 3 152 That heren wel this man wol nothing yerne
Tr 3 153 But youre honour, and sen hym almost sterve,
Tr 3 154 And ben so loth to suffren hym yow serve. "
Tr 3 155 With that she gan hire eyen on hym caste
Tr 3 156 Ful esily and ful debonairly,
Tr 3 157 Avysyng hire, and hied nought to faste
Tr 3 158 With nevere a word, but seyde hym softely,
Tr 3 159 " Myn honour sauf, I wol wel trewely,
Tr 3 160 And in swich forme as he gan now devyse,
Tr 3 161 Receyven hym fully to my servyse,
Tr 3 162 " Bysechyng hym, for Goddes love, that he
Tr 3 163 Wolde, in honour of trouthe and gentilesse,
Tr 3 164 As I wel mene, ek menen wel to me,
Tr 3 165 And myn honour with wit and bisynesse
Tr 3 166 Ay kepe; and if I may don hym gladnesse,
Tr 3 167 From hennesforth, iwys, I nyl nought feyne.
Tr 3 168 Now beth al hool; no lenger ye ne pleyne.
Tr 3 169 " But natheles, this warne I yow, " quod she,
Tr 3 170 " A kynges sone although ye be, ywys,
Tr 3 171 Ye shal namore han sovereignete
Tr 3 172 Of me in love, than right in that cas is.
Tr 3 173 N' y nyl forbere, if that ye don amys,
Tr 3 174 To wratthe yow; and whil that ye me serve,
Tr 3 175 Chericen yow right after ye disserve.
Tr 3 176 " And shortly, deere herte and al my knyght,
Tr 3 177 Beth glad, and draweth yow to lustinesse,
Tr 3 178 And I shal trewely, with al my myght,
Tr 3 179 Youre bittre tornen al into swetenesse.
Tr 3 180 If I be she that may yow do gladnesse,
Tr 3 181 For every wo ye shal recovere a blisse " --
Tr 3 182 And hym in armes took, and gan hym kisse.
Tr 3 183 Fil Pandarus on knees, and up his eyen
Tr 3 184 To heven threw, and held his hondes highe:
Tr 3 185 " Immortal god, " quod he, " that mayst nought deyen,
Tr 3 186 Cupide I mene, of this mayst glorifie;
Tr 3 187 And Venus, thow mayst maken melodie!
Tr 3 188 Withouten hond, me semeth that in the towne,
Tr 3 189 For this merveille ich here ech belle sowne.
Tr 3 190 " But ho! namore as now of this matere;
Tr 3 191 For-whi this folk wol comen up anon,
Tr 3 192 That han the lettre red; lo, I hem here.
Tr 3 193 But I conjure the, Criseyde, anon,
Tr 3 194 And to, thow Troilus, whan thow mayst goon,
Tr 3 195 That at myn hous ye ben at my warnynge,
Tr 3 196 For I ful well shal shape youre comynge;
Tr 3 197 " And eseth there youre hertes right ynough;
Tr 3 198 And lat se which of yow shal bere the belle
Tr 3 199 To speke of love aright! " -- therwith he lough --
Tr 3 200 " For ther have ye a leiser for to telle. "
Tr 3 201 Quod Troilus, " How longe shal I dwelle,
Tr 3 202 Er this be don? " Quod he, " Whan thow mayst ryse,
Tr 3 203 This thyng shal be right as I yow devyse. "
Tr 3 204 With that Eleyne and also Deiphebus
Tr 3 205 Tho comen upward, right at the steires ende;
Tr 3 206 And Lord, so thanne gan gronen Troilus,
Tr 3 207 His brother and his suster for to blende.
Tr 3 208 Quod Pandarus, " It tyme is that we wende.
Tr 3 209 Tak, nece myn, youre leve at alle thre,
Tr 3 210 And lat hem speke, and cometh forth with me. "
Tr 3 211 She took hire leve at hem ful thriftily,
Tr 3 212 As she wel koude, and they hire reverence
Tr 3 213 Unto the fulle diden, hardyly,
Tr 3 214 And wonder wel speken, in hire absence,
Tr 3 215 Of hire in preysing of hire excellence --
Tr 3 216 Hire governaunce, hire wit, and hire manere
Tr 3 217 Comendeden, it joie was to here.
Tr 3 218 Now lat hire wende unto hire owen place,
Tr 3 219 And torne we to Troilus ayein,
Tr 3 220 That gan ful lightly of the lettre pace
Tr 3 221 That Deiphebus hadde in the gardyn seyn;
Tr 3 222 And of Eleyne and hym he wolde feyn
Tr 3 223 Delivered ben, and seyde that hym leste
Tr 3 224 To slepe, and after tales have reste.
Tr 3 225 Eleyne hym kiste, and took hire leve blyve,
Tr 3 226 Deiphebus ek, and hom wente every wight;
Tr 3 227 And Pandarus, as faste as he may dryve,
Tr 3 228 To Troilus tho com, as lyne right,
Tr 3 229 And on a paillet al that glade nyght
Tr 3 230 By Troilus he lay, with mery chere,
Tr 3 231 To tale; and wel was hem they were yfeere.
Tr 3 232 Whan every wight was voided but they two,
Tr 3 233 And alle the dores weren faste yshette,
Tr 3 234 To telle in short, withouten wordes mo,
Tr 3 235 This Pandarus, withouten any lette,
Tr 3 236 Up roos, and on his beddes syde hym sette,
Tr 3 237 And gan to speken in a sobre wyse
Tr 3 238 To Troilus, as I shal yow devyse:
Tr 3 239 " Myn alderlevest lord, and brother deere,
Tr 3 240 God woot, and thow, that it sat me so soore,
Tr 3 241 Whan I the saugh so langwisshyng to-yere
Tr 3 242 For love, of which thi wo wax alwey moore,
Tr 3 243 That I, with al my myght and al my loore,
Tr 3 244 Have evere sithen don my bisynesse
Tr 3 245 To brynge the to joye out of distresse,
Tr 3 246 " And have it brought to swich plit as thow woost,
Tr 3 247 So that thorugh me thow stondest now in weye
Tr 3 248 To faren wel; I sey it for no bost,
Tr 3 249 And wostow whi? For shame it is to seye:
Tr 3 250 For the have I bigonne a gamen pleye
Tr 3 251 Which that I nevere do shal eft for other,
Tr 3 252 Although he were a thousand fold my brother.
Tr 3 253 " That is to seye, for the am I bicomen,
Tr 3 254 Bitwixen game and ernest, swich a meene
Tr 3 255 As maken wommen unto men to comen;
Tr 3 256 Al sey I nought, thow wost wel what I meene.
Tr 3 257 For the have I my nece, of vices cleene,
Tr 3 258 So fully maad thi gentilesse triste,
Tr 3 259 That al shal ben right as thiselven liste.
Tr 3 260 " But God, that al woot, take I to witnesse,
Tr 3 261 That nevere I this for coveitise wroughte,
Tr 3 262 But oonly for t' abregge that distresse
Tr 3 263 For which wel neigh thow deidest, as me thoughte.
Tr 3 264 But, goode brother, do now as the oughte,
Tr 3 265 For Goddes love, and kep hire out of blame,
Tr 3 266 Syn thow art wys, and save alwey hire name.
Tr 3 267 " For wel thow woost, the name as yet of here
Tr 3 268 Among the peeple, as who seyth, halwed is.
Tr 3 269 For that man is unbore, I dar wel swere,
Tr 3 270 That evere wiste that she dide amys.
Tr 3 271 But wo is me, that I, that cause al this,
Tr 3 272 May thynken that she is my nece deere,
Tr 3 273 And I hire em, and traitour ek yfeere!
Tr 3 274 " And were it wist that I, thorugh myn engyn,
Tr 3 275 Hadde in my nece yput this fantasie,
Tr 3 276 To doon thi lust and holly to ben thyn,
Tr 3 277 Whi, al the world upon it wolde crie,
Tr 3 278 And seyn that I the werste trecherie
Tr 3 279 Dide in this cas, that evere was bigonne,
Tr 3 280 And she forlost, and thow right nought ywonne.
Tr 3 281 " Wherfore, er I wol ferther gon a pas,
Tr 3 282 The preie ich eft, althogh thow shuldest deye,
Tr 3 283 That privete go with us in this cas;
Tr 3 284 That is to seyn, that thow us nevere wreye;
Tr 3 285 And be nought wroth, though I the ofte preye
Tr 3 286 To holden secree swich an heigh matere,
Tr 3 287 For skilfull is, thow woost wel, my praiere.
Tr 3 288 " And thynk what wo ther hath bitid er this,
Tr 3 289 For makyng of avantes, as men rede;
Tr 3 290 And what meschaunce in this world yet ther is,
Tr 3 291 Fro day to day, right for that wikked dede;
Tr 3 292 For which thise wise clerkes that ben dede
Tr 3 293 Han evere yet proverbed to us yonge,
Tr 3 294 That `firste vertu is to kepe tonge.'
Tr 3 295 " And nere it that I wilne as now t' abregge
Tr 3 296 Diffusioun of speche, I koude almoost
Tr 3 297 A thousand olde stories the allegge
Tr 3 298 Of wommen lost through fals and foles bost.
Tr 3 299 Proverbes kanst thiself ynowe and woost
Tr 3 300 Ayeins that vice, for to ben a labbe,
Tr 3 301 Al seyde men soth as often as thei gabbe.
Tr 3 302 " O tonge, allas, so often here-byforn
Tr 3 303 Hath mad ful many a lady bright of hewe
Tr 3 304 Seyd `Weilaway, the day that I was born!'
Tr 3 305 And many a maydes sorwe for to newe;
Tr 3 306 And for the more part, al is untrewe
Tr 3 307 That men of yelpe, and it were brought to preve.
Tr 3 308 Of kynde non avauntour is to leve.
Tr 3 309 " Avauntour and a lyere, al is on;
Tr 3 310 As thus: I pose, a womman grante me
Tr 3 311 Hire love, and seith that other wol she non,
Tr 3 312 And I am sworn to holden it secree,
Tr 3 313 And after I go telle it two or thre --
Tr 3 314 Iwis, I am avauntour at the leeste,
Tr 3 315 And lyere, for I breke my biheste.
Tr 3 316 " Now loke thanne, if they be nought to blame,
Tr 3 317 Swich manere folk -- what shal I clepe hem, what? --
Tr 3 318 That hem avaunte of wommen, and by name,
Tr 3 319 That nevere yet bihyghte hem this ne that,
Tr 3 320 Ne knewe hem more than myn olde hat!
Tr 3 321 No wonder is, so God me sende hele,
Tr 3 322 Though wommen dreden with us men to dele.
Tr 3 323 " I sey nought this for no mistrust of yow,
Tr 3 324 Ne for no wis-man, but for foles nyce,
Tr 3 325 And for the harm that in the werld is now,
Tr 3 326 As wel for folie ofte as for malice;
Tr 3 327 For wel woot I, in wise folk that vice
Tr 3 328 No womman drat, if she be wel avised;
Tr 3 329 For wyse ben by foles harm chastised.
Tr 3 330 " But now to purpos; leve brother deere,
Tr 3 331 Have al this thyng that I have seyd in mynde,
Tr 3 332 And kep the clos, and be now of good cheere,
Tr 3 333 For at thi day thow shalt me trewe fynde.
Tr 3 334 I shal thi proces set in swych a kynde,
Tr 3 335 And God toforn, that it shal the suffise,
Tr 3 336 For it shal be right as thow wolt devyse.
Tr 3 337 " For wel I woot, thow menest wel, parde;
Tr 3 338 Therfore I dar this fully undertake.
Tr 3 339 Thow woost ek what thi lady graunted the,
Tr 3 340 And day is set the chartres up to make.
Tr 3 341 Have now good nyght, I may no lenger wake;
Tr 3 342 And bid for me, syn thow art now in blysse,
Tr 3 343 That God me sende deth or soone lisse. "
Tr 3 344 Who myghte tellen half the joie or feste
Tr 3 345 Which that the soule of Troilus tho felte,
Tr 3 346 Heryng th' effect of Pandarus byheste?
Tr 3 347 His olde wo, that made his herte swelte,
Tr 3 348 Gan tho for joie wasten and tomelte,
Tr 3 349 And al the richesse of his sikes sore
Tr 3 350 At ones fledde; he felte of hem namore.
Tr 3 351 But right so as thise holtes and thise hayis,
Tr 3 352 That han in wynter dede ben and dreye,
Tr 3 353 Revesten hem in grene whan that May is,
Tr 3 354 Whan every lusty liketh best to pleye;
Tr 3 355 Right in that selve wise, soth to seye,
Tr 3 356 Wax sodeynliche his herte ful of joie,
Tr 3 357 That gladder was ther nevere man in Troie.
Tr 3 358 And gan his look on Pandarus up caste
Tr 3 359 Ful sobrely, and frendly for to se,
Tr 3 360 And seyde, " Frend, in Aperil the laste --
Tr 3 361 As wel thow woost, if it remembre the --
Tr 3 362 How neigh the deth for wo thow fownde me,
Tr 3 363 And how thow dedest al thi bisynesse
Tr 3 364 To knowe of me the cause of my destresse.
Tr 3 365 " Thow woost how longe ich it forbar to seye
Tr 3 366 To the, that art the man that I best triste;
Tr 3 367 And peril non was it to the bywreye,
Tr 3 368 That wist I wel; but telle me, if the liste,
Tr 3 369 Sith I so loth was that thiself it wiste,
Tr 3 370 How dorst I mo tellen of this matere,
Tr 3 371 That quake now, and no wight may us here?
Tr 3 372 " But natheles, by that God I the swere,
Tr 3 373 That, as hym list, may al this world governe --
Tr 3 374 And, if I lye, Achilles with his spere
Tr 3 375 Myn herte cleve, al were my lif eterne,
Tr 3 376 As I am mortal, if I late or yerne
Tr 3 377 Wolde it bewreye, or dorst, or sholde konne,
Tr 3 378 For al the good that God made under sonne --
Tr 3 379 " That rather deye I wolde, and determyne,
Tr 3 380 As thynketh me, now stokked in prisoun,
Tr 3 381 In wrecchidnesse, in filthe, and in vermyne,
Tr 3 382 Caytif to cruel kyng Agamenoun;
Tr 3 383 And this in all the temples of this town
Tr 3 384 Upon the goddes alle, I wol the swere
Tr 3 385 To-morwe day, if that it liketh here.
Tr 3 386 " And that thow hast so muche ido for me
Tr 3 387 That I ne may it nevere more disserve,
Tr 3 388 This know I wel, al myghte I now for the
Tr 3 389 A thousand tymes on a morwe sterve.
Tr 3 390 I kan namore, but that I wol the serve
Tr 3 391 Right as thi sclave, whider so thow wende,
Tr 3 392 For evere more, unto my lyves ende.
Tr 3 393 " But here, with al myn herte, I the biseche
Tr 3 394 That nevere in me thow deme swich folie
Tr 3 395 As I shal seyn: me thoughte by thi speche
Tr 3 396 That this which thow me dost for compaignie,
Tr 3 397 I sholde wene it were a bauderye.
Tr 3 398 I am nought wood, al if I lewed be!
Tr 3 399 It is nought so, that woot I wel, parde!
Tr 3 400 " But he that gooth for gold or for ricchesse
Tr 3 401 On swich message, calle hym what the list;
Tr 3 402 And this that thow doost, calle it gentilesse,
Tr 3 403 Compassioun, and felawship, and trist.
Tr 3 404 Departe it so, for wyde-wher is wist
Tr 3 405 How that ther is diversite requered
Tr 3 406 Bytwixen thynges like, as I have lered.
Tr 3 407 " And that thow knowe I thynke nought ne wene
Tr 3 408 That this servise a shame be or jape,
Tr 3 409 I have my faire suster Polixene,
Tr 3 410 Cassandre, Eleyne, or any of the frape --
Tr 3 411 Be she nevere so fair or wel yshape,
Tr 3 412 Tel me which thow wilt of everychone,
Tr 3 413 To han for thyn, and lat me thanne allone.
Tr 3 414 " But, sith thow hast don me this servyse
Tr 3 415 My lif to save and for non hope of mede,
Tr 3 416 So for the love of God, this grete emprise
Tr 3 417 Perfourme it out, for now is moste nede;
Tr 3 418 For heigh and lough, withowten any drede,
Tr 3 419 I wol alwey thyn hestes alle kepe.
Tr 3 420 Have now good nyght, and lat us bothe slepe. "
Tr 3 421 Thus held hym ech of other wel apayed,
Tr 3 422 That al the world ne myghte it bet amende;
Tr 3 423 And on the morwe, whan they were arayed,
Tr 3 424 Ech to his owen nedes gan entende.
Tr 3 425 But Troilus, though as the fir he brende
Tr 3 426 For sharp desir of hope and of plesaunce,
Tr 3 427 He nought forgat his goode governaunce,
Tr 3 428 But in hymself with manhod gan restreyne
Tr 3 429 Ech racle dede and ech unbridled cheere,
Tr 3 430 That alle tho that lyven, soth to seyne,
Tr 3 431 Ne sholde han wist, by word or by manere,
Tr 3 432 What that he mente, as touchyng this matere.
Tr 3 433 From every wight as fer as is the cloude
Tr 3 434 He was, so wel dissimilen he koude.
Tr 3 435 And al the while which that I yow devyse,
Tr 3 436 This was his lif: with all his fulle myght,
Tr 3 437 By day, he was in Martes heigh servyse --
Tr 3 438 This is to seyn, in armes as a knyght;
Tr 3 439 And for the more part, the longe nyght
Tr 3 440 He lay and thoughte how that he myghte serve
Tr 3 441 His lady best, hire thonk for to deserve.
Tr 3 442 Nil I naught swere, although he lay ful softe,
Tr 3 443 That in his thought he nas somwhat disesed,
Tr 3 444 Ne that he torned on his pilwes ofte,
Tr 3 445 And wold of that hym missed han ben sesed.
Tr 3 446 But in swich cas men is nought alwey plesed,
Tr 3 447 For aught I woot, namore than was he;
Tr 3 448 That kan I deme of possibilitee.
Tr 3 449 But certeyn is, to purpos for to go,
Tr 3 450 That in this while, as writen is in geeste,
Tr 3 451 He say his lady somtyme, and also
Tr 3 452 She with hym spak, whan that she dorst or leste;
Tr 3 453 And by hire bothe avys, as was the beste,
Tr 3 454 Apoynteden full warly in this nede,
Tr 3 455 So as they durste, how they wolde procede.
Tr 3 456 But it was spoken in so short a wise,
Tr 3 457 In swich await alwey, and in swich feere,
Tr 3 458 Lest any wight devynen or devyse
Tr 3 459 Wolde of hem two, or to it laye an ere,
Tr 3 460 That al this world so leef to hem ne were
Tr 3 461 As that Cupide wolde hem grace sende
Tr 3 462 To maken of hire speche aright an ende.
Tr 3 463 But thilke litel that they spake or wroughte,
Tr 3 464 His wise goost took ay of al swych heede,
Tr 3 465 It semed hire he wiste what she thoughte
Tr 3 466 Withouten word, so that it was no nede
Tr 3 467 To bidde hym ought to doon, or ought forbeede;
Tr 3 468 For which she thought that love, al come it late,
Tr 3 469 Of alle joie hadde opned hire the yate.
Tr 3 470 And shortly of this proces for to pace,
Tr 3 471 So wel his werk and wordes he bisette,
Tr 3 472 That he so ful stood in his lady grace,
Tr 3 473 That twenty thousand tymes, er she lette,
Tr 3 474 She thonked God that evere she with hym mette.
Tr 3 475 So koude he hym governe in swich servyse,
Tr 3 476 That al the world ne myght it bet devyse.
Tr 3 477 For whi she fond hym so discret in al,
Tr 3 478 So secret, and of swich obeisaunce,
Tr 3 479 That wel she felte he was to hire a wal
Tr 3 480 Of stiel, and sheld from every displesaunce;
Tr 3 481 That to ben in his goode governaunce,
Tr 3 482 So wis he was, she was namore afered --
Tr 3 483 I mene, as fer as oughte ben requered.
Tr 3 484 And Pandarus, to quike alwey the fir,
Tr 3 485 Was evere ylike prest and diligent;
Tr 3 486 To ese his frend was set al his desir.
Tr 3 487 He shof ay on, he to and fro was sent;
Tr 3 488 He lettres bar whan Troilus was absent;
Tr 3 489 That nevere man, as in his frendes nede,
Tr 3 490 Ne bar hym bet than he, withouten drede.
Tr 3 491 But now, paraunter, som man wayten wolde
Tr 3 492 That every word, or soonde, or look, or cheere
Tr 3 493 Of Troilus that I rehercen sholde,
Tr 3 494 In al this while unto his lady deere --
Tr 3 495 I trowe it were a long thyng for to here --
Tr 3 496 Or of what wight that stant in swich disjoynte,
Tr 3 497 His wordes alle, or every look, to poynte.
Tr 3 498 For sothe, I have naught herd it don er this
Tr 3 499 In story non, ne no man here, I wene;
Tr 3 500 And though I wolde, I koude nought, ywys;
Tr 3 501 For ther was som epistel hem bitwene,
Tr 3 502 That wolde, as seyth myn autour, wel contene
Tr 3 503 Neigh half this book, of which hym liste nought write.
Tr 3 504 How sholde I thanne a lyne of it endite?
Tr 3 505 But to the grete effect: than sey I thus,
Tr 3 506 That stondyng in concord and in quiete,
Tr 3 507 Thise ilke two, Criseyde and Troilus,
Tr 3 508 As I have told, and in this tyme swete --
Tr 3 509 Save only often myghte they nought mete,
Tr 3 510 Ne leiser have hire speches to fulfelle --
Tr 3 511 That it bifel right as I shal yow telle:
Tr 3 512 That Pandarus, that evere dide his myght
Tr 3 513 Right for the fyn that I shal speke of here,
Tr 3 514 As for to bryngen to his hows som nyght
Tr 3 515 His faire nece and Troilus yfere,
Tr 3 516 Wheras at leiser al this heighe matere,
Tr 3 517 Touchyng here love, were at the fulle upbounde,
Tr 3 518 Hadde out of doute a tyme to it founde.
Tr 3 519 For he with gret deliberacioun
Tr 3 520 Hadde every thyng that herto myght availle
Tr 3 521 Forncast and put in execucioun,
Tr 3 522 And neither left for cost ne for travaille.
Tr 3 523 Come if hem list, hem sholde no thyng faille;
Tr 3 524 And for to ben in ought aspied there,
Tr 3 525 That, wiste he wel, an impossible were.
Tr 3 526 Dredeles, it cler was in the wynd
Tr 3 527 Of every pie and every lette-game;
Tr 3 528 Now al is wel, for al the world is blynd
Tr 3 529 In this matere, bothe fremde and tame.
Tr 3 530 This tymbur is al redy up to frame;
Tr 3 531 Us lakketh nought but that we witen wolde
Tr 3 532 A certeyn houre, in which she comen sholde.
Tr 3 533 And Troilus, that al this purveiaunce
Tr 3 534 Knew at the fulle, and waited on it ay,
Tr 3 535 Hadde hereupon ek mad gret ordinaunce,
Tr 3 536 And found his cause, and therto his aray,
Tr 3 537 If that he were missed, nyght or day,
Tr 3 538 Ther-while he was aboute this servyse,
Tr 3 539 That he was gon to don his sacrifise,
Tr 3 540 And moste at swich a temple allone wake,
Tr 3 541 Answered of Apollo for to be;
Tr 3 542 And first to sen the holy laurer quake,
Tr 3 543 Er that Apollo spak out of the tree,
Tr 3 544 To telle hym next whan Grekes sholde flee --
Tr 3 545 And forthy lette hym no man, God forbede,
Tr 3 546 But prey Apollo helpen in this nede.
Tr 3 547 Now is ther litel more for to doone,
Tr 3 548 But Pandare up and, shortly for to seyne,
Tr 3 549 Right sone upon the chaungynge of the moone,
Tr 3 550 Whan lightles is the world a nyght or tweyne,
Tr 3 551 And that the wolken shop hym for to reyne,
Tr 3 552 He streght o morwe unto his nece wente --
Tr 3 553 Ye han wel herd the fyn of his entente.
Tr 3 554 Whan he was com, he gan anon to pleye
Tr 3 555 As he was wont, and of hymself to jape;
Tr 3 556 And finaly he swor and gan hire seye,
Tr 3 557 By this and that, she sholde hym nought escape,
Tr 3 558 Ne lenger don hym after hire to cape;
Tr 3 559 But certeynly she moste, by hire leve,
Tr 3 560 Come soupen in his hous with hym at eve.
Tr 3 561 At which she lough, and gan hire faste excuse,
Tr 3 562 And seyde, " It reyneth. lo, how sholde I gon? "
Tr 3 563 " Lat be, " quod he, " ne stant nought thus to muse.
Tr 3 564 This moot be don! Ye shal be ther anon. "
Tr 3 565 So at the laste herof they fille aton,
Tr 3 566 Or elles, softe he swor hire in hire ere,
Tr 3 567 He nolde nevere comen ther she were.
Tr 3 568 Soone after this, she to hym gan to rowne,
Tr 3 569 And axed hym if Troilus were there.
Tr 3 570 He swor hire nay, for he was out of towne,
Tr 3 571 And seyde, " Nece, I pose that he were;
Tr 3 572 Yow thurste nevere han the more fere;
Tr 3 573 For rather than men myghte hym ther aspie,
Tr 3 574 Me were levere a thousand fold to dye. "
Tr 3 575 Nought list myn auctour fully to declare
Tr 3 576 What that she thoughte whan he seyde so,
Tr 3 577 That Troilus was out of towne yfare,
Tr 3 578 As if he seyde therof soth or no;
Tr 3 579 But that, withowten await, with hym to go,
Tr 3 580 She graunted hym, sith he hire that bisoughte,
Tr 3 581 And, as his nece, obeyed as hire oughte.
Tr 3 582 But natheles, yet gan she hym biseche,
Tr 3 583 Although with hym to gon it was no fere,
Tr 3 584 For to ben war of goosissh poeples speche,
Tr 3 585 That dremen thynges whiche as nevere were,
Tr 3 586 And wel avyse hym whom he broughte there;
Tr 3 587 And seyde hym, " Em, syn I moste on yow triste,
Tr 3 588 Loke al be wel, and do now as yow liste. "
Tr 3 589 He swor hire yis, by stokkes and by stones,
Tr 3 590 And by the goddes that in hevene dwelle,
Tr 3 591 Or elles were hym levere, soule and bones,
Tr 3 592 With Pluto kyng as depe ben in helle
Tr 3 593 As Tantalus -- what sholde I more telle?
Tr 3 594 Whan al was wel, he roos and took his leve,
Tr 3 595 And she to soper com, whan it was eve,
Tr 3 596 With a certein of hire owen men,
Tr 3 597 And with hire faire nece Antigone,
Tr 3 598 And other of hire wommen nyne or ten.
Tr 3 599 But who was glad now, who, as trowe ye,
Tr 3 600 But Troilus, that stood and myght it se
Tr 3 601 Thorughout a litel wyndow in a stewe,
Tr 3 602 Ther he bishet syn mydnyght was in mewe,
Tr 3 603 Unwist of every wight but of Pandare?
Tr 3 604 But to the point: now whan that she was come,
Tr 3 605 With alle joie and alle frendes fare
Tr 3 606 Hire em anon in armes hath hire nome,
Tr 3 607 And after to the soper, alle and some,
Tr 3 608 Whan tyme was, ful softe they hem sette.
Tr 3 609 God woot, ther was no deynte for to fette!
Tr 3 610 And after soper gonnen they to rise,
Tr 3 611 At ese wel, with herte fresshe and glade;
Tr 3 612 And wel was hym that koude best devyse
Tr 3 613 To liken hire, or that hire laughen made:
Tr 3 614 He song; she pleyde; he tolde tale of Wade.
Tr 3 615 But at the laste, as every thyng hath ende,
Tr 3 616 She took hire leve, and nedes wolde wende.
Tr 3 617 But O Fortune, executrice of wierdes,
Tr 3 618 O influences of thise hevenes hye!
Tr 3 619 Soth is, that under God ye ben oure hierdes,
Tr 3 620 Though to us bestes ben the causez wrie.
Tr 3 621 This mene I now: for she gan homward hye,
Tr 3 622 But execut was al bisyde hire leve
Tr 3 623 The goddes wil, for which she moste bleve.
Tr 3 624 The bente moone with hire hornes pale,
Tr 3 625 Saturne, and Jove, in Cancro joyned were,
Tr 3 626 That swych a reyn from heven gan avale
Tr 3 627 That every maner womman that was there
Tr 3 628 Hadde of that smoky reyn a verray feere;
Tr 3 629 At which Pandare tho lough, and seyde thenne,
Tr 3 630 " Now were it tyme a lady to gon henne!
Tr 3 631 " But goode nece, if I myghte evere plese
Tr 3 632 Yow any thyng, than prey ich yow, " quod he,
Tr 3 633 " To don myn herte as now so gret an ese
Tr 3 634 As for to dwelle here al this nyght with me,
Tr 3 635 For-whi this is youre owen hous, parde.
Tr 3 636 For by my trouthe, I sey it nought a-game,
Tr 3 637 To wende as now, it were to me a shame. "
Tr 3 638 Criseyde, which that koude as muche good
Tr 3 639 As half a world, took hede of his preiere;
Tr 3 640 And syn it ron, and al was on a flod,
Tr 3 641 She thoughte, " As good chep may I dwellen here,
Tr 3 642 And graunte it gladly with a frendes chere,
Tr 3 643 And have a thonk, as grucche and thanne abide;
Tr 3 644 For hom to gon, it may nought wel bitide. "
Tr 3 645 " I wol, " quod she, " myn uncle lief and deere;
Tr 3 646 Syn that yow list, it skile is to be so.
Tr 3 647 I am right glad with yow to dwellen here;
Tr 3 648 I seyde but a-game I wolde go. "
Tr 3 649 " Iwys, graunt mercy, nece, " quod he tho,
Tr 3 650 " Were it a game or no, soth for to telle,
Tr 3 651 Now am I glad, syn that yow list to dwelle. "
Tr 3 652 Thus al is wel; but tho bigan aright
Tr 3 653 The newe joie and al the feste agayn.
Tr 3 654 But Pandarus, if goodly hadde he myght,
Tr 3 655 He wolde han hyed hire to bedde fayn,
Tr 3 656 And seyde, " Lord, this is an huge rayn!
Tr 3 657 This were a weder for to slepen inne --
Tr 3 658 And that I rede us soone to bygynne.
Tr 3 659 " And nece, woot ye wher I wol yow leye,
Tr 3 660 For that we shul nat liggen far asonder,
Tr 3 661 And for ye neither shullen, dar I seye,
Tr 3 662 Heren noyse of reynes nor of thonder?
Tr 3 663 By God, right in my litel closet yonder.
Tr 3 664 And I wol in that outer hous allone
Tr 3 665 Be wardein of youre wommen everichone.
Tr 3 666 " And in this myddel chambre that ye se
Tr 3 667 Shal youre wommen slepen, wel and softe;
Tr 3 668 And there I seyde shal youreselven be;
Tr 3 669 And if ye liggen wel to-nyght, com ofte,
Tr 3 670 And careth nought what weder is alofte.
Tr 3 671 The wyn anon, and whan so that yow leste,
Tr 3 672 So go we slepe: I trowe it be the beste. "
Tr 3 673 Ther nys no more, but hereafter soone,
Tr 3 674 The voide dronke, and travers drawe anon,
Tr 3 675 Gan every wight that hadde nought to done
Tr 3 676 More in the place out of the chaumbre gon.
Tr 3 677 And evere mo so sterneliche it ron,
Tr 3 678 And blew therwith so wondirliche loude,
Tr 3 679 That wel neigh no man heren other koude.
Tr 3 680 Tho Pandarus, hire em, right as hym oughte,
Tr 3 681 With wommen swiche as were hire most aboute,
Tr 3 682 Ful glad unto hire beddes syde hire broughte,
Tr 3 683 And took his leve, and gan ful lowe loute,
Tr 3 684 And seyde, " Here at this closet dore withoute,
Tr 3 685 Right overthwart, youre wommen liggen alle,
Tr 3 686 That whom yow list of hem ye may here calle. "
Tr 3 687 So whan that she was in the closet leyd,
Tr 3 688 And alle hire wommen forth by ordinaunce
Tr 3 689 Abedde weren, ther as I have seyd,
Tr 3 690 Ther was nomore to skippen nor to traunce,
Tr 3 691 But boden go to bedde, with meschaunce,
Tr 3 692 If any wight was steryng anywhere,
Tr 3 693 And lat hem slepen that abedde were.
Tr 3 694 But Pandarus, that wel koude ech a deel
Tr 3 695 Th' olde daunce, and every point therinne,
Tr 3 696 Whan that he sey that alle thyng was wel,
Tr 3 697 He thought he wolde upon his werk bigynne,
Tr 3 698 And gan the stuwe doore al softe unpynne;
Tr 3 699 And stille as stoon, withouten lenger lette,
Tr 3 700 By Troilus adown right he hym sette,
Tr 3 701 And shortly to the point right for to gon,
Tr 3 702 Of al this werk he tolde hym word and ende,
Tr 3 703 And seyde, " Make the redy right anon,
Tr 3 704 For thow shalt into hevene blisse wende. "
Tr 3 705 " Now, blisful Venus, thow me grace sende! "
Tr 3 706 Quod Troilus, " For nevere yet no nede
Tr 3 707 Hadde ich er now, ne halvendel the drede. "
Tr 3 708 Quod Pandarus, " Ne drede the nevere a deel,
Tr 3 709 For it shal be right as thow wolt desire;
Tr 3 710 So thryve I, this nyght shal I make it weel,
Tr 3 711 Or casten al the gruwel in the fire. "
Tr 3 712 " Yet, blisful Venus, this nyght thow me enspire, "
Tr 3 713 Quod Troilus, " As wys as I the serve,
Tr 3 714 And evere bet and bet shal, til I sterve.
Tr 3 715 " And if ich hadde, O Venus ful of myrthe,
Tr 3 716 Aspectes badde of Mars or of Saturne,
Tr 3 717 Or thow combust or let were in my birthe,
Tr 3 718 Thy fader prey al thilke harm disturne
Tr 3 719 Of grace, and that I glad ayein may turne,
Tr 3 720 For love of hym thow lovedest in the shawe --
Tr 3 721 I meene Adoun, that with the boor was slawe.
Tr 3 722 " O Jove ek, for the love of faire Europe,
Tr 3 723 The which in forme of bole awey thow fette,
Tr 3 724 Now help! O Mars, thow with thi blody cope,
Tr 3 725 For love of Cipris, thow me nought ne lette!
Tr 3 726 O Phebus, thynk whan Dane hireselven shette
Tr 3 727 Under the bark, and laurer wax for drede;
Tr 3 728 Yet for hire love, O help now at this nede!
Tr 3 729 " Mercurie, for the love of Hierse eke,
Tr 3 730 For which Pallas was with Aglawros wroth,
Tr 3 731 Now help! And ek Diane, I the biseke
Tr 3 732 That this viage be nought to the looth!
Tr 3 733 O fatal sustren which, er any cloth
Tr 3 734 Me shapen was, my destine me sponne,
Tr 3 735 So helpeth to this werk that is bygonne! "
Tr 3 736 Quod Pandarus, " Thow wrecched mouses herte,
Tr 3 737 Artow agast so that she wol the bite?
Tr 3 738 Wy! Don this furred cloke upon thy sherte,
Tr 3 739 And folwe me, for I wol have the wite.
Tr 3 740 But bid, and lat me gon biforn a lite. "
Tr 3 741 And with that word he gan undon a trappe,
Tr 3 742 And Troilus he brought in by the lappe.
Tr 3 743 The sterne wynd so loude gan to route
Tr 3 744 That no wight oother noise myghte heere;
Tr 3 745 And they that layen at the dore withoute,
Tr 3 746 Ful sikerly they slepten alle yfere;
Tr 3 747 And Pandarus, with a ful sobre cheere,
Tr 3 748 Goth to the dore anon, withouten lette,
Tr 3 749 Ther as they laye, and softely it shette.
Tr 3 750 And as he com ayeynward pryvely,
Tr 3 751 His nece awook, and axed, " Who goth there? "
Tr 3 752 " My dere nece, " quod he, " it am I.
Tr 3 753 Ne wondreth nought, ne have of it no fere. "
Tr 3 754 And ner he com and seyde hire in hire ere,
Tr 3 755 " No word, for love of God, I yow biseche!
Tr 3 756 Lat no wight risen and heren of oure speche. "
Tr 3 757 " What, which wey be ye comen, benedicite? "
Tr 3 758 Quod she; " And how, unwist of hem alle? "
Tr 3 759 " Here at this secre trappe-dore, " quod he.
Tr 3 760 Quod tho Criseyde, " Lat me som wight calle! "
Tr 3 761 " I! God forbede that it sholde falle, "
Tr 3 762 Quod Pandarus, " that ye swich folye wroughte!
Tr 3 763 They myghte demen thyng they nevere er thoughte.
Tr 3 764 " It is nought good a slepyng hound to wake,
Tr 3 765 Ne yeve a wight a cause to devyne:
Tr 3 766 Youre wommen slepen alle, I undertake,
Tr 3 767 So that, for hem, the hous men myghte myne,
Tr 3 768 And slepen wollen til the sonne shyne.
Tr 3 769 And whan my tale brought is to an ende,
Tr 3 770 Unwist, right as I com, so wol I wende.
Tr 3 771 " Now, nece myn, ye shul wel understonde, "
Tr 3 772 Quod he, " so as ye wommen demen alle,
Tr 3 773 That for to holde in love a man in honde,
Tr 3 774 And hym hire lief and deere herte calle,
Tr 3 775 And maken hym an howve above a calle --
Tr 3 776 I meene, as love another in this while --
Tr 3 777 She doth hireself a shame and hym a gyle.
Tr 3 778 " Now, wherby that I telle yow al this:
Tr 3 779 Ye woot youreself, as wel as any wight,
Tr 3 780 How that youre love al fully graunted is
Tr 3 781 To Troilus, the worthieste knyght,
Tr 3 782 Oon of this world, and therto trouthe yplight,
Tr 3 783 That, but it were on hym along, ye nolde
Tr 3 784 Hym nevere falsen while ye lyven sholde.
Tr 3 785 " Now stant it thus, that sith I fro yow wente,
Tr 3 786 This Troilus, right platly for to seyn,
Tr 3 787 Is thorugh a goter, by a pryve wente,
Tr 3 788 Into my chaumbre come in al this reyn,
Tr 3 789 Unwist of every manere wight, certeyn,
Tr 3 790 Save of myself, as wisly have I joye,
Tr 3 791 And by that feith I shal Priam of Troie.
Tr 3 792 " And he is come in swich peyne and distresse
Tr 3 793 That, but he be al fully wood by this,
Tr 3 794 He sodeynly mot falle into wodnesse,
Tr 3 795 But if God helpe; and cause whi this is.
Tr 3 796 He seith hym told is of a frend of his,
Tr 3 797 How that ye sholden love oon hatte Horaste;
Tr 3 798 For sorwe of which this nyght shal ben his laste. "
Tr 3 799 Criseyde, which that al this wonder herde,
Tr 3 800 Gan sodeynly aboute hire herte colde,
Tr 3 801 And with a sik she sorwfully answerde,
Tr 3 802 " Allas! I wende, whoso tales tolde,
Tr 3 803 My deere herte wolde me nought holde
Tr 3 804 So lightly fals! Allas, conceytes wronge,
Tr 3 805 What harm they don! For now lyve I to longe!
Tr 3 806 " Horaste! Allas, and falsen Troilus?
Tr 3 807 I knowe hym nought, God helpe me so! " quod she.
Tr 3 808 " Allas, what wikked spirit tolde hym thus?
Tr 3 809 Now certes, em, tomorwe and I hym se,
Tr 3 810 I shal therof as ful excusen me,
Tr 3 811 As evere dide womman, if hym like. "
Tr 3 812 And with that word she gan ful soore sike.
Tr 3 813 " O God, " quod she, " so worldly selynesse,
Tr 3 814 Which clerkes callen fals felicitee,
Tr 3 815 Imedled is with many a bitternesse!
Tr 3 816 Ful angwissous than is, God woot, " quod she,
Tr 3 817 " Condicioun of veyn prosperitee:
Tr 3 818 For either joies comen nought yfeere,
Tr 3 819 Or elles no wight hath hem alwey here.
Tr 3 820 " O brotel wele of mannes joie unstable!
Tr 3 821 With what wight so thow be, or how thow pleye,
Tr 3 822 Either he woot that thow, joie, art muable,
Tr 3 823 Or woot it nought; it mot ben oon of tweye.
Tr 3 824 Now if he woot it nought, how may he seye
Tr 3 825 That he hath verray joie and selynesse,
Tr 3 826 That is of ignoraunce ay in derknesse?
Tr 3 827 " Now if he woot that joie is transitorie,
Tr 3 828 As every joye of worldly thyng mot flee,
Tr 3 829 Than every tyme he that hath in memorie,
Tr 3 830 The drede of lesyng maketh hym that he
Tr 3 831 May in no perfit selynesse be;
Tr 3 832 And if to lese his joie he sette a myte,
Tr 3 833 Than semeth it that joie is worth ful lite.
Tr 3 834 " Wherfore I wol diffyne in this matere,
Tr 3 835 That trewely, for aught I kan espie,
Tr 3 836 Ther is no verray weele in this world heere.
Tr 3 837 But O thow wikked serpent, jalousie,
Tr 3 838 Thow mysbyleved envyous folie,
Tr 3 839 Why hastow Troilus mad to me untriste,
Tr 3 840 That nevere yet agylte hym, that I wiste? "
Tr 3 841 Quod Pandarus, " Thus fallen is this cas -- "
Tr 3 842 " Wy! Uncle myn, " quod she, " who tolde hym this?
Tr 3 843 Why doth my deere herte thus, allas? "
Tr 3 844 " Ye woot, ye, nece myn, " quod he, " what is.
Tr 3 845 I hope al shal be wel that is amys,
Tr 3 846 For ye may quenche al this, if that yow leste --
Tr 3 847 And doth right so, for I holde it the beste. "
Tr 3 848 " So shal I do to-morwe, ywys, " quod she,
Tr 3 849 " And God toforn, so that it shal suffise. "
Tr 3 850 " To-morwe? Allas, that were a fair! " quod he;
Tr 3 851 " Nay, nay, it may nat stonden in this wise,
Tr 3 852 For, nece myn, thus writen clerkes wise,
Tr 3 853 That peril is with drecchyng in ydrawe;
Tr 3 854 Nay, swiche abodes ben nought worth an hawe.
Tr 3 855 " Nece, alle thyng hath tyme, I dar avowe;
Tr 3 856 For whan a chaumbre afire is or an halle,
Tr 3 857 Wel more nede is, it sodeynly rescowe
Tr 3 858 Than to dispute and axe amonges alle
Tr 3 859 How this candel in the strawe is falle.
Tr 3 860 A, benedicite! For al among that fare
Tr 3 861 The harm is don, and fare-wel feldefare!
Tr 3 862 " And nece myn -- ne take it naught agrief --
Tr 3 863 If that ye suffre hym al nyght in this wo,
Tr 3 864 God help me so, ye hadde hym nevere lief!
Tr 3 865 That dar I seyn, now ther is but we two.
Tr 3 866 But wel I woot that ye wol nat do so;
Tr 3 867 Ye ben to wys to doon so gret folie,
Tr 3 868 To putte his lif al nyght in jupertie. "
Tr 3 869 " Hadde I hym nevere lief? by God, I weene
Tr 3 870 Ye hadde nevere thyng so lief! " quod she.
Tr 3 871 " Now by my thrift, " quod he, " that shal be seene!
Tr 3 872 For syn ye make this ensaumple of me,
Tr 3 873 If ich al nyght wolde hym in sorwe se,
Tr 3 874 For al the tresour in the town of Troie,
Tr 3 875 I bidde God I nevere mote have joie.
Tr 3 876 " Now loke thanne, if ye that ben his love
Tr 3 877 Shul putte his lif al night in jupertie
Tr 3 878 For thyng of nought, now by that God above,
Tr 3 879 Naught oonly this delay comth of folie,
Tr 3 880 But of malice, if that I shal naught lie.
Tr 3 881 What! Platly, and ye suffre hym in destresse,
Tr 3 882 Ye neyther bounte don ne gentilesse. "
Tr 3 883 Quod tho Criseyde, " Wol ye don o thyng
Tr 3 884 And ye therwith shal stynte al his disese?
Tr 3 885 Have heere, and bereth hym this blewe ryng,
Tr 3 886 For ther is nothyng myghte hym bettre plese,
Tr 3 887 Save I myself, ne more hys herte apese;
Tr 3 888 And sey my deere herte that his sorwe
Tr 3 889 Is causeles; that shal be sene to-morwe. "
Tr 3 890 " A ryng? " quod he, " Ye haselwodes shaken!
Tr 3 891 Ye, nece myn, that ryng moste han a stoon
Tr 3 892 That myghte dede men alyve maken;
Tr 3 893 And swich a ryng trowe I that ye have non.
Tr 3 894 Discrecioun out of youre hed is gon;
Tr 3 895 That fele I now, " quod he, " and that is routhe.
Tr 3 896 O tyme ilost, wel maistow corsen slouthe!
Tr 3 897 " Woot ye not wel that noble and heigh corage
Tr 3 898 Ne sorweth nought, ne stynteth ek, for lite?
Tr 3 899 But if a fool were in a jalous rage,
Tr 3 900 I nolde setten at his sorwe a myte,
Tr 3 901 But feffe hym with a fewe wordes white
Tr 3 902 Anothir day, whan that I myghte hym fynde;
Tr 3 903 But this thyng stant al in another kynde.
Tr 3 904 " This is so gentil and so tendre of herte
Tr 3 905 That with his deth he wol his sorwes wreke;
Tr 3 906 For trusteth wel, how sore that hym smerte,
Tr 3 907 He wol to yow no jalous wordes speke.
Tr 3 908 And forthi, nece, er that his herte breke,
Tr 3 909 So speke youreself to hym of this matere,
Tr 3 910 For with o word ye may his herte stere.
Tr 3 911 " Now have I told what peril he is inne,
Tr 3 912 And his comynge unwist is to every wight;
Tr 3 913 Ne, parde, harm may ther be non, ne synne:
Tr 3 914 I wol myself be with yow al this nyght.
Tr 3 915 Ye knowe ek how it is youre owen knyght,
Tr 3 916 And that bi right ye moste upon hym triste,
Tr 3 917 And I al prest to fecche hym whan yow liste. "
Tr 3 918 This accident so pitous was to here,
Tr 3 919 And ek so like a sooth at prime face,
Tr 3 920 And Troilus hire knyght to hir so deere,
Tr 3 921 His prive comyng, and the siker place,
Tr 3 922 That though that she did hym as thanne a grace,
Tr 3 923 Considered alle thynges as they stoode,
Tr 3 924 No wonder is, syn she did al for goode.
Tr 3 925 Criseyde answerde, " As wisly God at reste
Tr 3 926 My soule brynge, as me is for hym wo!
Tr 3 927 And em, iwis, fayn wolde I don the beste,
Tr 3 928 If that ich hadde grace to do so;
Tr 3 929 But whether that ye dwelle or for hym go,
Tr 3 930 I am, til God me bettre mynde sende,
Tr 3 931 At dulcarnoun, right at my wittes ende. "
Tr 3 932 Quod Pandarus, " Yee, nece, wol ye here?
Tr 3 933 Dulcarnoun called is `flemyng of wrecches':
Tr 3 934 It semeth hard, for wrecches wol nought lere,
Tr 3 935 For verray slouthe or other wilfull tecches;
Tr 3 936 This seyd by hem that ben nought worth two fecches;
Tr 3 937 But ye ben wis, and that we han on honde
Tr 3 938 Nis neither hard, ne skilful to withstonde. "
Tr 3 939 " Than, em, " quod she, " doth herof as yow list.
Tr 3 940 But er he com, I wil up first arise,
Tr 3 941 And for the love of God, syn al my trist
Tr 3 942 Is on yow two, and ye ben bothe wise,
Tr 3 943 So werketh now in so discret a wise
Tr 3 944 That I honour may have, and he plesaunce:
Tr 3 945 For I am here al in youre governaunce. "
Tr 3 946 " That is wel seyd, " quod he, " my nece deere.
Tr 3 947 Ther good thrift on that wise gentil herte!
Tr 3 948 But liggeth stille, and taketh hym right here --
Tr 3 949 It nedeth nought no ferther for hym sterte.
Tr 3 950 And ech of yow ese otheres sorwes smerte,
Tr 3 951 For love of God! And Venus, I the herye;
Tr 3 952 For soone hope I we shul ben alle merye. "
Tr 3 953 This Troilus ful soone on knees hym sette
Tr 3 954 Ful sobrely, right be hyre beddes hed,
Tr 3 955 And in his beste wyse his lady grette.
Tr 3 956 But Lord, so she wex sodeynliche red!
Tr 3 957 Ne though men sholde smyten of hire hed,
Tr 3 958 She kouth. nought a word aright out brynge
Tr 3 959 So sodeynly, for his sodeyn comynge.
Tr 3 960 But Pandarus, that so wel koude feele
Tr 3 961 In every thyng, to pleye anon bigan,
Tr 3 962 And seyde, " Nece, se how this lord kan knele!
Tr 3 963 Now for youre trouthe, se this gentil man! "
Tr 3 964 And with that word he for a quysshen ran,
Tr 3 965 And seyde, " Kneleth now, while that yow leste;
Tr 3 966 There God youre hertes brynge soone at reste! "
Tr 3 967 Kan I naught seyn, for she bad hym nought rise,
Tr 3 968 If sorwe it putte out of hire remembraunce,
Tr 3 969 Or elles that she took it in the wise
Tr 3 970 Of dewete, as for his observaunce;
Tr 3 971 But wel fynde I she dede hym this plesaunce,
Tr 3 972 That she hym kiste, although she siked sore,
Tr 3 973 And bad hym sitte adown withouten more.
Tr 3 974 Quod Pandarus, " Now wol ye wel bigynne.
Tr 3 975 Now doth hym sitte, goode nece deere,
Tr 3 976 Upon youre beddes syde al ther withinne,
Tr 3 977 That ech of yow the bet may other heere. "
Tr 3 978 And with that word he drow hym to the feere,
Tr 3 979 And took a light, and fond his contenaunce,
Tr 3 980 As for to looke upon an old romaunce.
Tr 3 981 Criseyde, that was Troilus lady right,
Tr 3 982 And cler stood on a ground of sikernesse,
Tr 3 983 Al thoughte she hire servant and hire knyght
Tr 3 984 Ne sholde of right non untrouthe in hire gesse,
Tr 3 985 Yet natheles, considered his distresse,
Tr 3 986 And that love is in cause of swich folie,
Tr 3 987 Thus to hym spak she of his jalousie:
Tr 3 988 " Lo, herte myn, as wolde the excellence
Tr 3 989 Of love, ayeins the which that no man may --
Tr 3 990 Ne oughte ek -- goodly make resistence,
Tr 3 991 And ek bycause I felte wel and say
Tr 3 992 Youre grete trouthe and servise every day,
Tr 3 993 And that youre herte al myn was, soth to seyne,
Tr 3 994 This drof me for to rewe upon youre peyne.
Tr 3 995 " And youre goodnesse have I founde alwey yit,
Tr 3 996 Of which, my deere herte and al my knyght,
Tr 3 997 I thonke it yow, as fer as I have wit,
Tr 3 998 Al kan I nought as muche as it were right;
Tr 3 999 And I, emforth my connyng and my might,
Tr 3 1000 Have and ay shal, how sore that me smerte,
Tr 3 1001 Ben to yow trewe and hool with al myn herte,
Tr 3 1002 " And dredeles, that shal be founde at preve.
Tr 3 1003 But, herte myn, what al this is to seyne
Tr 3 1004 Shal wel be told, so that ye nought yow greve,
Tr 3 1005 Though I to yow right on youreself compleyne,
Tr 3 1006 For therwith mene I fynaly the peyne
Tr 3 1007 That halt youre herte and myn in hevynesse
Tr 3 1008 Fully to slen, and every wrong redresse.
Tr 3 1009 " My goode myn, noot I for-why ne how
Tr 3 1010 That jalousie, allas, that wikked wyvere,
Tr 3 1011 Thus causeles is cropen into yow,
Tr 3 1012 The harm of which I wolde fayn delyvere.
Tr 3 1013 Allas, that he, al hool or of hym slyvere,
Tr 3 1014 Shuld han his refut in so digne a place;
Tr 3 1015 Ther Jove hym sone out of youre herte arace!
Tr 3 1016 " But O, thow Jove, O auctour of nature,
Tr 3 1017 Is this an honour to thi deyte,
Tr 3 1018 That folk ungiltif suffren hire injure,
Tr 3 1019 And who that giltif is, al quyt goth he?
Tr 3 1020 O, were it lefull for to pleyn on the,
Tr 3 1021 That undeserved suffrest jalousie,
Tr 3 1022 Of that I wolde upon the pleyne and crie!
Tr 3 1023 " Ek al my wo is this, that folk now usen
Tr 3 1024 To seyn right thus, `Ye, jalousie is love!'
Tr 3 1025 And wolde a busshel venym al excusen,
Tr 3 1026 For that o greyn of love is on it shove.
Tr 3 1027 But that woot heighe God that sit above,
Tr 3 1028 If it be likkere love, or hate, or grame;
Tr 3 1029 And after that, it oughte bere his name.
Tr 3 1030 " But certeyn is, som manere jalousie
Tr 3 1031 Is excusable more than som, iwys;
Tr 3 1032 As whan cause is, and som swich fantasie
Tr 3 1033 With piete so wel repressed is
Tr 3 1034 That it unnethe doth or seyth amys,
Tr 3 1035 But goodly drynketh up al his distresse --
Tr 3 1036 And that excuse I, for the gentilesse;
Tr 3 1037 " And som so ful of furie is and despit
Tr 3 1038 That it sourmounteth his repressioun.
Tr 3 1039 But herte myn, ye be nat in that plit,
Tr 3 1040 That thonke I God; for which youre passioun
Tr 3 1041 I wol nought calle it but illusioun
Tr 3 1042 Of habundaunce of love and besy cure,
Tr 3 1043 That doth youre herte this disese endure.
Tr 3 1044 " Of which I am right sory but nought wroth;
Tr 3 1045 But, for my devoir and youre hertes reste,
Tr 3 1046 Wherso yow list, by ordal or by oth,
Tr 3 1047 By sort, or in what wise so yow leste,
Tr 3 1048 For love of God, lat preve it for the beste;
Tr 3 1049 And if that I be giltif, do me deye!
Tr 3 1050 Allas, what myght I more don or seye? "
Tr 3 1051 With that a fewe brighte teris newe
Tr 3 1052 Owt of hire eighen fille, and thus she seyde,
Tr 3 1053 " Now God, thow woost, in thought ne dede untrewe
Tr 3 1054 To Troilus was nevere yet Criseyde. "
Tr 3 1055 With that here heed down in the bed she leyde,
Tr 3 1056 And with the sheete it wreigh, and sighte soore,
Tr 3 1057 And held hire pees; nought o word spak she more.
Tr 3 1058 But now help God to quenchen al this sorwe!
Tr 3 1059 So hope I that he shal, for he best may.
Tr 3 1060 For I have seyn of a ful misty morwe
Tr 3 1061 Folowen ful ofte a myrie someris day;
Tr 3 1062 And after wynter foloweth grene May;
Tr 3 1063 Men sen alday, and reden ek in stories,
Tr 3 1064 That after sharpe shoures ben victories.
Tr 3 1065 This Troilus, whan he hire wordes herde,
Tr 3 1066 Have ye no care, hym liste nought to slepe;
Tr 3 1067 For it thoughte hym no strokes of a yerde
Tr 3 1068 To heere or seen Criseyde, his lady, wepe;
Tr 3 1069 But wel he felt aboute his herte crepe,
Tr 3 1070 For everi tere which that Criseyde asterte,
Tr 3 1071 The crampe of deth to streyne hym by the herte.
Tr 3 1072 And in his mynde he gan the tyme acorse
Tr 3 1073 That he com there, and that, that he was born;
Tr 3 1074 For now is wikke torned into worse,
Tr 3 1075 And al that labour he hath don byforn,
Tr 3 1076 He wende it lost; he thoughte he nas but lorn.
Tr 3 1077 " O Pandarus, " thoughte he, " allas, thi wile
Tr 3 1078 Serveth of nought, so weylaway the while! "
Tr 3 1079 And therwithal he heng adown the heed,
Tr 3 1080 And fil on knees, and sorwfully he sighte.
Tr 3 1081 What myghte he seyn? He felte he nas but deed,
Tr 3 1082 For wroth was she that sholde his sorwes lighte.
Tr 3 1083 But natheles, whan that he speken myghte,
Tr 3 1084 Than seyde he thus, " God woot that of this game,
Tr 3 1085 Whan al is wist, than am I nought to blame. "
Tr 3 1086 Therwith the sorwe so his herte shette
Tr 3 1087 That from his eyen fil there nought a tere,
Tr 3 1088 And every spirit his vigour in knette,
Tr 3 1089 So they astoned or oppressed were.
Tr 3 1090 The felyng of his sorwe, or of his fere,
Tr 3 1091 Or of aught elles, fled was out of towne;
Tr 3 1092 And down he fel al sodeynly a-swowne.
Tr 3 1093 This was no litel sorwe for to se;
Tr 3 1094 But al was hust, and Pandare up as faste;
Tr 3 1095 " O nece, pes, or we be lost! " quod he,
Tr 3 1096 " Beth naught agast! " But certeyn, at the laste,
Tr 3 1097 For this or that, he into bed hym caste,
Tr 3 1098 And seyde, " O thef, is this a mannes herte? "
Tr 3 1099 And of he rente al to his bare sherte,
Tr 3 1100 And seyde, " Nece, but ye helpe us now,
Tr 3 1101 Allas, youre owen Troilus is lorn! "
Tr 3 1102 " Iwis, so wolde I, and I wiste how,
Tr 3 1103 Ful fayn, " quod she. " Allas, that I was born " !
Tr 3 1104 " Yee, nece, wol ye pullen out the thorn
Tr 3 1105 That stiketh in his herte? " quod Pandare.
Tr 3 1106 " Sey `Al foryeve,' and stynt is al this fare! "
Tr 3 1107 " Ye, that to me, " quod she, " ful levere were
Tr 3 1108 Than al the good the sonne aboute gooth. "
Tr 3 1109 And therwithal she swor hym in his ere,
Tr 3 1110 " Iwys, my deere herte, I am nought wroth,
Tr 3 1111 Have here my trouthe! " -- and many an other oth.
Tr 3 1112 " Now speke to me, for it am I, Criseyde! "
Tr 3 1113 But al for nought; yit myght he nought abreyde.
Tr 3 1114 Therwith his pous and paumes of his hondes
Tr 3 1115 They gan to frote, and wete his temples tweyne;
Tr 3 1116 And to deliveren hym fro bittre bondes
Tr 3 1117 She ofte hym kiste; and shortly for to seyne,
Tr 3 1118 Hym to revoken she did al hire peyne;
Tr 3 1119 And at the laste, he gan his breth to drawe,
Tr 3 1120 And of his swough sone after that adawe,
Tr 3 1121 And gan bet mynde and reson to hym take,
Tr 3 1122 But wonder soore he was abayst, iwis;
Tr 3 1123 And with a sik, whan he gan bet awake,
Tr 3 1124 He seyde, " O mercy, God, what thyng is this? "
Tr 3 1125 " Why do ye with youreselven thus amys? "
Tr 3 1126 Quod tho Criseyde, " Is this a mannes game?
Tr 3 1127 What, Troilus, wol ye do thus for shame? "
Tr 3 1128 And therwithal hire arm over hym she leyde,
Tr 3 1129 And al foryaf, and ofte tyme hym keste.
Tr 3 1130 He thonked hire, and to hire spak, and seyde
Tr 3 1131 As fil to purpos for his herte reste;
Tr 3 1132 And she to that answerde hym as hire leste,
Tr 3 1133 And with hire goodly wordes hym disporte
Tr 3 1134 She gan, and ofte his sorwes to comforte.
Tr 3 1135 Quod Pandarus, " For aught I kan aspien,
Tr 3 1136 This light, nor I, ne serven here of nought.
Tr 3 1137 Light is nought good for sike folkes yen!
Tr 3 1138 But, for the love of God, syn ye ben brought
Tr 3 1139 In thus good plit, lat now no hevy thought
Tr 3 1140 Ben hangyng in the hertes of yow tweye " --
Tr 3 1141 And bar the candel to the chymeneye.
Tr 3 1142 Soone after this, though it no nede were,
Tr 3 1143 Whan she swiche othes as hire leste devyse
Tr 3 1144 Hadde of hym take, hire thoughte tho no fere,
Tr 3 1145 Ne cause ek non to bidde hym thennes rise.
Tr 3 1146 Yet lasse thyng than othes may suffise
Tr 3 1147 In many a cas, for every wyght, I gesse,
Tr 3 1148 That loveth wel, meneth but gentilesse.
Tr 3 1149 But in effect she wolde wite anon
Tr 3 1150 Of what man, and ek wheer, and also why
Tr 3 1151 He jalous was, syn ther was cause non;
Tr 3 1152 And ek the sygne that he took it by,
Tr 3 1153 She badde hym that to telle hire bisily,
Tr 3 1154 Or elles, certeyn, she bar hym on honde
Tr 3 1155 That this was don of malice, hire to fonde.
Tr 3 1156 Withouten more, shortly for to seyne,
Tr 3 1157 He most obeye unto his lady heste;
Tr 3 1158 And for the lasse harm, he moste feyne.
Tr 3 1159 He seyde hire, whan she was at swich a feste,
Tr 3 1160 She myght on hym han loked at the leste --
Tr 3 1161 Noot I nought what, al deere ynough a rysshe,
Tr 3 1162 As he that nedes most a cause fisshe.
Tr 3 1163 And she answerde, " Swete, al were it so,
Tr 3 1164 What harm was that, syn I non yvel mene?
Tr 3 1165 For, by that God that bought us bothe two,
Tr 3 1166 In alle thyng is myn entente cleene.
Tr 3 1167 Swiche argumentes ne ben naught worth a beene.
Tr 3 1168 Wol ye the childissh jalous contrefete?
Tr 3 1169 Now were it worthi that ye were ybete. "
Tr 3 1170 Tho Troilus gan sorwfully to sike --
Tr 3 1171 Lest she be wroth, hym thoughte his herte deyde --
Tr 3 1172 And seyde, " Allas, upon my sorwes sike
Tr 3 1173 Have mercy, swete herte myn, Criseyde!
Tr 3 1174 And if that in tho wordes that I seyde
Tr 3 1175 Be any wrong, I wol no more trespace.
Tr 3 1176 Doth what yow list; I am al in youre grace. "
Tr 3 1177 And she answerde, " Of gilt misericorde!
Tr 3 1178 That is to seyn, that I foryeve al this;
Tr 3 1179 And evere more on this nyght yow recorde,
Tr 3 1180 And beth wel war ye do namore amys. "
Tr 3 1181 " Nay, dere herte myn, " quod he, " iwys! "
Tr 3 1182 " And now, " quod she, " that I have don yow smerte,
Tr 3 1183 Foryeve it me, myn owene swete herte. "
Tr 3 1184 This Troilus, with blisse of that supprised,
Tr 3 1185 Putte al in Goddes hand, as he that mente
Tr 3 1186 Nothing but wel; and sodeynly avysed,
Tr 3 1187 He hire in armes faste to hym hente.
Tr 3 1188 And Pandarus with a ful good entente
Tr 3 1189 Leyde hym to slepe, and seyde, " If ye be wise,
Tr 3 1190 Swouneth nought now, lest more folk arise! "
Tr 3 1191 What myghte or may the sely larke seye,
Tr 3 1192 Whan that the sperhauk hath it in his foot?
Tr 3 1193 I kan namore; but of thise ilke tweye --
Tr 3 1194 To whom this tale sucre be or soot --
Tr 3 1195 Though that I tarie a yer, somtyme I moot,
Tr 3 1196 After myn auctour, tellen hire gladnesse,
Tr 3 1197 As wel as I have told hire hevynesse.
Tr 3 1198 Criseyde, which that felte hire thus itake,
Tr 3 1199 As writen clerkes in hire bokes olde,
Tr 3 1200 Right as an aspes leef she gan to quake,
Tr 3 1201 Whan she hym felte hire in his armes folde.
Tr 3 1202 But Troilus, al hool of cares colde,
Tr 3 1203 Gan thanken tho the bryghte goddes sevene;
Tr 3 1204 Thus sondry peynes bryngen folk in hevene.
Tr 3 1205 This Troilus in armes gan hire streyne,
Tr 3 1206 And seyde, " O swete, as evere mot I gon,
Tr 3 1207 Now be ye kaught; now is ther but we tweyne!
Tr 3 1208 Now yeldeth yow, for other bote is non! "
Tr 3 1209 To that Criseyde answerde thus anon,
Tr 3 1210 " Ne hadde I er now, my swete herte deere,
Tr 3 1211 Ben yolde, ywis, I were now nought heere! "
Tr 3 1212 O, sooth is seyd, that heled for to be
Tr 3 1213 As of a fevre or other gret siknesse,
Tr 3 1214 Men moste drynke, as men may ofte se,
Tr 3 1215 Ful bittre drynke; and for to han gladnesse
Tr 3 1216 Men drynken ofte peyne and gret distresse --
Tr 3 1217 I mene it here, as for this aventure,
Tr 3 1218 That thorugh a peyne hath founden al his cure.
Tr 3 1219 And now swetnesse semeth more swete,
Tr 3 1220 That bitternesse assaied was byforn;
Tr 3 1221 For out of wo in blisse now they flete;
Tr 3 1222 Non swich they felten sithen they were born.
Tr 3 1223 Now is this bet than bothe two be lorn.
Tr 3 1224 For love of God, take every womman heede
Tr 3 1225 To werken thus, if it comth to the neede.
Tr 3 1226 Criseyde, al quyt from every drede and tene,
Tr 3 1227 As she that juste cause hadde hym to triste,
Tr 3 1228 Made hym swych feste it joye was to sene,
Tr 3 1229 Whan she his trouthe and clene entente wiste;
Tr 3 1230 And as aboute a tree, with many a twiste,
Tr 3 1231 Bytrent and writh the swote wodebynde,
Tr 3 1232 Gan ech of hem in armes other wynde.
Tr 3 1233 And as the newe abaysed nyghtyngale,
Tr 3 1234 That stynteth first whan she bygynneth to synge,
Tr 3 1235 Whan that she hereth any herde tale,
Tr 3 1236 Or in the hegges any wyght stirynge,
Tr 3 1237 And after siker doth hire vois out rynge,
Tr 3 1238 Right so Criseyde, whan hire drede stente,
Tr 3 1239 Opned hire herte and tolde hym hire entente.
Tr 3 1240 And right as he that seth his deth yshapen,
Tr 3 1241 And dyen mot, in ought that he may gesse,
Tr 3 1242 And sodeynly rescous doth hym escapen,
Tr 3 1243 And from his deth is brought in sykernesse,
Tr 3 1244 For al this world, in swych present gladnesse
Tr 3 1245 Was Troilus, and hath his lady swete.
Tr 3 1246 With worse hap God lat us nevere mete!
Tr 3 1247 Hire armes smale, hire streghte bak and softe,
Tr 3 1248 Hire sydes longe, flesshly, smothe, and white
Tr 3 1249 He gan to stroke, and good thrift bad ful ofte
Tr 3 1250 Hire snowissh throte, hire brestes rounde and lite.
Tr 3 1251 Thus in this hevene he gan hym to delite,
Tr 3 1252 And therwithal a thousand tyme hire kiste,
Tr 3 1253 That what to don, for joie unnethe he wiste.
Tr 3 1254 Than seyde he thus: " O Love, O Charite!
Tr 3 1255 Thi moder ek, Citheria the swete,
Tr 3 1256 After thiself next heried be she --
Tr 3 1257 Venus mene I, the wel-willy planete! --
Tr 3 1258 And next that, Imeneus, I the grete,
Tr 3 1259 For nevere man was to yow goddes holde
Tr 3 1260 As I, which ye han brought fro cares colde.
Tr 3 1261 " Benigne Love, thow holy bond of thynges,
Tr 3 1262 Whoso wol grace and list the nought honouren,
Tr 3 1263 Lo, his desir wol fle withouten wynges;
Tr 3 1264 For noldestow of bownte hem socouren
Tr 3 1265 That serven best and most alwey labouren,
Tr 3 1266 Yet were al lost, that dar I wel seyn, certes,
Tr 3 1267 But if thi grace passed oure desertes.
Tr 3 1268 " And for thow me, that koude leest disserve
Tr 3 1269 Of hem that noumbred ben unto thi grace,
Tr 3 1270 Hast holpen, ther I likly was to sterve,
Tr 3 1271 And me bistowed in so heigh a place
Tr 3 1272 That thilke boundes may no blisse pace,
Tr 3 1273 I kan namore; but laude and reverence
Tr 3 1274 Be to thy bounte and thyn excellence! "
Tr 3 1275 And therwithal Criseyde anon he kiste,
Tr 3 1276 Of which certein she felte no disese,
Tr 3 1277 And thus seyde he: " Now wolde God I wiste,
Tr 3 1278 Myn herte swete, how I yow myght plese!
Tr 3 1279 What man, " quod he, " was evere thus at ese
Tr 3 1280 As I, on which the faireste and the beste
Tr 3 1281 That evere I say deyneth hire herte reste?
Tr 3 1282 " Here may men seen that mercy passeth right;
Tr 3 1283 Th' experience of that is felt in me,
Tr 3 1284 That am unworthi to so swete a wight.
Tr 3 1285 But herte myn, of youre benignite,
Tr 3 1286 So thynketh, though that I unworthi be,
Tr 3 1287 Yet mot I nede amenden in som wyse,
Tr 3 1288 Right thorugh the vertu of youre heigh servyse.
Tr 3 1289 " And for the love of God, my lady deere,
Tr 3 1290 Syn God hath wrought me for I shall yow serve --
Tr 3 1291 As thus I mene: he wol ye be my steere,
Tr 3 1292 To do me lyve, if that yow liste, or sterve --
Tr 3 1293 So techeth me how that I may disserve
Tr 3 1294 Youre thonk, so that I thorugh myn ignoraunce
Tr 3 1295 Ne do no thyng that yow be displesaunce.
Tr 3 1296 " For certes, fresshe wommanliche wif,
Tr 3 1297 This dar I seye, that trouth and diligence,
Tr 3 1298 That shal ye fynden in me al my lif;
Tr 3 1299 N' y wol nat, certein, breken youre defence;
Tr 3 1300 And if I do, present or in absence,
Tr 3 1301 For love of God, lat sle me with the dede,
Tr 3 1302 If that it like unto youre wommanhede. "
Tr 3 1303 " Iwys, " quod she, " myn owen hertes list,
Tr 3 1304 My ground of ese, and al myn herte deere,
Tr 3 1305 Gramercy, for on that is al my trist!
Tr 3 1306 But lat us falle awey fro this matere,
Tr 3 1307 For it suffiseth, this that seyd is heere,
Tr 3 1308 And at o word, withouten repentaunce,
Tr 3 1309 Welcome, my knyght, my pees, my suffisaunce! "
Tr 3 1310 Of hire delit or joies oon the leeste
Tr 3 1311 Were impossible to my wit to seye;
Tr 3 1312 But juggeth ye that han ben at the feste
Tr 3 1313 Of swich gladnesse, if that hem liste pleye!
Tr 3 1314 I kan namore, but thus thise ilke tweye
Tr 3 1315 That nyght, bitwixen drede and sikernesse,
Tr 3 1316 Felten in love the grete worthynesse.
Tr 3 1317 O blisful nyght, of hem so longe isought,
Tr 3 1318 How blithe unto hem bothe two thow weere!
Tr 3 1319 Why nad I swich oon with my soule ybought,
Tr 3 1320 Ye, or the leeste joie that was theere?
Tr 3 1321 Awey, thow foule daunger and thow feere,
Tr 3 1322 And lat hem in this hevene blisse dwelle,
Tr 3 1323 That is so heigh that al ne kan I telle!
Tr 3 1324 But sooth is, though I kan nat tellen al,
Tr 3 1325 As kan myn auctour, of his excellence,
Tr 3 1326 Yet have I seyd, and God toforn, and shal
Tr 3 1327 In every thyng, al holly his sentence;
Tr 3 1328 And if that ich, at Loves reverence,
Tr 3 1329 Have any word in eched for the beste,
Tr 3 1330 Doth therwithal right as youreselven leste.
Tr 3 1331 For myne wordes, heere and every part,
Tr 3 1332 I speke hem alle under correccioun
Tr 3 1333 Of yow that felyng han in loves art,
Tr 3 1334 And putte it al in youre discrecioun
Tr 3 1335 To encresse or maken dymynucioun
Tr 3 1336 Of my langage, and that I yow biseche.
Tr 3 1337 But now to purpos of my rather speche.
Tr 3 1338 Thise ilke two, that ben in armes laft,
Tr 3 1339 So loth to hem asonder gon it were,
Tr 3 1340 That ech from other wenden ben biraft,
Tr 3 1341 Or elles -- lo, this was hir mooste feere --
Tr 3 1342 That al this thyng but nyce dremes were;
Tr 3 1343 For which ful ofte ech of hem seyde, " O swete,
Tr 3 1344 Clippe ich yow thus, or elles I it meete? "
Tr 3 1345 And Lord! So he gan goodly on hire se
Tr 3 1346 That nevere his look ne bleynte from hire face,
Tr 3 1347 And seyde, " O deere herte, may it be
Tr 3 1348 That it be soth, that ye ben in this place? "
Tr 3 1349 " Yee, herte myn, God thank I of his grace, "
Tr 3 1350 Quod tho Criseyde, and therwithal hym kiste,
Tr 3 1351 That where his spirit was, for joie he nyste.
Tr 3 1352 This Troilus ful ofte hire eyen two
Tr 3 1353 Gan for to kisse, and seyde, " O eyen clere,
Tr 3 1354 It weren ye that wroughte me swich wo,
Tr 3 1355 Ye humble nettes of my lady deere!
Tr 3 1356 Though ther be mercy writen in youre cheere,
Tr 3 1357 God woot, the text ful hard is, soth, to fynde!
Tr 3 1358 How koude ye withouten bond me bynde? "
Tr 3 1359 Therwith he gan hire faste in armes take,
Tr 3 1360 And wel a thousand tymes gan he syke --
Tr 3 1361 Naught swiche sorwfull sikes as men make
Tr 3 1362 For wo, or elles when that folk ben sike,
Tr 3 1363 But esy sykes, swiche as ben to like,
Tr 3 1364 That shewed his affeccioun withinne;
Tr 3 1365 Of swiche sikes koude he nought bilynne.
Tr 3 1366 Soone after this they spake of sondry thynges,
Tr 3 1367 As fel to purpos of this aventure,
Tr 3 1368 And pleyinge entrechaungeden hire rynges,
Tr 3 1369 Of whiche I kan nought tellen no scripture;
Tr 3 1370 But wel I woot, a broche, gold and asure,
Tr 3 1371 In which a ruby set was lik an herte,
Tr 3 1372 Criseyde hym yaf, and stak it on his sherte.
Tr 3 1373 Lord, trowe ye a coveytous or a wrecche,
Tr 3 1374 That blameth love and halt of it despit,
Tr 3 1375 That of tho pens that he kan mokre and kecche
Tr 3 1376 Was evere yit yyeven hym swich delit
Tr 3 1377 As is in love, in o poynt, in som plit?
Tr 3 1378 Nay, douteles, for also God me save,
Tr 3 1379 So perfit joie may no nygard have.
Tr 3 1380 They wol seyn " Yis, " but Lord, so they lye,
Tr 3 1381 Tho besy wrecches, ful of wo and drede!
Tr 3 1382 Thei callen love a woodnesse or folie,
Tr 3 1383 But it shall falle hem as I shal yow rede:
Tr 3 1384 They shal forgon the white and ek the rede,
Tr 3 1385 And lyve in wo, ther God yeve hem meschaunce,
Tr 3 1386 And every lovere in his trouthe avaunce!
Tr 3 1387 As wolde God tho wrecches that dispise
Tr 3 1388 Servise of love hadde erys also longe
Tr 3 1389 As hadde Mida, ful of coveytise,
Tr 3 1390 And therto dronken hadde as hoot and stronge
Tr 3 1391 As Crassus did for his affectis wronge,
Tr 3 1392 To techen hem that they ben in the vice,
Tr 3 1393 And loveres nought, although they holde hem nyce.
Tr 3 1394 Thise ilke two of whom that I yow seye,
Tr 3 1395 Whan that hire hertes wel assured were,
Tr 3 1396 Tho gonne they to speken and to pleye,
Tr 3 1397 And ek rehercen how, and whan, and where
Tr 3 1398 Thei knewe hem first, and every wo and feere
Tr 3 1399 That passed was; but al swich hevynesse --
Tr 3 1400 I thank it God -- was torned to gladnesse.
Tr 3 1401 And evere mo, when that hem fel to speke
Tr 3 1402 Of any wo of swich a tyme agoon,
Tr 3 1403 With kissyng al that tale sholde breke
Tr 3 1404 And fallen in a newe joye anoon;
Tr 3 1405 And diden al hire myght, syn they were oon,
Tr 3 1406 For to recoveren blisse and ben at eise,
Tr 3 1407 And passed wo with joie contrepeise.
Tr 3 1408 Resoun wol nought that I speke of slep,
Tr 3 1409 For it acordeth nought to my matere.
Tr 3 1410 God woot, they took of that ful litel kep!
Tr 3 1411 But lest this nyght, that was to hem so deere,
Tr 3 1412 Ne sholde in veyn escape in no manere,
Tr 3 1413 It was byset in joie and bisynesse
Tr 3 1414 Of al that souneth into gentilesse.
Tr 3 1415 But whan the cok, comune astrologer,
Tr 3 1416 Gan on his brest to bete and after crowe,
Tr 3 1417 And Lucyfer, the dayes messager,
Tr 3 1418 Gan for to rise and out hire bemes throwe,
Tr 3 1419 And estward roos -- to hym that koude it knowe --
Tr 3 1420 Fortuna Major, that anoon Criseyde,
Tr 3 1421 With herte soor, to Troilus thus seyde:
Tr 3 1422 " Myn hertes lif, my trist, al my plesaunce,
Tr 3 1423 That I was born, allas, what me is wo,
Tr 3 1424 That day of us moot make disseveraunce!
Tr 3 1425 For tyme it is to ryse and hennes go,
Tr 3 1426 Or ellis I am lost for evere mo!
Tr 3 1427 O nyght, allas, why nyltow over us hove
Tr 3 1428 As longe as whan Almena lay by Jove?
Tr 3 1429 " O blake nyght, as folk in bokes rede,
Tr 3 1430 That shapen art by God this world to hide
Tr 3 1431 At certeyn tymes wyth thi derke wede,
Tr 3 1432 That under that men myghte in reste abide,
Tr 3 1433 Wel oughten bestes pleyne and folk the chide,
Tr 3 1434 That there as day wyth labour wolde us breste,
Tr 3 1435 That thow thus fleest, and deynest us nought reste.
Tr 3 1436 " Thow doost, allas, to shortly thyn office,
Tr 3 1437 Thow rakle nyght! Ther God, maker of kynde,
Tr 3 1438 The, for thyn haste and thyn unkynde vice,
Tr 3 1439 So faste ay to oure hemysperie bynde
Tr 3 1440 That nevere more under the ground thow wynde!
Tr 3 1441 For now, for thow so hiest out of Troie,
Tr 3 1442 Have I forgon thus hastili my joie! "
Tr 3 1443 This Troilus, that with tho wordes felte,
Tr 3 1444 As thoughte hym tho, for pietous distresse
Tr 3 1445 The blody teris from his herte melte,
Tr 3 1446 As he that nevere yet swich hevynesse
Tr 3 1447 Assayed hadde, out of so gret gladnesse,
Tr 3 1448 Gan therwithal Criseyde, his lady deere,
Tr 3 1449 In armes streyne, and seyde in this manere:
Tr 3 1450 " O cruel day, accusour of the joie
Tr 3 1451 That nyght and love han stole and faste iwryen,
Tr 3 1452 Acorsed be thi comyng into Troye,
Tr 3 1453 For every bore hath oon of thi bryghte yen!
Tr 3 1454 Envyous day, what list the so to spien?
Tr 3 1455 What hastow lost? Why sekestow this place?
Tr 3 1456 Ther God thi light so quenche, for his grace!
Tr 3 1457 " Allas, what have thise loveris the agylt,
Tr 3 1458 Dispitous day? Thyn be the peyne of helle!
Tr 3 1459 For many a lovere hastow slayn, and wilt;
Tr 3 1460 Thy pourynge in wol nowher lat hem dwelle.
Tr 3 1461 What profrestow thi light here for to selle?
Tr 3 1462 Go selle it hem that smale selys grave;
Tr 3 1463 We wol the nought; us nedeth no day have. "
Tr 3 1464 And ek the sonne, Titan, gan he chide,
Tr 3 1465 And seyde, " O fool, wel may men the dispise,
Tr 3 1466 That hast the dawyng al nyght by thi syde,
Tr 3 1467 And suffrest hire so soone up fro the rise
Tr 3 1468 For to disese loveris in this wyse.
Tr 3 1469 What, holde youre bed ther, thow, and ek thi Morwe!
Tr 3 1470 I bidde God, so yeve yow bothe sorwe! "
Tr 3 1471 Therwith ful soore he syghte, and thus he seyde:
Tr 3 1472 " My lady right, and of my wele or wo
Tr 3 1473 The welle and roote, O goodly myn Criseyde,
Tr 3 1474 And shal I rise, allas, and shal I so?
Tr 3 1475 Now fele I that myn herte moot a-two,
Tr 3 1476 For how sholde I my lif an houre save,
Tr 3 1477 Syn that with yow is al the lif ich have?
Tr 3 1478 " What shal I don? For, certes, I not how,
Tr 3 1479 Ne whan, allas, I shal the tyme see
Tr 3 1480 That in this plit I may ben eft with yow;
Tr 3 1481 And of my lif, God woot how that shal be,
Tr 3 1482 Syn that desir right now so streyneth me
Tr 3 1483 That I am ded anon, but I retourne.
Tr 3 1484 How sholde I longe, allas, fro yow sojourne?
Tr 3 1485 " But natheles, myn owen lady bright,
Tr 3 1486 Were it so that I wiste outrely
Tr 3 1487 That I, youre humble servant and youre knyght,
Tr 3 1488 Were in youre herte iset so fermely
Tr 3 1489 As ye in myn -- the which thyng, trewely,
Tr 3 1490 Me levere were than thise worldes tweyne --
Tr 3 1491 Yet sholde I bet enduren al my peyne. "
Tr 3 1492 To that Criseyde answerde right anon,
Tr 3 1493 And with a sik she seyde, " O herte deere,
Tr 3 1494 The game, ywys, so ferforth now is gon
Tr 3 1495 That first shal Phebus fallen fro his speere,
Tr 3 1496 And everich egle ben the dowves feere,
Tr 3 1497 And everich roche out of his place sterte,
Tr 3 1498 Er Troilus oute of Criseydes herte.
Tr 3 1499 " Ye ben so depe in-with myn herte grave,
Tr 3 1500 That, though I wolde it torne out of my thought,
Tr 3 1501 As wisly verray God my soule save,
Tr 3 1502 To dyen in the peyne, I koude nought.
Tr 3 1503 And, for the love of God that us hath wrought,
Tr 3 1504 Lat in youre brayn non other fantasie
Tr 3 1505 So crepe that it cause me to dye!
Tr 3 1506 " And that ye me wolde han as faste in mynde
Tr 3 1507 As I have yow, that wolde I yow biseche;
Tr 3 1508 And if I wiste sothly that to fynde,
Tr 3 1509 God myghte nought a poynt my joies eche.
Tr 3 1510 But herte myn, withouten more speche,
Tr 3 1511 Beth to me trewe, or ellis were it routhe,
Tr 3 1512 For I am thyn, by God and by my trouthe!
Tr 3 1513 " Beth glad, forthy, and lyve in sikernesse!
Tr 3 1514 Thus seyde I nevere er this, ne shal to mo;
Tr 3 1515 And if to yow it were a gret gladnesse
Tr 3 1516 To torne ayeyn soone after that ye go,
Tr 3 1517 As fayn wolde I as ye that it were so,
Tr 3 1518 As wisly God myn herte brynge at reste! "
Tr 3 1519 And hym in armes tok, and ofte keste.
Tr 3 1520 Agayns his wil, sith it mot nedes be,
Tr 3 1521 This Troilus up ros, and faste hym cledde,
Tr 3 1522 And in his armes took his lady free
Tr 3 1523 An hondred tyme, and on his wey hym spedde;
Tr 3 1524 And with swich voys as though his herte bledde,
Tr 3 1525 He seyde, " Farwel, dere herte swete;
Tr 3 1526 Ther God us graunte sownde and soone to mete! "
Tr 3 1527 To which no word for sorwe she answerde,
Tr 3 1528 So soore gan his partyng hire distreyne;
Tr 3 1529 And Troilus unto his paleys ferde,
Tr 3 1530 As wo-bygon as she was, soth to seyne.
Tr 3 1531 So harde hym wrong of sharp desir the peyne
Tr 3 1532 For to ben eft there he was in plesaunce,
Tr 3 1533 That it may nevere out of his remembraunce.
Tr 3 1534 Retorned to his real paleys soone,
Tr 3 1535 He softe into his bed gan for to slynke,
Tr 3 1536 To slepe longe, as he was wont to doone.
Tr 3 1537 But al for nought; he may wel ligge and wynke,
Tr 3 1538 But slep ne may ther in his herte synke,
Tr 3 1539 Thynkyng how she for whom desir hym brende
Tr 3 1540 A thousand fold was worth more than he wende.
Tr 3 1541 And in his thought gan up and down to wynde
Tr 3 1542 Hire wordes alle, and every countenaunce,
Tr 3 1543 And fermely impressen in his mynde
Tr 3 1544 The leeste point that to him was plesaunce;
Tr 3 1545 And verraylich of thilke remembraunce
Tr 3 1546 Desir al newe hym brende, and lust to brede
Tr 3 1547 Gan more than erst, and yet took he non hede.
Tr 3 1548 Criseyde also, right in the same wyse,
Tr 3 1549 Of Troilus gan in hire herte shette
Tr 3 1550 His worthynesse, his lust, his dedes wise,
Tr 3 1551 His gentilesse, and how she with hym mette,
Tr 3 1552 Thonkyng Love he so wel hire bisette,
Tr 3 1553 Desiryng eft to han hire herte deere
Tr 3 1554 In swich a plit, she dorste make hym cheere.
Tr 3 1555 Pandare, o-morwe, which that comen was
Tr 3 1556 Unto his nece and gan hire faire grete,
Tr 3 1557 Seyde, " Al this nyght so reyned it, allas,
Tr 3 1558 That al my drede is that ye, nece swete,
Tr 3 1559 Han litel laiser had to slepe and mete.
Tr 3 1560 Al nyght, " quod he, " hath reyn so do me wake,
Tr 3 1561 That som of us, I trowe, hire hedes ake. "
Tr 3 1562 And ner he com, and seyde, " How stant it now
Tr 3 1563 This mury morwe? Nece, how kan ye fare? "
Tr 3 1564 Criseyde answerde, " Nevere the bet for yow,
Tr 3 1565 Fox that ye ben! God yeve youre herte kare!
Tr 3 1566 God help me so, ye caused al this fare,
Tr 3 1567 Trowe I, " quod she, " for al youre wordes white.
Tr 3 1568 O, whoso seeth yow knoweth yow ful lite. "
Tr 3 1569 With that she gan hire face for to wrye
Tr 3 1570 With the shete, and wax for shame al reed;
Tr 3 1571 And Pandarus gan under for to prie,
Tr 3 1572 And seyde, " Nece, if that I shal be ded,
Tr 3 1573 Have here a swerd and smyteth of myn hed! "
Tr 3 1574 With that his arm al sodeynly he thriste
Tr 3 1575 Under hire nekke, and at the laste hire kyste.
Tr 3 1576 I passe al that which chargeth nought to seye.
Tr 3 1577 What! God foryaf his deth, and she al so
Tr 3 1578 Foryaf, and with here uncle gan to pleye,
Tr 3 1579 For other cause was ther noon than so.
Tr 3 1580 But of this thing right to the effect to go:
Tr 3 1581 Whan tyme was, hom til here hous she wente,
Tr 3 1582 And Pandarus hath fully his entente.
Tr 3 1583 Now torne we ayeyn to Troilus,
Tr 3 1584 That resteles ful longe abedde lay,
Tr 3 1585 And pryvely sente after Pandarus,
Tr 3 1586 To hym to com in al the haste he may.
Tr 3 1587 He com anon -- nought ones seyde he nay --
Tr 3 1588 And Troilus ful sobrely he grette,
Tr 3 1589 And down upon his beddes syde hym sette.
Tr 3 1590 This Troilus, with al th' affeccioun
Tr 3 1591 Of frendes love that herte may devyse,
Tr 3 1592 To Pandarus on knowes fil adown,
Tr 3 1593 And er that he wolde of the place arise
Tr 3 1594 He gan hym thonken in his beste wise
Tr 3 1595 An hondred sythe, and gan the tyme blesse
Tr 3 1596 That he was born, to brynge hym fro destresse.
Tr 3 1597 He seyde, " O frend of frendes the alderbeste
Tr 3 1598 That evere was, the sothe for to telle,
Tr 3 1599 Thow hast in hevene ybrought my soule at reste
Tr 3 1600 Fro Flegitoun, the fery flood of helle,
Tr 3 1601 That, though I myght a thousand tymes selle
Tr 3 1602 Upon a day my lif in thi servise,
Tr 3 1603 It myghte naught a moote in that suffise.
Tr 3 1604 " The sonne, which that al the world may se,
Tr 3 1605 Saugh nevere yet my lif, that dar I leye,
Tr 3 1606 So inly fair and goodly as is she
Tr 3 1607 Whos I am al, and shal, tyl that I deye.
Tr 3 1608 And that I thus am hires, dar I seye,
Tr 3 1609 That thanked be the heighe worthynesse
Tr 3 1610 Of Love, and ek thi kynde bysynesse.
Tr 3 1611 " Thus hastow me no litel thing yyive,
Tr 3 1612 For which to the obliged be for ay
Tr 3 1613 My lif. And whi? For thorugh thyn help I lyve,
Tr 3 1614 Or elles ded hadde I ben many a day. "
Tr 3 1615 And with that word down in his bed he lay,
Tr 3 1616 And Pandarus ful sobrely hym herde
Tr 3 1617 Tyl al was seyd, and than he thus answerde:
Tr 3 1618 " My deere frend, if I have don for the
Tr 3 1619 In any cas, God wot, it is me lief,
Tr 3 1620 And am as glad as man may of it be,
Tr 3 1621 God help me so; but tak now nat a-grief
Tr 3 1622 That I shal seyn: be war of this meschief,
Tr 3 1623 That, there as thow now brought art in thy blisse,
Tr 3 1624 That thow thiself ne cause it nat to misse.
Tr 3 1625 " For of fortunes sharpe adversitee
Tr 3 1626 The worste kynde of infortune is this,
Tr 3 1627 A man to han ben in prosperitee,
Tr 3 1628 And it remembren whan it passed is.
Tr 3 1629 Th' art wis ynough; forthi do nat amys:
Tr 3 1630 Be naught to rakel, theigh thow sitte warme,
Tr 3 1631 For if thow be, certeyn it wol the harme.
Tr 3 1632 " Thow art at ese, and hold the wel therinne;
Tr 3 1633 For also seur as reed is every fir,
Tr 3 1634 As gret a craft is kepe wel as wynne.
Tr 3 1635 Bridle alwey wel thi speche and thi desir,
Tr 3 1636 For worldly joie halt nought but by a wir.
Tr 3 1637 That preveth wel, it brest al day so ofte;
Tr 3 1638 Forthi nede is to werken with it softe. "
Tr 3 1639 Quod Troilus, " I hope, and God toforn,
Tr 3 1640 My deere frend, that I shal so me beere
Tr 3 1641 That in my gylt ther shal nothyng be lorn,
Tr 3 1642 N' y nyl nought rakle as for to greven heere.
Tr 3 1643 It nedeth naught this matere ofte stere;
Tr 3 1644 For wystestow myn herte wel, Pandare,
Tr 3 1645 God woot, of this thow woldest litel care. "
Tr 3 1646 Tho gan he telle hym of his glade nyght,
Tr 3 1647 And wherof first his herte dred, and how,
Tr 3 1648 And seyde, " Frend, as I am trewe knyght,
Tr 3 1649 And by that feyth I shal to God and yow,
Tr 3 1650 I hadde it nevere half so hote as now;
Tr 3 1651 And ay the more that desir me biteth
Tr 3 1652 To love hire best, the more it me deliteth.
Tr 3 1653 " I not myself naught wisly what it is,
Tr 3 1654 But now I feele a newe qualitee --
Tr 3 1655 Yee, al another than I dide er this. "
Tr 3 1656 Pandare answerd, and seyde thus, that " he
Tr 3 1657 That ones may in hevene blisse be,
Tr 3 1658 He feleth other weyes, dar I leye,
Tr 3 1659 Than thilke tyme he first herde of it seye. "
Tr 3 1660 This is o word for al: this Troilus
Tr 3 1661 Was nevere ful to speke of this matere,
Tr 3 1662 And for to preisen unto Pandarus
Tr 3 1663 The bounte of his righte lady deere,
Tr 3 1664 And Pandarus to thanke and maken cheere.
Tr 3 1665 This tale ay was span-newe to bygynne,
Tr 3 1666 Til that the nyght departed hem atwynne.
Tr 3 1667 Soon after this, for that Fortune it wolde,
Tr 3 1668 Icomen was the blisful tyme swete
Tr 3 1669 That Troilus was warned that he sholde,
Tr 3 1670 There he was erst, Criseyde his lady mete,
Tr 3 1671 For which he felte his herte in joie flete
Tr 3 1672 And feithfully gan alle the goddes herie.
Tr 3 1673 And lat se now if that he kan be merie!
Tr 3 1674 And holden was the forme and al the wise
Tr 3 1675 Of hire commyng, and of his also,
Tr 3 1676 As it was erst, which nedeth nought devyse.
Tr 3 1677 But pleynly to th' effect right for to go:
Tr 3 1678 In joie and suerte Pandarus hem two
Tr 3 1679 Abedde brought, whan that hem bothe leste,
Tr 3 1680 And thus they ben in quyete and in reste.
Tr 3 1681 Nought nedeth it to yow, syn they ben met,
Tr 3 1682 To axe at me if that they blithe were;
Tr 3 1683 For if it erst was wel, tho was it bet
Tr 3 1684 A thousand fold; this nedeth nought enquere.
Tr 3 1685 Ago was every sorwe and every feere;
Tr 3 1686 And bothe, ywys, they hadde, and so they wende,
Tr 3 1687 As muche joie as herte may comprende.
Tr 3 1688 This is no litel thyng of for to seye;
Tr 3 1689 This passeth every wit for to devyse;
Tr 3 1690 For ech of hem gan otheres lust obeye.
Tr 3 1691 Felicite, which that thise clerkes wise
Tr 3 1692 Comenden so, ne may nought here suffise;
Tr 3 1693 This joie may nought writen be with inke;
Tr 3 1694 This passeth al that herte may bythynke.
Tr 3 1695 But cruel day -- so wailaway the stounde! --
Tr 3 1696 Gan for t' aproche, as they by sygnes knewe,
Tr 3 1697 For which hem thoughte feelen dethis wownde.
Tr 3 1698 So wo was hem that chaungen gan hire hewe,
Tr 3 1699 And day they gonnen to despise al newe,
Tr 3 1700 Callyng it traitour, envyous, and worse,
Tr 3 1701 And bitterly the dayes light thei corse.
Tr 3 1702 Quod Troilus, " Allas, now am I war
Tr 3 1703 That Piros and tho swifte steedes thre,
Tr 3 1704 Which that drawen forth the sonnes char,
Tr 3 1705 Han gon som bi-path in dispit of me;
Tr 3 1706 That maketh it so soone day to be;
Tr 3 1707 And for the sonne hym hasteth thus to rise,
Tr 3 1708 Ne shal I nevere don hire sacrifise. "
Tr 3 1709 But nedes day departe hem moste soone,
Tr 3 1710 And whan hire speche don was and hire cheere,
Tr 3 1711 They twynne anon, as they were wont to doone,
Tr 3 1712 And setten tyme of metyng eft yfeere;
Tr 3 1713 And many a nyght they wroughte in this manere,
Tr 3 1714 And thus Fortune a tyme ledde in joie
Tr 3 1715 Criseyde and ek this kynges sone of Troie.
Tr 3 1716 In suffisaunce, in blisse, and in singynges,
Tr 3 1717 This Troilus gan al his lif to lede.
Tr 3 1718 He spendeth, jousteth, maketh festeynges;
Tr 3 1719 He yeveth frely ofte, and chaungeth wede,
Tr 3 1720 And held aboute hym alwey, out of drede,
Tr 3 1721 A world of folk, as com hym wel of kynde,
Tr 3 1722 The fresshest and the beste he koude fynde;
Tr 3 1723 That swich a vois was of hym and a stevene,
Tr 3 1724 Thorughout the world, of honour and largesse,
Tr 3 1725 That it up rong unto the yate of hevene;
Tr 3 1726 And, as in love, he was in swich gladnesse
Tr 3 1727 That in his herte he demed, as I gesse,
Tr 3 1728 That ther nys lovere in this world at ese
Tr 3 1729 So wel as he; and thus gan love hym plese.
Tr 3 1730 The goodlihede or beaute which that kynde
Tr 3 1731 In any other lady hadde yset
Tr 3 1732 Kan nought the montance of a knotte unbynde
Tr 3 1733 Aboute his herte of al Criseydes net.
Tr 3 1734 He was so narwe ymasked and yknet,
Tr 3 1735 That it undon on any manere syde,
Tr 3 1736 That nyl naught ben, for aught that may bitide.
Tr 3 1737 And by the hond ful ofte he wolde take
Tr 3 1738 This Pandarus, and into gardyn lede,
Tr 3 1739 And swich a feste and swich a proces make
Tr 3 1740 Hym of Criseyde, and of hire wommanhede,
Tr 3 1741 And of hire beaute, that withouten drede
Tr 3 1742 It was an hevene his wordes for to here;
Tr 3 1743 And thanne he wolde synge in this manere:
Tr 3 1744 " Love, that of erthe and se hath governaunce,
Tr 3 1745 Love, that his hestes hath in hevene hye,
Tr 3 1746 Love, that with an holsom alliaunce
Tr 3 1747 Halt peples joyned, as hym lest hem gye,
Tr 3 1748 Love, that knetteth lawe of compaignie,
Tr 3 1749 And couples doth in vertu for to dwelle,
Tr 3 1750 Bynd this acord, that I have told and telle.
Tr 3 1751 " That, that the world with feith which that is stable
Tr 3 1752 Diverseth so his stowndes concordynge,
Tr 3 1753 That elementz that ben so discordable
Tr 3 1754 Holden a bond perpetuely durynge,
Tr 3 1755 That Phebus mote his rosy day forth brynge,
Tr 3 1756 And that the mone hath lordshipe over the nyghtes:
Tr 3 1757 Al this doth Love, ay heried be his myghtes! --
Tr 3 1758 " That, that the se, that gredy is to flowen,
Tr 3 1759 Constreyneth to a certeyn ende so
Tr 3 1760 His flodes that so fiersly they ne growen
Tr 3 1761 To drenchen erthe and al for evere mo;
Tr 3 1762 And if that Love aught lete his bridel go,
Tr 3 1763 Al that now loveth asondre sholde lepe,
Tr 3 1764 And lost were al that Love halt now to-hepe.
Tr 3 1765 " So wolde God, that auctour is of kynde,
Tr 3 1766 That with his bond Love of his vertu liste
Tr 3 1767 To cerclen hertes alle and faste bynde,
Tr 3 1768 That from his bond no wight the wey out wiste;
Tr 3 1769 And hertes colde, hem wolde I that he twiste
Tr 3 1770 To make hem love, and that hem liste ay rewe
Tr 3 1771 On hertes sore, and kepe hem that ben trewe! "
Tr 3 1772 In alle nedes for the townes werre
Tr 3 1773 He was, and ay, the first in armes dyght,
Tr 3 1774 And certeynly, but if that bokes erre,
Tr 3 1775 Save Ector most ydred of any wight;
Tr 3 1776 And this encrees of hardynesse and myght
Tr 3 1777 Com hym of love, his ladies thank to wynne,
Tr 3 1778 That altered his spirit so withinne.
Tr 3 1779 In tyme of trewe, on haukyng wolde he ride,
Tr 3 1780 Or elles honte boor, beer, or lyoun;
Tr 3 1781 The smale bestes leet he gon biside.
Tr 3 1782 And whan that he com ridyng into town,
Tr 3 1783 Ful ofte his lady from hire wyndow down,
Tr 3 1784 As fressh as faukoun comen out of muwe,
Tr 3 1785 Ful redy was hym goodly to saluwe.
Tr 3 1786 And moost of love and vertu was his speche,
Tr 3 1787 And in despit hadde alle wrecchednesse;
Tr 3 1788 And douteles, no nede was hym biseche
Tr 3 1789 To honouren hem that hadde worthynesse,
Tr 3 1790 And esen hem that weren in destresse;
Tr 3 1791 And glad was he if any wyght wel ferde,
Tr 3 1792 That lovere was, whan he it wiste or herde.
Tr 3 1793 For soth to seyne, he lost held every wyght,
Tr 3 1794 But if he were in Loves heigh servise --
Tr 3 1795 I mene folk that oughte it ben of right.
Tr 3 1796 And over al this, so wel koude he devyse
Tr 3 1797 Of sentement and in so unkouth wise
Tr 3 1798 Al his array, that every lovere thoughte
Tr 3 1799 That al was wel, what so he seyde or wroughte.
Tr 3 1800 And though that he be come of blood roial,
Tr 3 1801 Hym liste of pride at no wight for to chace;
Tr 3 1802 Benigne he was to ech in general,
Tr 3 1803 For which he gat hym thank in every place.
Tr 3 1804 Thus wolde Love -- yheried be his grace! --
Tr 3 1805 That Pride, Envye, Ire, and Avarice
Tr 3 1806 He gan to fle, and everich other vice.
Tr 3 1807 Thow lady bryght, the doughter to Dyone,
Tr 3 1808 Thy blynde and wynged sone ek, daun Cupide,
Tr 3 1809 Yee sustren nyne ek, that by Elicone
Tr 3 1810 In hil Pernaso listen for t' abide,
Tr 3 1811 That ye thus fer han deyned me to gyde --
Tr 3 1812 I kan namore, but syn that ye wol wende,
Tr 3 1813 Ye heried ben for ay withouten ende!
Tr 3 1814 Thorugh yow have I seyd fully in my song
Tr 3 1815 Th' effect and joie of Troilus servise,
Tr 3 1816 Al be that ther was som disese among,
Tr 3 1817 As to myn auctour listeth to devise.
Tr 3 1818 My thridde bok now ende ich in this wyse,
Tr 3 1819 And Troilus in lust and in quiete
Tr 3 1820 Is with Criseyde, his owen herte swete.
Tr 4 1 But al to litel, weylaway the whyle,
Tr 4 2 Lasteth swich joie, ythonked be Fortune,
Tr 4 3 That semeth trewest whan she wol bygyle
Tr 4 4 And kan to fooles so hire song entune
Tr 4 5 That she hem hent and blent, traitour comune!
Tr 4 6 And whan a wight is from hire whiel ythrowe,
Tr 4 7 Than laugheth she, and maketh hym the mowe.
Tr 4 8 From Troilus she gan hire brighte face
Tr 4 9 Awey to writhe, and tok of hym non heede,
Tr 4 10 But caste hym clene out of his lady grace,
Tr 4 11 And on hire whiel she sette up Diomede;
Tr 4 12 For which myn herte right now gynneth blede,
Tr 4 13 And now my penne, allas, with which I write,
Tr 4 14 Quaketh for drede of that I moste endite.
Tr 4 15 For how Criseyde Troilus forsook --
Tr 4 16 Or at the leeste, how that she was unkynde --
Tr 4 17 Moot hennesforth ben matere of my book,
Tr 4 18 As writen folk thorugh which it is in mynde.
Tr 4 19 Allas, that they sholde evere cause fynde
Tr 4 20 To speke hire harm! And if they on hire lye,
Tr 4 21 Iwis, hemself sholde han the vilanye.
Tr 4 22 O ye Herynes, Nyghtes doughtren thre,
Tr 4 23 That endeles compleignen evere in pyne,
Tr 4 24 Megera, Alete, and ek Thesiphone,
Tr 4 25 Thow cruel Mars ek, fader to Quyryne,
Tr 4 26 This ilke ferthe book me helpeth fyne,
Tr 4 27 So that the losse of lyf and love yfeere
Tr 4 28 Of Troilus be fully shewed heere.
Tr 4 29 Liggyng in oost, as I have seyd er this,
Tr 4 30 The Grekys stronge aboute Troie town,
Tr 4 31 Byfel that, whan that Phebus shynyng is
Tr 4 32 Upon the brest of Hercules lyoun,
Tr 4 33 That Ector, with ful many a bold baroun,
Tr 4 34 Caste on a day with Grekis for to fighte,
Tr 4 35 As he was wont, to greve hem what he myghte.
Tr 4 36 Not I how longe or short it was bitwene
Tr 4 37 This purpos and that day they issen mente,
Tr 4 38 But on a day, wel armed, brighte, and shene,
Tr 4 39 Ector and many a worthi wight out wente,
Tr 4 40 With spere in honde and bigge bowes bente;
Tr 4 41 And in the berd, withouten lenger lette,
Tr 4 42 Hire fomen in the feld hem faste mette.
Tr 4 43 The longe day, with speres sharpe igrounde,
Tr 4 44 With arwes, dartes, swerdes, maces felle,
Tr 4 45 They fighte and bringen hors and man to grounde,
Tr 4 46 And with hire axes out the braynes quelle.
Tr 4 47 But in the laste shour, soth for to telle,
Tr 4 48 The folk of Troie hemselven so mysledden
Tr 4 49 That with the worse at nyght homward they fledden.
Tr 4 50 At which day was taken Antenore,
Tr 4 51 Maugre Polydamas or Monesteo,
Tr 4 52 Santippe, Sarpedoun, Polynestore,
Tr 4 53 Polite, or ek the Trojan daun Rupheo,
Tr 4 54 And other lasse folk as Phebuseo;
Tr 4 55 So that, for harm, that day the folk of Troie
Tr 4 56 Dredden to lese a gret part of hire joie.
Tr 4 57 Of Priamus was yeve, at Grek requeste,
Tr 4 58 A tyme of trewe, and tho they gonnen trete
Tr 4 59 Hire prisoners to chaungen, meste and leste,
Tr 4 60 And for the surplus yeven sommes grete.
Tr 4 61 This thing anon was couth in every strete,
Tr 4 62 Bothe in th' assege, in town, and everywhere,
Tr 4 63 And with the firste it com to Calkas ere.
Tr 4 64 Whan Calkas knew this tretis sholde holde,
Tr 4 65 In consistorie among the Grekes soone
Tr 4 66 He gan in thringe forth with lordes olde,
Tr 4 67 And sette hym there as he was wont to doone;
Tr 4 68 And with a chaunged face hem bad a boone,
Tr 4 69 For love of God, to don that reverence,
Tr 4 70 To stynte noyse and yeve hym audience.
Tr 4 71 Than seyde he thus: " Lo, lordes myn, ich was
Tr 4 72 Troian, as it is knowen out of drede;
Tr 4 73 And, if that yow remembre, I am Calkas,
Tr 4 74 That alderfirst yaf comfort to youre nede,
Tr 4 75 And tolde wel how that ye shulden spede.
Tr 4 76 For dredeles, thorugh yow shal in a stownde
Tr 4 77 Ben Troie ybrend and beten down to grownde.
Tr 4 78 " And in what forme, or in what manere wise,
Tr 4 79 This town to shende, and al youre lust t' acheve,
Tr 4 80 Ye han er this wel herd me yow devyse;
Tr 4 81 This knowe ye, my lordes, as I leve.
Tr 4 82 And for the Grekis weren me so leeve,
Tr 4 83 I com myself, in my propre persone,
Tr 4 84 To teche in this how yow was best to doone.
Tr 4 85 " Havyng unto my tresor ne my rente
Tr 4 86 Right no resport, to respect of youre ese,
Tr 4 87 Thus al my good I lefte and to yow wente,
Tr 4 88 Wenyng in this yow lordes for to plese.
Tr 4 89 But al that los ne doth me no disese.
Tr 4 90 I vouchesauf, as wisly have I joie,
Tr 4 91 For yow to lese al that I have in Troie,
Tr 4 92 " Save of a doughter that I lefte, allas,
Tr 4 93 Slepyng at hom, whanne out of Troie I sterte.
Tr 4 94 O sterne, O cruel fader that I was!
Tr 4 95 How myghte I have in that so hard an herte?
Tr 4 96 Allas, I ne hadde ibrought hire in hire sherte!
Tr 4 97 For sorwe of which I wol nought lyve to-morwe,
Tr 4 98 But if ye lordes rewe upon my sorwe.
Tr 4 99 " For by that cause I say no tyme er now
Tr 4 100 Hire to delivere, ich holden have my pees;
Tr 4 101 But now or nevere, if that it like yow,
Tr 4 102 I may hire have right soone, douteles.
Tr 4 103 O help and grace amonges al this prees!
Tr 4 104 Rewe on this olde caytyf in destresse,
Tr 4 105 Syn I thorugh yow have al this hevynesse.
Tr 4 106 " Ye have now kaught and fetered in prisoun
Tr 4 107 Troians ynowe, and if youre willes be,
Tr 4 108 My child with oon may han redempcioun;
Tr 4 109 Now for the love of God and of bounte,
Tr 4 110 Oon of so fele, allas, so yive hym me!
Tr 4 111 What nede were it this preiere for to werne,
Tr 4 112 Syn ye shul bothe han folk and town as yerne?
Tr 4 113 " On peril of my lif, I shal nat lye;
Tr 4 114 Appollo hath me told it feithfully;
Tr 4 115 I have ek founde it be astronomye,
Tr 4 116 By sort, and by augurye ek, trewely,
Tr 4 117 And dar wel say, the tyme is faste by
Tr 4 118 That fire and flaumbe on al the town shal sprede,
Tr 4 119 And thus shal Troie torne to asshen dede.
Tr 4 120 " For certein, Phebus and Neptunus bothe,
Tr 4 121 That makeden the walles of the town,
Tr 4 122 Ben with the folk of Troie alwey so wrothe
Tr 4 123 That they wol brynge it to confusioun,
Tr 4 124 Right in despit of kyng Lameadoun;
Tr 4 125 Bycause he nolde payen hem here hire,
Tr 4 126 The town of Troie shal ben set on-fire. "
Tr 4 127 Tellyng his tale alwey, this olde greye,
Tr 4 128 Humble in his speche and in his lokyng eke,
Tr 4 129 The salte teris from his eyen tweye
Tr 4 130 Ful faste ronnen down by either cheke.
Tr 4 131 So longe he gan of socour hem biseke
Tr 4 132 That, for to hele hym of his sorwes soore,
Tr 4 133 They yave hym Antenor, withouten moore.
Tr 4 134 But who was glad ynough but Calkas tho?
Tr 4 135 And of this thyng ful soone his nedes leyde
Tr 4 136 On hem that sholden for the tretis go,
Tr 4 137 And hem for Antenor ful ofte preyde
Tr 4 138 To bryngen hom kyng Toas and Criseyde.
Tr 4 139 And whan Priam his save-garde sente,
Tr 4 140 Th' embassadours to Troie streight they wente.
Tr 4 141 The cause itold of hire comyng, the olde
Tr 4 142 Priam, the kyng, ful soone in general
Tr 4 143 Let her-upon his parlement to holde,
Tr 4 144 Of which th' effect rehercen yow I shal.
Tr 4 145 Th' embassadours ben answerd for fynal;
Tr 4 146 Th' eschaunge of prisoners and al this nede
Tr 4 147 Hem liketh wel, and forth in they procede.
Tr 4 148 This Troilus was present in the place
Tr 4 149 Whan axed was for Antenor Criseyde,
Tr 4 150 For which ful soone chaungen gan his face,
Tr 4 151 As he that with tho wordes wel neigh deyde.
Tr 4 152 But natheles he no word to it seyde,
Tr 4 153 Lest men sholde his affeccioun espye;
Tr 4 154 With mannes herte he gan his sorwes drye,
Tr 4 155 And ful of angwissh and of grisly drede
Tr 4 156 Abod what lordes wolde unto it seye;
Tr 4 157 And if they wolde graunte -- as God forbede --
Tr 4 158 Th' eschaunge of hire, than thoughte he thynges tweye:
Tr 4 159 First, how to save hire honour, and what weye
Tr 4 160 He myghte best th' eschaunge of hire withstonde.
Tr 4 161 Ful faste he caste how al this myghte stonde.
Tr 4 162 Love hym made al prest to don hire byde,
Tr 4 163 And rather dyen than she sholde go;
Tr 4 164 But Resoun seyde hym, on that other syde,
Tr 4 165 " Withouten assent of hire ne do nat so,
Tr 4 166 Lest for thi werk she wolde be thy fo,
Tr 4 167 And seyn that thorugh thy medlynge is iblowe
Tr 4 168 Youre bother love, ther it was erst unknowe. "
Tr 4 169 For which he gan deliberen, for the beste,
Tr 4 170 That though the lordes wolde that she wente,
Tr 4 171 He wolde lat hem graunte what hem leste,
Tr 4 172 And telle his lady first what that they mente;
Tr 4 173 And whan that she hadde seyd hym hire entente,
Tr 4 174 Therafter wolde he werken also blyve,
Tr 4 175 Theigh al the world ayeyn it wolde stryve.
Tr 4 176 Ector, which that wel the Grekis herde,
Tr 4 177 For Antenor how they wolde han Criseyde,
Tr 4 178 Gan it withstonde, and sobrely answerde:
Tr 4 179 " Syres, she nys no prisonere, " he seyde;
Tr 4 180 " I not on yow who that this charge leyde,
Tr 4 181 But, on my part, ye may eftsone hem telle,
Tr 4 182 We usen here no wommen for to selle. "
Tr 4 183 The noyse of peple up stirte thanne at ones,
Tr 4 184 As breme as blase of straw iset on-fire;
Tr 4 185 For infortune it wolde, for the nones,
Tr 4 186 They sholden hire confusioun desire.
Tr 4 187 " Ector, " quod they, " what goost may yow enspyre
Tr 4 188 This womman thus to shilde and don us leese
Tr 4 189 Daun Antenor -- a wrong wey now ye chese --
Tr 4 190 " That is so wys and ek so bold baroun?
Tr 4 191 And we han nede to folk, as men may se.
Tr 4 192 He is ek oon the grettest of this town.
Tr 4 193 O Ector, lat tho fantasies be!
Tr 4 194 O kyng Priam, " quod they, " thus sygge we,
Tr 4 195 That al oure vois is to forgon Criseyde. "
Tr 4 196 And to deliveren Antenor they preyde.
Tr 4 197 O Juvenal, lord, trewe is thy sentence,
Tr 4 198 That litel wyten folk what is to yerne,
Tr 4 199 That they ne fynde in hire desir offence;
Tr 4 200 For cloude of errour let hem to discerne
Tr 4 201 What best is. And lo, here ensample as yerne:
Tr 4 202 This folk desiren now deliveraunce
Tr 4 203 Of Antenor, that brought hem to meschaunce,
Tr 4 204 For he was after traitour to the town
Tr 4 205 Of Troye. Allas, they quytte hym out to rathe!
Tr 4 206 O nyce world, lo, thy discrecioun!
Tr 4 207 Criseyde, which that nevere dide hem scathe,
Tr 4 208 Shal now no lenger in hire blisse bathe;
Tr 4 209 But Antenor, he shal com hom to towne,
Tr 4 210 And she shal out; thus seyden here and howne.
Tr 4 211 For which delibered was by parlement
Tr 4 212 For Antenor to yelden out Criseyde,
Tr 4 213 And it pronounced by the president,
Tr 4 214 Altheigh that Ector " nay " ful ofte preyde.
Tr 4 215 And fynaly, what wight that it withseyde,
Tr 4 216 It was for nought; it moste ben and sholde,
Tr 4 217 For substaunce of the parlement it wolde.
Tr 4 218 Departed out of parlement echone,
Tr 4 219 This Troilus, withouten wordes mo,
Tr 4 220 Unto his chambre spedde hym faste allone,
Tr 4 221 But if it were a man of his or two
Tr 4 222 The which he bad out faste for to go
Tr 4 223 Bycause he wolde slepen, as he seyde,
Tr 4 224 And hastily upon his bed hym leyde.
Tr 4 225 And as in wynter leves ben biraft,
Tr 4 226 Ech after other, til the tree be bare,
Tr 4 227 So that ther nys but bark and braunche ilaft,
Tr 4 228 Lith Troilus, byraft of ech welfare,
Tr 4 229 Ibounden in the blake bark of care,
Tr 4 230 Disposed wood out of his wit to breyde,
Tr 4 231 So sore hym sat the chaungynge of Criseyde.
Tr 4 232 He rist hym up, and every dore he shette,
Tr 4 233 And wyndow ek, and tho this sorwful man
Tr 4 234 Upon his beddes syde adown hym sette,
Tr 4 235 Ful lik a ded ymage, pale and wan;
Tr 4 236 And in his brest the heped wo bygan
Tr 4 237 Out breste, and he to werken in this wise
Tr 4 238 In his woodnesse, as I shal yow devyse.
Tr 4 239 Right as the wylde bole bygynneth sprynge,
Tr 4 240 Now her, now ther, idarted to the herte,
Tr 4 241 And of his deth roreth in compleynynge,
Tr 4 242 Right so gan he aboute the chaumbre sterte,
Tr 4 243 Smytyng his brest ay with his fistes smerte;
Tr 4 244 His hed to the wal, his body to the grounde
Tr 4 245 Ful ofte he swapte, hymselven to confounde.
Tr 4 246 His eyen two, for piete of herte,
Tr 4 247 Out stremeden as swifte welles tweye;
Tr 4 248 The heighe sobbes of his sorwes smerte
Tr 4 249 His speche hym refte; unnethes myghte he seye,
Tr 4 250 " O deth, allas, why nyltow do me deye?
Tr 4 251 Acorsed be that day which that Nature
Tr 4 252 Shop me to ben a lyves creature! "
Tr 4 253 But after, whan the furie and al the rage,
Tr 4 254 Which that his herte twiste and faste threste,
Tr 4 255 By lengthe of tyme somwhat gan aswage,
Tr 4 256 Upon his bed he leyde hym down to reste.
Tr 4 257 But tho bygonne his teeris more out breste,
Tr 4 258 That wonder is the body may suffise
Tr 4 259 To half this wo which that I yow devyse.
Tr 4 260 Than seyde he thus: " Fortune, allas the while!
Tr 4 261 What have I don? What have I thus agylt?
Tr 4 262 How myghtestow for rowthe me bygile?
Tr 4 263 Is ther no grace, and shal I thus be spilt?
Tr 4 264 Shal thus Creiseyde awey, for that thow wilt?
Tr 4 265 Allas, how maistow in thyn herte fynde
Tr 4 266 To ben to me thus cruwel and unkynde?
Tr 4 267 " Have I the nought honoured al my lyve,
Tr 4 268 As thow wel woost, above the goddes alle?
Tr 4 269 Whi wiltow me fro joie thus deprive?
Tr 4 270 O Troilus, what may men now the calle
Tr 4 271 But wrecche of wrecches, out of honour falle
Tr 4 272 Into miserie, in which I wol bewaille
Tr 4 273 Criseyde -- allas! -- til that the breth me faille?
Tr 4 274 " Allas, Fortune, if that my lif in joie
Tr 4 275 Displesed hadde unto thi foule envye,
Tr 4 276 Why ne haddestow my fader, kyng of Troye,
Tr 4 277 Byraft the lif, or don my bretheren dye,
Tr 4 278 Or slayn myself, that thus compleyne and crye --
Tr 4 279 I, combre-world, that may of nothyng serve,
Tr 4 280 But evere dye and nevere fulli sterve.
Tr 4 281 " If that Criseyde allone were me laft,
Tr 4 282 Nought roughte I whiderward thow woldest me steere;
Tr 4 283 And hire, allas, than hastow me biraft.
Tr 4 284 But everemore, lo, this is thi manere,
Tr 4 285 To reve a wight that most is to hym deere,
Tr 4 286 To preve in that thi gerful violence.
Tr 4 287 Thus am I lost; ther helpeth no diffence.
Tr 4 288 " O verrey lord, O Love! O god, allas!
Tr 4 289 That knowest best myn herte and al my thought,
Tr 4 290 What shal my sorwful lif don in this cas,
Tr 4 291 If I forgo that I so deere have bought?
Tr 4 292 Syn ye Criseyde and me han fully brought
Tr 4 293 Into youre grace, and bothe oure hertes seled,
Tr 4 294 How may ye suffre, allas, it be repeled?
Tr 4 295 " What shal I don? I shal, while I may dure
Tr 4 296 On lyve in torment and in cruwel peyne
Tr 4 297 This infortune or this disaventure,
Tr 4 298 Allone as I was born, iwys, compleyne;
Tr 4 299 Ne nevere wol I seen it shyne or reyne,
Tr 4 300 But ende I wol, as Edippe, in derknesse
Tr 4 301 My sorwful lif, and dyen in distresse.
Tr 4 302 " O wery goost, that errest to and fro,
Tr 4 303 Why nyltow fleen out of the wofulleste
Tr 4 304 Body that evere myghte on grounde go?
Tr 4 305 O soule, lurkynge in this wo, unneste,
Tr 4 306 Fle forth out of myn herte, and lat it breste,
Tr 4 307 And folowe alwey Criseyde, thi lady dere.
Tr 4 308 Thi righte place is now no lenger here.
Tr 4 309 " O woful eyen two, syn youre disport
Tr 4 310 Was al to sen Criseydes eyen brighte,
Tr 4 311 What shal ye don but, for my discomfort,
Tr 4 312 Stonden for naught, and wepen out youre sighte,
Tr 4 313 Syn she is queynt that wont was yow to lighte?
Tr 4 314 In vayn fro this forth have ich eyen tweye
Tr 4 315 Ifourmed, syn youre vertu is aweye.
Tr 4 316 " O my Criseyde, O lady sovereigne
Tr 4 317 Of thilke woful soule that thus crieth,
Tr 4 318 Who shal now yeven comfort to my peyne?
Tr 4 319 Allas, no wight. But whan myn herte dieth,
Tr 4 320 My spirit, which that so unto yow hieth,
Tr 4 321 Receyve in gree, for that shal ay yow serve;
Tr 4 322 Forthi no fors is, though the body sterve.
Tr 4 323 " O ye loveris, that heigh upon the whiel
Tr 4 324 Ben set of Fortune, in good aventure,
Tr 4 325 God leve that ye fynde ay love of stiel,
Tr 4 326 And longe mote youre lif in joie endure!
Tr 4 327 But whan ye comen by my sepulture,
Tr 4 328 Remembreth that youre felawe resteth there;
Tr 4 329 For I loved ek, though ich unworthi were.
Tr 4 330 " O oold, unholsom, and myslyved man --
Tr 4 331 Calkas I mene -- allas, what eiled the
Tr 4 332 To ben a Grek, syn thow art born Troian?
Tr 4 333 O Calkas, which that wolt my bane be,
Tr 4 334 In corsed tyme was thow born for me!
Tr 4 335 As wolde blisful Jove, for his joie,
Tr 4 336 That I the hadde wher I wolde, in Troie! "
Tr 4 337 A thousand sikes, hotter than the gleede,
Tr 4 338 Out of his brest ech after other wente,
Tr 4 339 Medled with pleyntes new, his wo to feede,
Tr 4 340 For which his woful teris nevere stente;
Tr 4 341 And shortly, so his peynes hym torente,
Tr 4 342 And wex so mat, that joie nor penaunce
Tr 4 343 He feleth non, but lith forth in a traunce.
Tr 4 344 Pandare, which that in the parlement
Tr 4 345 Hadde herd what every lord and burgeys seyde,
Tr 4 346 And how ful graunted was by oon assent
Tr 4 347 For Antenor to yelden so Criseyde,
Tr 4 348 Gan wel neigh wood out of his wit to breyde,
Tr 4 349 So that for wo he nyste what he mente,
Tr 4 350 But in a rees to Troilus he wente.
Tr 4 351 A certeyn knyght that for the tyme kepte
Tr 4 352 The chambre door undide it hym anon;
Tr 4 353 And Pandare, that ful tendreliche wepte,
Tr 4 354 Into the derke chambre, as stille as ston,
Tr 4 355 Toward the bed gan softely to gon,
Tr 4 356 So confus that he nyste what to seye;
Tr 4 357 For verray wo his wit was neigh aweye.
Tr 4 358 And with his chiere and lokyng al totorn
Tr 4 359 For sorwe of this, and with his armes folden,
Tr 4 360 He stood this woful Troilus byforn,
Tr 4 361 And on his pitous face he gan byholden.
Tr 4 362 But Lord, so ofte gan his herte colden,
Tr 4 363 Seyng his frend in wo, whos hevynesse
Tr 4 364 His herte slough, as thoughte hym, for destresse.
Tr 4 365 This woful wight, this Troilus, that felte
Tr 4 366 His frend Pandare ycomen hym to se,
Tr 4 367 Gan as the snow ayeyn the sonne melte;
Tr 4 368 For which this sorwful Pandare, of pitee,
Tr 4 369 Gan for to wepe as tendreliche as he;
Tr 4 370 And specheles thus ben thise ilke tweye,
Tr 4 371 That neither myghte o word for sorwe seye.
Tr 4 372 But at the laste this woful Troilus,
Tr 4 373 Neigh ded for smert, gan bresten out to rore,
Tr 4 374 And with a sorwful noise he seyde thus,
Tr 4 375 Among hise sobbes and his sikes sore:
Tr 4 376 " Lo, Pandare, I am ded, withouten more.
Tr 4 377 Hastow nat herd at parlement, " he seyde,
Tr 4 378 " For Antenor how lost is my Criseyde? "
Tr 4 379 This Pandarus, ful ded and pale of hewe,
Tr 4 380 Ful pitously answerde and seyde, " Yis!
Tr 4 381 As wisly were it fals as it is trewe,
Tr 4 382 That I have herd, and woot al how it is.
Tr 4 383 O mercy, God, who wolde have trowed this?
Tr 4 384 Who wolde have wend that in so litel a throwe
Tr 4 385 Fortune oure joie wold han overthrowe?
Tr 4 386 " For in this world ther is no creature,
Tr 4 387 As to my dom, that ever saugh ruyne
Tr 4 388 Straunger than this, thorugh cas or aventure.
Tr 4 389 But who may al eschue, or al devyne?
Tr 4 390 Swich is this world! Forthi I thus diffyne:
Tr 4 391 Ne trust no wight to fynden in Fortune
Tr 4 392 Ay propretee; hire yiftes ben comune.
Tr 4 393 " But telle me this: whi thow art now so mad
Tr 4 394 To sorwen thus? Whi listow in this wise,
Tr 4 395 Syn thi desir al holly hastow had,
Tr 4 396 So that, by right, it oughte ynough suffise?
Tr 4 397 But I, that nevere felte in my servyse
Tr 4 398 A frendly cheere or lokyng of an eye,
Tr 4 399 Lat me thus wepe and wailen til I deye.
Tr 4 400 " And over al this, as thow wel woost thiselve,
Tr 4 401 This town is ful of ladys al aboute;
Tr 4 402 And, to my doom, fairer than swiche twelve
Tr 4 403 As evere she was, shal I fynde in som route --
Tr 4 404 Yee, on or two, withouten any doute.
Tr 4 405 Forthi be glad, myn owen deere brother!
Tr 4 406 If she be lost, we shal recovere an other.
Tr 4 407 " What! God forbede alwey that ech plesaunce
Tr 4 408 In o thyng were and in non other wight!
Tr 4 409 If oon kan synge, an other kan wel daunce;
Tr 4 410 If this be goodly, she is glad and light;
Tr 4 411 And this is fair, and that kan good aright.
Tr 4 412 Ech for his vertu holden is for deere,
Tr 4 413 Both heroner and faucoun for ryvere.
Tr 4 414 " And ek, as writ Zanzis, that was ful wys,
Tr 4 415 `The newe love out chaceth ofte the olde';
Tr 4 416 And upon newe cas lith newe avys.
Tr 4 417 Thenk ek, thi lif to saven artow holde.
Tr 4 418 Swich fir, by proces, shal of kynde colde,
Tr 4 419 For syn it is but casuel plesaunce,
Tr 4 420 Som cas shal putte it out of remembraunce;
Tr 4 421 " For also seur as day comth after nyght,
Tr 4 422 The newe love, labour, or oother wo,
Tr 4 423 Or elles selde seynge of a wight,
Tr 4 424 Don olde affecciouns alle over-go.
Tr 4 425 And, for thi part, thow shalt have oon of tho
Tr 4 426 T' abregge with thi bittre peynes smerte;
Tr 4 427 Absence of hire shal dryve hire out of herte. "
Tr 4 428 Thise wordes seyde he for the nones alle,
Tr 4 429 To help his frend, lest he for sorwe deyde;
Tr 4 430 For douteles, to don his wo to falle,
Tr 4 431 He roughte nought what unthrift that he seyde.
Tr 4 432 But Troilus, that neigh for sorwe deyde,
Tr 4 433 Took litel heede of al that evere he mente --
Tr 4 434 Oon ere it herde, at tother out it wente --
Tr 4 435 But at the laste answerde, and seyde, " Frend,
Tr 4 436 This lechecraft, or heeled thus to be,
Tr 4 437 Were wel sittyng, if that I were a fend --
Tr 4 438 To traysen a wight that trewe is unto me!
Tr 4 439 I pray God lat this conseil nevere ythe;
Tr 4 440 But do me rather sterve anon-right here,
Tr 4 441 Er I thus do as thow me woldest leere!
Tr 4 442 " She that I serve, iwis, what so thow seye,
Tr 4 443 To whom myn herte enhabit is by right,
Tr 4 444 Shal han me holly hires til that I deye.
Tr 4 445 For Pandarus, syn I have trouthe hire hight,
Tr 4 446 I wol nat ben untrewe for no wight,
Tr 4 447 But as hire man I wol ay lyve and sterve,
Tr 4 448 And nevere other creature serve.
Tr 4 449 " And ther thow seist thow shalt as faire fynde
Tr 4 450 As she, lat be; make no comparisoun
Tr 4 451 To creature yformed here by kynde!
Tr 4 452 O leve Pandare, in conclusioun,
Tr 4 453 I wol nat ben of thyn opynyoun
Tr 4 454 Touchyng al this. For which I the biseche,
Tr 4 455 So hold thi pees; thow sleest me with thi speche!
Tr 4 456 " Thow biddest me I shulde love another
Tr 4 457 Al fresshly newe, and lat Criseyde go!
Tr 4 458 It lith nat in my power, leeve brother;
Tr 4 459 And though I myght, I wolde nat do so.
Tr 4 460 But kanstow playen raket, to and fro,
Tr 4 461 Nettle in, dok out, now this, now that, Pandare?
Tr 4 462 Now foule falle hire for thi wo that care!
Tr 4 463 " Thow farest ek by me, thow Pandarus,
Tr 4 464 As he that, whan a wight is wo bygon,
Tr 4 465 He cometh to hym a paas and seith right thus:
Tr 4 466 `Thynk nat on smert, and thow shalt fele non.'
Tr 4 467 Thow moost me first transmewen in a ston,
Tr 4 468 And reve me my passiones alle,
Tr 4 469 Er thow so lightly do my wo to falle.
Tr 4 470 " The deth may wel out of my brest departe
Tr 4 471 The lif, so longe may this sorwe myne,
Tr 4 472 But fro my soule shal Criseydes darte
Tr 4 473 Out nevere mo; but down with Proserpyne,
Tr 4 474 Whan I am ded, I wol go wone in pyne,
Tr 4 475 And ther I wol eternaly compleyne
Tr 4 476 My wo, and how that twynned be we tweyne.
Tr 4 477 " Thow hast here made an argument for fyn,
Tr 4 478 How that it sholde a lasse peyne be
Tr 4 479 Criseyde to forgon, for she was myn
Tr 4 480 And lyved in ese and in felicite.
Tr 4 481 Whi gabbestow, that seydest unto me
Tr 4 482 That `hym is wors that is fro wele ythrowe,
Tr 4 483 Than he hadde erst noon of that wele yknowe'?
Tr 4 484 " But tel me now, syn that the thynketh so light
Tr 4 485 To changen so in love ay to and fro,
Tr 4 486 Whi hastow nat don bisily thi myght
Tr 4 487 To chaungen hire that doth the al thi wo?
Tr 4 488 Why nyltow lete hire fro thyn herte go?
Tr 4 489 Whi nyltow love an other lady swete,
Tr 4 490 That may thyn herte setten in quiete?
Tr 4 491 " If thou hast had in love ay yet myschaunce
Tr 4 492 And kanst it not out of thyn herte dryve,
Tr 4 493 I, that levede yn lust and in plesaunce
Tr 4 494 With here, as muche as creature on lyve,
Tr 4 495 How sholde I that foryete, and that so blyve?
Tr 4 496 O, where hastow ben hid so longe in muwe,
Tr 4 497 That kanst so wel and formely arguwe?
Tr 4 498 " Nay, God wot, nought worth is al thi red,
Tr 4 499 For which, for what that evere may byfalle,
Tr 4 500 Withouten wordes mo, I wol be ded.
Tr 4 501 O deth, that endere art of sorwes alle,
Tr 4 502 Com now, syn I so ofte after the calle;
Tr 4 503 For sely is that deth, soth for to seyne,
Tr 4 504 That, ofte ycleped, cometh and endeth peyne.
Tr 4 505 " Wel wot I, whil my lyf was in quyete,
Tr 4 506 Er thow me slowe, I wolde have yeven hire;
Tr 4 507 But now thi comynge is to me so swete
Tr 4 508 That in this world I nothing so desire.
Tr 4 509 O deth, syn with this sorwe I am a-fyre,
Tr 4 510 Thou other do me anoon yn teris drenche,
Tr 4 511 Or with thi colde strok myn hete quenche.
Tr 4 512 " Syn that thou sleest so fele in sondry wyse
Tr 4 513 Ayens hire wil, unpreyed, day and nyght,
Tr 4 514 Do me at my requeste this service:
Tr 4 515 Delyvere now the world -- so dostow right --
Tr 4 516 Of me, that am the wofulleste wyght
Tr 4 517 That evere was; for tyme is that I sterve,
Tr 4 518 Syn in this world of right nought may I serve. "
Tr 4 519 This Troylus in teris gan distille,
Tr 4 520 As licour out of a lambyc ful faste;
Tr 4 521 And Pandarus gan holde his tunge stille,
Tr 4 522 And to the ground his eyen doun he caste.
Tr 4 523 But natheles, thus thought he at the laste:
Tr 4 524 " What! Parde, rather than my felawe deye,
Tr 4 525 Yet shal I somwhat more unto hym seye. "
Tr 4 526 And seyde, " Frend, syn thow hast swych distresse,
Tr 4 527 And syn the list myn argumentz to blame,
Tr 4 528 Why nylt thiselven helpen don redresse
Tr 4 529 And with thy manhod letten al this grame?
Tr 4 530 Go ravysshe here! Ne kanstow nat, for shame?
Tr 4 531 And other lat here out of towne fare,
Tr 4 532 Or hold here stille, and leve thi nyce fare.
Tr 4 533 " Artow in Troie, and hast non hardyment
Tr 4 534 To take a womman which that loveth the
Tr 4 535 And wolde hireselven ben of thyn assent?
Tr 4 536 Now is nat this a nyce vanitee?
Tr 4 537 Ris up anon, and lat this wepyng be,
Tr 4 538 And kith thow art a man; for in this houre
Tr 4 539 I wol ben ded, or she shal bleven oure. "
Tr 4 540 To this answerde hym Troilus ful softe,
Tr 4 541 And seyde, " Parde, leve brother deere,
Tr 4 542 Al this have I myself yet thought ful ofte,
Tr 4 543 And more thyng than thow devysest here.
Tr 4 544 But whi this thyng is laft, thow shalt wel here;
Tr 4 545 And whan thow me hast yeve an audience,
Tr 4 546 Therafter maystow telle al thi sentence.
Tr 4 547 " First, syn thow woost this town hath al this werre
Tr 4 548 For ravysshyng of wommen so by myght,
Tr 4 549 It sholde nought be suffred me to erre,
Tr 4 550 As it stant now, ne don so gret unright.
Tr 4 551 I sholde han also blame of every wight,
Tr 4 552 My fadres graunt if that I so withstoode,
Tr 4 553 Syn she is chaunged for the townes goode.
Tr 4 554 " I have ek thought, so it were hire assent,
Tr 4 555 To axe hire at my fader, of his grace;
Tr 4 556 Than thynke I this were hire accusement,
Tr 4 557 Syn wel I woot I may hire nought purchace;
Tr 4 558 For syn my fader, in so heigh a place
Tr 4 559 As parlement hath hire eschaunge enseled,
Tr 4 560 He nyl for me his lettre be repeled.
Tr 4 561 " Yet drede I moost hire herte to perturbe
Tr 4 562 With violence, if I do swich a game;
Tr 4 563 For if I wolde it openly desturbe,
Tr 4 564 It mooste be disclaundre to hire name.
Tr 4 565 And me were levere ded than hire diffame --
Tr 4 566 As nolde God but if I sholde have
Tr 4 567 Hire honour levere than my lif to save!
Tr 4 568 " Thus am I lost, for aught that I kan see.
Tr 4 569 For certeyn is, syn that I am hire knyght,
Tr 4 570 I moste hire honour levere han than me
Tr 4 571 In every cas, as lovere ought of right.
Tr 4 572 Thus am I with desir and reson twight:
Tr 4 573 Desir for to destourben hire me redeth,
Tr 4 574 And reson nyl nat; so myn herte dredeth. "
Tr 4 575 Thus wepyng that he koude nevere cesse,
Tr 4 576 He seyde, " Allas, how shal I, wrecche, fare?
Tr 4 577 For wel fele I alwey my love encresse,
Tr 4 578 And hope is lasse and lasse alway, Pandare.
Tr 4 579 Encressen ek the causes of my care.
Tr 4 580 So weilaway, whi nyl myn herte breste?
Tr 4 581 For, as in love, ther is but litel reste. "
Tr 4 582 Pandare answerde, " Frend, thow maist, for me,
Tr 4 583 Don as the list; but hadde ich it so hoote,
Tr 4 584 And thyn estat, she sholde go with me,
Tr 4 585 Though al this town cride on this thyng by note.
Tr 4 586 I nolde sette at al that noys a grote!
Tr 4 587 For whan men han wel cryd, than wol they rowne;
Tr 4 588 Ek wonder last but nyne nyght nevere in towne.
Tr 4 589 " Devyne not in resoun ay so depe
Tr 4 590 Ne preciously, but help thiself anon.
Tr 4 591 Bet is that othere than thiselven wepe,
Tr 4 592 And namely, syn ye two ben al on,
Tr 4 593 Ris up, for by myn hed, she shal not goon!
Tr 4 594 And rather be in blame a lite ifounde
Tr 4 595 Than sterve here as a gnat, withouten wounde.
Tr 4 596 " It is no rape, in my dom, ne no vice,
Tr 4 597 Hire to witholden that ye love moost;
Tr 4 598 Peraunter she myghte holde the for nyce
Tr 4 599 To late hire go thus unto the Grekis oost.
Tr 4 600 Thenk ek Fortune, as wel thiselven woost,
Tr 4 601 Helpeth hardy man unto his enprise,
Tr 4 602 And weyveth wrecches for hire cowardise.
Tr 4 603 " And though thy lady wolde a lite hire greve,
Tr 4 604 Thow shalt thiself thi pees hereafter make;
Tr 4 605 But as for me, certeyn, I kan nat leve
Tr 4 606 That she wolde it as now for yvel take.
Tr 4 607 Whi sholde thanne of ferd thyn herte quake?
Tr 4 608 Thenk ek how Paris hath, that is thi brother,
Tr 4 609 A love; and whi shaltow nat have another?
Tr 4 610 " And Troilus, o thyng I dar the swere:
Tr 4 611 That if Criseyde, which that is thi lief,
Tr 4 612 Now loveth the as wel as thow dost here,
Tr 4 613 God help me so, she nyl nat take a-grief,
Tr 4 614 Theigh thow do boote anon in this meschief;
Tr 4 615 And if she wilneth fro the for to passe,
Tr 4 616 Thanne is she fals; so love hire wel the lasse.
Tr 4 617 " Forthi tak herte, and thynk right as a knyght:
Tr 4 618 Thorugh love is broken al day every lawe.
Tr 4 619 Kith now somwhat thi corage and thi myght;
Tr 4 620 Have mercy on thiself for any awe.
Tr 4 621 Lat nat this wrecched wo thyn herte gnawe,
Tr 4 622 But manly sette the world on six and sevene;
Tr 4 623 And if thow deye a martyr, go to hevene!
Tr 4 624 " I wol myself ben with the at this dede,
Tr 4 625 Theigh ich and al my kyn upon a stownde
Tr 4 626 Shulle in a strete as dogges liggen dede,
Tr 4 627 Thorugh-girt with many a wid and blody wownde;
Tr 4 628 In every cas I wol a frend be founde.
Tr 4 629 And if the list here sterven as a wrecche,
Tr 4 630 Adieu, the devel spede hym that it recche! "
Tr 4 631 This Troilus gan with tho wordes quyken,
Tr 4 632 And seyde, " Frend, graunt mercy, ich assente.
Tr 4 633 But certeynly thow maist nat so me priken,
Tr 4 634 Ne peyne non ne may me so tormente,
Tr 4 635 That, for no cas, it is nat myn entente,
Tr 4 636 At shorte wordes, though I deyen sholde,
Tr 4 637 To ravysshe hire, but if hireself it wolde. "
Tr 4 638 " Whi, so mene I, " quod Pandare, " al this day.
Tr 4 639 But telle me thanne, hastow hire wil assayed,
Tr 4 640 That sorwest thus? " And he answerde hym, " Nay. "
Tr 4 641 " Wherof artow, " quod Pandare, " thanne amayed,
Tr 4 642 That nost nat that she wol ben yvele appayed
Tr 4 643 To ravysshe hire, syn thow hast nought ben there,
Tr 4 644 But if that Jove told it in thyn ere?
Tr 4 645 " Forthi ris up, as nought ne were, anon,
Tr 4 646 And wassh thi face, and to the kyng thow wende,
Tr 4 647 Or he may wondren whider thow art goon.
Tr 4 648 Thow most with wisdom hym and othere blende,
Tr 4 649 Or, upon cas, he may after the sende
Tr 4 650 Er thow be war; and shortly, brother deere,
Tr 4 651 Be glad, and lat me werke in this matere,
Tr 4 652 " For I shal shape it so, that sikerly
Tr 4 653 Thow shalt this nyght som tyme, in som manere,
Tr 4 654 Come speken with thi lady pryvely,
Tr 4 655 And by hire wordes ek, and by hire cheere,
Tr 4 656 Thow shalt ful sone aperceyve and wel here
Tr 4 657 Al hire entente, and in this cas the beste.
Tr 4 658 And far now wel, for in this point I reste. "
Tr 4 659 The swifte Fame, which that false thynges
Tr 4 660 Egal reporteth lik the thynges trewe,
Tr 4 661 Was thorughout Troie yfled with preste wynges
Tr 4 662 Fro man to man, and made this tale al newe,
Tr 4 663 How Calkas doughter, with hire brighte hewe,
Tr 4 664 At parlement, withouten wordes more,
Tr 4 665 Ygraunted was in chaunge of Antenore.
Tr 4 666 The whiche tale anon-right as Criseyde
Tr 4 667 Hadde herd, she, which that of hire fader roughte,
Tr 4 668 As in this cas, right nought, ne whan he deyde,
Tr 4 669 Ful bisily to Jupiter bisoughte
Tr 4 670 Yeve hem meschaunce that this tretis broughte;
Tr 4 671 But shortly, lest thise tales sothe were,
Tr 4 672 She dorst at no wight asken it, for fere.
Tr 4 673 As she that hadde hire herte and al hire mynde
Tr 4 674 On Troilus iset so wonder faste
Tr 4 675 That al this world ne myghte hire love unbynde,
Tr 4 676 Ne Troilus out of hire herte caste,
Tr 4 677 She wol ben his, while that hire lif may laste.
Tr 4 678 And thus she brenneth both in love and drede,
Tr 4 679 So that she nyste what was best to reede.
Tr 4 680 But as men seen in towne and al aboute
Tr 4 681 That wommen usen frendes to visite,
Tr 4 682 So to Criseyde of wommen com a route,
Tr 4 683 For pitous joie, and wenden hire delite;
Tr 4 684 And with hire tales, deere ynough a myte,
Tr 4 685 Thise wommen, which that in the cite dwelle,
Tr 4 686 They sette hem down and seyde as I shall telle.
Tr 4 687 Quod first that oon, " I am glad, trewely,
Tr 4 688 Bycause of yow, that shal youre fader see. "
Tr 4 689 Another seyde, " Ywis, so nam nat I,
Tr 4 690 For al to litel hath she with us be. "
Tr 4 691 Quod tho the thridde, " I hope, ywis, that she
Tr 4 692 Shal bryngen us the pees on every syde,
Tr 4 693 That, whan she goth, almyghty God hire gide! "
Tr 4 694 Tho wordes and tho wommanysshe thynges,
Tr 4 695 She herde hem right as though she thennes were;
Tr 4 696 For God it woot, hire herte on othir thyng is.
Tr 4 697 Although the body sat among hem there,
Tr 4 698 Hire advertence is alwey elleswhere,
Tr 4 699 For Troilus ful faste hire soule soughte;
Tr 4 700 Withouten word, on hym alwey she thoughte.
Tr 4 701 Thise wommen, that thus wenden hire to plese,
Tr 4 702 Aboute naught gonne alle hire tales spende.
Tr 4 703 Swich vanyte ne kan don hire non ese,
Tr 4 704 As she that al this mene while brende
Tr 4 705 Of other passioun than that they wende,
Tr 4 706 So that she felte almost hire herte dye
Tr 4 707 For wo and wery of that compaignie.
Tr 4 708 For which no lenger myghte she restreyne
Tr 4 709 Hir teeris, so they gonnen up to welle,
Tr 4 710 That yaven signes of the bittre peyne
Tr 4 711 In which hir spirit was, and moste dwelle,
Tr 4 712 Remembryng hir, fro heven into which helle
Tr 4 713 She fallen was, syn she forgoth the syghte
Tr 4 714 Of Troilus, and sorwfully she sighte.
Tr 4 715 And thilke fooles sittynge hire aboute
Tr 4 716 Wenden that she wepte and siked sore
Tr 4 717 Bycause that she sholde out of that route
Tr 4 718 Departe, and nevere pleye with hem more.
Tr 4 719 And they that hadde yknowen hire of yore
Tr 4 720 Seigh hire so wepe and thoughte it kyndenesse,
Tr 4 721 And ech of hem wepte ek for hire destresse.
Tr 4 722 And bisyly they gonnen hire comforten
Tr 4 723 Of thyng, God woot, on which she litel thoughte;
Tr 4 724 And with hire tales wenden hire disporten,
Tr 4 725 And to be glad they often hire bysoughte;
Tr 4 726 But swich an ese therwith they hire wroughte,
Tr 4 727 Right as a man is esed for to feele
Tr 4 728 For ache of hed to clawen hym on his heele!
Tr 4 729 But after al this nyce vanyte
Tr 4 730 They toke hire leve, and hom they wenten alle.
Tr 4 731 Criseyde, ful of sorwful piete,
Tr 4 732 Into hire chambre up went out of the halle,
Tr 4 733 And on hire bed she gan for ded to falle,
Tr 4 734 In purpos nevere thennes for to rise;
Tr 4 735 And thus she wroughte, as I shal yow devyse.
Tr 4 736 Hire ownded heer, that sonnyssh was of hewe,
Tr 4 737 She rente, and ek hire fyngeres longe and smale
Tr 4 738 She wrong ful ofte, and bad God on hire rewe,
Tr 4 739 And with the deth to doon boote on hire bale.
Tr 4 740 Hire hewe, whilom bright, that tho was pale,
Tr 4 741 Bar witnesse of hire wo and hire constreynte;
Tr 4 742 And thus she spak, sobbyng in hire compleynte:
Tr 4 743 " Allas, " quod she, " out of this regioun
Tr 4 744 I, woful wrecche and infortuned wight,
Tr 4 745 And born in corsed constellacioun,
Tr 4 746 Moot goon and thus departen fro my knyght!
Tr 4 747 Wo worth, allas, that ilke dayes light
Tr 4 748 On which I saugh hym first with eyen tweyne,
Tr 4 749 That causeth me, and ich hym, al this peyne! "
Tr 4 750 Therwith the teris from hire eyen two
Tr 4 751 Down fille, as shour in Aperil ful swithe;
Tr 4 752 Hire white brest she bet, and for the wo
Tr 4 753 After the deth she cryed a thousand sithe,
Tr 4 754 Syn he that wont hire wo was for to lithe
Tr 4 755 She moot forgon; for which disaventure
Tr 4 756 She held hireself a forlost creature.
Tr 4 757 She seyde, " How shal he don, and ich also?
Tr 4 758 How sholde I lyve if that I from hym twynne?
Tr 4 759 O deere herte eke, that I love so,
Tr 4 760 Who shal that sorwe slen that ye ben inne?
Tr 4 761 O Calkas, fader, thyn be al this synne!
Tr 4 762 O moder myn, that cleped were Argyve,
Tr 4 763 Wo worth that day that thow me bere on lyve!
Tr 4 764 " To what fyn sholde I lyve and sorwen thus?
Tr 4 765 How sholde a fissh withouten water dure?
Tr 4 766 What is Criseyde worth, from Troilus?
Tr 4 767 How sholde a plaunte or lyves creature
Tr 4 768 Lyve withouten his kynde noriture?
Tr 4 769 For which ful ofte a by-word here I seye,
Tr 4 770 That `rooteles moot grene soone deye.'
Tr 4 771 " I shal doon thus -- syn neither swerd ne darte
Tr 4 772 Dar I noon handle, for the crueltee --
Tr 4 773 That ilke day that I from yow departe,
Tr 4 774 If sorwe of that nyl nat my bane be:
Tr 4 775 Thanne shal no mete or drynke come in me
Tr 4 776 Til I my soule out of my breste unshethe,
Tr 4 777 And thus myselven wol I don to dethe.
Tr 4 778 " And, Troilus, my clothes everychon
Tr 4 779 Shul blake ben in tokenyng, herte swete,
Tr 4 780 That I am as out of this world agon,
Tr 4 781 That wont was yow to setten in quiete;
Tr 4 782 And of myn ordre, ay til deth me mete,
Tr 4 783 The observance evere, in youre absence,
Tr 4 784 Shal sorwe ben, compleynt, and abstinence.
Tr 4 785 " Myn herte and ek the woful goost therinne
Tr 4 786 Byqueth. I with youre spirit to compleyne
Tr 4 787 Eternaly, for they shal nevere twynne;
Tr 4 788 For though in erthe ytwynned be we tweyne,
Tr 4 789 Yet in the feld of pite, out of peyne,
Tr 4 790 That highte Elisos, shal we ben yfeere,
Tr 4 791 As Orpheus and Erudice, his fere.
Tr 4 792 " Thus, herte myn, for Antenor, allas,
Tr 4 793 I soone shal be chaunged, as I wene.
Tr 4 794 But how shul ye don in this sorwful cas?
Tr 4 795 How shal youre tendre herte this sustene?
Tr 4 796 But, herte myn, foryete this sorwe and tene,
Tr 4 797 And me also; for sothly for to seye,
Tr 4 798 So ye wel fare, I recche naught to deye. "
Tr 4 799 How myghte it evere yred ben or ysonge,
Tr 4 800 The pleynte that she made in hire destresse?
Tr 4 801 I not; but, as for me, my litel tonge,
Tr 4 802 If I discryven wolde hire hevynesse,
Tr 4 803 It sholde make hire sorwe seme lesse
Tr 4 804 Than that it was, and childisshly deface
Tr 4 805 Hire heigh compleynte, and therfore ich it pace.
Tr 4 806 Pandare, which that sent from Troilus
Tr 4 807 Was to Criseyde -- as ye han herd devyse
Tr 4 808 That for the beste it was acorded thus,
Tr 4 809 And he ful glad to doon hym that servyse --
Tr 4 810 Unto Criseyde, in a ful secree wise,
Tr 4 811 Ther as she lay in torment and in rage,
Tr 4 812 Com hire to telle al hoolly his message,
Tr 4 813 And fond that she hireselven gan to trete
Tr 4 814 Ful pitously, for with hire salte teris
Tr 4 815 Hire brest, hire face, ybathed was ful wete;
Tr 4 816 The myghty tresses of hire sonnysshe heeris
Tr 4 817 Unbroiden hangen al aboute hire eeris,
Tr 4 818 Which yaf hym verray signal of martire
Tr 4 819 Of deth, which that hire herte gan desire.
Tr 4 820 Whan she hym saugh, she gan for shame anon
Tr 4 821 Hire tery face atwixe hire armes hide;
Tr 4 822 For which this Pandare is so wo-bygon
Tr 4 823 That in the hous he myghte unnethe abyde,
Tr 4 824 As he that pite felt on every syde;
Tr 4 825 For if Criseyde hadde erst compleyned soore,
Tr 4 826 Tho gan she pleyne a thousand tymes more.
Tr 4 827 And in hire aspre pleynte thus she seyde:
Tr 4 828 " Pandare first of joies mo than two
Tr 4 829 Was cause causyng unto me, Criseyde,
Tr 4 830 That now transmewed ben in cruel wo.
Tr 4 831 Wher shal I seye to yow welcom or no,
Tr 4 832 That alderfirst me broughte unto servyse
Tr 4 833 Of love -- allas! -- that endeth in swich wise?
Tr 4 834 " Endeth than love in wo? Ye, or men lieth,
Tr 4 835 And alle worldly blisse, as thynketh me.
Tr 4 836 The ende of blisse ay sorwe it occupieth.
Tr 4 837 And whoso troweth nat that it so be,
Tr 4 838 Lat hym upon me, woful wrecche, ysee,
Tr 4 839 That myself hate and ay my burthe acorse,
Tr 4 840 Felyng alwey fro wikke I go to worse.
Tr 4 841 " Whoso me seeth, he seeth sorwe al atonys --
Tr 4 842 Peyne, torment, pleynte, wo, distresse!
Tr 4 843 Out of my woful body harm ther noon is,
Tr 4 844 As angwissh, langour, cruel bitternesse,
Tr 4 845 Anoy, smert, drede, fury, and ek siknesse.
Tr 4 846 I trowe, ywys, from hevene teeris reyne
Tr 4 847 For pite of myn aspre and cruel peyne. "
Tr 4 848 " And thow, my suster, ful of discomfort, "
Tr 4 849 Quod Pandarus, " what thynkestow to do?
Tr 4 850 Whi ne hastow to thyselven som resport?
Tr 4 851 Whi wiltow thus thiself, allas, fordo?
Tr 4 852 Leef al this werk, and tak now heede to
Tr 4 853 That I shal seyn; and herkne of good entente
Tr 4 854 This which by me thi Troilus the sente. "
Tr 4 855 Tornede hire tho Criseyde, a wo makynge
Tr 4 856 So gret that it a deth was for to see.
Tr 4 857 " Allas, " quod she, " what wordes may ye brynge?
Tr 4 858 What wol my deere herte seyn to me,
Tr 4 859 Which that I drede nevere mo to see?
Tr 4 860 Wol he han pleynte or teris er I wende?
Tr 4 861 I have ynough, if he therafter sende! "
Tr 4 862 She was right swich to seen in hire visage
Tr 4 863 As is that wight that men on beere bynde;
Tr 4 864 Hire face, lik of Paradys the ymage,
Tr 4 865 Was al ychaunged in another kynde.
Tr 4 866 The pleye, the laughter, men was wont to fynde
Tr 4 867 On hire, and ek hire joies everichone,
Tr 4 868 Ben fled; and thus lith now Criseyde allone.
Tr 4 869 Aboute hire eyen two a purpre ryng
Tr 4 870 Bytrent, in sothfast tokenyng of hire peyne,
Tr 4 871 That to biholde it was a dedly thyng;
Tr 4 872 For which Pandare myghte nat restreyne
Tr 4 873 The teeris from his eighen for to reyne;
Tr 4 874 But natheles, as he best myghte, he seyde
Tr 4 875 From Troilus thise wordes to Criseyde:
Tr 4 876 " Lo, nece, I trowe ye han herd al how
Tr 4 877 The kyng with othere lordes, for the beste,
Tr 4 878 Hath mad eschaunge of Antenor and yow,
Tr 4 879 That cause is of this sorwe and this unreste.
Tr 4 880 But how this cas dooth Troilus moleste,
Tr 4 881 That may non erthly mannes tonge seye --
Tr 4 882 As he that shortly shapith hym to deye.
Tr 4 883 " For which we han so sorwed, he and I,
Tr 4 884 That into litel bothe it hadde us slawe;
Tr 4 885 But thorugh my conseyl this day finaly
Tr 4 886 He somwhat is fro wepynge now withdrawe,
Tr 4 887 And semeth me that he desireth fawe
Tr 4 888 With yow to ben al nyght, for to devyse
Tr 4 889 Remedie in this, if ther were any wyse.
Tr 4 890 " This, short and pleyn, th' effect of my message,
Tr 4 891 As ferforth as my wit kan comprehende,
Tr 4 892 For ye that ben of torment in swich rage
Tr 4 893 May to no long prologe as now entende.
Tr 4 894 And hereupon ye may answere hym sende;
Tr 4 895 And for the love of God, my nece deere,
Tr 4 896 So lef this wo er Troilus be here! "
Tr 4 897 " Gret is my wo, " quod she, and sighte soore
Tr 4 898 As she that feleth dedly sharp distresse;
Tr 4 899 " But yit to me his sorwe is muchel more,
Tr 4 900 That love hym bet than he hymself, I gesse.
Tr 4 901 Allas, for me hath he swich hevynesse?
Tr 4 902 Kan he for me so pitously compleyne?
Tr 4 903 Iwis, his sorwe doubleth al my peyne.
Tr 4 904 " Grevous to me, God woot, is for to twynne, "
Tr 4 905 Quod she, " but yet it harder is to me
Tr 4 906 To sen that sorwe which that he is inne;
Tr 4 907 For wel I woot it wol my bane be,
Tr 4 908 And deye I wol in certeyn, " tho quod she;
Tr 4 909 " But bid hym come, er deth, that thus me threteth,
Tr 4 910 Dryve out that goost which in myn herte beteth. "
Tr 4 911 Thise wordes seyd, she on hire armes two
Tr 4 912 Fil gruf, and gan to wepen pitously.
Tr 4 913 Quod Pandarus, " Allas, whi do ye so,
Tr 4 914 Syn wel ye woot the tyme is faste by
Tr 4 915 That he shal come? Aris up hastily,
Tr 4 916 That he yow nat bywopen thus ne fynde,
Tr 4 917 But ye wole have hym wood out of his mynde.
Tr 4 918 " For wiste he that ye ferde in this manere,
Tr 4 919 He wolde hymselven sle; and if I wende
Tr 4 920 To han this fare, he sholde nat come here
Tr 4 921 For al the good that Priam may dispende.
Tr 4 922 For to what fyn he wolde anon pretende,
Tr 4 923 That knowe ich wel; and forthi yet I seye:
Tr 4 924 So lef this sorwe, or platly he wol deye.
Tr 4 925 " And shapeth yow his sorwe for t' abregge,
Tr 4 926 And nought encresse, leeve nece swete!
Tr 4 927 Beth rather to hym cause of flat than egge,
Tr 4 928 And with som wisdom ye his sorwe bete.
Tr 4 929 What helpeth it to wepen ful a strete,
Tr 4 930 Or though ye bothe in salte teeris dreynte?
Tr 4 931 Bet is a tyme of cure ay than of pleynte.
Tr 4 932 " I mene thus: whan ich hym hider brynge,
Tr 4 933 Syn ye be wise and bothe of oon assent,
Tr 4 934 So shapeth how destourbe youre goynge,
Tr 4 935 Or come ayeyn soon after ye be went.
Tr 4 936 Women ben wise in short avysement;
Tr 4 937 And lat sen how youre wit shal now availle,
Tr 4 938 And that that I may helpe, it shal nat faille. "
Tr 4 939 " Go, " quod Criseyde, " and uncle, trewely,
Tr 4 940 I shal don al my myght me to restreyne
Tr 4 941 From wepyng in his sighte, and bisily
Tr 4 942 Hym for to glade I shal don al my peyne,
Tr 4 943 And in myn herte seken every veyne.
Tr 4 944 If to his sore ther may be fonden salve,
Tr 4 945 It shal nat lakke, certeyn, on my halve. "
Tr 4 946 Goth Pandarus, and Troilus he soughte
Tr 4 947 Til in a temple he fond hym al allone,
Tr 4 948 As he that of his lif no lenger roughte;
Tr 4 949 But to the pitouse goddes everichone
Tr 4 950 Ful tendrely he preyde and made his mone,
Tr 4 951 To doon hym sone out of this world to pace,
Tr 4 952 For wel he thoughte ther was non other grace.
Tr 4 953 And shortly, al the sothe for to seye,
Tr 4 954 He was so fallen in despeir that day,
Tr 4 955 That outrely he shop hym for to deye.
Tr 4 956 For right thus was his argument alway:
Tr 4 957 He seyde he nas but lorn, weylaway!
Tr 4 958 " For al that comth, comth by necessitee:
Tr 4 959 Thus to ben lorn, it is my destinee.
Tr 4 960 " For certeynly, this wot I wel, " he seyde,
Tr 4 961 " That forsight of divine purveyaunce
Tr 4 962 Hath seyn alwey me to forgon Criseyde,
Tr 4 963 Syn God seeth every thyng, out of doutaunce,
Tr 4 964 And hem disponyth, thorugh his ordinaunce,
Tr 4 965 In hire merites sothly for to be,
Tr 4 966 As they shul comen by predestyne.
Tr 4 967 " But natheles, allas, whom shal I leeve?
Tr 4 968 For ther ben grete clerkes many oon
Tr 4 969 That destyne thorugh argumentes preve;
Tr 4 970 And som men seyn that nedely ther is noon,
Tr 4 971 But that fre chois is yeven us everychon.
Tr 4 972 O, welaway! So sleighe arn clerkes olde
Tr 4 973 That I not whos opynyoun I may holde.
Tr 4 974 " For som men seyn, if God seth al biforn --
Tr 4 975 Ne God may nat deceyved ben, parde --
Tr 4 976 Than moot it fallen, theigh men hadde it sworn,
Tr 4 977 That purveiance hath seyn before to be.
Tr 4 978 Wherfore I sey, that from eterne if he
Tr 4 979 Hath wist byforn oure thought ek as oure dede,
Tr 4 980 We han no fre chois, as thise clerkes rede.
Tr 4 981 " For other thought, nor other dede also,
Tr 4 982 Myghte nevere ben, but swich as purveyaunce,
Tr 4 983 Which may nat ben deceyved nevere mo,
Tr 4 984 Hath feled byforn, withouten ignoraunce.
Tr 4 985 For yf ther myghte ben a variaunce
Tr 4 986 To writhen out fro Goddis purveyinge,
Tr 4 987 Ther nere no prescience of thyng comynge,
Tr 4 988 " But it were rather an opynyoun
Tr 4 989 Uncerteyn, and no stedfast forseynge;
Tr 4 990 And certes, that were an abusioun,
Tr 4 991 That God sholde han no parfit cler wytynge
Tr 4 992 More than we men that han doutous wenynge.
Tr 4 993 But swich an errour upon God to gesse
Tr 4 994 Were fals and foul, and wikked corsednesse.
Tr 4 995 " Ek this is an opynyoun of some
Tr 4 996 That han hire top ful heighe and smothe yshore:
Tr 4 997 They seyn right thus, that thyng is nat to come
Tr 4 998 For that the prescience hath seyn byfore
Tr 4 999 That it shal come; but they seyn that therfore
Tr 4 1000 That it shal come, therfore the purveyaunce
Tr 4 1001 Woot it byforn, withouten ignoraunce;
Tr 4 1002 " And in this manere this necessite
Tr 4 1003 Retorneth in his part contrarie agayn.
Tr 4 1004 For nedfully byhoveth it nat to bee
Tr 4 1005 That thilke thynges fallen in certayn
Tr 4 1006 That ben purveyed; but nedly, as they sayn,
Tr 4 1007 Byhoveth it that thynges whiche that falle,
Tr 4 1008 That they in certayn ben purveyed alle.
Tr 4 1009 " I mene as though I laboured me in this
Tr 4 1010 To enqueren which thyng cause of which thyng be:
Tr 4 1011 As wheither that the prescience of God is
Tr 4 1012 The certeyn cause of the necessite
Tr 4 1013 Of thynges that to comen ben, parde,
Tr 4 1014 Or if necessite of thyng comynge
Tr 4 1015 Be cause certeyn of the purveyinge.
Tr 4 1016 " But now n' enforce I me nat in shewynge
Tr 4 1017 How the ordre of causes stant; but wel woot I
Tr 4 1018 That it byhoveth that the byfallynge
Tr 4 1019 Of thynges wist byfore certeynly
Tr 4 1020 Be necessarie, al seme it nat therby
Tr 4 1021 That prescience put fallynge necessaire
Tr 4 1022 To thyng to come, al falle it foule or faire.
Tr 4 1023 " For if ther sitte a man yond on a see,
Tr 4 1024 Than by necessite bihoveth it
Tr 4 1025 That, certes, thyn opynyoun sooth be
Tr 4 1026 That wenest or conjectest that he sit.
Tr 4 1027 And further over now ayeynward yit,
Tr 4 1028 Lo, right so is it of the part contrarie,
Tr 4 1029 As thus -- now herkne, for I wol nat tarie:
Tr 4 1030 " I sey that if the opynyoun of the
Tr 4 1031 Be soth, for that he sitte, than sey I this:
Tr 4 1032 That he mot sitten by necessite;
Tr 4 1033 And thus necessite in eyther is.
Tr 4 1034 For in hym, nede of sittynge is, ywys,
Tr 4 1035 And in the, nede of soth; and thus, forsothe,
Tr 4 1036 There mot necessite ben in yow bothe.
Tr 4 1037 " But thow mayst seyn, the man sit nat therfore
Tr 4 1038 That thyn opynyoun of his sittynge soth is,
Tr 4 1039 But rather, for the man sit ther byfore,
Tr 4 1040 Therfore is thyn opynyoun soth, ywis.
Tr 4 1041 And I seye, though the cause of soth of this
Tr 4 1042 Comth of his sittyng, yet necessite
Tr 4 1043 Is entrechaunged, both in hym and the.
Tr 4 1044 " Thus in this same wise, out of doutaunce,
Tr 4 1045 I may wel maken, as it semeth me,
Tr 4 1046 My resonyng of Goddes purveyaunce
Tr 4 1047 And of the thynges that to comen be;
Tr 4 1048 By which resoun men may wel yse
Tr 4 1049 That thilke thynges that in erthe falle,
Tr 4 1050 That by necessite they comen alle.
Tr 4 1051 " For although that for thyng shal come, ywys,
Tr 4 1052 Therfore is it purveyed, certeynly --
Tr 4 1053 Nat that it comth for it purveyed is --
Tr 4 1054 Yet natheles, bihoveth it nedfully
Tr 4 1055 That thing to come be purveyd, trewely,
Tr 4 1056 Or elles, thynges that purveyed be,
Tr 4 1057 That they bitiden by necessite.
Tr 4 1058 " And this suffiseth right ynough, certeyn,
Tr 4 1059 For to destruye oure fre chois every del.
Tr 4 1060 But now is this abusioun, to seyn
Tr 4 1061 That fallyng of the thynges temporel
Tr 4 1062 Is cause of Goddes prescience eternel.
Tr 4 1063 Now trewely, that is a fals sentence,
Tr 4 1064 That thyng to come sholde cause his prescience.
Tr 4 1065 " What myght I wene, and I hadde swich a thought,
Tr 4 1066 But that God purveyeth thyng that is to come
Tr 4 1067 For that it is to come, and ellis nought?
Tr 4 1068 So myghte I wene that thynges alle and some
Tr 4 1069 That whilom ben byfalle and overcome
Tr 4 1070 Ben cause of thilke sovereyne purveyaunce
Tr 4 1071 That forwoot al withouten ignoraunce.
Tr 4 1072 " And over al this, yet sey I more herto:
Tr 4 1073 That right as whan I wot ther is a thyng,
Tr 4 1074 Iwys, that thyng moot nedfully be so;
Tr 4 1075 Ek right so, whan I woot a thyng comyng,
Tr 4 1076 So mot it come; and thus the bifallyng
Tr 4 1077 Of thynges that ben wist bifore the tyde,
Tr 4 1078 They mowe nat ben eschued on no syde. "
Tr 4 1079 Thanne seyde he thus: " Almyghty Jove in trone,
Tr 4 1080 That woost of al thys thyng the sothfastnesse,
Tr 4 1081 Rewe on my sorwe: or do me deyen sone,
Tr 4 1082 Or bryng Criseyde and me fro this destresse! "
Tr 4 1083 And whil he was in al this hevynesse,
Tr 4 1084 Disputyng with hymself in this matere,
Tr 4 1085 Com Pandare in, and seyde as ye may here:
Tr 4 1086 " O myghty God, " quod Pandarus, " in trone,
Tr 4 1087 I! Who say evere a wis man faren so?
Tr 4 1088 Whi, Troilus, what thinkestow to doone?
Tr 4 1089 Hastow swich lust to ben thyn owen fo?
Tr 4 1090 What, parde, yet is nat Criseyde ago!
Tr 4 1091 Whi list the so thiself fordoon for drede
Tr 4 1092 That in thyn hed thyne eyen semen dede?
Tr 4 1093 " Hastow nat lyved many a yer byforn
Tr 4 1094 Withouten hire, and ferd ful wel at ese?
Tr 4 1095 Artow for hire and for noon other born?
Tr 4 1096 Hath Kynde the wrought al only hire to plese?
Tr 4 1097 Lat be, and thynk right thus in thi disese:
Tr 4 1098 That, in the dees right as ther fallen chaunces,
Tr 4 1099 Right so in love ther come and gon plesaunces.
Tr 4 1100 " And yet this is a wonder most of alle,
Tr 4 1101 Whi thow thus sorwest, syn thow nost nat yit,
Tr 4 1102 Touchyng hire goyng, how that it shal falle,
Tr 4 1103 Ne yif she kan hireself destourben it.
Tr 4 1104 Thow hast nat yet assayed al hire wit.
Tr 4 1105 A man may al bytyme his nekke beede
Tr 4 1106 Whan it shal of, and sorwen at the nede.
Tr 4 1107 " Forthi tak hede of that that I shal seye:
Tr 4 1108 I have with hire yspoke and longe ybe,
Tr 4 1109 So as acorded was bitwixe us tweye;
Tr 4 1110 And evere mor me thynketh thus, that she
Tr 4 1111 Hath somwhat in hire hertes privete
Tr 4 1112 Wherwith she kan, if I shal right arede,
Tr 4 1113 Destourbe al this of which thow art in drede.
Tr 4 1114 " For which my counseil is, whan it is nyght
Tr 4 1115 Thow to hire go and make of this an ende;
Tr 4 1116 And blisful Juno thorugh hire grete myght
Tr 4 1117 Shal, as I hope, hire grace unto us sende.
Tr 4 1118 Myn herte seyth, `Certeyn, she shal nat wende.'
Tr 4 1119 And forthi put thyn herte a while in reste,
Tr 4 1120 And hold this purpos, for it is the beste. "
Tr 4 1121 This Troilus answerd, and sighte soore:
Tr 4 1122 " Thow seist right wel, and I wol don right so. "
Tr 4 1123 And what hym liste, he seyde unto it more.
Tr 4 1124 And whan that it was tyme for to go,
Tr 4 1125 Ful pryvely hymself, withouten mo,
Tr 4 1126 Unto hire com, as he was wont to doone;
Tr 4 1127 And how they wroughte, I shal yow tellen soone.
Tr 4 1128 Soth is, that whan they gonnen first to mete,
Tr 4 1129 So gan the peyne hire hertes for to twiste
Tr 4 1130 That neyther of hem other myghte grete,
Tr 4 1131 But hem in armes toke, and after kiste.
Tr 4 1132 The lasse woful of hem bothe nyste
Tr 4 1133 Wher that he was, ne myghte o word out brynge,
Tr 4 1134 As I seyde erst, for wo and for sobbynge.
Tr 4 1135 The woful teeris that they leten falle
Tr 4 1136 As bittre weren, out of teris kynde,
Tr 4 1137 For peyne, as is ligne aloes or galle --
Tr 4 1138 So bittre teeris weep nought, as I fynde,
Tr 4 1139 The woful Mirra thorugh the bark and rynde --
Tr 4 1140 That in this world ther nys so hard an herte
Tr 4 1141 That nolde han rewed on hire peynes smerte.
Tr 4 1142 But whan hire woful weri goostes tweyne
Tr 4 1143 Retourned ben ther as hem oughte dwelle,
Tr 4 1144 And that somwhat to wayken gan the peyne
Tr 4 1145 By lengthe of pleynte, and ebben gan the welle
Tr 4 1146 Of hire teeris, and the herte unswelle,
Tr 4 1147 With broken vois, al hoors forshright, Criseyde
Tr 4 1148 To Troilus thise ilke wordes seyde:
Tr 4 1149 " O Jove, I deye, and mercy I beseche!
Tr 4 1150 Help, Troilus! " And therwithal hire face
Tr 4 1151 Upon his brest she leyde and loste speche --
Tr 4 1152 Hire woful spirit from his propre place,
Tr 4 1153 Right with the word, alwey o poynt to pace.
Tr 4 1154 And thus she lith with hewes pale and grene,
Tr 4 1155 That whilom fressh and fairest was to sene.
Tr 4 1156 This Troilus, that on hire gan biholde,
Tr 4 1157 Clepyng hire name -- and she lay as for ded --
Tr 4 1158 Without answere, and felte hire lymes colde,
Tr 4 1159 Hire eyen throwen upward to hire hed,
Tr 4 1160 This sorwful man kan now noon other red,
Tr 4 1161 But ofte tyme hire colde mowth he kiste.
Tr 4 1162 Wher hym was wo, God and hymself it wiste!
Tr 4 1163 He rist hym up, and long streght he hire leyde;
Tr 4 1164 For signe of lif, for aught he kan or may,
Tr 4 1165 Kan he non fynde in nothyng on Criseyde,
Tr 4 1166 For which his song ful ofte is " weylaway! "
Tr 4 1167 But whan he saugh that specheles she lay,
Tr 4 1168 With sorweful vois and herte of blisse al bare,
Tr 4 1169 He seyde how she was fro this world yfare.
Tr 4 1170 So after that he longe hadde hire compleyned,
Tr 4 1171 His hondes wrong, and seyd that was to seye,
Tr 4 1172 And with his teeris salt hire brest byreyned,
Tr 4 1173 He gan tho teeris wypen of ful dreye,
Tr 4 1174 And pitously gan for the soule preye,
Tr 4 1175 And seyde, " O Lord, that set art in thi trone,
Tr 4 1176 Rewe ek on me, for I shal folwe hire sone! "
Tr 4 1177 She cold was, and withouten sentement
Tr 4 1178 For aught he woot, for breth ne felte he non,
Tr 4 1179 And this was hym a pregnant argument
Tr 4 1180 That she was forth out of this world agon.
Tr 4 1181 And whan he say ther was non other woon,
Tr 4 1182 He gan hire lymes dresse in swich manere
Tr 4 1183 As men don hem that shal ben layd on beere.
Tr 4 1184 And after this, with sterne and cruel herte,
Tr 4 1185 His swerd anon out of his shethe he twighte
Tr 4 1186 Hymself to slen, how sore that hym smerte,
Tr 4 1187 So that his soule hire soule folwen myghte
Tr 4 1188 Ther as the doom of Mynos wolde it dighte,
Tr 4 1189 Syn Love and cruel Fortune it ne wolde
Tr 4 1190 That in this world he lenger lyven sholde.
Tr 4 1191 Than seyde he thus, fulfild of heigh desdayn:
Tr 4 1192 " O cruel Jove, and thow, Fortune adverse,
Tr 4 1193 This al and som: that falsly have ye slayn
Tr 4 1194 Criseyde, and syn ye may do me no werse,
Tr 4 1195 Fy on youre myght and werkes so dyverse!
Tr 4 1196 Thus cowardly ye shul me nevere wynne;
Tr 4 1197 Ther shal no deth me fro my lady twynne.
Tr 4 1198 " For I this world, syn ye have slayn hire thus,
Tr 4 1199 Wol lete and folwe hire spirit low or hye.
Tr 4 1200 Shal nevere lovere seyn that Troilus
Tr 4 1201 Dar nat for fere with his lady dye;
Tr 4 1202 For certeyn I wol beere hire compaignie.
Tr 4 1203 But syn ye wol nat suffre us lyven here,
Tr 4 1204 Yet suffreth that oure soules ben yfere.
Tr 4 1205 " And thow, cite, which that I leve in wo,
Tr 4 1206 And thow, Priam, and bretheren alle yfeere,
Tr 4 1207 And thow, my moder, farwel, for I go;
Tr 4 1208 And Atropos, make redy thow my beere;
Tr 4 1209 And thow, Criseyde, o swete herte deere,
Tr 4 1210 Receyve now my spirit! " wolde he seye,
Tr 4 1211 With swerd at herte, al redy for to deye.
Tr 4 1212 But as God wolde, of swough therwith sh' abreyde,
Tr 4 1213 And gan to sike, and " Troilus " she cride;
Tr 4 1214 And he answerde, " Lady myn, Criseyde,
Tr 4 1215 Lyve ye yet? " and leet his swerd down glide.
Tr 4 1216 " Ye, herte myn, that thonked be Cipride! "
Tr 4 1217 Quod she; and therwithal she soore syghte,
Tr 4 1218 And he bigan conforte hire as he myghte,
Tr 4 1219 Took hire in armes two, and kiste hire ofte,
Tr 4 1220 And hire to glade he did al his entente;
Tr 4 1221 For which hire goost, that flikered ay o-lofte,
Tr 4 1222 Into hire woful herte ayeyn it wente.
Tr 4 1223 But at the laste, as that hire eye glente
Tr 4 1224 Asyde, anon she gan his swerd espie,
Tr 4 1225 As it lay bare, and gan for fere crye,
Tr 4 1226 And asked hym, whi he it hadde out drawe.
Tr 4 1227 And Troilus anon the cause hire tolde,
Tr 4 1228 And how hymself therwith he wolde han slawe;
Tr 4 1229 For which Criseyde upon hym gan biholde,
Tr 4 1230 And gan hym in hire armes faste folde,
Tr 4 1231 And seyde, " O mercy, God! Lo, which a dede!
Tr 4 1232 Allas, how neigh we weren bothe dede!
Tr 4 1233 " Than if I nadde spoken, as grace was,
Tr 4 1234 Ye wolde han slayn youreself anon? " quod she.
Tr 4 1235 " Yee, douteles " ; and she answerde, " Allas,
Tr 4 1236 For by that ilke Lord that made me,
Tr 4 1237 I nolde a forlong wey on lyve have be
Tr 4 1238 After youre deth, to han ben crowned queene
Tr 4 1239 Of al that lond the sonne on shyneth sheene.
Tr 4 1240 " But with this selve swerd, which that here is,
Tr 4 1241 Myselve I wolde han slawe, " quod she tho.
Tr 4 1242 " But hoo, for we han right ynough of this,
Tr 4 1243 And lat us rise, and streght to bedde go,
Tr 4 1244 And there lat us speken of oure wo;
Tr 4 1245 For, by the morter which that I se brenne,
Tr 4 1246 Knowe I ful wel that day is nat far henne. "
Tr 4 1247 Whan they were in hire bed, in armes folde,
Tr 4 1248 Naught was it lik tho nyghtes here-byforn.
Tr 4 1249 For pitously ech other gan byholde,
Tr 4 1250 As they that hadden al hire blisse ylorn,
Tr 4 1251 Bywaylinge ay the day that they were born;
Tr 4 1252 Til at the laste this sorwful wight, Criseyde,
Tr 4 1253 To Troilus thise ilke wordes seyde:
Tr 4 1254 " Lo, herte myn, wel woot ye this, " quod she,
Tr 4 1255 " That if a wight alwey his wo compleyne
Tr 4 1256 And seketh nought how holpen for to be,
Tr 4 1257 It nys but folie and encrees of peyne;
Tr 4 1258 And syn that here assembled be we tweyne
Tr 4 1259 To fynde boote of wo that we ben inne,
Tr 4 1260 It were al tyme soone to bygynne.
Tr 4 1261 " I am a womman, as ful wel ye woot,
Tr 4 1262 And as I am avysed sodeynly,
Tr 4 1263 So wol I telle yow, whil it is hoot.
Tr 4 1264 Me thynketh thus: that nouther ye nor I
Tr 4 1265 Ought half this wo to maken, skilfully;
Tr 4 1266 For ther is art ynough for to redresse
Tr 4 1267 That yet is mys, and slen this hevynesse.
Tr 4 1268 " Soth is, the wo, the which that we ben inne,
Tr 4 1269 For aught I woot, for nothyng ellis is
Tr 4 1270 But for the cause that we sholden twynne.
Tr 4 1271 Considered al, ther nys namore amys.
Tr 4 1272 But what is thanne a remede unto this,
Tr 4 1273 But that we shape us soone for to meete?
Tr 4 1274 This al and som, my deere herte sweete.
Tr 4 1275 " Now, that I shal wel bryngen it aboute
Tr 4 1276 To come ayeyn, soone after that I go,
Tr 4 1277 Therof am I no manere thyng in doute;
Tr 4 1278 For, dredeles, withinne a wowke or two
Tr 4 1279 I shal ben here; and that it may be so
Tr 4 1280 By alle right and in a wordes fewe,
Tr 4 1281 I shal yow wel an heep of weyes shewe.
Tr 4 1282 " For which I wol nat make long sermoun --
Tr 4 1283 For tyme ylost may nought recovered be --
Tr 4 1284 But I wol gon to my conclusioun,
Tr 4 1285 And to the beste, in aught that I kan see.
Tr 4 1286 And for the love of God, foryeve it me
Tr 4 1287 If I speke aught ayeyns youre hertes reste;
Tr 4 1288 For trewely, I speke it for the beste,
Tr 4 1289 " Makyng alwey a protestacioun
Tr 4 1290 That now thise wordes which that I shal seye
Tr 4 1291 Nis but to shewen yow my mocioun
Tr 4 1292 To fynde unto oure help the beste weye;
Tr 4 1293 And taketh it non other wise, I preye,
Tr 4 1294 For in effect, what so ye me comaunde,
Tr 4 1295 That wol I don, for that is no demaunde.
Tr 4 1296 " Now herkneth this: ye han wel understonde
Tr 4 1297 My goyng graunted is by parlement
Tr 4 1298 So ferforth that it may nat be withstonde
Tr 4 1299 For al this world, as by my jugement.
Tr 4 1300 And syn ther helpeth non avisement
Tr 4 1301 To letten it, lat it passe out of mynde,
Tr 4 1302 And lat us shape a bettre wey to fynde.
Tr 4 1303 " The soth is this: the twynnyng of us tweyne
Tr 4 1304 Wol us disese and cruelich anoye,
Tr 4 1305 But hym byhoveth somtyme han a peyne
Tr 4 1306 That serveth Love, if that he wol have joye.
Tr 4 1307 And syn I shal no ferther out of Troie
Tr 4 1308 Than I may ride ayeyn on half a morwe,
Tr 4 1309 It oughte lesse causen us to sorwe;
Tr 4 1310 " So as I shal not so ben hid in muwe,
Tr 4 1311 That day by day, myn owne herte deere --
Tr 4 1312 Syn wel ye woot that it is now a trewe --
Tr 4 1313 Ye shal ful wel al myn estat yheere.
Tr 4 1314 And er that trewe is doon, I shal ben heere;
Tr 4 1315 And thanne have ye both Antenore ywonne
Tr 4 1316 And me also. Beth glad now, if ye konne,
Tr 4 1317 " And thenk right thus: `Criseyde is now agon.
Tr 4 1318 But what, she shal come hastiliche ayeyn!'
Tr 4 1319 And whanne, allas? By God, lo, right anon,
Tr 4 1320 Er dayes ten, this dar I saufly seyn.
Tr 4 1321 And than at erste shal we be so feyn,
Tr 4 1322 So as we shal togideres evere dwelle,
Tr 4 1323 That al this world ne myghte oure blisse telle.
Tr 4 1324 " I se that oft-tyme, there as we ben now,
Tr 4 1325 That for the beste, oure counseyl for to hide,
Tr 4 1326 Ye speke nat with me, nor I with yow
Tr 4 1327 In fourtenyght, ne se yow go ne ride.
Tr 4 1328 May ye naught ten dayes thanne abide,
Tr 4 1329 For myn honour, in swich an aventure?
Tr 4 1330 Iwys, ye mowen ellis lite endure!
Tr 4 1331 " Ye knowe ek how that al my kyn is heere,
Tr 4 1332 But if that onliche it my fader be,
Tr 4 1333 And ek myn othere thynges alle yfeere,
Tr 4 1334 And nameliche, my deere herte, ye,
Tr 4 1335 Whom that I nolde leven for to se
Tr 4 1336 For al this world, as wyd as it hath space,
Tr 4 1337 Or ellis se ich nevere Joves face!
Tr 4 1338 " Whi trowe ye my fader in this wise
Tr 4 1339 Coveyteth so to se me, but for drede
Tr 4 1340 Lest in this town that folkes me despise
Tr 4 1341 Because of hym, for his unhappy dede?
Tr 4 1342 What woot my fader what lif that I lede?
Tr 4 1343 For if he wiste in Troie how wel I fare,
Tr 4 1344 Us neded for my wendyng nought to care.
Tr 4 1345 " Ye sen that every day ek, more and more,
Tr 4 1346 Men trete of pees, and it supposid is
Tr 4 1347 That men the queene Eleyne shal restore,
Tr 4 1348 And Grekis us restoren that is mys;
Tr 4 1349 So, though ther nere comfort non but this,
Tr 4 1350 That men purposen pees on every syde,
Tr 4 1351 Ye may the bettre at ese of herte abyde.
Tr 4 1352 " For if that it be pees, myn herte deere,
Tr 4 1353 The nature of the pees moot nedes dryve
Tr 4 1354 That men moost entrecomunen yfeere,
Tr 4 1355 And to and fro ek ride and gon as blyve
Tr 4 1356 Alday as thikke as been fleen from an hyve,
Tr 4 1357 And every wight han liberte to bleve
Tr 4 1358 Whereas hym liste the bet, withouten leve.
Tr 4 1359 " And though so be that pees ther may be non,
Tr 4 1360 Yet hider, though ther nevere pees ne were,
Tr 4 1361 I moste come; for whider sholde I gon,
Tr 4 1362 Or how, meschaunce, sholde I dwelle there
Tr 4 1363 Among tho men of armes evere in feere?
Tr 4 1364 For which, as wisly God my soule rede,
Tr 4 1365 I kan nat sen wherof ye sholden drede.
Tr 4 1366 " Have here another wey, if it so be
Tr 4 1367 That al this thyng ne may yow nat suffise:
Tr 4 1368 My fader, as ye knowen wel, parde,
Tr 4 1369 Is old, and elde is ful of coveytise,
Tr 4 1370 And I right now have founden al the gise,
Tr 4 1371 Withouten net, wherwith I shal hym hente.
Tr 4 1372 And herkeneth how, if that ye wol assente:
Tr 4 1373 " Lo, Troilus, men seyn that hard it is
Tr 4 1374 The wolf ful and the wether hool to have;
Tr 4 1375 This is to seyn, that men ful ofte, iwys,
Tr 4 1376 Mote spenden part the remenant for to save;
Tr 4 1377 For ay with gold men may the herte grave
Tr 4 1378 Of hym that set is upon coveytise;
Tr 4 1379 And how I mene, I shal it yow devyse:
Tr 4 1380 " The moeble which that I have in this town
Tr 4 1381 Unto my fader shal I take, and seye
Tr 4 1382 That right for trust and for savacioun
Tr 4 1383 It sent is from a frend of his or tweye,
Tr 4 1384 The whiche frendes ferventliche hym preye
Tr 4 1385 To senden after more, and that in hie,
Tr 4 1386 Whil that this town stant thus in jupartie.
Tr 4 1387 " And that shal ben an huge quantite --
Tr 4 1388 Thus shal I seyn -- but lest it folk espide,
Tr 4 1389 This may be sent by no wyght but by me.
Tr 4 1390 I shal ek shewen hym, yf pees bytyde,
Tr 4 1391 What frendes that ich have on every syde
Tr 4 1392 Toward the court, to don the wrathe pace
Tr 4 1393 Of Priamus and don hym stonde in grace.
Tr 4 1394 " So what for o thyng and for other, swete,
Tr 4 1395 I shal hym so enchaunten with my sawes
Tr 4 1396 That right in hevene his sowle is, shal he mete;
Tr 4 1397 For al Appollo, or his clerkes lawes,
Tr 4 1398 Or calkullynge, avayleth nought thre hawes;
Tr 4 1399 Desir of gold shal so his soule blende
Tr 4 1400 That, as me lyst, I shal wel make an ende.
Tr 4 1401 " And yf he wolde ought by hys sort it preve
Tr 4 1402 If that I lye, in certayn I shal fonde
Tr 4 1403 Distorben hym and plukke hym by the sleve,
Tr 4 1404 Makynge his sort, and beren hym on honde
Tr 4 1405 He hath not wel the goddes understonde;
Tr 4 1406 For goddes speken in amphibologies,
Tr 4 1407 And for o soth they tellen twenty lyes.
Tr 4 1408 " Ek, `Drede fond first goddes, I suppose' --
Tr 4 1409 Thus shal I seyn -- and that his coward herte
Tr 4 1410 Made hym amys the goddes text to glose,
Tr 4 1411 Whan he for fered out of Delphos sterte.
Tr 4 1412 And but I make hym soone to converte
Tr 4 1413 And don my red withinne a day or tweye,
Tr 4 1414 I wol to yow oblige me to deye. "
Tr 4 1415 And treweliche, as writen wel I fynde
Tr 4 1416 That al this thyng was seyd of good entente,
Tr 4 1417 And that hire herte trewe was and kynde
Tr 4 1418 Towardes hym, and spak right as she mente,
Tr 4 1419 And that she starf for wo neigh whan she wente,
Tr 4 1420 And was in purpos evere to be trewe:
Tr 4 1421 Thus writen they that of hire werkes knewe.
Tr 4 1422 This Troilus, with herte and erys spradde,
Tr 4 1423 Herde al this thyng devysen to and fro,
Tr 4 1424 And verrayliche him semed that he hadde
Tr 4 1425 The selve wit; but yet to late hire go
Tr 4 1426 His herte mysforyaf hym evere mo;
Tr 4 1427 But fynaly, he gan his herte wreste
Tr 4 1428 To trusten hire, and took it for the beste.
Tr 4 1429 For which the grete furie of his penaunce
Tr 4 1430 Was queynt with hope, and therwith hem bitwene
Tr 4 1431 Bigan for joie th' amorouse daunce;
Tr 4 1432 And as the briddes, whanne the sonne is shene,
Tr 4 1433 Deliten in hire song in leves grene,
Tr 4 1434 Right so the wordes that they spake yfeere
Tr 4 1435 Delited hem, and made hire hertes clere.
Tr 4 1436 But natheles, the wendyng of Criseyde,
Tr 4 1437 For al this world, may nat out of his mynde,
Tr 4 1438 For which ful ofte he pitously hire preyde
Tr 4 1439 That of hire heste he myghte hire trewe fynde,
Tr 4 1440 And seyde hire, " Certes, if ye be unkynde,
Tr 4 1441 And but ye come at day set into Troye,
Tr 4 1442 Ne shal I nevere have hele, honour, ne joye.
Tr 4 1443 " For also soth as sonne uprist o-morwe --
Tr 4 1444 And God so wisly thow me, woful wrecche,
Tr 4 1445 To reste brynge out of this cruel sorwe! --
Tr 4 1446 I wol myselven sle if that ye drecche.
Tr 4 1447 But of my deeth though litel be to recche,
Tr 4 1448 Yet, er that ye me causen so to smerte,
Tr 4 1449 Dwelle rather here, myn owen swete herte.
Tr 4 1450 " For trewely, myn owne lady deere,
Tr 4 1451 Tho sleghtes yet that I have herd yow stere
Tr 4 1452 Ful shaply ben to faylen alle yfeere.
Tr 4 1453 For thus men seyth `That on thenketh the beere,
Tr 4 1454 But al another thenketh his ledere.'
Tr 4 1455 Youre syre is wys; and seyd is, out of drede,
Tr 4 1456 `Men may the wise atrenne, and naught atrede.'
Tr 4 1457 " It is ful hard to halten unespied
Tr 4 1458 Byfore a crepel, for he kan the craft;
Tr 4 1459 Youre fader is in sleght as Argus eyed;
Tr 4 1460 For al be that his moeble is hym biraft,
Tr 4 1461 His olde sleighte is yet so with hym laft
Tr 4 1462 Ye shal nat blende hym for youre wommanhede,
Tr 4 1463 Ne feyne aright; and that is al my drede.
Tr 4 1464 " I not if pees shal evere mo bitide;
Tr 4 1465 But pees or no, for ernest ne for game,
Tr 4 1466 I woot, syn Calkas on the Grekis syde
Tr 4 1467 Hath ones ben and lost so foule his name,
Tr 4 1468 He dar nomore come here ayeyn for shame;
Tr 4 1469 For which that wey, for aught I kan espie,
Tr 4 1470 To trusten on nys but a fantasie.
Tr 4 1471 " Ye shal ek sen, youre fader shal yow glose
Tr 4 1472 To ben a wif; and as he kan wel preche,
Tr 4 1473 He shal som Grek so preyse and wel alose
Tr 4 1474 That ravysshen he shal yow with his speche,
Tr 4 1475 Or do yow don by force as he shal teche;
Tr 4 1476 And Troilus, of whom ye nyl han routhe,
Tr 4 1477 Shal causeles so sterven in his trouthe!
Tr 4 1478 " And over al this, youre fader shal despise
Tr 4 1479 Us alle, and seyn this cite nys but lorn,
Tr 4 1480 And that th' assege nevere shal aryse,
Tr 4 1481 For-whi the Grekis han it alle sworn,
Tr 4 1482 Til we be slayn and down oure walles torn.
Tr 4 1483 And thus he shal yow with his wordes fere,
Tr 4 1484 That ay drede I that ye wol bleven there.
Tr 4 1485 " Ye shal ek seen so many a lusty knyght
Tr 4 1486 Among the Grekis, ful of worthynesse,
Tr 4 1487 And ech of hem with herte, wit, and myght
Tr 4 1488 To plesen yow don al his bisynesse,
Tr 4 1489 That ye shul dullen of the rudenesse
Tr 4 1490 Of us sely Troians, but if routhe
Tr 4 1491 Remorde yow, or vertu of youre trouthe.
Tr 4 1492 " And this to me so grevous is to thynke
Tr 4 1493 That fro my brest it wol my soule rende;
Tr 4 1494 Ne dredeles, in me ther may nat synke
Tr 4 1495 A good opynyoun, if that ye wende,
Tr 4 1496 For whi youre fadres sleghte wol us shende.
Tr 4 1497 And if ye gon, as I have told yow yore,
Tr 4 1498 So thenk I n' am but ded, withoute more.
Tr 4 1499 " For which, with humble, trewe, and pitous herte,
Tr 4 1500 A thousand tymes mercy I yow preye;
Tr 4 1501 So rueth on myn aspre peynes smerte,
Tr 4 1502 And doth somwhat as that I shal yow seye,
Tr 4 1503 And lat us stele awey bitwixe us tweye;
Tr 4 1504 And thynk that folie is, whan man may chese,
Tr 4 1505 For accident his substaunce ay to lese.
Tr 4 1506 " I mene thus: that syn we mowe er day
Tr 4 1507 Wel stele awey and ben togidere so,
Tr 4 1508 What wit were it to putten in assay,
Tr 4 1509 In cas ye sholden to youre fader go,
Tr 4 1510 If that ye myghten come ayeyn or no?
Tr 4 1511 Thus mene I: that it were a gret folie
Tr 4 1512 To putte that sikernesse in jupertie.
Tr 4 1513 " And vulgarly to speken of substaunce
Tr 4 1514 Of tresour, may we bothe with us lede
Tr 4 1515 Inough to lyve in honour and plesaunce
Tr 4 1516 Til into tyme that we shal ben dede;
Tr 4 1517 And thus we may eschuen al this drede.
Tr 4 1518 For everich other wey ye kan recorde,
Tr 4 1519 Myn herte, ywys, may therwith naught acorde.
Tr 4 1520 " And hardily, ne dredeth no poverte,
Tr 4 1521 For I have kyn and frendes elleswhere
Tr 4 1522 That, though we comen in oure bare sherte,
Tr 4 1523 Us sholde neyther lakken gold ne gere,
Tr 4 1524 But ben honured while we dwelten there.
Tr 4 1525 And go we anon; for as in myn entente,
Tr 4 1526 This is the beste, if that ye wole assente. "
Tr 4 1527 Criseyde, with a sik, right in this wise
Tr 4 1528 Answerde, " Ywys, my deere herte trewe,
Tr 4 1529 We may wel stele awey, as ye devyse,
Tr 4 1530 And fynden swich unthrifty weyes newe,
Tr 4 1531 But afterward ful soore it wol us rewe.
Tr 4 1532 And helpe me God so at my mooste nede,
Tr 4 1533 As causeles ye suffren al this drede!
Tr 4 1534 " For thilke day that I for cherisynge
Tr 4 1535 Or drede of fader, or for other wight,
Tr 4 1536 Or for estat, delit, or for weddynge,
Tr 4 1537 Be fals to yow, my Troilus, my knyght,
Tr 4 1538 Saturnes doughter, Juno, thorugh hire myght,
Tr 4 1539 As wood as Athamante do me dwelle
Tr 4 1540 Eternalich in Stix, the put of helle!
Tr 4 1541 " And this on every god celestial
Tr 4 1542 I swere it yow, and ek on ech goddesse,
Tr 4 1543 On every nymphe and deite infernal,
Tr 4 1544 On satiry and fawny more and lesse,
Tr 4 1545 That halve goddes ben of wildernesse;
Tr 4 1546 And Attropos my thred of lif tobreste
Tr 4 1547 If I be fals! Now trowe me if yow leste!
Tr 4 1548 " And thow, Symois, that as an arwe clere
Tr 4 1549 Thorugh Troie rennest downward to the se,
Tr 4 1550 Ber witnesse of this word that seyd is here:
Tr 4 1551 That thilke day that ich untrewe be
Tr 4 1552 To Troilus, myn owene herte fre,
Tr 4 1553 That thow retourne bakward to thi welle,
Tr 4 1554 And I with body and soule synke in helle!
Tr 4 1555 " But that ye speke, awey thus for to go
Tr 4 1556 And leten alle youre frendes, God forbede
Tr 4 1557 For any womman that ye sholden so,
Tr 4 1558 And namely syn Troie hath now swich nede
Tr 4 1559 Of help. And ek of o thyng taketh hede:
Tr 4 1560 If this were wist, my lif lay in balaunce,
Tr 4 1561 And youre honour; God shilde us fro meschaunce!
Tr 4 1562 " And if so be that pees heere-after take,
Tr 4 1563 As alday happeth after anger game,
Tr 4 1564 Whi, Lord, the sorwe and wo ye wolden make,
Tr 4 1565 That ye ne dorste come ayeyn for shame!
Tr 4 1566 And er that ye juparten so youre name,
Tr 4 1567 Beth naught to hastif in this hoote fare,
Tr 4 1568 For hastif man ne wanteth nevere care.
Tr 4 1569 " What trowe ye the peple ek al aboute
Tr 4 1570 Wolde of it seye? It is ful light t' arede.
Tr 4 1571 They wolden seye, and swere it out of doute,
Tr 4 1572 That love ne drof yow naught to don this dede,
Tr 4 1573 But lust voluptuous and coward drede.
Tr 4 1574 Thus were al lost, ywys, myn herte deere,
Tr 4 1575 Youre honour, which that now shyneth so clere.
Tr 4 1576 " And also thynketh on myn honeste,
Tr 4 1577 That floureth yet, how foule I sholde it shende,
Tr 4 1578 And with what filthe it spotted sholde be,
Tr 4 1579 If in this forme I sholde with yow wende.
Tr 4 1580 Ne though I lyved unto the werldes ende,
Tr 4 1581 My name sholde I nevere ayeynward wynne;
Tr 4 1582 Thus were I lost, and that were routhe and synne.
Tr 4 1583 " And forthi sle with resoun al this hete!
Tr 4 1584 Men seyn, `The suffrant overcomith,' parde;
Tr 4 1585 Ek `Whoso wol han lief, he lief moot lete.'
Tr 4 1586 Thus maketh vertu of necessite
Tr 4 1587 By pacience, and thynk that lord is he
Tr 4 1588 Of Fortune ay that naught wole of hire recche,
Tr 4 1589 And she ne daunteth no wight but a wrecche.
Tr 4 1590 " And trusteth this: that certes, herte swete,
Tr 4 1591 Er Phebus suster, Lucina the sheene,
Tr 4 1592 The Leoun passe out of this Ariete,
Tr 4 1593 I wol ben here, withouten any wene.
Tr 4 1594 I mene, as helpe me Juno, hevenes quene,
Tr 4 1595 The tenthe day, but if that deth m' assaile,
Tr 4 1596 I wol yow sen withouten any faille. "
Tr 4 1597 " And now, so this be soth, " quod Troilus,
Tr 4 1598 " I shal wel suffre unto the tenthe day,
Tr 4 1599 Syn that I se that nede it mot be thus.
Tr 4 1600 But for the love of God, if it be may,
Tr 4 1601 So late us stelen priveliche away;
Tr 4 1602 For evere in oon, as for to lyve in reste,
Tr 4 1603 Myn herte seyth that it wol be the beste. "
Tr 4 1604 " O mercy, God, what lif is this? " quod she.
Tr 4 1605 " Allas, ye sle me thus for verray tene!
Tr 4 1606 I se wel now that ye mystrusten me,
Tr 4 1607 For by youre wordes it is wel yseene.
Tr 4 1608 Now for the love of Cinthia the sheene,
Tr 4 1609 Mistrust me nought thus causeles, for routhe,
Tr 4 1610 Syn to be trewe I have yow plight my trouthe.
Tr 4 1611 " And thynketh wel that somtyme it is wit
Tr 4 1612 To spende a tyme, a tyme for to wynne;
Tr 4 1613 Ne, parde, lorn am I naught fro yow yit,
Tr 4 1614 Though that we ben a day or two atwynne.
Tr 4 1615 Drif out the fantasies yow withinne,
Tr 4 1616 And trusteth me, and leveth ek youre sorwe,
Tr 4 1617 Or here my trouthe: I wol naught lyve tyl morwe.
Tr 4 1618 " For if ye wiste how soore it doth me smerte,
Tr 4 1619 Ye wolde cesse of this; for, God, thow wost,
Tr 4 1620 The pure spirit wepeth in myn herte
Tr 4 1621 To se yow wepen that I love most,
Tr 4 1622 And that I mot gon to the Grekis oost.
Tr 4 1623 Ye, nere it that I wiste remedie
Tr 4 1624 To come ayeyn, right here I wolde dye!
Tr 4 1625 " But certes, I am naught so nyce a wight
Tr 4 1626 That I ne kan ymaginen a wey
Tr 4 1627 To come ayeyn that day that I have hight.
Tr 4 1628 For who may holde a thing that wol awey?
Tr 4 1629 My fader naught, for al his queynte pley!
Tr 4 1630 And by my thrift, my wendyng out of Troie
Tr 4 1631 Another day shal torne us alle to joie.
Tr 4 1632 " Forthi with al myn herte I yow biseke,
Tr 4 1633 If that yow list don ought for my preyere,
Tr 4 1634 And for that love which that I love yow eke,
Tr 4 1635 That er that I departe fro yow here,
Tr 4 1636 That of so good a confort and a cheere
Tr 4 1637 I may yow sen that ye may brynge at reste
Tr 4 1638 Myn herte, which that is o poynt to breste.
Tr 4 1639 " And over al this I prey yow, " quod she tho,
Tr 4 1640 " Myn owene hertes sothfast suffisaunce,
Tr 4 1641 Syn I am thyn al hol, withouten mo,
Tr 4 1642 That whil that I am absent, no plesaunce
Tr 4 1643 Of oother do me fro youre remembraunce;
Tr 4 1644 For I am evere agast, forwhy men rede
Tr 4 1645 That love is thyng ay ful of bisy drede.
Tr 4 1646 " For in this world ther lyveth lady non,
Tr 4 1647 If that ye were untrewe -- as God defende! --
Tr 4 1648 That so bitraised were or wo-bigon
Tr 4 1649 As I, that alle trouthe in yow entende.
Tr 4 1650 And douteles, if that ich other wende,
Tr 4 1651 I ner but ded; and er ye cause fynde,
Tr 4 1652 For Goddes love, so beth me naught unkynde! "
Tr 4 1653 To this answerde Troilus and seyde,
Tr 4 1654 " Now God, to whom ther nys no cause ywrye,
Tr 4 1655 Me glade, as wys I nevere unto Criseyde,
Tr 4 1656 Syn thilke day I saugh hire first with ye,
Tr 4 1657 Was fals, ne nevere shal til that I dye.
Tr 4 1658 At shorte wordes, wel ye may me leve.
Tr 4 1659 I kan na more; it shal be founde at preve. "
Tr 4 1660 " Grant mercy, goode myn, iwys! " quod she,
Tr 4 1661 " And blisful Venus lat me nevere sterve
Tr 4 1662 Er I may stonde of plesaunce in degree
Tr 4 1663 To quyte hym wel that so wel kan deserve;
Tr 4 1664 And while that God my wit wol me conserve,
Tr 4 1665 I shal so don, so trewe I have yow founde,
Tr 4 1666 That ay honour to me-ward shal rebounde.
Tr 4 1667 " For trusteth wel that youre estat roial,
Tr 4 1668 Ne veyn delit, nor only worthinesse
Tr 4 1669 Of yow in werre or torney marcial,
Tr 4 1670 Ne pompe, array, nobleye, or ek richesse
Tr 4 1671 Ne made me to rewe on youre destresse,
Tr 4 1672 But moral vertu, grounded upon trouthe --
Tr 4 1673 That was the cause I first hadde on yow routhe!
Tr 4 1674 " Eke gentil herte and manhod that ye hadde,
Tr 4 1675 And that ye hadde, as me thoughte, in despit
Tr 4 1676 Every thyng that souned into badde,
Tr 4 1677 As rudenesse and poeplissh appetit,
Tr 4 1678 And that youre resoun bridlede youre delit,
Tr 4 1679 This made, aboven every creature,
Tr 4 1680 That I was youre, and shal while I may dure.
Tr 4 1681 " And this may lengthe of yeres naught fordo,
Tr 4 1682 Ne remuable Fortune deface.
Tr 4 1683 But Juppiter, that of his myght may do
Tr 4 1684 The sorwful to be glad, so yeve us grace
Tr 4 1685 Or nyghtes ten to meten in this place,
Tr 4 1686 So that it may youre herte and myn suffise!
Tr 4 1687 And fareth now wel, for tyme is that ye rise. "
Tr 4 1688 And after that they longe ypleyned hadde,
Tr 4 1689 And ofte ykist, and streite in armes folde,
Tr 4 1690 The day gan rise, and Troilus hym cladde,
Tr 4 1691 And rewfullich his lady gan byholde,
Tr 4 1692 As he that felte dethes cares colde,
Tr 4 1693 And to hire grace he gan hym recomaunde.
Tr 4 1694 Wher hym was wo, this holde I no demaunde.
Tr 4 1695 For mannes hed ymagynen ne kan,
Tr 4 1696 N' entendement considere, ne tonge telle
Tr 4 1697 The cruele peynes of this sorwful man,
Tr 4 1698 That passen every torment down in helle.
Tr 4 1699 For whan he saugh that she ne myghte dwelle,
Tr 4 1700 Which that his soule out of his herte rente,
Tr 4 1701 Withouten more out of the chaumbre he wente.
Tr 5 1 Aprochen gan the fatal destyne
Tr 5 2 That Joves hath in disposicioun,
Tr 5 3 And to yow, angry Parcas, sustren thre,
Tr 5 4 Committeth to don execucioun;
Tr 5 5 For which Criseyde moste out of the town,
Tr 5 6 And Troilus shal dwellen forth in pyne
Tr 5 7 Til Lachesis his thred no lenger twyne.
Tr 5 8 The gold-tressed Phebus heighe on-lofte
Tr 5 9 Thries hadde alle with his bemes cleene
Tr 5 10 The snowes molte, and Zepherus as ofte
Tr 5 11 Ibrought ayeyn the tendre leves grene,
Tr 5 12 Syn that the sone of Ecuba the queene
Tr 5 13 Bigan to love hire first for whom his sorwe
Tr 5 14 Was al, that she departe sholde a-morwe.
Tr 5 15 Ful redy was at prime Diomede
Tr 5 16 Criseyde unto the Grekis oost to lede,
Tr 5 17 For sorwe of which she felt hire herte blede,
Tr 5 18 As she that nyste what was best to rede.
Tr 5 19 And trewely, as men in bokes rede,
Tr 5 20 Men wiste nevere womman han the care,
Tr 5 21 Ne was so loth out of a town to fare.
Tr 5 22 This Troilus, withouten reed or loore,
Tr 5 23 As man that hath his joies ek forlore,
Tr 5 24 Was waytyng on his lady evere more
Tr 5 25 As she that was the sothfast crop and more
Tr 5 26 Of al his lust or joies heretofore.
Tr 5 27 But Troilus, now far-wel al thi joie,
Tr 5 28 For shaltow nevere sen hire eft in Troie!
Tr 5 29 Soth is that while he bood in this manere,
Tr 5 30 He gan his wo ful manly for to hide,
Tr 5 31 That wel unnethe it sene was in his chere;
Tr 5 32 But at the yate ther she sholde out ride,
Tr 5 33 With certeyn folk he hoved hire t' abide,
Tr 5 34 So wo-bigon, al wolde he naught hym pleyne,
Tr 5 35 That on his hors unnethe he sat for peyne.
Tr 5 36 For ire he quook, so gan his herte gnawe,
Tr 5 37 Whan Diomede on horse gan hym dresse,
Tr 5 38 And seyde to hymself this ilke sawe:
Tr 5 39 " Allas, " quod he, " thus foul a wrecchednesse,
Tr 5 40 Whi suffre ich it? Whi nyl ich it redresse?
Tr 5 41 Were it nat bet atones for to dye
Tr 5 42 Than evere more in langour thus to drye?
Tr 5 43 " Whi nyl I make atones riche and pore
Tr 5 44 To have inough to doone er that she go?
Tr 5 45 Why nyl I brynge al Troie upon a roore?
Tr 5 46 Whi nyl I slen this Diomede also?
Tr 5 47 Why nyl I rather with a man or two
Tr 5 48 Stele hire away? Whi wol I this endure?
Tr 5 49 Whi nyl I helpen to myn owen cure? "
Tr 5 50 But why he nolde don so fel a dede,
Tr 5 51 That shal I seyn, and whi hym liste it spare:
Tr 5 52 He hadde in herte alweyes a manere drede
Tr 5 53 Lest that Criseyde, in rumour of this fare,
Tr 5 54 Sholde han ben slayn; lo, this was al his care.
Tr 5 55 And ellis, certeyn, as I seyde yore,
Tr 5 56 He hadde it don, withouten wordes more.
Tr 5 57 Criseyde, whan she redy was to ride,
Tr 5 58 Ful sorwfully she sighte, and seyde " Allas! "
Tr 5 59 But forth she moot, for aught that may bitide;
Tr 5 60 Ther is non other remedie in this cas.
Tr 5 61 And forth she rit ful sorwfully a pas.
Tr 5 62 What wonder is, though that hire sore smerte,
Tr 5 63 Whan she forgoth hire owen swete herte?
Tr 5 64 This Troilus, in wise of curteysie,
Tr 5 65 With hauk on honde and with an huge route
Tr 5 66 Of knyghtes, rood and did hire companye,
Tr 5 67 Passyng al the valeye fer withoute,
Tr 5 68 And ferther wolde han riden, out of doute,
Tr 5 69 Ful fayn, and wo was hym to gon so sone;
Tr 5 70 But torne he moste, and it was ek to done.
Tr 5 71 And right with that was Antenor ycome
Tr 5 72 Out of the Grekis oost, and every wight
Tr 5 73 Was of it glad, and seyde he was welcome.
Tr 5 74 And Troilus, al nere his herte light,
Tr 5 75 He peyned hym with al his fulle myght
Tr 5 76 Hym to withholde of wepyng atte leeste,
Tr 5 77 And Antenor he kiste and made feste.
Tr 5 78 And therwithal he moste his leve take,
Tr 5 79 And caste his eye upon hire pitously,
Tr 5 80 And neer he rood, his cause for to make,
Tr 5 81 To take hire by the honde al sobrely.
Tr 5 82 And Lord, so she gan wepen tendrely!
Tr 5 83 And he ful softe and sleighly gan hire seye,
Tr 5 84 " Now holde youre day, and do me nat to deye. "
Tr 5 85 With that his courser torned he aboute
Tr 5 86 With face pale, and unto Diomede
Tr 5 87 No word he spak, ne non of al his route;
Tr 5 88 Of which the sone of Tideus took hede,
Tr 5 89 As he that koude more than the crede
Tr 5 90 In swich a craft, and by the reyne hire hente;
Tr 5 91 And Troilus to Troie homward he wente.
Tr 5 92 This Diomede, that ledde hire by the bridel,
Tr 5 93 Whan that he saugh the folk of Troie aweye,
Tr 5 94 Thoughte, " Al my labour shal nat ben on ydel,
Tr 5 95 If that I may, for somwhat shal I seye,
Tr 5 96 For at the werste it may yet shorte oure weye.
Tr 5 97 I have herd seyd ek tymes twyes twelve,
Tr 5 98 `He is a fool that wol foryete hymselve.' "
Tr 5 99 But natheles, this thoughte he wel ynough,
Tr 5 100 That " Certeynlich I am aboute nought,
Tr 5 101 If that I speke of love or make it tough;
Tr 5 102 For douteles, if she have in hire thought
Tr 5 103 Hym that I gesse, he may nat ben ybrought
Tr 5 104 So soon awey; but I shal fynde a meene
Tr 5 105 That she naught wite as yet shal what I mene. "
Tr 5 106 This Diomede, as he that koude his good,
Tr 5 107 Whan tyme was, gan fallen forth in speche
Tr 5 108 Of this and that, and axed whi she stood
Tr 5 109 In swich disese, and gan hire ek biseche
Tr 5 110 That if that he encresse myghte or eche
Tr 5 111 With any thyng hire ese, that she sholde
Tr 5 112 Comaunde it hym, and seyde he don it wolde.
Tr 5 113 For treweliche he swor hire as a knyght
Tr 5 114 That ther nas thyng with which he myghte hire plese,
Tr 5 115 That he nolde don his peyne and al his myght
Tr 5 116 To don it, for to don hire herte an ese;
Tr 5 117 And preyede hire she wolde hire sorwe apese,
Tr 5 118 And seyde, " Iwis, we Grekis kan have joie
Tr 5 119 To honouren yow as wel as folk of Troie. "
Tr 5 120 He seyde ek thus: " I woot yow thynketh straunge --
Tr 5 121 Ne wonder is, for it is to yow newe --
Tr 5 122 Th' aquayntaunce of thise Troianis to chaunge
Tr 5 123 For folk of Grece, that ye nevere knewe.
Tr 5 124 But wolde nevere God but if as trewe
Tr 5 125 A Grek ye sholde among us alle fynde
Tr 5 126 As any Troian is, and ek as kynde.
Tr 5 127 " And by the cause I swor yow right, lo, now,
Tr 5 128 To ben youre frend, and helply, to my myght,
Tr 5 129 And for that more aquayntaunce ek of yow
Tr 5 130 Have ich had than another straunger wight,
Tr 5 131 So fro this forth, I pray yow, day and nyght
Tr 5 132 Comaundeth me, how soore that me smerte,
Tr 5 133 To don al that may like unto youre herte;
Tr 5 134 " And that ye me wolde as youre brother trete,
Tr 5 135 And taketh naught my frendshipe in despit;
Tr 5 136 And though youre sorwes be for thynges grete --
Tr 5 137 Not I nat whi -- but out of more respit
Tr 5 138 Myn herte hath for t' amende it gret delit;
Tr 5 139 And if I may youre harmes nat redresse,
Tr 5 140 I am right sory for youre hevynesse,
Tr 5 141 " For though ye Troians with us Grekes wrothe
Tr 5 142 Han many a day ben, alwey yet, parde,
Tr 5 143 O god of Love in soth we serven bothe.
Tr 5 144 And for the love of God, my lady fre,
Tr 5 145 Whomso ye hate, as beth nat wroth with me,
Tr 5 146 For trewely, ther kan no wyght yow serve
Tr 5 147 That half so loth youre wratthe wold disserve.
Tr 5 148 " And nere it that we ben so neigh the tente
Tr 5 149 Of Calcas, which that sen us bothe may,
Tr 5 150 I wolde of this yow telle al myn entente --
Tr 5 151 But this enseled til anothir day.
Tr 5 152 Yeve me youre hond; I am, and shal ben ay,
Tr 5 153 God helpe me so, while that my lyf may dure,
Tr 5 154 Youre owene aboven every creature.
Tr 5 155 " Thus seyde I nevere er now to womman born,
Tr 5 156 For God myn herte as wisly glade so,
Tr 5 157 I loved never womman here-biforn
Tr 5 158 As paramours, ne nevere shal no mo.
Tr 5 159 And for the love of God, beth nat my fo,
Tr 5 160 Al kan I naught to yow, my lady deere,
Tr 5 161 Compleyne aright, for I am yet to leere.
Tr 5 162 " And wondreth nought, myn owen lady bright,
Tr 5 163 Though that I speke of love to yow thus blyve;
Tr 5 164 For I have herd er this of many a wight,
Tr 5 165 Hath loved thyng he nevere saigh his lyve.
Tr 5 166 Ek I am nat of power for to stryve
Tr 5 167 Ayeyns the god of Love, but hym obeye
Tr 5 168 I wole alwey; and mercy I yow preye.
Tr 5 169 " Ther ben so worthi knyghtes in this place,
Tr 5 170 And ye so fayr, that everich of hem alle
Tr 5 171 Wol peynen hym to stonden in youre grace.
Tr 5 172 But myghte me so faire a grace falle,
Tr 5 173 That ye me for youre servant wolde calle,
Tr 5 174 So lowely ne so trewely yow serve
Tr 5 175 Nil non of hem as I shal til I sterve. "
Tr 5 176 Criseyde unto that purpos lite answerde,
Tr 5 177 As she that was with sorwe oppressed so
Tr 5 178 That, in effect, she naught his tales herde
Tr 5 179 But here and ther, now here a word or two.
Tr 5 180 Hire thoughte hire sorwful herte brast a-two,
Tr 5 181 For whan she gan hire fader fer espie
Tr 5 182 Wel neigh down of hire hors she gan to sye.
Tr 5 183 But natheles she thonketh Diomede
Tr 5 184 Of al his travaile and his goode cheere,
Tr 5 185 And that hym list his frendshipe hire to bede;
Tr 5 186 And she accepteth it in good manere,
Tr 5 187 And wol do fayn that is hym lief and dere,
Tr 5 188 And tristen hym she wolde, and wel she myghte,
Tr 5 189 As seyde she; and from hire hors sh' alighte.
Tr 5 190 Hire fader hath hire in his armes nome,
Tr 5 191 And twenty tyme he kiste his doughter sweete,
Tr 5 192 And seyde, " O deere doughter myn, welcome! "
Tr 5 193 She seyde ek she was fayn with hym to mete,
Tr 5 194 And stood forth muwet, milde, and mansuete.
Tr 5 195 But here I leve hire with hire fader dwelle,
Tr 5 196 And forth I wol of Troilus yow telle.
Tr 5 197 To Troie is come this woful Troilus,
Tr 5 198 In sorwe aboven alle sorwes smerte,
Tr 5 199 With feloun look and face dispitous.
Tr 5 200 Tho sodeynly doun from his hors he sterte,
Tr 5 201 And thorugh his paleis, with a swollen herte,
Tr 5 202 To chaumbre he wente; of nothyng took he hede,
Tr 5 203 Ne non to hym dar speke a word for drede.
Tr 5 204 And ther his sorwes that he spared hadde
Tr 5 205 He yaf an issue large, and " Deth! " he criede;
Tr 5 206 And in his throwes frenetik and madde
Tr 5 207 He corseth Jove, Appollo, and ek Cupide;
Tr 5 208 He corseth Ceres, Bacus, and Cipride,
Tr 5 209 His burthe, hymself, his fate, and ek nature,
Tr 5 210 And, save his lady, every creature.
Tr 5 211 To bedde he goth, and walwith ther and torneth
Tr 5 212 In furie, as doth he Ixion in helle,
Tr 5 213 And in this wise he neigh til day sojorneth.
Tr 5 214 But tho bigan his herte a lite unswelle
Tr 5 215 Thorugh teris, which that gonnen up to welle,
Tr 5 216 And pitously he cryde upon Criseyde,
Tr 5 217 And to hymself right thus he spak, and seyde,
Tr 5 218 " Wher is myn owene lady, lief and deere?
Tr 5 219 Wher is hire white brest? Wher is it, where?
Tr 5 220 Wher ben hire armes and hire eyen cleere
Tr 5 221 That yesternyght this tyme with me were?
Tr 5 222 Now may I wepe allone many a teere,
Tr 5 223 And graspe aboute I may, but in this place,
Tr 5 224 Save a pilowe, I fynde naught t' enbrace.
Tr 5 225 " How shal I do? Whan shal she come ayeyn?
Tr 5 226 I not, allas, whi lete ich hire to go;
Tr 5 227 As wolde God ich hadde as tho ben sleyn!
Tr 5 228 O herte myn, Criseyde, O swete fo!
Tr 5 229 O lady myn, that I love and na mo,
Tr 5 230 To whom for evermo myn herte I dowe,
Tr 5 231 Se how I dey, ye nyl me nat rescowe!
Tr 5 232 " Who seth yow now, my righte lode-sterre?
Tr 5 233 Who sit right now or stant in youre presence?
Tr 5 234 Who kan conforten now youre hertes werre?
Tr 5 235 Now I am gon, whom yeve ye audience?
Tr 5 236 Who speketh for me right now in myn absence?
Tr 5 237 Allas, no wight; and that is al my care,
Tr 5 238 For wel woot I, as yvele as I ye fare.
Tr 5 239 " How sholde I thus ten dayes ful endure,
Tr 5 240 Whan I the firste nyght have al this tene?
Tr 5 241 How shal she don ek, sorwful creature?
Tr 5 242 For tendernesse, how shal she sustene
Tr 5 243 Swich wo for me? O pitous, pale, grene
Tr 5 244 Shal ben youre fresshe, wommanliche face
Tr 5 245 For langour, er ye torne unto this place. "
Tr 5 246 And whan he fil in any slomberynges,
Tr 5 247 Anon bygynne he sholde for to grone
Tr 5 248 And dremen of the dredefulleste thynges
Tr 5 249 That myghte ben; as mete he were allone
Tr 5 250 In place horrible makyng ay his mone,
Tr 5 251 Or meten that he was amonges alle
Tr 5 252 His enemys, and in hire hondes falle.
Tr 5 253 And therwithal his body sholde sterte,
Tr 5 254 And with the stert al sodeynliche awake,
Tr 5 255 And swich a tremour fele aboute his herte
Tr 5 256 That of the fere his body sholde quake;
Tr 5 257 And therwithal he sholde a noyse make,
Tr 5 258 And seme as though he sholde falle depe
Tr 5 259 From heighe o-lofte; and thanne he wolde wepe,
Tr 5 260 And rewen on hymself so pitously
Tr 5 261 That wonder was to here his fantasie.
Tr 5 262 Another tyme he sholde myghtyly
Tr 5 263 Conforte hymself, and sein it was folie
Tr 5 264 So causeles swich drede for to drye;
Tr 5 265 And eft bygynne his aspre sorwes newe,
Tr 5 266 That every man myght on his sorwes rewe.
Tr 5 267 Who koude telle aright or ful discryve
Tr 5 268 His wo, his pleynt, his langour, and his pyne?
Tr 5 269 Naught alle the men that han or ben on lyve.
Tr 5 270 Thow, redere, maist thiself ful wel devyne
Tr 5 271 That swich a wo my wit kan nat diffyne;
Tr 5 272 On ydel for to write it sholde I swynke,
Tr 5 273 Whan that my wit is wery it to thynke.
Tr 5 274 On hevene yet the sterres weren seene,
Tr 5 275 Although ful pale ywoxen was the moone,
Tr 5 276 And whiten gan the orisonte shene
Tr 5 277 Al estward, as it wont is for to doone;
Tr 5 278 And Phebus with his rosy carte soone
Tr 5 279 Gan after that to dresse hym up to fare
Tr 5 280 Whan Troilus hath sent after Pandare.
Tr 5 281 This Pandare, that of al the day biforn
Tr 5 282 Ne myghte han comen Troilus to se,
Tr 5 283 Although he on his hed it hadde sworn --
Tr 5 284 For with the kyng Priam al day was he,
Tr 5 285 So that it lay nought in his libertee
Tr 5 286 Nowher to gon -- but on the morwe he wente
Tr 5 287 To Troilus, whan that he for hym sente.
Tr 5 288 For in his herte he koude wel devyne
Tr 5 289 That Troilus al nyght for sorwe wook;
Tr 5 290 And that he wolde telle hym of his pyne,
Tr 5 291 This knew he wel ynough, withoute book.
Tr 5 292 For which to chaumbre streght the wey he took,
Tr 5 293 And Troilus tho sobrelich he grette,
Tr 5 294 And on the bed ful sone he gan hym sette.
Tr 5 295 " My Pandarus, " quod Troilus, " the sorwe
Tr 5 296 Which that I drye I may nat longe endure.
Tr 5 297 I trowe I shal nat lyven til to-morwe.
Tr 5 298 For which I wolde alweys, on aventure,
Tr 5 299 To the devysen of my sepulture
Tr 5 300 The forme; and of my moeble thow dispone
Tr 5 301 Right as the semeth best is for to done.
Tr 5 302 " But of the fir and flaumbe funeral
Tr 5 303 In which my body brennen shal to glede,
Tr 5 304 And of the feste and pleyes palestral
Tr 5 305 At my vigile, I prey the, tak good hede
Tr 5 306 That that be wel; and offre Mars my steede,
Tr 5 307 My swerd, myn helm; and, leve brother deere,
Tr 5 308 My sheld to Pallas yef, that shyneth cleere.
Tr 5 309 " The poudre in which myn herte ybrend shal torne,
Tr 5 310 That preye I the thow take and it conserve
Tr 5 311 In a vessell that men clepeth an urne,
Tr 5 312 Of gold, and to my lady that I serve,
Tr 5 313 For love of whom thus pitouslich I sterve,
Tr 5 314 So yeve it hire, and do me this plesaunce,
Tr 5 315 To preyen hire kepe it for a remembraunce.
Tr 5 316 " For wele I fele, by my maladie
Tr 5 317 And by my dremes now and yore ago,
Tr 5 318 Al certeynly that I mot nedes dye.
Tr 5 319 The owle ek, which that hette Escaphilo,
Tr 5 320 Hath after me shright al thise nyghtes two.
Tr 5 321 And god Mercurye, of me now, woful wrecche,
Tr 5 322 The soule gyde, and whan the liste, it fecche! "
Tr 5 323 Pandare answerde and seyde, " Troilus,
Tr 5 324 My deere frend, as I have told the yore,
Tr 5 325 That it is folye for to sorwen thus,
Tr 5 326 And causeles, for which I kan namore.
Tr 5 327 But whoso wil nought trowen reed ne loore,
Tr 5 328 I kan nat sen in hym no remedie,
Tr 5 329 But lat hym worthen with his fantasie.
Tr 5 330 " But, Troilus, I prey the, tel me now
Tr 5 331 If that thow trowe er this that any wight
Tr 5 332 Hath loved paramours as wel as thow?
Tr 5 333 Ye, God woot, and fro many a worthi knyght
Tr 5 334 Hath his lady gon a fourtenyght,
Tr 5 335 And he nat yet made halvendel the fare.
Tr 5 336 What nede is the to maken al this care?
Tr 5 337 " Syn day by day thow maist thiselven se
Tr 5 338 That from his love, or ellis from his wif,
Tr 5 339 A man mot twynnen of necessite --
Tr 5 340 Ye, though he love hire as his owene lif --
Tr 5 341 Yet nyl he with hymself thus maken strif.
Tr 5 342 For wel thou woost, my leve brother deere,
Tr 5 343 That alwey frendes may nat ben yfeere.
Tr 5 344 " How don this folk that seen hire loves wedded
Tr 5 345 By frendes myght, as it bitit ful ofte,
Tr 5 346 And sen hem in hire spouses bed ybedded?
Tr 5 347 God woot, they take it wisly, faire, and softe,
Tr 5 348 Forwhi good hope halt up hire herte o-lofte.
Tr 5 349 And for they kan a tyme of sorwe endure,
Tr 5 350 As tyme hem hurt, a tyme doth hem cure.
Tr 5 351 " So shuldestow endure, and laten slide
Tr 5 352 The tyme, and fonde to ben glad and light.
Tr 5 353 Ten dayes nys so longe nought t' abide.
Tr 5 354 And syn she the to comen hath bihyght,
Tr 5 355 She nyl hire heste breken for no wight.
Tr 5 356 For dred the nat that she nyl fynden weye
Tr 5 357 To come ayein; my lif that dorste I leye.
Tr 5 358 " Thi swevnes ek and al swich fantasie
Tr 5 359 Drif out and lat hem faren to meschaunce,
Tr 5 360 For they procede of thi malencolie
Tr 5 361 That doth the fele in slep al this penaunce.
Tr 5 362 A straw for alle swevenes signifiaunce!
Tr 5 363 God helpe me so, I counte hem nought a bene!
Tr 5 364 Ther woot no man aright what dremes mene.
Tr 5 365 " For prestes of the temple tellen this,
Tr 5 366 That dremes ben the revelaciouns
Tr 5 367 Of goddes, and as wel they telle, ywis,
Tr 5 368 That they ben infernals illusiouns;
Tr 5 369 And leches seyn that of complexiouns
Tr 5 370 Proceden they, or fast, or glotonye.
Tr 5 371 Who woot in soth thus what thei signifie?
Tr 5 372 " Ek oother seyn that thorugh impressiouns,
Tr 5 373 As if a wight hath faste a thyng in mynde,
Tr 5 374 That therof cometh swiche avysiouns;
Tr 5 375 And other seyn, as they in bokes fynde,
Tr 5 376 That after tymes of the yer, by kynde,
Tr 5 377 Men dreme, and that th' effect goth by the moone.
Tr 5 378 But leve no drem, for it is nought to doone.
Tr 5 379 " Wel worth. of dremes ay thise olde wives,
Tr 5 380 And treweliche ek augurye of thise fowles,
Tr 5 381 For fere of which men wenen lese here lyves,
Tr 5 382 As revenes qualm, or shrichyng of thise owles.
Tr 5 383 To trowen on it bothe fals and foul is.
Tr 5 384 Allas, allas, so noble a creature
Tr 5 385 As is a man shal dreden swich ordure!
Tr 5 386 " For which with al myn herte I the biseche,
Tr 5 387 Unto thiself that al this thow foryyve;
Tr 5 388 And ris now up withowten more speche,
Tr 5 389 And lat us caste how forth may best be dryve
Tr 5 390 This tyme, and ek how fresshly we may lyve
Tr 5 391 Whan that she comth, the which shal be right soone.
Tr 5 392 God helpe me so, the beste is thus to doone.
Tr 5 393 " Ris, lat us speke of lusty lif in Troie
Tr 5 394 That we han led, and forth the tyme dryve;
Tr 5 395 And ek of tyme comyng us rejoie,
Tr 5 396 That bryngen shal oure blisse now so blyve;
Tr 5 397 And langour of thise twyes dayes fyve
Tr 5 398 We shal therwith so foryete or oppresse
Tr 5 399 That wel unneth it don shal us duresse.
Tr 5 400 " This town is ful of lordes al aboute,
Tr 5 401 And trewes lasten al this mene while.
Tr 5 402 Go we pleye us in som lusty route
Tr 5 403 To Sarpedoun, nat hennes but a myle;
Tr 5 404 And thus thow shalt the tyme wel bygile,
Tr 5 405 And dryve it forth unto that blisful morwe
Tr 5 406 That thow hire se, that cause is of thi sorwe.
Tr 5 407 " Now ris, my deere brother Troilus,
Tr 5 408 For certes it non honour is to the
Tr 5 409 To wepe and in thi bedde to jouken thus;
Tr 5 410 For trewelich, of o thyng trust to me:
Tr 5 411 If thow thus ligge a day, or two, or thre,
Tr 5 412 The folk wol seyn that thow for cowardise
Tr 5 413 The feynest sik, and that thow darst nat rise! "
Tr 5 414 This Troilus answerde, " O brother deere,
Tr 5 415 This knowen folk that han ysuffred peyne,
Tr 5 416 That though he wepe and make sorwful cheere
Tr 5 417 That feleth harm and smert in every veyne,
Tr 5 418 No wonder is. and though ich evere pleyne,
Tr 5 419 Or alwey wepe, I am no thyng to blame,
Tr 5 420 Syn I have lost the cause of al my game.
Tr 5 421 " But syn of fyne force I mot arise,
Tr 5 422 I shal arise as soone as evere I may;
Tr 5 423 And God, to whom myn herte I sacrifice,
Tr 5 424 So sende us hastely the tenthe day!
Tr 5 425 For was ther nevere fowel so fayn of May
Tr 5 426 As I shal ben whan that she comth in Troie
Tr 5 427 That cause is of my torment and my joie.
Tr 5 428 " But whider is thi reed, " quod Troilus,
Tr 5 429 " That we may pleye us best in al this town? "
Tr 5 430 " By God, my conseil is, " quod Pandarus,
Tr 5 431 " To ride and pleye us with kyng Sarpedoun. "
Tr 5 432 So longe of this they speken up and down
Tr 5 433 Til Troilus gan at the laste assente
Tr 5 434 To rise, and forth to Sarpedoun they wente.
Tr 5 435 This Sarpedoun, as he that honourable
Tr 5 436 Was evere his lyve, and ful of heigh largesse,
Tr 5 437 With al that myghte yserved ben on table
Tr 5 438 That deynte was, al coste it gret richesse,
Tr 5 439 He fedde hem day by day, that swich noblesse,
Tr 5 440 As seyden bothe the mooste and ek the leeste,
Tr 5 441 Was nevere er that day wist at any feste.
Tr 5 442 Nor in this world ther is non instrument
Tr 5 443 Delicious, thorugh wynd or touche of corde,
Tr 5 444 As fer as any wight hath evere ywent,
Tr 5 445 That tonge telle or herte may recorde,
Tr 5 446 That at that feste it nas wel herd acorde;
Tr 5 447 Ne of ladys ek so fair a compaignie
Tr 5 448 On daunce, er tho, was nevere iseye with ie.
Tr 5 449 But what availeth this to Troilus,
Tr 5 450 That for his sorwe nothyng of it roughte?
Tr 5 451 For evere in oon his herte pietous
Tr 5 452 Ful bisyly Criseyde, his lady, soughte.
Tr 5 453 On hire was evere al that his herte thoughte,
Tr 5 454 Now this, now that, so faste ymagenynge
Tr 5 455 That glade, iwis, kan hym no festeyinge.
Tr 5 456 Thise ladies ek that at this feste ben,
Tr 5 457 Syn that he saugh his lady was aweye,
Tr 5 458 It was his sorwe upon hem for to sen,
Tr 5 459 Or for to here on instrumentes pleye.
Tr 5 460 For she that of his herte berth the keye
Tr 5 461 Was absent, lo, this was his fantasie --
Tr 5 462 That no wight sholde maken melodie.
Tr 5 463 Nor ther nas houre in al the day or nyght,
Tr 5 464 Whan he was there as no wight myghte hym heere,
Tr 5 465 That he ne seyde, " O lufsom lady bryght,
Tr 5 466 How have ye faren syn that ye were here?
Tr 5 467 Welcome, ywis, myn owne lady deere! "
Tr 5 468 But weylaway, al this nat but a maze.
Tr 5 469 Fortune his howve entended bet to glaze!
Tr 5 470 The lettres ek that she of olde tyme
Tr 5 471 Hadde hym ysent, he wolde allone rede
Tr 5 472 An hondred sithe atwixen noon and prime,
Tr 5 473 Refiguryng hire shap, hire wommanhede,
Tr 5 474 Withinne his herte, and every word or dede
Tr 5 475 That passed was; and thus he drof t' an ende
Tr 5 476 The ferthe day, and seyde he wolde wende.
Tr 5 477 And seyde, " Leve brother Pandarus,
Tr 5 478 Intendestow that we shal here bleve
Tr 5 479 Til Sarpedoun wol forth congeyen us?
Tr 5 480 Yet were it fairer that we toke oure leve.
Tr 5 481 For Goddes love, lat us now soone at eve
Tr 5 482 Oure leve take, and homward lat us torne,
Tr 5 483 For treweliche, I nyl nat thus sojourne. "
Tr 5 484 Pandare answerde, " Be we comen hider
Tr 5 485 To fecchen fir and rennen hom ayein?
Tr 5 486 God help me so, I kan nat tellen whider
Tr 5 487 We myghte gon, if I shal sothly seyn,
Tr 5 488 Ther any wight is of us more feyn
Tr 5 489 Than Sarpedoun; and if we hennes hye
Tr 5 490 Thus sodeynly, I holde it vilanye.
Tr 5 491 " Syn that we seyden that we wolde bleve
Tr 5 492 With hym a wowke, and now, thus sodeynly,
Tr 5 493 The ferthe day to take of hym owre leve --
Tr 5 494 He wolde wondren on it, trewely!
Tr 5 495 Lat us holden forth oure purpos fermely;
Tr 5 496 And syn that ye bihighten hym to bide,
Tr 5 497 Holde forward now, and after lat us ride. "
Tr 5 498 Thus Pandarus, with alle peyne and wo,
Tr 5 499 Made hym to dwelle; and at the wikes ende
Tr 5 500 Of Sarpedoun they toke hire leve tho,
Tr 5 501 And on hire wey they spedden hem to wende.
Tr 5 502 Quod Troilus, " Now Lord me grace sende,
Tr 5 503 That I may fynden at myn hom-comynge
Tr 5 504 Criseyde comen! " And therwith gan he synge.
Tr 5 505 " Ye, haselwode! " thoughte this Pandare,
Tr 5 506 And to hymself ful softeliche he seyde,
Tr 5 507 " God woot, refreyden may this hote fare,
Tr 5 508 Er Calkas sende Troilus Criseyde! "
Tr 5 509 But natheles, he japed thus, and pleyde,
Tr 5 510 And swor, ywys, his herte hym wel bihighte
Tr 5 511 She wolde come as soone as evere she myghte.
Tr 5 512 Whan they unto the paleys were ycomen
Tr 5 513 Of Troilus, they doun of hors alighte,
Tr 5 514 And to the chambre hire wey than han they nomen;
Tr 5 515 And into tyme that it gan to nyghte
Tr 5 516 They spaken of Criseyde the brighte;
Tr 5 517 And after this, whan that hem bothe leste,
Tr 5 518 They spedde hem fro the soper unto reste.
Tr 5 519 On morwe, as soone as day bygan to clere,
Tr 5 520 This Troilus gan of his slep t' abrayde,
Tr 5 521 And to Pandare, his owen brother deere,
Tr 5 522 " For love of God, " ful pitously he sayde,
Tr 5 523 " As go we sen the palais of Criseyde;
Tr 5 524 For syn we yet may have namore feste,
Tr 5 525 So lat us sen hire paleys atte leeste. "
Tr 5 526 And therwithal, his meyne for to blende,
Tr 5 527 A cause he fond in towne for to go,
Tr 5 528 And to Criseydes hous they gonnen wende.
Tr 5 529 But Lord, this sely Troilus was wo!
Tr 5 530 Hym thoughte his sorwful herte braste a-two.
Tr 5 531 For whan he saugh hire dores spered alle,
Tr 5 532 Wel neigh for sorwe adoun he gan to falle.
Tr 5 533 Therwith, whan he was war and gan biholde
Tr 5 534 How shet was every wyndow of the place,
Tr 5 535 As frost, hym thoughte, his herte gan to colde;
Tr 5 536 For which with chaunged dedlich pale face,
Tr 5 537 Withouten word, he forthby gan to pace,
Tr 5 538 And as God wolde, he gan so faste ride
Tr 5 539 That no wight of his contenance espide.
Tr 5 540 Than seide he thus: " O paleys desolat,
Tr 5 541 O hous of houses whilom best ihight,
Tr 5 542 O paleys empty and disconsolat,
Tr 5 543 O thow lanterne of which queynt is the light,
Tr 5 544 O paleys, whilom day, that now art nyght,
Tr 5 545 Wel oughtestow to falle, and I to dye,
Tr 5 546 Syn she is went that wont was us to gye!
Tr 5 547 " O paleis, whilom crowne of houses alle,
Tr 5 548 Enlumyned with sonne of alle blisse!
Tr 5 549 O ryng, fro which the ruby is out falle,
Tr 5 550 O cause of wo, that cause hast ben of lisse!
Tr 5 551 Yet, syn I may no bet, fayn wolde I kisse
Tr 5 552 Thy colde dores, dorste I for this route;
Tr 5 553 And farwel shryne, of which the seynt is oute! "
Tr 5 554 Therwith he caste on Pandarus his ye,
Tr 5 555 With chaunged face, and pitous to biholde;
Tr 5 556 And whan he myghte his tyme aright aspie,
Tr 5 557 Ay as he rood to Pandarus he tolde
Tr 5 558 His newe sorwe and ek his joies olde,
Tr 5 559 So pitously and with so ded an hewe
Tr 5 560 That every wight myghte on his sorwe rewe.
Tr 5 561 Fro thennesforth he rideth up and down,
Tr 5 562 And every thyng com hym to remembraunce
Tr 5 563 As he rood forby places of the town
Tr 5 564 In which he whilom hadde al his plesaunce.
Tr 5 565 " Lo, yonder saugh ich last my lady daunce;
Tr 5 566 And in that temple, with hire eyen cleere,
Tr 5 567 Me kaughte first my righte lady dere.
Tr 5 568 " And yonder have I herd ful lustyly
Tr 5 569 My dere herte laugh; and yonder pleye
Tr 5 570 Saugh ich hire ones ek ful blisfully;
Tr 5 571 And yonder ones to me gan she seye,
Tr 5 572 `Now goode swete, love me wel, I preye';
Tr 5 573 And yond so goodly gan she me biholde
Tr 5 574 That to the deth myn herte is to hire holde.
Tr 5 575 " And at that corner, in the yonder hous,
Tr 5 576 Herde I myn alderlevest lady deere
Tr 5 577 So wommanly, with vois melodious,
Tr 5 578 Syngen so wel, so goodly, and so cleere
Tr 5 579 That in my soule yet me thynketh ich here
Tr 5 580 The blisful sown; and in that yonder place
Tr 5 581 My lady first me took unto hire grace. "
Tr 5 582 Thanne thoughte he thus: " O blisful lord Cupide,
Tr 5 583 Whan I the proces have in my memorie
Tr 5 584 How thow me hast wereyed on every syde,
Tr 5 585 Men myght a book make of it, lik a storie.
Tr 5 586 What nede is the to seke on me victorie,
Tr 5 587 Syn I am thyn and holly at thi wille?
Tr 5 588 What joie hastow thyn owen folk to spille?
Tr 5 589 " Wel hastow, lord, ywroke on me thyn ire,
Tr 5 590 Thow myghty god, and dredefull for to greve!
Tr 5 591 Now mercy, lord! Thow woost wel I desire
Tr 5 592 Thi grace moost of alle lustes leeve,
Tr 5 593 And lyve and dye I wol in thy byleve;
Tr 5 594 For which I n' axe in guerdoun but o bone --
Tr 5 595 That thow Criseyde ayein me sende sone.
Tr 5 596 " Destreyne hire herte as faste to retorne
Tr 5 597 As thow doost myn to longen hire to see;
Tr 5 598 Than woot I wel that she nyl naught sojorne.
Tr 5 599 Now blisful lord, so cruel thow ne be
Tr 5 600 Unto the blood of Troie, I preye the,
Tr 5 601 As Juno was unto the blood Thebane,
Tr 5 602 For which the folk of Thebes caughte hire bane. "
Tr 5 603 And after this he to the yates wente
Tr 5 604 Ther as Criseyde out rood a ful good paas,
Tr 5 605 And up and down ther made he many a wente,
Tr 5 606 And to hymself ful ofte he seyde, " Allas,
Tr 5 607 Fro hennes rood my blisse and my solas!
Tr 5 608 As wolde blisful God now, for his joie,
Tr 5 609 I myghte hire sen ayein come into Troie!
Tr 5 610 " And to the yonder hille I gan hire gyde,
Tr 5 611 Allas, and ther I took of hire my leve!
Tr 5 612 And yond I saugh hire to hire fader ride,
Tr 5 613 For sorwe of which myn herte shal tocleve;
Tr 5 614 And hider hom I com whan it was eve,
Tr 5 615 And here I dwelle out cast from alle joie,
Tr 5 616 And shal, til I may sen hire eft in Troie. "
Tr 5 617 And of hymself ymagened he ofte
Tr 5 618 To ben defet, and pale, and waxen lesse
Tr 5 619 Than he was wont, and that men seyden softe,
Tr 5 620 " What may it be? Who kan the sothe gesse
Tr 5 621 Whi Troilus hath al this hevynesse? "
Tr 5 622 And al this nas but his malencolie,
Tr 5 623 That he hadde of hymself swich fantasie.
Tr 5 624 Another tyme ymaginen he wolde
Tr 5 625 That every wight that wente by the weye
Tr 5 626 Hadde of hym routhe, and that they seyen sholde,
Tr 5 627 " I am right sory Troilus wol deye. "
Tr 5 628 And thus he drof a day yet forth or tweye,
Tr 5 629 As ye have herd; swich lif right gan he lede
Tr 5 630 As he that stood bitwixen hope and drede.
Tr 5 631 For which hym likede in his songes shewe
Tr 5 632 Th' enchesoun of his wo, as he best myghte;
Tr 5 633 And made a song of wordes but a fewe,
Tr 5 634 Somwhat his woful herte for to lighte;
Tr 5 635 And whan he was from every mannes syghte,
Tr 5 636 With softe vois he of his lady deere,
Tr 5 637 That absent was, gan synge as ye may heere:
Tr 5 638 " O sterre, of which I lost have al the light,
Tr 5 639 With herte soor wel oughte I to biwaille
Tr 5 640 That evere derk in torment, nyght by nyght,
Tr 5 641 Toward my deth with wynd in steere I saille;
Tr 5 642 For which the tenthe nyght, if that I faille
Tr 5 643 The gydyng of thi bemes bright an houre,
Tr 5 644 My ship and me Caribdis wol devoure. "
Tr 5 645 This song whan he thus songen hadde, soone
Tr 5 646 He fil ayeyn into his sikes olde;
Tr 5 647 And every nyght, as was his wone to doone,
Tr 5 648 He stood the brighte moone to byholde,
Tr 5 649 And al his sorwe he to the moone tolde,
Tr 5 650 And seyde, " Ywis, whan thow art horned newe,
Tr 5 651 I shal be glad, if al the world be trewe!
Tr 5 652 " I saugh thyn hornes olde ek by the morwe
Tr 5 653 Whan hennes rood my righte lady dere
Tr 5 654 That cause is of my torment and my sorwe;
Tr 5 655 For which, O brighte Latona the clere,
Tr 5 656 For love of God, ren faste aboute thy spere!
Tr 5 657 For whan thyne hornes newe gynnen sprynge,
Tr 5 658 Than shal she come that may my blisse brynge. "
Tr 5 659 The dayes moore and lenger every nyght
Tr 5 660 Than they ben wont to be, hym thoughte tho,
Tr 5 661 And that the sonne went his cours unright
Tr 5 662 By lenger weye than it was wont to do;
Tr 5 663 And seyde, " Ywis, me dredeth evere mo
Tr 5 664 The sonnes sone, Pheton, be on lyve,
Tr 5 665 And that his fader carte amys he dryve. "
Tr 5 666 Upon the walles faste ek wolde he walke,
Tr 5 667 And on the Grekis oost he wolde se;
Tr 5 668 And to hymself right thus he wolde talke:
Tr 5 669 " Lo, yonder is myn owene lady free,
Tr 5 670 Or ellis yonder, ther tho tentes be;
Tr 5 671 And thennes comth this eyr, that is so soote
Tr 5 672 That in my soule I fele it doth me boote.
Tr 5 673 " And hardily, this wynd that more and moore
Tr 5 674 Thus stoundemele encresseth in my face
Tr 5 675 Is of my ladys depe sikes soore.
Tr 5 676 I preve it thus: for in noon other place
Tr 5 677 Of al this town, save onliche in this space,
Tr 5 678 Fele I no wynd that sowneth so lik peyne;
Tr 5 679 It seyth, `Allas! Whi twynned be we tweyne?' "
Tr 5 680 This longe tyme he dryveth forth right thus
Tr 5 681 Til fully passed was the nynthe nyght;
Tr 5 682 And ay bisyde hym was this Pandarus,
Tr 5 683 That bisily did al his fulle myght
Tr 5 684 Hym to conforte and make his herte light,
Tr 5 685 Yevyng hym hope alwey the tenthe morwe
Tr 5 686 That she shal come and stynten al his sorwe.
Tr 5 687 Upon that other syde ek was Criseyde,
Tr 5 688 With wommen fewe, among the Grekis stronge,
Tr 5 689 For which ful ofte a day " Allas, " she seyde,
Tr 5 690 " That I was born! Wel may myn herte longe
Tr 5 691 After my deth, for now lyve I to longe.
Tr 5 692 Allas, and I ne may it nat amende,
Tr 5 693 For now is wors than evere yet I wende!
Tr 5 694 " My fader nyl for nothyng do me grace
Tr 5 695 To gon ayeyn, for naught I kan hym queme;
Tr 5 696 And if so be that I my terme pace,
Tr 5 697 My Troilus shal in his herte deme
Tr 5 698 That I am fals, and so it may wel seme:
Tr 5 699 Thus shal ich have unthonk on every side --
Tr 5 700 That I was born so weilaway the tide!
Tr 5 701 " And if that I me putte in jupartie
Tr 5 702 To stele awey by nyght, and it bifalle
Tr 5 703 That I be kaught, I shal be holde a spie;
Tr 5 704 Or elles -- lo, this drede I moost of alle --
Tr 5 705 If in the hondes of som wrecche I falle,
Tr 5 706 I nam but lost, al be myn herte trewe.
Tr 5 707 Now, myghty God, thow on my sorwe rewe! "
Tr 5 708 Ful pale ywoxen was hire brighte face,
Tr 5 709 Hire lymes lene, as she that al the day
Tr 5 710 Stood, whan she dorste, and loked on the place
Tr 5 711 Ther she was born, and ther she dwelt hadde ay;
Tr 5 712 And al the nyght wepyng, allas, she lay.
Tr 5 713 And thus despeired, out of alle cure,
Tr 5 714 She ladde hire lif, this woful creature.
Tr 5 715 Ful ofte a day she sighte ek for destresse,
Tr 5 716 And in hireself she wente ay purtraynge
Tr 5 717 Of Troilus the grete worthynesse,
Tr 5 718 And al his goodly wordes recordynge
Tr 5 719 Syn first that day hire love bigan to springe.
Tr 5 720 And thus she sette hire woful herte afire
Tr 5 721 Thorugh remembraunce of that she gan desire.
Tr 5 722 In al this world ther nys so cruel herte
Tr 5 723 That hire hadde herd compleynen in hire sorwe
Tr 5 724 That nolde han wepen for hire peynes smerte,
Tr 5 725 So tendrely she weep, bothe eve and morwe.
Tr 5 726 Hire nedede no teris for to borwe!
Tr 5 727 And this was yet the werste of al hire peyne:
Tr 5 728 Ther was no wight to whom she dorste hire pleyne.
Tr 5 729 Ful rewfully she loked upon Troie,
Tr 5 730 Biheld the toures heigh and ek the halles;
Tr 5 731 " Allas, " quod she, " the plesance and the joie,
Tr 5 732 The which that now al torned into galle is,
Tr 5 733 Have ich had ofte withinne yonder walles!
Tr 5 734 O Troilus, what dostow now? " she seyde.
Tr 5 735 " Lord, wheyther thow yet thenke upon Criseyde?
Tr 5 736 " Allas, I ne hadde trowed on youre loore
Tr 5 737 And went with yow, as ye me redde er this!
Tr 5 738 Than hadde I now nat siked half so soore.
Tr 5 739 Who myghte han seyd that I hadde don amys
Tr 5 740 To stele awey with swich oon as he ys.
Tr 5 741 But al to late comth the letuarie
Tr 5 742 Whan men the cors unto the grave carie.
Tr 5 743 " To late is now to speke of that matere.
Tr 5 744 Prudence, allas, oon of thyne eyen thre
Tr 5 745 Me lakked alwey, er that I come here!
Tr 5 746 On tyme ypassed wel remembred me,
Tr 5 747 And present tyme ek koud ich wel ise,
Tr 5 748 But future tyme, er I was in the snare,
Tr 5 749 Koude I nat sen; that causeth now my care.
Tr 5 750 " But natheles, bityde what bityde,
Tr 5 751 I shal to-morwe at nyght, by est or west,
Tr 5 752 Out of this oost stele in som manere syde,
Tr 5 753 And gon with Troilus where as hym lest.
Tr 5 754 This purpos wol ich holde, and this is best.
Tr 5 755 No fors of wikked tonges janglerie,
Tr 5 756 For evere on love han wrecches had envye.
Tr 5 757 " For whoso wol of every word take hede,
Tr 5 758 Or reulen hym by every wightes wit,
Tr 5 759 Ne shal he nevere thryven, out of drede;
Tr 5 760 For that that som men blamen evere yit,
Tr 5 761 Lo, other manere folk comenden it.
Tr 5 762 And as for me, for al swich variaunce,
Tr 5 763 Felicite clepe I my suffisaunce.
Tr 5 764 " For which, withouten any wordes mo,
Tr 5 765 To Troie I wole, as for conclusioun. "
Tr 5 766 But God it wot, er fully monthes two,
Tr 5 767 She was ful fer fro that entencioun!
Tr 5 768 For bothe Troilus and Troie town
Tr 5 769 Shal knotteles thorughout hire herte slide;
Tr 5 770 For she wol take a purpos for t' abide.
Tr 5 771 This Diomede, of whom yow telle I gan,
Tr 5 772 Goth now withinne hymself ay arguynge,
Tr 5 773 With al the sleghte and al that evere he kan,
Tr 5 774 How he may best, with shortest taryinge,
Tr 5 775 Into his net Criseydes herte brynge.
Tr 5 776 To this entent he koude nevere fyne;
Tr 5 777 To fisshen hire he leyde out hook and lyne.
Tr 5 778 But natheles, wel in his herte he thoughte
Tr 5 779 That she nas nat withoute a love in Troie,
Tr 5 780 For nevere sythen he hire thennes broughte
Tr 5 781 Ne koude he sen hire laughe or maken joie.
Tr 5 782 He nyst how best hire herte for t' acoye;
Tr 5 783 " But for t' asay, " he seyde, " it naught n' agreveth,
Tr 5 784 For he that naught n' asaieth naught n' acheveth. "
Tr 5 785 Yet seyde he to hymself upon a nyght,
Tr 5 786 " Now am I nat a fool, that woot wel how
Tr 5 787 Hire wo for love is of another wight,
Tr 5 788 And hereupon to gon assaye hire now?
Tr 5 789 I may wel wite it nyl nat ben my prow,
Tr 5 790 For wise folk in bookes it expresse,
Tr 5 791 `Men shal nat wowe a wight in hevynesse.'
Tr 5 792 " But whoso myghte wynnen swich a flour
Tr 5 793 From hym for whom she morneth nyght and day,
Tr 5 794 He myghte seyn he were a conquerour. "
Tr 5 795 And right anon, as he that bold was ay,
Tr 5 796 Thoughte in his herte, " Happe how happe may,
Tr 5 797 Al sholde I dye, I wol hire herte seche!
Tr 5 798 I shal namore lesen but my speche. "
Tr 5 799 This Diomede, as bokes us declare,
Tr 5 800 Was in his nedes prest and corageous,
Tr 5 801 With sterne vois and myghty lymes square,
Tr 5 802 Hardy, testif, strong, and chivalrous
Tr 5 803 Of dedes, lik his fader Tideus.
Tr 5 804 And som men seyn he was of tonge large;
Tr 5 805 And heir he was of Calydoigne and Arge.
Tr 5 806 Criseyde mene was of hire stature;
Tr 5 807 Therto of shap, of face, and ek of cheere,
Tr 5 808 Ther myghte ben no fairer creature.
Tr 5 809 And ofte tymes this was hire manere:
Tr 5 810 To gon ytressed with hire heres clere
Tr 5 811 Doun by hire coler at hire bak byhynde,
Tr 5 812 Which with a thred of gold she wolde bynde;
Tr 5 813 And, save hire browes joyneden yfeere,
Tr 5 814 Ther nas no lak, in aught I kan espien.
Tr 5 815 But for to speken of hire eyen cleere,
Tr 5 816 Lo, trewely, they writen that hire syen
Tr 5 817 That Paradis stood formed in hire yen.
Tr 5 818 And with hire riche beaute evere more
Tr 5 819 Strof love in hire ay, which of hem was more.
Tr 5 820 She sobre was, ek symple, and wys withal,
Tr 5 821 The best ynorisshed ek that myghte be,
Tr 5 822 And goodly of hire speche in general,
Tr 5 823 Charitable, estatlich, lusty, fre;
Tr 5 824 Ne nevere mo ne lakked hire pite;
Tr 5 825 Tendre-herted, slydynge of corage;
Tr 5 826 But trewely, I kan nat telle hire age.
Tr 5 827 And Troilus wel woxen was in highte,
Tr 5 828 And complet formed by proporcioun
Tr 5 829 So wel that kynde it nought amenden myghte;
Tr 5 830 Yong, fressh, strong, and hardy as lyoun;
Tr 5 831 Trewe as stiel in ech condicioun;
Tr 5 832 Oon of the beste entecched creature
Tr 5 833 That is or shal whil that the world may dure.
Tr 5 834 And certeynly in storye it is yfounde
Tr 5 835 That Troilus was nevere unto no wight,
Tr 5 836 As in his tyme, in no degree secounde
Tr 5 837 In durryng don that longeth to a knyght.
Tr 5 838 Al myghte a geant passen hym of myght,
Tr 5 839 His herte ay with the first and with the beste
Tr 5 840 Stood paregal, to durre don that hym leste.
Tr 5 841 But for to tellen forth of Diomede:
Tr 5 842 It fel that after, on the tenthe day
Tr 5 843 Syn that Criseyde out of the citee yede,
Tr 5 844 This Diomede, as fressh as braunche in May,
Tr 5 845 Com to the tente ther as Calkas lay,
Tr 5 846 And feyned hym with Calkas han to doone;
Tr 5 847 But what he mente, I shal yow tellen soone.
Tr 5 848 Criseyde, at shorte wordes for to telle,
Tr 5 849 Welcomed hym and down hym by hire sette --
Tr 5 850 And he was ethe ynough to maken dwelle!
Tr 5 851 And after this, withouten longe lette,
Tr 5 852 The spices and the wyn men forth hem fette;
Tr 5 853 And forth they speke of this and that yfeere,
Tr 5 854 As frendes don, of which som shal ye heere.
Tr 5 855 He gan first fallen of the werre in speche
Tr 5 856 Bitwixe hem and the folk of Troie town;
Tr 5 857 And of th' assege he gan hire ek biseche
Tr 5 858 To telle hym what was hire opynyoun;
Tr 5 859 Fro that demaunde he so descendeth down
Tr 5 860 To axen hire if that hire straunge thoughte
Tr 5 861 The Grekis gise and werkes that they wroughte;
Tr 5 862 And whi hire fader tarieth so longe
Tr 5 863 To wedden hire unto som worthy wight.
Tr 5 864 Criseyde, that was in hire peynes stronge
Tr 5 865 For love of Troilus, hire owen knyght,
Tr 5 866 As ferforth as she konnyng hadde or myght
Tr 5 867 Answerde hym tho; but as of his entente,
Tr 5 868 It semed nat she wiste what he mente.
Tr 5 869 But natheles, this ilke Diomede
Tr 5 870 Gan in hymself assure, and thus he seyde:
Tr 5 871 " If ich aright have taken of yow hede,
Tr 5 872 Me thynketh thus, O lady myn, Criseyde,
Tr 5 873 That syn I first hond on youre bridel leyde,
Tr 5 874 Whan ye out come of Troie by the morwe,
Tr 5 875 Ne koude I nevere sen yow but in sorwe.
Tr 5 876 " Kan I nat seyn what may the cause be,
Tr 5 877 But if for love of som Troian it were,
Tr 5 878 The which right sore wolde athynken me
Tr 5 879 That ye for any wight that dwelleth there
Tr 5 880 Sholden spille a quarter of a tere
Tr 5 881 Or pitously youreselven so bigile --
Tr 5 882 For dredeles, it is nought worth the while.
Tr 5 883 " The folk of Troie, as who seyth, alle and some
Tr 5 884 In prisoun ben, as ye youreselven se;
Tr 5 885 Nor thennes shal nat oon on-lyve come
Tr 5 886 For al the gold atwixen sonne and se.
Tr 5 887 Trusteth wel, and understondeth me,
Tr 5 888 Ther shal nat oon to mercy gon on-lyve,
Tr 5 889 Al were he lord of worldes twies fyve!
Tr 5 890 " Swich wreche on hem for fecchynge of Eleyne
Tr 5 891 Ther shal ben take, er that we hennes wende,
Tr 5 892 That Manes, which that goddes ben of peyne,
Tr 5 893 Shal ben agast that Grekes wol hem shende,
Tr 5 894 And men shul drede, unto the worldes ende,
Tr 5 895 From hennesforth to ravysshen any queene,
Tr 5 896 So cruel shal oure wreche on hem be seene.
Tr 5 897 " And but if Calkas lede us with ambages --
Tr 5 898 That is to seyn, with double wordes slye,
Tr 5 899 Swiche as men clepen a word with two visages --
Tr 5 900 Ye shal wel knowen that I naught ne lie,
Tr 5 901 And al this thyng right sen it with youre ye,
Tr 5 902 And that anon, ye nyl nat trowe how sone;
Tr 5 903 Now taketh hede, for it is for to doone.
Tr 5 904 " What! Wene ye youre wise fader wolde
Tr 5 905 Han yeven Antenor for yow anon,
Tr 5 906 If he ne wiste that the cite sholde
Tr 5 907 Destroied ben? Whi, nay, so mote I gon!
Tr 5 908 He knew ful wel ther shal nat scapen oon
Tr 5 909 That Troian is. and for the grete feere
Tr 5 910 He dorste nat ye dwelte lenger there.
Tr 5 911 " What wol ye more, lufsom lady deere?
Tr 5 912 Lat Troie and Troian fro youre herte pace!
Tr 5 913 Drif out that bittre hope, and make good cheere,
Tr 5 914 And clepe ayeyn the beaute of youre face
Tr 5 915 That ye with salte teris so deface,
Tr 5 916 For Troie is brought in swich a jupartie
Tr 5 917 That it to save is now no remedie.
Tr 5 918 " And thenketh wel, ye shal in Grekis fynde
Tr 5 919 A moore parfit love, er it be nyght,
Tr 5 920 Than any Troian is, and more kynde,
Tr 5 921 And bet to serven yow wol don his myght.
Tr 5 922 And if ye vouchesauf, my lady bright,
Tr 5 923 I wol ben he to serven yow myselve,
Tr 5 924 Yee, levere than be kyng of Greces twelve! "
Tr 5 925 And with that word he gan to waxen red,
Tr 5 926 And in his speche a litel wight he quok,
Tr 5 927 And caste asyde a litel wight his hed,
Tr 5 928 And stynte a while; and afterward he wok,
Tr 5 929 And sobreliche on hire he threw his lok,
Tr 5 930 And seyde, " I am, al be it yow no joie,
Tr 5 931 As gentil man as any wight in Troie.
Tr 5 932 " For if my fader Tideus, " he seyde,
Tr 5 933 " Ilyved hadde, ich hadde ben er this
Tr 5 934 Of Calydoyne and Arge a kyng, Criseyde!
Tr 5 935 And so hope I that I shal yet, iwis.
Tr 5 936 But he was slayn -- allas, the more harm is. --
Tr 5 937 Unhappily at Thebes al to rathe,
Tr 5 938 Polymyte and many a man to scathe.
Tr 5 939 " But herte myn, syn that I am youre man --
Tr 5 940 And ben the first of whom I seche grace --
Tr 5 941 To serve yow as hertely as I kan,
Tr 5 942 And evere shal whil I to lyve have space,
Tr 5 943 So, er that I departe out of this place,
Tr 5 944 Ye wol me graunte that I may to-morwe,
Tr 5 945 At bettre leyser, telle yow my sorwe. "
Tr 5 946 What sholde I telle his wordes that he seyde?
Tr 5 947 He spak inough for o day at the meeste.
Tr 5 948 It preveth wel; he spak so that Criseyde
Tr 5 949 Graunted on the morwe, at his requeste,
Tr 5 950 For to speken with hym at the leeste --
Tr 5 951 So that he nolde speke of swich matere.
Tr 5 952 And thus to hym she seyde, as ye may here,
Tr 5 953 As she that hadde hire herte on Troilus
Tr 5 954 So faste that ther may it non arace;
Tr 5 955 And strangely she spak, and seyde thus:
Tr 5 956 " O Diomede, I love that ilke place
Tr 5 957 Ther I was born; and Joves, for his grace,
Tr 5 958 Delyvere it soone of al that doth it care!
Tr 5 959 God, for thy myght, so leve it wel to fare!
Tr 5 960 " That Grekis wolde hire wrath on Troie wreke,
Tr 5 961 If that they myght, I knowe it wel, iwis;
Tr 5 962 But it shal naught byfallen as ye speke,
Tr 5 963 And God toforn! And forther over this,
Tr 5 964 I woot my fader wys and redy is,
Tr 5 965 And that he me hath bought, as ye me tolde,
Tr 5 966 So deere, I am the more unto hym holde.
Tr 5 967 " That Grekis ben of heigh condicioun
Tr 5 968 I woot ek wel; but certeyn, men shal fynde
Tr 5 969 As worthi folk withinne Troie town,
Tr 5 970 As konnyng, and as parfit, and as kynde,
Tr 5 971 As ben bitwixen Orkades and Inde;
Tr 5 972 And that ye koude wel yowre lady serve,
Tr 5 973 I trowe ek wel, hire thank for to deserve.
Tr 5 974 " But as to speke of love, ywis, " she seyde,
Tr 5 975 " I hadde a lord, to whom I wedded was,
Tr 5 976 The whos myn herte al was, til that he deyde;
Tr 5 977 And other love, as help me now Pallas,
Tr 5 978 Ther in myn herte nys, ne nevere was.
Tr 5 979 And that ye ben of noble and heigh kynrede,
Tr 5 980 I have wel herd it tellen, out of drede.
Tr 5 981 " And that doth me to han so gret a wonder
Tr 5 982 That ye wol scornen any womman so.
Tr 5 983 Ek, God woot, love and I ben fer ysonder!
Tr 5 984 I am disposed bet, so mot I go,
Tr 5 985 Unto my deth, to pleyne and maken wo.
Tr 5 986 What I shal after don I kan nat seye;
Tr 5 987 But trewelich, as yet me list nat pleye.
Tr 5 988 " Myn herte is now in tribulacioun,
Tr 5 989 And ye in armes bisy day by day.
Tr 5 990 Herafter, whan ye wonnen han the town,
Tr 5 991 Peraventure so it happen may
Tr 5 992 That whan I se that nevere yit I say
Tr 5 993 Than wol I werke that I nevere wroughte!
Tr 5 994 This word to yow ynough suffisen oughte.
Tr 5 995 " To-morwe ek wol I speken with yow fayn,
Tr 5 996 So that ye touchen naught of this matere.
Tr 5 997 And whan yow list, ye may come here ayayn;
Tr 5 998 And er ye gon, thus muche I sey yow here:
Tr 5 999 As help me Pallas with hire heres clere,
Tr 5 1000 If that I sholde of any Grek han routhe,
Tr 5 1001 It sholde be youreselven, by my trouthe!
Tr 5 1002 " I say nat therfore that I wol yow love,
Tr 5 1003 N' y say nat nay; but in conclusioun,
Tr 5 1004 I mene wel, by God that sit above! "
Tr 5 1005 And therwithal she caste hire eyen down,
Tr 5 1006 And gan to sike, and seyde, " O Troie town,
Tr 5 1007 Yet bidde I God in quiete and in reste
Tr 5 1008 I may yow sen, or do myn herte breste. "
Tr 5 1009 But in effect, and shortly for to seye,
Tr 5 1010 This Diomede al fresshly newe ayeyn
Tr 5 1011 Gan pressen on, and faste hire mercy preye;
Tr 5 1012 And after this, the sothe for to seyn,
Tr 5 1013 Hire glove he took, of which he was ful feyn;
Tr 5 1014 And finaly, whan it was woxen eve
Tr 5 1015 And al was wel, he roos and tok his leve.
Tr 5 1016 The brighte Venus folwede and ay taughte
Tr 5 1017 The wey ther brode Phebus down alighte;
Tr 5 1018 And Cynthea hire char-hors overraughte
Tr 5 1019 To whirle out of the Leoun, if she myghte;
Tr 5 1020 And Signifer his candels sheweth brighte
Tr 5 1021 Whan that Criseyde unto hire bedde wente
Tr 5 1022 Inwith hire fadres faire brighte tente,
Tr 5 1023 Retornyng in hire soule ay up and down
Tr 5 1024 The wordes of this sodeyn Diomede,
Tr 5 1025 His grete estat, and perel of the town,
Tr 5 1026 And that she was allone and hadde nede
Tr 5 1027 Of frendes help; and thus bygan to brede
Tr 5 1028 The cause whi, the sothe for to telle,
Tr 5 1029 That she took fully purpos for to dwelle.
Tr 5 1030 The morwen com, and gostly for to speke,
Tr 5 1031 This Diomede is come unto Criseyde;
Tr 5 1032 And shortly, lest that ye my tale breke,
Tr 5 1033 So wel he for hymselven spak and seyde
Tr 5 1034 That alle hire sikes soore adown he leyde;
Tr 5 1035 And finaly, the sothe for to seyne,
Tr 5 1036 He refte hire of the grete of al hire peyne.
Tr 5 1037 And after this the storie telleth us
Tr 5 1038 That she hym yaf the faire baye stede
Tr 5 1039 The which he ones wan of Troilus;
Tr 5 1040 And ek a broche -- and that was litel nede --
Tr 5 1041 That Troilus was, she yaf this Diomede.
Tr 5 1042 And ek, the bet from sorwe hym to releve,
Tr 5 1043 She made hym were a pencel of hire sleve.
Tr 5 1044 I fynde ek in stories elleswhere,
Tr 5 1045 Whan thorugh the body hurt was Diomede
Tr 5 1046 Of Troilus, tho wep she many a teere
Tr 5 1047 Whan that she saugh his wyde wowndes blede,
Tr 5 1048 And that she took, to kepen hym, good hede;
Tr 5 1049 And for to helen hym of his sorwes smerte,
Tr 5 1050 Men seyn -- I not -- that she yaf hym hire herte.
Tr 5 1051 But trewely, the storie telleth us,
Tr 5 1052 Ther made nevere womman moore wo
Tr 5 1053 Than she, whan that she falsed Troilus.
Tr 5 1054 She seyde, " Allas, for now is clene ago
Tr 5 1055 My name of trouthe in love, for everemo!
Tr 5 1056 For I have falsed oon the gentileste
Tr 5 1057 That evere was, and oon the worthieste!
Tr 5 1058 " Allas, of me, unto the worldes ende,
Tr 5 1059 Shal neyther ben ywriten nor ysonge
Tr 5 1060 No good word, for thise bokes wol me shende.
Tr 5 1061 O, rolled shal I ben on many a tonge!
Tr 5 1062 Thorughout the world my belle shal be ronge!
Tr 5 1063 And wommen moost wol haten me of alle.
Tr 5 1064 Allas, that swich a cas me sholde falle!
Tr 5 1065 " Thei wol seyn, in as muche as in me is,
Tr 5 1066 I have hem don dishonour, weylaway!
Tr 5 1067 Al be I nat the first that dide amys,
Tr 5 1068 What helpeth that to don my blame awey?
Tr 5 1069 But syn I se ther is no bettre way,
Tr 5 1070 And that to late is now for me to rewe,
Tr 5 1071 To Diomede algate I wol be trewe.
Tr 5 1072 " But, Troilus, syn I no bettre may,
Tr 5 1073 And syn that thus departen ye and I,
Tr 5 1074 Yet prey I God, so yeve yow right good day,
Tr 5 1075 As for the gentileste, trewely,
Tr 5 1076 That evere I say, to serven feythfully,
Tr 5 1077 And best kan ay his lady honour kepe. "
Tr 5 1078 And with that word she brast anon to wepe.
Tr 5 1079 " And certes yow ne haten shal I nevere;
Tr 5 1080 And frendes love, that shal ye han of me,
Tr 5 1081 And my good word, al sholde I lyven evere.
Tr 5 1082 And trewely I wolde sory be
Tr 5 1083 For to seen yow in adversitee;
Tr 5 1084 And gilteles, I woot wel, I yow leve.
Tr 5 1085 But al shal passe; and thus take I my leve. "
Tr 5 1086 But trewely, how longe it was bytwene
Tr 5 1087 That she forsok hym for this Diomede,
Tr 5 1088 Ther is non auctour telleth it, I wene.
Tr 5 1089 Take every man now to his bokes heede,
Tr 5 1090 He shal no terme fynden, out of drede.
Tr 5 1091 For though that he bigan to wowe hire soone,
Tr 5 1092 Er he hire wan, yet was ther more to doone.
Tr 5 1093 Ne me ne list this sely womman chyde
Tr 5 1094 Forther than the storye wol devyse.
Tr 5 1095 Hire name, allas, is publysshed so wide
Tr 5 1096 That for hire gilt it oughte ynough suffise.
Tr 5 1097 And if I myghte excuse hire any wise,
Tr 5 1098 For she so sory was for hire untrouthe,
Tr 5 1099 Iwis, I wolde excuse hire yet for routhe.
Tr 5 1100 This Troilus, as I byfore have told,
Tr 5 1101 Thus driveth forth, as wel as he hath myght;
Tr 5 1102 But often was his herte hoot and cold,
Tr 5 1103 And namely that ilke nynthe nyght,
Tr 5 1104 Which on the morwe she hadde hym bihight
Tr 5 1105 To com ayeyn. God woot, ful litel reste
Tr 5 1106 Hadde he that nyght -- nothyng to slepe hym leste.
Tr 5 1107 The laurer-crowned Phebus with his heete
Tr 5 1108 Gan, in his cours ay upward as he wente,
Tr 5 1109 To warmen of the est se the wawes weete,
Tr 5 1110 And Nysus doughter song with fressh entente,
Tr 5 1111 Whan Troilus his Pandare after sente;
Tr 5 1112 And on the walles of the town they pleyde,
Tr 5 1113 To loke if they kan sen aught of Criseyde.
Tr 5 1114 Tyl it was noon they stoden for to se
Tr 5 1115 Who that ther come, and every maner wight
Tr 5 1116 That com fro fer, they seyden it was she --
Tr 5 1117 Til that thei koude knowen hym aright.
Tr 5 1118 Now was his herte dul, now was it light.
Tr 5 1119 And thus byjaped stonden for to stare
Tr 5 1120 Aboute naught this Troilus and Pandare.
Tr 5 1121 To Pandarus this Troilus tho seyde,
Tr 5 1122 " For aught I woot, byfor noon, sikirly,
Tr 5 1123 Into this town ne comth nat here Criseyde.
Tr 5 1124 She hath ynough to doone, hardyly,
Tr 5 1125 To wynnen from hire fader, so trowe I.
Tr 5 1126 Hire olde fader wol yet make hire dyne
Tr 5 1127 Er that she go -- God yeve hys herte pyne! "
Tr 5 1128 Pandare answerede, " It may wel be, certeyn.
Tr 5 1129 And forthi lat us dyne, I the byseche,
Tr 5 1130 And after noon than maystow come ayeyn. "
Tr 5 1131 And hom they go, withoute more speche,
Tr 5 1132 And comen ayeyn -- but longe may they seche
Tr 5 1133 Er that they fynde that they after cape.
Tr 5 1134 Fortune hem bothe thenketh for to jape!
Tr 5 1135 Quod Troilus, " I se wel now that she
Tr 5 1136 Is taried with hire olde fader so,
Tr 5 1137 That er she come, it wol neigh even be.
Tr 5 1138 Com forth; I wol unto the yate go.
Tr 5 1139 Thise porters ben unkonnyng evere mo,
Tr 5 1140 And I wol don hem holden up the yate
Tr 5 1141 As naught ne were, although she come late. "
Tr 5 1142 The day goth faste, and after that com eve,
Tr 5 1143 And yet com nought to Troilus Criseyde.
Tr 5 1144 He loketh forth by hegge, by tre, by greve,
Tr 5 1145 And fer his hed over the wal he leyde;
Tr 5 1146 And at the laste he torned hym and seyde,
Tr 5 1147 " By God, I woot hire menyng now, Pandare!
Tr 5 1148 Almoost, ywys, al newe was my care.
Tr 5 1149 " Now douteles, this lady kan hire good;
Tr 5 1150 I woot she meneth riden pryvely.
Tr 5 1151 I comende hire wisdom, by myn hood!
Tr 5 1152 She wol nat maken peple nycely
Tr 5 1153 Gaure on hire whan she comth, but softely
Tr 5 1154 By nyghte into the town she thenketh ride.
Tr 5 1155 And, deere brother, thynk nat longe t' abide.
Tr 5 1156 " We han naught elles for to don, ywis.
Tr 5 1157 And Pandarus, now woltow trowen me?
Tr 5 1158 Have here my trouthe, I se hire! Yond she is.
Tr 5 1159 Heve up thyn eyen, man! Maistow nat se? "
Tr 5 1160 Pandare answerede, " Nay, so mote I the!
Tr 5 1161 Al wrong, by God! What saistow, man? Where arte?
Tr 5 1162 That I se yond nys but a fare-carte. "
Tr 5 1163 " Allas, thow seyst right soth, " quod Troilus.
Tr 5 1164 " But, hardily, it is naught al for nought
Tr 5 1165 That in myn herte I now rejoysse thus;
Tr 5 1166 It is ayeyns som good I have a thought.
Tr 5 1167 Not I nat how, but syn that I was wrought
Tr 5 1168 Ne felte I swich a comfort, dar I seye;
Tr 5 1169 She comth to-nyght, my lif that dorste I leye! "
Tr 5 1170 Pandare answerde, " It may be, wel ynough, "
Tr 5 1171 And held with hym of al that evere he seyde.
Tr 5 1172 But in his herte he thoughte, and softe lough,
Tr 5 1173 And to hymself ful sobreliche he seyde,
Tr 5 1174 " From haselwode, there joly Robyn pleyde,
Tr 5 1175 Shal come al that that thow abidest heere.
Tr 5 1176 Ye, fare wel al the snow of ferne yere! "
Tr 5 1177 The warden of the yates gan to calle
Tr 5 1178 The folk which that withoute the yates were,
Tr 5 1179 And bad hem dryven in hire bestes alle,
Tr 5 1180 Or all the nyght they moste bleven there.
Tr 5 1181 And fer withinne the nyght, with many a teere,
Tr 5 1182 This Troilus gan homward for to ride,
Tr 5 1183 For wel he seth it helpeth naught t' abide.
Tr 5 1184 But natheles, he gladed hym in this:
Tr 5 1185 He thought he misacounted hadde his day,
Tr 5 1186 And seyde, " I understonde have al amys.
Tr 5 1187 For thilke nyght I last Criseyde say,
Tr 5 1188 She seyde, `I shal ben here, if that I may,
Tr 5 1189 Er that the moone, O deere herte swete,
Tr 5 1190 The Leoun passe, out of this Ariete.'
Tr 5 1191 " For which she may yet holde al hire byheste. "
Tr 5 1192 And on the morwe unto the yate he wente,
Tr 5 1193 And up and down, by west and ek by este,
Tr 5 1194 Upon the walles made he many a wente.
Tr 5 1195 But al for nought; his hope alwey hym blente.
Tr 5 1196 For which at nyght, in sorwe and sikes sore,
Tr 5 1197 He wente hym hom, withouten any more.
Tr 5 1198 His hope al clene out of his herte fledde;
Tr 5 1199 He nath wheron now lenger for to honge;
Tr 5 1200 But for the peyne hym thoughte his herte bledde,
Tr 5 1201 So were his throwes sharpe and wonder stronge;
Tr 5 1202 For whan he saugh that she abood so longe,
Tr 5 1203 He nyste what he juggen of it myghte,
Tr 5 1204 Syn she hath broken that she hym bihighte.
Tr 5 1205 The thridde, ferthe, fifte, sexte day
Tr 5 1206 After tho dayes ten of which I tolde,
Tr 5 1207 Bitwixen hope and drede his herte lay,
Tr 5 1208 Yet somwhat trustyng on hire hestes olde.
Tr 5 1209 But whan he saugh she nolde hire terme holde,
Tr 5 1210 He kan now sen non other remedie
Tr 5 1211 But for to shape hym soone for to dye.
Tr 5 1212 Therwith the wikked spirit, God us blesse,
Tr 5 1213 Which that men clepeth woode jalousie,
Tr 5 1214 Gan in hym crepe, in al this hevynesse;
Tr 5 1215 For which, by cause he wolde soone dye,
Tr 5 1216 He ne et ne drank, for his malencolye,
Tr 5 1217 And ek from every compaignye he fledde:
Tr 5 1218 This was the lif that al the tyme he ledde.
Tr 5 1219 He so defet was, that no manere man
Tr 5 1220 Unneth hym myghte knowen ther he wente;
Tr 5 1221 So was he lene, and therto pale and wan,
Tr 5 1222 And feble, that he walketh by potente;
Tr 5 1223 And with his ire he thus hymselve shente.
Tr 5 1224 But whoso axed hym wherof hym smerte,
Tr 5 1225 He seyde his harm was al aboute his herte.
Tr 5 1226 Priam ful ofte, and ek his moder deere,
Tr 5 1227 His bretheren and his sustren gonne hym freyne
Tr 5 1228 Whi he so sorwful was in al his cheere,
Tr 5 1229 And what thyng was the cause of al his peyne;
Tr 5 1230 But al for naught. He nolde his cause pleyne,
Tr 5 1231 But seyde he felte a grevous maladie
Tr 5 1232 Aboute his herte, and fayn he wolde dye.
Tr 5 1233 So on a day he leyde hym doun to slepe,
Tr 5 1234 And so byfel that yn his slep hym thoughte
Tr 5 1235 That in a forest faste he welk to wepe
Tr 5 1236 For love of here that hym these peynes wroughte;
Tr 5 1237 And up and doun as he the forest soughte,
Tr 5 1238 He mette he saugh a bor with tuskes grete,
Tr 5 1239 That slepte ayeyn the bryghte sonnes hete.
Tr 5 1240 And by this bor, faste in his armes folde,
Tr 5 1241 Lay, kyssyng ay, his lady bryght, Criseyde.
Tr 5 1242 For sorwe of which, whan he it gan byholde,
Tr 5 1243 And for despit, out of his slep he breyde,
Tr 5 1244 And loude he cride on Pandarus, and seyde:
Tr 5 1245 " O Pandarus, now know I crop and roote.
Tr 5 1246 I n' am but ded; ther nys noon other bote.
Tr 5 1247 " My lady bryght, Criseyde, hath me bytrayed,
Tr 5 1248 In whom I trusted most of ony wight.
Tr 5 1249 She elliswhere hath now here herte apayed.
Tr 5 1250 The blysful goddes thorugh here grete myght
Tr 5 1251 Han in my drem yshewed it ful right.
Tr 5 1252 Thus yn my drem Criseyde have I byholde " --
Tr 5 1253 And al this thing to Pandarus he tolde.
Tr 5 1254 " O my Criseyde, allas, what subtilte,
Tr 5 1255 What newe lust, what beaute, what science,
Tr 5 1256 What wratthe of juste cause have ye to me?
Tr 5 1257 What gilt of me, what fel experience
Tr 5 1258 Hath fro me raft, allas, thyn advertence?
Tr 5 1259 O trust, O feyth, O depe asseuraunce!
Tr 5 1260 Who hath me reft Criseyde, al my plesaunce?
Tr 5 1261 " Allas, whi leet I you from hennes go,
Tr 5 1262 For which wel neigh out of my wit I breyde?
Tr 5 1263 Who shal now trowe on any othes mo?
Tr 5 1264 God wot, I wende, O lady bright, Criseyde,
Tr 5 1265 That every word was gospel that ye seyde!
Tr 5 1266 But who may bet bigile, yf hym lyste,
Tr 5 1267 Than he on whom men weneth best to triste?
Tr 5 1268 " What shal I don, my Pandarus, allas?
Tr 5 1269 I fele now so sharp a newe peyne,
Tr 5 1270 Syn that ther lith no remedye in this cas,
Tr 5 1271 That bet were it I with myn hondes tweyne
Tr 5 1272 Myselven slowh alwey than thus to pleyne;
Tr 5 1273 For thorugh the deth my wo sholde han an ende,
Tr 5 1274 Ther every day with lyf myself I shende. "
Tr 5 1275 Pandare answerde and seyde, " Allas the while
Tr 5 1276 That I was born! Have I nat seyd er this,
Tr 5 1277 That dremes many a maner man bigile?
Tr 5 1278 And whi? For folk expounden hem amys.
Tr 5 1279 How darstow seyn that fals thy lady ys
Tr 5 1280 For any drem, right for thyn owene drede?
Tr 5 1281 Lat be this thought; thow kanst no dremes rede.
Tr 5 1282 " Peraunter, ther thow dremest of this boor,
Tr 5 1283 It may so be that it may signifie
Tr 5 1284 Hire fader, which that old is and ek hoor,
Tr 5 1285 Ayeyn the sonne lith o poynt to dye,
Tr 5 1286 And she for sorwe gynneth wepe and crie,
Tr 5 1287 And kisseth hym, ther he lith on the grounde:
Tr 5 1288 Thus sholdestow thi drem aright expounde! "
Tr 5 1289 " How myghte I than don, " quod Troilus,
Tr 5 1290 " To knowe of this, yee, were it nevere so lite? "
Tr 5 1291 " Now seystow wisly, " quod this Pandarus;
Tr 5 1292 " My red is this: syn thow kanst wel endite,
Tr 5 1293 That hastily a lettre thow hire write,
Tr 5 1294 Thorugh which thow shalt wel bryngyn it aboute
Tr 5 1295 To know a soth of that thow art in doute.
Tr 5 1296 " And se now whi: for this I dar wel seyn,
Tr 5 1297 That if so is that she untrewe be,
Tr 5 1298 I kan nat trowen that she wol write ayeyn.
Tr 5 1299 And if she write, thow shalt ful sone yse
Tr 5 1300 As wheither she hath any liberte
Tr 5 1301 To come ayeyn; or ellis in som clause,
Tr 5 1302 If she be let, she wol assigne a cause.
Tr 5 1303 " Thow hast nat writen hire syn that she wente,
Tr 5 1304 Nor she to the; and this I dorste laye,
Tr 5 1305 Ther may swich cause ben in hire entente
Tr 5 1306 That hardily thow wolt thiselven saye
Tr 5 1307 That hire abod the best is for yow twaye.
Tr 5 1308 Now writ hire thanne, and thow shalt feele sone
Tr 5 1309 A soth of al. Ther is namore to done. "
Tr 5 1310 Acorded ben to this conclusioun,
Tr 5 1311 And that anon, thise ilke lordes two;
Tr 5 1312 And hastily sit Troilus adown,
Tr 5 1313 And rolleth in his herte to and fro
Tr 5 1314 How he may best discryven hire his wo.
Tr 5 1315 And to Criseyde, his owen lady deere,
Tr 5 1316 He wrot right thus, and seyde as ye may here:
Tr 5 1317 " Right fresshe flour, whos I ben have and shal,
Tr 5 1318 Withouten part of elleswhere servyse,
Tr 5 1319 With herte, body, lif, lust, thought, and al,
Tr 5 1320 I, woful wyght, in everich humble wise
Tr 5 1321 That tonge telle or herte may devyse,
Tr 5 1322 As ofte as matere occupieth place,
Tr 5 1323 Me recomaunde unto youre noble grace.
Tr 5 1324 " Liketh yow to witen, swete herte,
Tr 5 1325 As ye wel knowe, how longe tyme agon
Tr 5 1326 That ye me lefte in aspre peynes smerte,
Tr 5 1327 Whan that ye wente, of which yet boote non
Tr 5 1328 Have I non had, but evere wors bigon
Tr 5 1329 Fro day to day am I, and so mot dwelle,
Tr 5 1330 While it yow list, of wele and wo my welle.
Tr 5 1331 " For which to yow, with dredful herte trewe,
Tr 5 1332 I write, as he that sorwe drifth to write,
Tr 5 1333 My wo, that everich houre encresseth newe,
Tr 5 1334 Compleynyng, as I dar or kan endite.
Tr 5 1335 And that defaced is, that may ye wite
Tr 5 1336 The teris which that fro myn eyen reyne,
Tr 5 1337 That wolden speke, if that they koude, and pleyne.
Tr 5 1338 " Yow first biseche I, that youre eyen clere
Tr 5 1339 To loke on this defouled ye nat holde;
Tr 5 1340 And over al this, that ye, my lady deere,
Tr 5 1341 Wol vouchesauf this lettre to byholde;
Tr 5 1342 And by the cause ek of my cares colde
Tr 5 1343 That sleth my wit, if aught amys m' asterte,
Tr 5 1344 Foryeve it me, myn owen swete herte!
Tr 5 1345 " If any servant dorste or oughte of right
Tr 5 1346 Upon his lady pitously compleyne,
Tr 5 1347 Thanne wene I that ich oughte be that wight,
Tr 5 1348 Considered this, that ye thise monthes tweyne
Tr 5 1349 Han taried, ther ye seyden, soth to seyne,
Tr 5 1350 But dayes ten ye nolde in oost sojourne --
Tr 5 1351 But in two monthes yet ye nat retourne.
Tr 5 1352 " But for as muche as me moot nedes like
Tr 5 1353 Al that yow liste, I dar nat pleyne moore,
Tr 5 1354 But humblely, with sorwful sikes sike,
Tr 5 1355 Yow write ich myn unresty sorwes soore,
Tr 5 1356 Fro day to day desiryng evere moore
Tr 5 1357 To knowen fully, if youre wille it weere,
Tr 5 1358 How ye han ferd and don whil ye be theere;
Tr 5 1359 " The whos welfare and hele ek God encresse
Tr 5 1360 In honour swich that upward in degree
Tr 5 1361 It growe alwey, so that it nevere cesse.
Tr 5 1362 Right as youre herte ay kan, my lady free,
Tr 5 1363 Devyse, I prey to God so moot it be,
Tr 5 1364 And graunte it that ye soone upon me rewe,
Tr 5 1365 As wisly as in al I am yow trewe.
Tr 5 1366 " And if yow liketh knowen of the fare
Tr 5 1367 Of me, whos wo ther may no wit discryve,
Tr 5 1368 I kan namore but, chiste of every care,
Tr 5 1369 At wrytyng of this lettre I was on-lyve,
Tr 5 1370 Al redy out my woful gost to dryve,
Tr 5 1371 Which I delaye, and holde hym yet in honde,
Tr 5 1372 Upon the sighte of matere of youre sonde.
Tr 5 1373 " Myn eyen two, in veyn with which I se,
Tr 5 1374 Of sorwful teris salte arn waxen welles;
Tr 5 1375 My song, in pleynte of myn adversitee;
Tr 5 1376 My good, in harm; myn ese ek woxen helle is.
Tr 5 1377 My joie, in wo; I kan sey yow naught ellis,
Tr 5 1378 But torned is -- for which my lif I warie --
Tr 5 1379 Everich joie or ese in his contrarie;
Tr 5 1380 " Which with youre comyng hom ayeyn to Troie
Tr 5 1381 Ye may redresse, and more a thousand sithe
Tr 5 1382 Than evere ich hadde encressen in me joie.
Tr 5 1383 For was ther nevere herte yet so blithe
Tr 5 1384 To han his lif as I shal ben as swithe
Tr 5 1385 As I yow se; and though no manere routhe
Tr 5 1386 Commeve yow, yet thynketh on youre trouthe.
Tr 5 1387 " And if so be my gilt hath deth deserved,
Tr 5 1388 Or if yow list namore upon me se,
Tr 5 1389 In guerdoun yet of that I have yow served,
Tr 5 1390 Byseche I yow, myn owen lady free,
Tr 5 1391 That hereupon ye wolden write me,
Tr 5 1392 For love of God, my righte lode-sterre,
Tr 5 1393 That deth may make an ende of al my werre;
Tr 5 1394 " If other cause aught doth yow for to dwelle,
Tr 5 1395 That with youre lettre ye me recomforte;
Tr 5 1396 For though to me youre absence is an helle,
Tr 5 1397 With pacience I wol my wo comporte,
Tr 5 1398 And with youre lettre of hope I wol desporte.
Tr 5 1399 Now writeth, swete, and lat me thus nat pleyne;
Tr 5 1400 With hope, or deth, delivereth me fro peyne.
Tr 5 1401 " Iwis, myne owene deere herte trewe,
Tr 5 1402 I woot that whan ye next upon me se,
Tr 5 1403 So lost have I myn hele and ek myn hewe,
Tr 5 1404 Criseyde shal nought konne knowen me.
Tr 5 1405 Iwys, myn hertes day, my lady free,
Tr 5 1406 So thursteth ay myn herte to byholde
Tr 5 1407 Youre beute, that my lif unnethe I holde.
Tr 5 1408 " I say namore, al have I for to seye
Tr 5 1409 To yow wel more than I telle may;
Tr 5 1410 But wheither that ye do me lyve or deye,
Tr 5 1411 Yet praye I God, so yeve yow right good day!
Tr 5 1412 And fareth wel, goodly, faire, fresshe may,
Tr 5 1413 As she that lif or deth may me comande!
Tr 5 1414 And to youre trouthe ay I me recomande,
Tr 5 1415 " With hele swich that, but ye yeven me
Tr 5 1416 The same hele, I shal non hele have.
Tr 5 1417 In yow lith, whan yow liste that it so be,
Tr 5 1418 The day in which me clothen shal my grave;
Tr 5 1419 In yow my lif, in yow myght for to save
Tr 5 1420 Me fro disese of alle peynes smerte;
Tr 5 1421 And far now wel, myn owen swete herte! Le vostre T. "
Tr 5 1422 This lettre forth was sent unto Criseyde,
Tr 5 1423 Of which hire answere in effect was this:
Tr 5 1424 Ful pitously she wroot ayeyn, and seyde,
Tr 5 1425 That also sone as that she myghte, ywys,
Tr 5 1426 She wolde come, and mende al that was mys.
Tr 5 1427 And fynaly she wroot and seyde hym thenne,
Tr 5 1428 She wolde come, ye, but she nyste whenne.
Tr 5 1429 But in hire lettre made she swich festes
Tr 5 1430 That wonder was, and swerth she loveth hym best,
Tr 5 1431 Of which he fond but botmeles bihestes.
Tr 5 1432 But Troilus, thow maist now, est or west,
Tr 5 1433 Pipe in an ivy lef, if that the lest!
Tr 5 1434 Thus goth the world. God shilde us fro meschaunce,
Tr 5 1435 And every wight that meneth trouthe avaunce!
Tr 5 1436 Encressen gan the wo fro day to nyght
Tr 5 1437 Of Troilus, for tarying of Criseyde;
Tr 5 1438 And lessen gan his hope and ek his myght,
Tr 5 1439 For which al down he in his bed hym leyde.
Tr 5 1440 He ne eet, ne dronk, ne slep, ne word seyde,
Tr 5 1441 Ymagynyng ay that she was unkynde,
Tr 5 1442 For which wel neigh he wex out of his mynde.
Tr 5 1443 This drem, of which I told have ek byforn,
Tr 5 1444 May nevere outen of his remembraunce.
Tr 5 1445 He thought ay wel he hadde his lady lorn,
Tr 5 1446 And that Joves of his purveyaunce
Tr 5 1447 Hym shewed hadde in slep the signifiaunce
Tr 5 1448 Of hire untrouthe and his disaventure,
Tr 5 1449 And that the boor was shewed hym in figure.
Tr 5 1450 For which he for Sibille his suster sente,
Tr 5 1451 That called was Cassandre ek al aboute,
Tr 5 1452 And al his drem he tolde hire er he stente,
Tr 5 1453 And hire bisoughte assoilen hym the doute
Tr 5 1454 Of the stronge boor with tuskes stoute;
Tr 5 1455 And fynaly, withinne a litel stounde,
Tr 5 1456 Cassandre hym gan right thus his drem expounde:
Tr 5 1457 She gan first smyle, and seyde, " O brother deere,
Tr 5 1458 If thow a soth of this desirest knowe,
Tr 5 1459 Thow most a fewe of olde stories heere,
Tr 5 1460 To purpos how that Fortune overthrowe
Tr 5 1461 Hath lordes olde, thorugh which, withinne a throwe,
Tr 5 1462 Thow wel this boor shalt knowe, and of what kynde
Tr 5 1463 He comen is, as men in bokes fynde.
Tr 5 1464 " Diane, which that wroth was and in ire
Tr 5 1465 For Grekis nolde don hire sacrifice,
Tr 5 1466 Ne encens upon hire auter sette afire,
Tr 5 1467 She, for that Grekis gonne hire so despise,
Tr 5 1468 Wrak hire in a wonder cruel wise;
Tr 5 1469 For with a boor as gret as ox in stalle
Tr 5 1470 She made up frete hire corn and vynes alle.
Tr 5 1471 " To sle this boor was al the contre raysed,
Tr 5 1472 Amonges which ther com, this boor to se,
Tr 5 1473 A mayde, oon of this world the beste ypreysed;
Tr 5 1474 And Meleagre, lord of that contree,
Tr 5 1475 He loved so this fresshe mayden free
Tr 5 1476 That with his manhod, er he wolde stente,
Tr 5 1477 This boor he slough, and hire the hed he sente;
Tr 5 1478 " Of which, as olde bokes tellen us,
Tr 5 1479 Ther ros a contek and a gret envye;
Tr 5 1480 And of this lord descended Tideus
Tr 5 1481 By ligne, or ellis olde bookes lye.
Tr 5 1482 But how this Meleagre gan to dye
Tr 5 1483 Thorugh his moder, wol I yow naught telle,
Tr 5 1484 For al to longe it were for to dwelle. "
Tr 5 1485 She tolde ek how Tideus, er she stente,
Tr 5 1486 Unto the stronge citee of Thebes,
Tr 5 1487 To cleymen kyngdom of the citee, wente,
Tr 5 1488 For his felawe, daun Polymytes,
Tr 5 1489 Of which the brother, daun Ethiocles,
Tr 5 1490 Ful wrongfully of Thebes held the strengthe;
Tr 5 1491 This tolde she by proces, al by lengthe.
Tr 5 1492 She tolde ek how Hemonydes asterte,
Tr 5 1493 Whan Tideus slough fifty knyghtes stoute.
Tr 5 1494 She tolde ek alle the prophecyes by herte,
Tr 5 1495 And how that seven kynges with hire route
Tr 5 1496 Bysegeden the citee al aboute;
Tr 5 1497 And of the holy serpent, and the welle,
Tr 5 1498 And of the furies, al she gan hym telle;
Tr 5 1499 Of Archymoris brennynge and the pleyes,
Tr 5 1500 And how Amphiorax fil thorugh the grounde,
Tr 5 1501 How Tideus was sleyn, lord of Argeyes,
Tr 5 1502 And how Ypomedoun in litel stounde
Tr 5 1503 Was dreynt, and ded Parthonope of wownde;
Tr 5 1504 And also how Capaneus the proude
Tr 5 1505 With thonder-dynt was slayn, that cride loude.
Tr 5 1506 She gan ek telle hym how that eyther brother,
Tr 5 1507 Ethiocles and Polymyte also,
Tr 5 1508 At a scarmuche ech of hem slough other,
Tr 5 1509 And of Argyves wepynge and hire wo;
Tr 5 1510 And how the town was brent, she tolde ek tho;
Tr 5 1511 And so descendeth down from gestes olde
Tr 5 1512 To Diomede, and thus she spak and tolde:
Tr 5 1513 " This ilke boor bitokneth Diomede,
Tr 5 1514 Tideus sone, that down descended is
Tr 5 1515 Fro Meleagre, that made the boor to blede;
Tr 5 1516 And thy lady, wherso she be, ywis,
Tr 5 1517 This Diomede hire herte hath, and she his.
Tr 5 1518 Wep if thow wolt, or lef, for out of doute,
Tr 5 1519 This Diomede is inne, and thow art oute. "
Tr 5 1520 " Thow seyst nat soth, " quod he, " thow sorceresse,
Tr 5 1521 With al thy false goost of prophecye!
Tr 5 1522 Thow wenest ben a gret devyneresse!
Tr 5 1523 Now sestow nat this fool of fantasie
Tr 5 1524 Peyneth hire on ladys for to lye?
Tr 5 1525 Awey! " quod he. " Ther Joves yeve the sorwe!
Tr 5 1526 Thow shalt be fals, peraunter, yet tomorwe!
Tr 5 1527 " As wel thow myghtest lien on Alceste,
Tr 5 1528 That was of creatures, but men lye,
Tr 5 1529 That evere weren, kyndest and the beste!
Tr 5 1530 For whan hire housbonde was in jupertye
Tr 5 1531 To dye hymself but if she wolde dye,
Tr 5 1532 She ches for hym to dye and gon to helle,
Tr 5 1533 And starf anon, as us the bokes telle. "
Tr 5 1534 Cassandre goth, and he with cruel herte
Tr 5 1535 Foryat his wo, for angre of hire speche;
Tr 5 1536 And from his bed al sodeynly he sterte,
Tr 5 1537 As though al hool hym hadde ymad a leche.
Tr 5 1538 And day by day he gan enquere and seche
Tr 5 1539 A sooth of this with al his fulle cure;
Tr 5 1540 And thus he drieth forth his aventure.
Tr 5 1541 Fortune, which that permutacioun
Tr 5 1542 Of thynges hath, as it is hire comitted
Tr 5 1543 Thorugh purveyaunce and disposicioun
Tr 5 1544 Of heighe Jove, as regnes shal be flitted
Tr 5 1545 Fro folk in folk, or when they shal be smytted,
Tr 5 1546 Gan pulle awey the fetheres brighte of Troie
Tr 5 1547 Fro day to day, til they ben bare of joie.
Tr 5 1548 Among al this, the fyn of the parodie
Tr 5 1549 Of Ector gan aprochen wonder blyve.
Tr 5 1550 The fate wolde his soule sholde unbodye,
Tr 5 1551 And shapen hadde a mene it out to dryve,
Tr 5 1552 Ayeyns which fate hym helpeth nat to stryve;
Tr 5 1553 But on a day to fighten gan he wende,
Tr 5 1554 At which -- allas! -- he caughte his lyves ende.
Tr 5 1555 For which me thynketh every manere wight
Tr 5 1556 That haunteth armes oughte to biwaille
Tr 5 1557 The deth of hym that was so noble a knyght;
Tr 5 1558 For as he drough a kyng by th' aventaille,
Tr 5 1559 Unwar of this, Achilles thorugh the maille
Tr 5 1560 And thorugh the body gan hym for to ryve;
Tr 5 1561 And thus this worthi knyght was brought of lyve.
Tr 5 1562 For whom, as olde bokes tellen us,
Tr 5 1563 Was mad swich wo that tonge it may nat telle,
Tr 5 1564 And namely, the sorwe of Troilus,
Tr 5 1565 That next hym was of worthynesse welle;
Tr 5 1566 And in this wo gan Troilus to dwelle
Tr 5 1567 That, what for sorwe, and love, and for unreste,
Tr 5 1568 Ful ofte a day he bad his herte breste.
Tr 5 1569 But natheles, though he gan hym dispaire,
Tr 5 1570 And dradde ay that his lady was untrewe,
Tr 5 1571 Yet ay on hire his herte gan repaire.
Tr 5 1572 And as thise lovers don, he soughte ay newe
Tr 5 1573 To gete ayeyn Criseyde, brighte of hewe;
Tr 5 1574 And in his herte he wente hire excusynge,
Tr 5 1575 That Calkas caused al hire tariynge.
Tr 5 1576 And ofte tyme he was in purpos grete
Tr 5 1577 Hymselven lik a pilgrym to desgise
Tr 5 1578 To seen hire; but he may nat contrefete
Tr 5 1579 To ben unknowen of folk that weren wise,
Tr 5 1580 Ne fynde excuse aright that may suffise
Tr 5 1581 If he among the Grekis knowen were;
Tr 5 1582 For which he wep ful ofte and many a tere.
Tr 5 1583 To hire he wroot yet ofte tyme al newe
Tr 5 1584 Ful pitously -- he lefte it nought for slouthe --
Tr 5 1585 Bisechyng hire that sithen he was trewe,
Tr 5 1586 That she wol come ayeyn and holde hire trouthe.
Tr 5 1587 For which Criseyde upon a day, for routhe --
Tr 5 1588 I take it so -- touchyng al this matere,
Tr 5 1589 Wrot hym ayeyn, and seyde as ye may here:
Tr 5 1590 " Cupides sone, ensample of goodlyheede,
Tr 5 1591 O swerd of knyghthod, sours of gentilesse,
Tr 5 1592 How myght a wight in torment and in drede
Tr 5 1593 And heleles, yow sende as yet gladnesse?
Tr 5 1594 I herteles, I sik, I in destresse!
Tr 5 1595 Syn ye with me, nor I with yow, may dele,
Tr 5 1596 Yow neyther sende ich herte may nor hele.
Tr 5 1597 " Youre lettres ful, the papir al ypleynted,
Tr 5 1598 Conceyved hath myn hertes pietee.
Tr 5 1599 I have ek seyn with teris al depeynted
Tr 5 1600 Youre lettre, and how that ye requeren me
Tr 5 1601 To come ayeyn, which yet ne may nat be;
Tr 5 1602 But whi, lest that this lettre founden were,
Tr 5 1603 No mencioun ne make I now, for feere.
Tr 5 1604 " Grevous to me, God woot, is youre unreste,
Tr 5 1605 Youre haste, and that the goddes ordinaunce
Tr 5 1606 It semeth nat ye take it for the beste.
Tr 5 1607 Nor other thyng nys in youre remembraunce,
Tr 5 1608 As thynketh me, but only youre plesaunce.
Tr 5 1609 But beth nat wroth, and that I yow biseche;
Tr 5 1610 For that I tarie is al for wikked speche.
Tr 5 1611 " For I have herd wel moore than I wende,
Tr 5 1612 Touchyng us two, how thynges han ystonde,
Tr 5 1613 Which I shal with dissymelyng amende.
Tr 5 1614 And beth nat wroth, I have ek understonde
Tr 5 1615 How ye ne do but holden me in honde.
Tr 5 1616 But now no force. I kan nat in yow gesse
Tr 5 1617 But alle trouthe and alle gentilesse.
Tr 5 1618 " Come I wole; but yet in swich disjoynte
Tr 5 1619 I stonde as now that what yer or what day
Tr 5 1620 That this shal be, that kan I naught apoynte.
Tr 5 1621 But in effect I pray yow, as I may,
Tr 5 1622 Of youre good word and of youre frendship ay;
Tr 5 1623 For trewely, while that my lif may dure,
Tr 5 1624 As for a frend ye may in me assure.
Tr 5 1625 " Yet preye ich yow, on yvel ye ne take
Tr 5 1626 That it is short which that I to yow write;
Tr 5 1627 I dar nat, ther I am, wel lettres make,
Tr 5 1628 Ne nevere yet ne koude I wel endite.
Tr 5 1629 Ek gret effect men write in place lite;
Tr 5 1630 Th' entente is al, and nat the lettres space.
Tr 5 1631 And fareth now wel. God have yow in his grace! La vostre Tr 5 C. "
Tr 5 1632 This Troilus this lettre thoughte al straunge
Tr 5 1633 Whan he it saugh, and sorwfullich he sighte;
Tr 5 1634 Hym thoughte it lik a kalendes of chaunge.
Tr 5 1635 But fynaly, he ful ne trowen myghte
Tr 5 1636 That she ne wolde hym holden that she hyghte;
Tr 5 1637 For with ful yvel wille list hym to leve
Tr 5 1638 That loveth wel, in swich cas, though hym greve.
Tr 5 1639 But natheles men seyen that at the laste,
Tr 5 1640 For any thyng, men shal the soothe se;
Tr 5 1641 And swich a cas bitidde, and that as faste,
Tr 5 1642 That Troilus wel understod that she
Tr 5 1643 Nas nought so kynde as that hire oughte be.
Tr 5 1644 And fynaly, he woot now out of doute
Tr 5 1645 That al is lost that he hath ben aboute.
Tr 5 1646 Stood on a day in his malencolie
Tr 5 1647 This Troilus, and in suspecioun
Tr 5 1648 Of hire for whom he wende for to dye.
Tr 5 1649 And so bifel that thorughout Troye town,
Tr 5 1650 As was the gise, iborn was up and down
Tr 5 1651 A manere cote-armure, as seith the storie,
Tr 5 1652 Byforn Deiphebe, in signe of his victorie;
Tr 5 1653 The whiche cote, as telleth Lollius,
Tr 5 1654 Deiphebe it hadde rent fro Diomede
Tr 5 1655 The same day. And whan this Troilus
Tr 5 1656 It saugh, he gan to taken of it hede,
Tr 5 1657 Avysyng of the lengthe and of the brede,
Tr 5 1658 And al the werk; but as he gan byholde,
Tr 5 1659 Ful sodeynly his herte gan to colde,
Tr 5 1660 As he that on the coler fond withinne
Tr 5 1661 A broch that he Criseyde yaf that morwe
Tr 5 1662 That she from Troie moste nedes twynne,
Tr 5 1663 In remembraunce of hym and of his sorwe.
Tr 5 1664 And she hym leyde ayeyn hire feith to borwe
Tr 5 1665 To kepe it ay! But now ful wel he wiste,
Tr 5 1666 His lady nas no lenger on to triste.
Tr 5 1667 He goth hym hom and gan ful soone sende
Tr 5 1668 For Pandarus, and al this newe chaunce,
Tr 5 1669 And of this broche, he tolde hym word and ende,
Tr 5 1670 Compleynyng of hire hertes variaunce,
Tr 5 1671 His longe love, his trouthe, and his penaunce.
Tr 5 1672 And after deth, withouten wordes moore,
Tr 5 1673 Ful faste he cride, his reste hym to restore.
Tr 5 1674 Than spak he thus, " O lady myn, Criseyde,
Tr 5 1675 Where is youre feith, and where is youre biheste?
Tr 5 1676 Where is youre love? Where is youre trouthe? " he seyde.
Tr 5 1677 " Of Diomede have ye now al this feeste!
Tr 5 1678 Allas, I wolde han trowed atte leeste
Tr 5 1679 That syn ye nolde in trouthe to me stonde,
Tr 5 1680 That ye thus nolde han holden me in honde!
Tr 5 1681 " Who shal now trowe on any othes mo?
Tr 5 1682 Allas, I nevere wolde han wend, er this,
Tr 5 1683 That ye, Criseyde, koude han chaunged so;
Tr 5 1684 Ne, but I hadde agilt and don amys,
Tr 5 1685 So cruel wende I nought youre herte, ywis,
Tr 5 1686 To sle me thus! Allas, youre name of trouthe
Tr 5 1687 Is now fordon, and that is al my routhe.
Tr 5 1688 " Was ther non other broch yow liste lete
Tr 5 1689 To feffe with youre newe love, " quod he,
Tr 5 1690 " But thilke broch that I, with teris wete,
Tr 5 1691 Yow yaf as for a remembraunce of me?
Tr 5 1692 Non other cause, allas, ne hadde ye
Tr 5 1693 But for despit, and ek for that ye mente
Tr 5 1694 Al outrely to shewen youre entente.
Tr 5 1695 " Thorugh which I se that clene out of youre mynde
Tr 5 1696 Ye han me cast -- and I ne kan nor may,
Tr 5 1697 For al this world, withinne myn herte fynde
Tr 5 1698 To unloven yow a quarter of a day!
Tr 5 1699 In corsed tyme I born was, weilaway,
Tr 5 1700 That yow, that doon me al this wo endure,
Tr 5 1701 Yet love I best of any creature!
Tr 5 1702 " Now God, " quod he, " me sende yet the grace
Tr 5 1703 That I may meten with this Diomede!
Tr 5 1704 And trewely, if I have myght and space,
Tr 5 1705 Yet shal I make, I hope, his sydes blede.
Tr 5 1706 O God, " quod he, " that oughtest taken heede
Tr 5 1707 To fortheren trouthe, and wronges to punyce,
Tr 5 1708 Whi nyltow don a vengeaunce of this vice?
Tr 5 1709 " O Pandarus, that in dremes for to triste
Tr 5 1710 Me blamed hast, and wont art oft upbreyde,
Tr 5 1711 Now maistow sen thiself, if that the liste,
Tr 5 1712 How trewe is now thi nece, bright Criseyde!
Tr 5 1713 In sondry formes, God it woot, " he seyde,
Tr 5 1714 " The goddes shewen bothe joie and tene
Tr 5 1715 In slep, and by my drem it is now sene.
Tr 5 1716 " And certeynly, withouten moore speche,
Tr 5 1717 From hennesforth, as ferforth as I may,
Tr 5 1718 Myn owen deth in armes wol I seche;
Tr 5 1719 I recche nat how soone be the day!
Tr 5 1720 But trewely, Criseyde, swete may,
Tr 5 1721 Whom I have ay with al my myght yserved,
Tr 5 1722 That ye thus doon, I have it nat deserved. "
Tr 5 1723 This Pandarus, that al thise thynges herde,
Tr 5 1724 And wiste wel he seyde a soth of this,
Tr 5 1725 He nought a word ayeyn to hym answerde;
Tr 5 1726 For sory of his frendes sorwe he is,
Tr 5 1727 And shamed for his nece hath don amys,
Tr 5 1728 And stant, astoned of thise causes tweye,
Tr 5 1729 As stille as ston; a word ne kowde he seye.
Tr 5 1730 But at the laste thus he spak, and seyde:
Tr 5 1731 " My brother deer, I may do the namore.
Tr 5 1732 What sholde I seyen? I hate, ywys, Cryseyde;
Tr 5 1733 And, God woot, I wol hate hire evermore!
Tr 5 1734 And that thow me bisoughtest don of yoore,
Tr 5 1735 Havyng unto myn honour ne my reste
Tr 5 1736 Right no reward, I dide al that the leste.
Tr 5 1737 " If I dide aught that myghte liken the,
Tr 5 1738 It is me lief; and of this tresoun now,
Tr 5 1739 God woot that it a sorwe is unto me!
Tr 5 1740 And dredeles, for hertes ese of yow,
Tr 5 1741 Right fayn I wolde amende it, wiste I how.
Tr 5 1742 And fro this world, almyghty God I preye
Tr 5 1743 Delivere hire soon! I kan namore seye. "
Tr 5 1744 Gret was the sorwe and pleynte of Troilus,
Tr 5 1745 But forth hire cours Fortune ay gan to holde.
Tr 5 1746 Criseyde loveth the sone of Tideus,
Tr 5 1747 And Troilus moot wepe in cares colde.
Tr 5 1748 Swich is this world, whoso it kan byholde;
Tr 5 1749 In ech estat is litel hertes reste.
Tr 5 1750 God leve us for to take it for the beste!
Tr 5 1751 In many cruel bataille, out of drede,
Tr 5 1752 Of Troilus, this ilke noble knyght,
Tr 5 1753 As men may in thise olde bokes rede,
Tr 5 1754 Was seen his knyghthod and his grete myght;
Tr 5 1755 And dredeles, his ire, day and nyght,
Tr 5 1756 Ful cruwely the Grekis ay aboughte;
Tr 5 1757 And alwey moost this Diomede he soughte.
Tr 5 1758 And ofte tyme, I fynde that they mette
Tr 5 1759 With blody strokes and with wordes grete,
Tr 5 1760 Assayinge how hire speres weren whette;
Tr 5 1761 And, God it woot, with many a cruel hete
Tr 5 1762 Gan Troilus upon his helm to bete!
Tr 5 1763 But natheles, Fortune it naught ne wolde
Tr 5 1764 Of oothers hond that eyther deyen sholde.
Tr 5 1765 And if I hadde ytaken for to write
Tr 5 1766 The armes of this ilke worthi man,
Tr 5 1767 Than wolde ich of his batailles endite;
Tr 5 1768 But for that I to writen first bigan
Tr 5 1769 Of his love, I have seyd as I kan --
Tr 5 1770 His worthi dedes, whoso list hem heere,
Tr 5 1771 Rede Dares, he kan telle hem alle ifeere --
Tr 5 1772 Bysechyng every lady bright of hewe,
Tr 5 1773 And every gentil womman, what she be,
Tr 5 1774 That al be that Criseyde was untrewe,
Tr 5 1775 That for that gilt she be nat wroth with me.
Tr 5 1776 Ye may hire gilt in other bokes se;
Tr 5 1777 And gladlier I wol write, yif yow leste,
Tr 5 1778 Penolopees trouthe and good Alceste.
Tr 5 1779 N' y sey nat this al oonly for thise men,
Tr 5 1780 But moost for wommen that bitraised be
Tr 5 1781 Thorugh false folk -- God yeve hem sorwe, amen! --
Tr 5 1782 That with hire grete wit and subtilte
Tr 5 1783 Bytraise yow. And this commeveth me
Tr 5 1784 To speke, and in effect yow alle I preye,
Tr 5 1785 Beth war of men, and herkneth what I seye!
Tr 5 1786 Go, litel bok, go, litel myn tragedye,
Tr 5 1787 Ther God thi makere yet, er that he dye,
Tr 5 1788 So sende myght to make in som comedye!
Tr 5 1789 But litel book, no makyng thow n' envie,
Tr 5 1790 But subgit be to alle poesye;
Tr 5 1791 And kis the steppes where as thow seest pace
Tr 5 1792 Virgile, Ovide, Omer, Lucan, and Stace.
Tr 5 1793 And for ther is so gret diversite
Tr 5 1794 In Englissh and in writyng of oure tonge,
Tr 5 1795 So prey I God that non myswrite the,
Tr 5 1796 Ne the mysmetre for defaute of tonge;
Tr 5 1797 And red wherso thow be, or elles songe,
Tr 5 1798 That thow be understonde, God I biseche!
Tr 5 1799 But yet to purpos of my rather speche:
Tr 5 1800 The wrath, as I bigan yow for to seye,
Tr 5 1801 Of Troilus the Grekis boughten deere,
Tr 5 1802 For thousandes his hondes maden deye,
Tr 5 1803 As he that was withouten any peere,
Tr 5 1804 Save Ector, in his tyme, as I kan heere.
Tr 5 1805 But -- weilawey, save only Goddes wille,
Tr 5 1806 Despitously hym slough the fierse Achille.
Tr 5 1807 And whan that he was slayn in this manere,
Tr 5 1808 His lighte goost ful blisfully is went
Tr 5 1809 Up to the holughnesse of the eighthe spere,
Tr 5 1810 In convers letyng everich element;
Tr 5 1811 And ther he saugh with ful avysement
Tr 5 1812 The erratik sterres, herkenyng armonye
Tr 5 1813 With sownes ful of hevenyssh melodie.
Tr 5 1814 And down from thennes faste he gan avyse
Tr 5 1815 This litel spot of erthe that with the se
Tr 5 1816 Embraced is, and fully gan despise
Tr 5 1817 This wrecched world, and held al vanite
Tr 5 1818 To respect of the pleyn felicite
Tr 5 1819 That is in hevene above; and at the laste,
Tr 5 1820 Ther he was slayn his lokyng down he caste,
Tr 5 1821 And in hymself he lough right at the wo
Tr 5 1822 Of hem that wepten for his deth so faste,
Tr 5 1823 And dampned al oure werk that foloweth so
Tr 5 1824 The blynde lust, the which that may nat laste,
Tr 5 1825 And sholden al oure herte on heven caste;
Tr 5 1826 And forth he wente, shortly for to telle,
Tr 5 1827 Ther as Mercurye sorted hym to dwelle.
Tr 5 1828 Swich fyn hath, lo, this Troilus for love!
Tr 5 1829 Swich fyn hath al his grete worthynesse!
Tr 5 1830 Swich fyn hath his estat real above!
Tr 5 1831 Swich fyn his lust, swich fyn hath his noblesse!
Tr 5 1832 Swych fyn hath false worldes brotelnesse!
Tr 5 1833 And thus bigan his lovyng of Criseyde,
Tr 5 1834 As I have told, and in this wise he deyde.
Tr 5 1835 O yonge, fresshe folkes, he or she,
Tr 5 1836 In which that love up groweth with youre age,
Tr 5 1837 Repeyreth hom fro worldly vanyte,
Tr 5 1838 And of youre herte up casteth the visage
Tr 5 1839 To thilke God that after his ymage
Tr 5 1840 Yow made, and thynketh al nys but a faire,
Tr 5 1841 This world that passeth soone as floures faire.
Tr 5 1842 And loveth hym the which that right for love
Tr 5 1843 Upon a crois, oure soules for to beye,
Tr 5 1844 First starf, and roos, and sit in hevene above;
Tr 5 1845 For he nyl falsen no wight, dar I seye,
Tr 5 1846 That wol his herte al holly on hym leye.
Tr 5 1847 And syn he best to love is, and most meke,
Tr 5 1848 What nedeth feynede loves for to seke?
Tr 5 1849 Lo here, of payens corsed olde rites!
Tr 5 1850 Lo here, what alle hire goddes may availle!
Tr 5 1851 Lo here, thise wrecched worldes appetites!
Tr 5 1852 Lo here, the fyn and guerdoun for travaille
Tr 5 1853 Of Jove, Appollo, of Mars, of swich rascaille!
Tr 5 1854 Lo here, the forme of olde clerkis speche
Tr 5 1855 In poetrie, if ye hire bokes seche.
Tr 5 1856 O moral Gower, this book I directe
Tr 5 1857 To the and to the, philosophical Strode,
Tr 5 1858 To vouchen sauf, ther nede is, to correcte,
Tr 5 1859 Of youre benignites and zeles goode.
Tr 5 1860 And to that sothfast Crist, that starf on rode,
Tr 5 1861 With al myn herte of mercy evere I preye,
Tr 5 1862 And to the Lord right thus I speke and seye:
Tr 5 1863 Thow oon, and two, and thre, eterne on lyve,
Tr 5 1864 That regnest ay in thre, and two, and oon,
Tr 5 1865 Uncircumscript, and al maist circumscrive,
Tr 5 1866 Us from visible and invisible foon
Tr 5 1867 Defende, and to thy mercy, everichon,
Tr 5 1868 So make us, Jesus, for thi mercy, digne,
Tr 5 1869 For love of mayde and moder thyn benigne.
Tr 5 1870 Amen.

Made with Concordance